ခါန် 12
ဂေ ဒူအီ ကိူန် အီ ဟဲ့ ဟွတ့် ယမ် တီ၊ ဂေ ပီ န့အု တာင် အီ ဟဲ့ ရူပ် အေ ဒွန် ဘ့လာက်။ ဂေ ဟဲ့ ခမ် ဘဲန် မျုဝ် ဘဲန် မျုဝ် ကူပ် ညှိုမ် ဂေ။ ကူပ် န့ ပါယ် တီ၊ တဲး အေ ဝဲန် ဒွန် မျုဝ် အီ နပ် ဒီ ဘူင် တဲး အေ ဒီလှး တူ မိုဝ်း ပ့လူမ်။ တဲး အေ ဝဲန် ဘော မှာပ် အီ ငှိုယ် ဒိုက် ဒီ အေ။ တဲး အေ ဘူင် ပီ ဒူအီ အီ ကာခဲန့် ကာဘ့လဲပ်။ တဲး အေ ဂျုဝ်ဂျာ ဘော ရိန် ဒီ ဘူင် တဲး အေ ဇမ် ဒူင် ဒီ လုဝ် ဇမ်။ 2 တဲး အေ ယွတ် ပီ ပါယ် ဇဝ် ယေဆူ အီ ဟဲ့ တဲး အေ ညှိုမ်။ အန် ဒီ ဘော စွယ် အေ၊ တဲး အေ ညှိုမ် ဆီချာ၊ တဲး ကော တူတ့် အာဆာက် အေ။ အန် ဇဝ် မိူဝ် တူ ယုဝ် ဒီ ခမ် ဒီ ယမ် ဒဲင် ရွင့် ကာဝဲ့။ ခုဝ်၊ အန် ဟဲ့ နပ်၊ ဝါယ် အန် တီ န့ ဒီ ဘျုဝ် ဒါခိုယ် ကာဆဝ်။ အန် ဇဝ် မိူဝ် တူ ယုဝ် ဒီ မွှိုမ် ဆာယ် ဒေါ ခမ် အန် ဒီ ယမ် ဒဲင် ရွင့် ကာဝဲ့။ ဟဲ့ ဟွတ့်၊ အန် ဟဲ့ ဝီ ဟုဝ့် ကွယ် ဘ့လာက် အာအး ဇဝ်ဖြာ။ 3 ကွဲ့ တဲး ဘေ ဒီလှး။ ကွဲ့ တဲး နဝ်း ဘေ လိုဝ်။ တဲး ဘေ လှုဝ်း ခဲ့ ခမ် ဇဝ် ယေဆူ ဒီ ဒူအီ အီ မိုဝ်း မှာပ်၊ ဒေါ ဖျာက် ဂေ ဒီ အန်။
4 အီ မုး ဘေ၊ ဘေ ညှမ် ဒွိုမ် ယိုဝ် ဂေ ဒူအီ အီ ဘူင် မှာပ် ဟဲ့ ရူ ကာဆဝ် ဒီ ဘေ ကော ဆီ ငဝ်း ယမ် ဘေ။ 5 ဘေ မိူဝ် ဟဲ့ ပိဝ် ဂြုဝ်း ပီ ကာလာင် ဇဝ်ဖြာ ဒီ ဘေ။ အန် ဇဝ် ဟဲ့ ကာလာင် ဒီ ဘေ ပီ အန် ကာလာင် ဒီ ဂွန် အန်။ အန် ဟဲ့ တဝ်း၊ “အိုယ် ဂွန် ကာညူမ် အုဝ်၊ မဲ ကွဲ့ လုက်တာယ် ဂြုဝ်း ပီ မာနုဝ် ဇဝ်ဖြာ ဒီ မဲ။ ကွဲ့ တဲး နဝ်း မဲ ဘ့လိူင် ဆေ န့ ပီ ဇဝ်ဖြာ ဟဲ့ ဆီဘျြီ့ မဲ။ 6 ခုဝ်၊ ဇဝ်ဖြာ ဘော မာနုဝ် ဂေ ဒူအီ ပီ ရွက့် အန်။ အန် ဘော ဒမ် မှာပ် ဒီ ဒူအီ ပဲ့ ဟဲ့ ရွုး အန်၊ တဲး ဂေ ဘဲန် ဂွန် အန်။”
7 တဲး ဘေ ခမ် ပီ မာနုဝ် ဇဝ်ဖြာ တီ။ ခုဝ်၊ ဇဝ်ဖြာ ဟဲ့ ဘူင် ဒီ ဘေ ပီ ပီ ဘူင် အန် ဒီ ဂွန် အန်။ ဂွန် ပီ တူ လုဝ် ဂုန့် မာ မာနုဝ်၊ န့ မိူဝ် တူ မိုဝ်း ခေါ အူ ဝီ။ 8 ဆေ ဘေ ယီ တူ ခမ် ပီ မာနုဝ် ဂုန့် ဘေ၊ ဘေ တူ မုး ဂွန် အာရာင် အန်။ ဘေ မုး ဂွန် ကာတဲ ဂ့လ။ ဒွန် အီ လုဝ် ခမ် ပီ မာနုဝ် အီ ဟဝ်။ 9 ဒဲင် တီ၊ အေ ဒွန် အီ၊ အေ ဟဲ့ မိုဝ်း ဂုန့်။ ဂုန့် အေ တီ ဟဲ့ မာနုဝ် အေ။ အေ မိူဝ် ရုဝ်ဆေ ဂေ။ အီ မုး ဇဝ်ဖြာ၊ ဆေ အေ ဂူမ် အန်၊ အေ ဒီ မိုဝ်း အာဆာက် အီ တူ လုဝ် ယမ်။ ခုဝ်၊ န့ ဟဲ့ ဝဲ ကာအာပ် အေ ဂူမ် အေ ရုဝ်ဆေ အန် ဇဝ် အီ မုး ဂုန့် အေ။ 10 ဂုန့် အေ အီ ကွယ် ဒဲင် ကာဒါယ် နီ၊ ဂေ ဟဲ့ မာနုဝ် နာ ဘွတ် နာ မွှိုမ် ဒီ အေ အာဒါ အူ ကာစန်၊ တဲး န့ ဒူပ် ပီ ထာင် ဂေ။ မာလဲ၊ အီ မုး ဇဝ်ဖြာ၊ အန် မာနုဝ် အေ၊ တဲး န့ ဘဲန် အာဂျိုဝ် ဒီ အေ၊ တဲး အေ ဘဲန် ဒူအီ အီ ဆီငါ ဘွတ် ပီ ဇဝ်ဖြာ ဟဲ့ ဆီငါ ဘွတ်။ 11 ဒေါ ခမ် အေ ဒုက် ဘော ဒေါ မာနုဝ် အီ ဒီ အေ၊ န့ တူ ဒါခိုယ် ဒီ နဝ်း အေ။ မာလဲ၊ ဝါယ် အန် တီ ဒူအီ အီ ဟဲ့ ခမ် ပီ မာနုဝ် တီ၊ ဂေ ဒီ ဝီ ယိုဝ် အာဂျိုဝ် အန်။ ဂေ ဒီ မိုဝ်း နဝ်း ဆိူဝ် နဝ်း မှာန် ဘော နဝ်း ဂျီတ် ယေန်။
12 ခုဝ် အန် တီ ကွဲ့ တဲး ဘေ မိုဝ်း နဝ်း တျီ့၊ တဲး ဘေ ဝီ မိုဝ်း ပ့လူမ် မိုဝ်း ဟဲန့်။ 13 တဲး န့ ပီ ဘေ ဟာဝ် ဆိူဝ် ဒူပ် န့တေန့် အီ မွှိုမ်။ ကွဲ့ တဲး ပ့လဝ် ဘေ ဟာဝ် ဂဲ့။ တဲး ဇဝ်ဖြာ ပီကဲန် ဘေ၊ တဲး ဘေ ပွိုန် ဒီ ဟာဝ် ဆီချာ။
14 တဲး ဘေ ဂျုဝ်ဂျာ ဒီ လာယ် ကာလဝ့် ဒီ အီ ဟဝ် ဒွန် အီ။ ဂျုဝ်ဂျာ ဘော တဲး ဘေ ဘဲန် ဒူအီ အီ ဆီငါ ဘွတ်။ ခုဝ်၊ ဆေ ဒူအီ တူ ကာပ့လု နဝ်း ဘော တူ ဘဲန် ဒူအီ အီ ဆီငါ ဘွတ်၊ အာဝ် မိုဝ်း အာဆေ အီ ဒီ ပွိုန် ယိုဝ် ဇဝ်ဖြာ။ 15 တဲး ဘေ ဆာဒိက်၊ ကွဲ့ တဲး န့ မိုဝ်း အာဆေ အီ လုတ် ပီ ဂေဇူ ဇဝ်ဖြာ။ ကွဲ့ တဲး န့ မိုဝ်း အာဆေ အီ ပီ ဒဝ် ဆွင့် အီ ဝီ န့လုဝ်း၊ တဲး န့ ဘဲန် ဒုက် ဒီ အီ။ ကွဲ့ တဲး ဒူအီ ကိူန် ဘဲန် နဝ်း ကာဒါတ့် ကူပ် ပီ ပျာတ့် ဒူအီ အီ ပီ ဒဝ် ဆွင့် တီ။ 16 တဲး ဘေ ဆာဒိက်၊ ကွဲ့ တဲး န့ မိုဝ်း ဒူအီ အီ လာယ် လုတ့် လာယ် လာယ်။ ကွဲ့ တဲး န့ မိုဝ်း အာဆေ အီ တူ ရုဝ်ဆေ ဂြုဝ်း ဇဝ်ဖြာ ပီ အာဆုဝ် တွိုန်။ အန် ဟဲ့ ဒွိုမ် ယွင့် ဒီ ဟူမ် တူတ့် ဒွန် မျုဝ် ပီ ဒီ ပွိုန် အန် ကူပ် မုး အန် ဂွန် ဂိန့်။ အာဒါ ပီ ဒီ ဟူမ် အူ မ့ပြာ အန် ဟဲ့ ကာရဝ်း ရုး အန် တီ။ 17 ဘေ ယီ ဟဲ့ နပ်၊ ဝါယ် အန် တီ ဒေါ ဝီ ဆီ ပွိုန် ဝိဝ် အန် ပီ မွင့်ကာရာ ဒွါ ဂုန့် အန်၊ အန် ဟူ ပွိုန် မာဆေ။ ပဲ့ ဟဲ့ ဝဲန် အန် ခါ အာတ့် အန် ပီ ဘော ဝီ ဂျုဝ်ဂျာ ဒီ ဒိုဝ်း ဝိဝ် မိူဝ်၊ အန် အာဝ် ဟူ ပွိုန် ဝိဝ် ဒေါ မှဝ်။ အန် ပီ ဘော ယာမ် တာင် မိူဝ်၊ အန် ယီ တူ ပွိုန် ဝီ ကာဝိဝ် ပဲ့ ဟဲ့ ဟွတ့် ဘူင် အန် တီ။
18 ဘေ မိူဝ် တူ ဒွိုမ် ဟာဝ် ကြိုပ် ဇဝ်ဖြာ ဒီ နွန် ဆီနာယ် တွိုန် ပီ ဂေ ဒူအီ ဒေါ မွိုန်။ ဘေ တူ ပွိုန် ကြိုပ် ဒီ နွန် အီ ဟဲ့ ပွိုန် ဒိုဝ် ပွိုန် ပါ တီ၊ အီ မိုဝ်း ငဝ် အီ ကုး တာင်၊ အီ အပ် ဝွင့် ဘော မိုဝ်း ဟမ် ခုန် လာင် အီ ပီ ဟမ် ဘုတ် နိုင် ပဲ။ 19 ဘေ မိူဝ် တူ ယိုဝ် ဂြုဝ်း ဇဝ်ဖြာ။ ဒေါ ယိုဝ် ဂေ ဒူအီ ဒေါ မွိုန် ဂြုဝ်း ဇဝ်ဖြာ တီ၊ ဂေ ဘော မှာန့်၊ ကွဲ့ တဲး ဂေ ယိုဝ် ပေါ အူ ဇေန့်။ 20 ဂေ မှာန့် ပါယ် တီ ခုဝ်၊ ဂေ တူ ခမ် အာမိင် ပီ ဒမ် အုန် ဇဝ်ဖြာ အီ တဝ်း၊ “ဘော မုး ဒူအီ၊ ဘော မုး ဒုဝ် ဆတ်ဒါဝါ၊ အာဆေ ဟီ တး ဒိုဝ် နွန် နီ၊ ဘေ လုဝ် ဒိုဝ်း မာဝ် ဝိုန့်၊ တဲး အန် ယမ်။” 21 ပဲ့ ဟဲ့ ယိုဝ် ဂေ တီ၊ န့ မွှိုမ် ယုဝ် ကာဆဝ်။ ဘော အာမုဝ်ဆဲ ဟဲ့ ကာဒုး ဒီ တဝ်း၊ “အုဝ် ဟဲ့ ယုဝ် ကာဆဝ်၊ ဟဲ့ ဒီယေန့် ဒီယုဝ်။”
22 အီ မုး ဘေ၊ ဘေ တူ ကြိုပ် ဇဝ်ဖြာ ပီ ဂေ ဒူအီ အီဆာရေလ တီ။ န့ ပီ ဘေ ဟဲ့ တး ကြိုပ် ဒီ နွန် ဇီအူန်၊ အီ မုး မိူင် ဒူင် ကွယ် ဇဝ်ဖြာ အီ အိမ် ဆေဆေ။ ဒူင် တီ၊ န့ ဘော ပီ မိူင် ယေရူဆာလဲမ်။ န့ ယီ ကွယ် ခဲင် ဂါင်ဟြာဝ်။ ဒေါ တး ကြိုပ် ဘေ ဇဝ်ဖြာ ဒူင် တီ၊ န့ ဘော မိုဝ်း ဂေ အာမူ အာမာတ် ဇဝ်ဖြာ ဘဲန် မှိုန့် ဘဲန် ဆဲန်၊ ဘူင် ဘ့လွယ် အီ ဒါခိုယ် ကာဆဝ်။ 23 ဒူင် တီ၊ န့ ဘော မုး ဒူင် ကွယ် ကာဇု ကာဒိုမ် ဂေ ဂွန် ဇဝ်ဖြာ အီ မုး ဂွန် ဂိန့်၊ အီ ဟဲ့ ဟွတ့် မိုဝ်း စိူဝ် ခဲင် ဇာရာင် အီ ကွယ် ဂါင်ဟြာဝ်။ န့ မုး ဘော ဒူင် ကွယ် ဇဝ်ဖြာ အီ ဒီ ဆုင်ဖျာတ် အာမူ ဒူအီ ဘောကာဂ့လျီတ်။ ဘော နဝ်း ဖွိုမ် ဂေ ဒူအီ အီ မိုဝ်း နဝ်း ဆိူဝ် နဝ်း မှာန်၊ အီ ဟဲ့ ဇေ့ဇုင်၊ ဂေ ကွယ် ဒီ တီ။ 24 ဒူင် ဒီ တး ကြိုပ် ဘေ တီ၊ န့ မုး ဘော ဒူင် ကွယ် ဇဝ် ယေဆူ။ ကူပ် ညှိုမ် ဘိုင် ဘေ ဇဝ် ယေဆူ တီ၊ ဘေ ဒီ ပွိုန် ပီ ကာဆဲန့် ဇဝ်ဖြာ အီ ကာမာယ်။ နှာမ် ဇဝ် ယေဆူ ပဲ့ ဟဲ့ ခြဝ်း ဂေ ဒီ တီ၊ န့ ဟဲ့ မွှိုမ် လွှိုမ် နှာမ် အာဘဲ တွိုန်။ ဘေ ဟဲ့ တး ကြိုပ် ဇဝ်ဖြာ ဒူင် ကွယ် မျုဝ် တီ ဒွန် မျုဝ်။
25 ပါယ် တီ၊ တဲး ဘေ ဆာဒိက်၊ ကွဲ့ တဲး ဘေ ဝဲန် ဂြုဝ်း ပီ ကာလာင် ဇဝ်ဖြာ။ ဂေ ဒူအီ ဒေါ မွိုန် တူ ထူမ် ဂြုဝ်း ဇဝ်ဖြာ ဒေါ ကွယ် ဂေ ဒဲင် ကာဒါယ်။ ခုဝ်၊ ဂေ တူ လွတ်၊ ဂေ လုဝ် ခမ် မှာပ် ဂေ။ အီ မုး အေ၊ အေ ဟဲ့ ပွိုန် ဒီ ထူမ် ဂြုဝ်း ဇဝ်ဖြာ အီ လေး ခဲင် ဂါင်ဟြာဝ်။ ဆေ အေ ယီ ဝဲန် ဂြုဝ်း တီ၊ အေ ဟဲ့ ဝဲ တူ ပွိုန် ဒီ လွတ်။ အေ ဒီ လုဝ် ခမ် မှာပ် အေ လွှိုမ် ဒူအီ ဒေါ မွိုန်။ 26 ဒေါ မွိုန် တီ ဂြုဝ်း ပီ ကာလာင် ဇဝ်ဖြာ ဟဲ့ တဲး ကာဒါယ် ဒီယုး ဒီယေန့်။ ဒေါ တီ နီ၊ အန် ဇဝ် ယီ ဟဲ့ ဝီ ကာဆဲန့် တဝ်း၊ “ပီ ဒီ ဝီ ဘူင် အုဝ် ပေါ အူ ဇေန့်၊ အာဝ် ဝန် မီ ကာဒါယ် ဒီ ဒီယုး ဒီယေန့်၊ အုဝ် ဒီ ဒီယုး ဘော ကာဒါယ် ဘော ဂါင်ဟြာဝ် တဲး န့ ဒီယေန့်။” 27 ဒေါ တဝ်း ဇဝ်ဖြာ၊ “အုဝ် ဒီ ဝီ ဘူင် ပေါ အူ ဇေန့် တီ၊” န့ ပီ အန် တဝ်း၊ အာမျုဝ် အီ ကွယ် ဒဲင် ကာဒါယ် အီ နပ် ဒီ ဒီယုး ဒီယေန့်၊ အန် ဒီ ဒိုဝ်း ဝဲန် တူတ့် ဒွန် မျုဝ်။ အန် ဒီ ဝီ တဲး န့ မိုဝ်း မီ အာမျုဝ် အီ တူ နပ် ဒီ ဒီယုး ဒီယေန့်။