ဆေ အေ ညှိုမ်၊ အေ မိူဝ် နပ် ဆီချာ၊ ပီ နှဝ့် န့ဒဝ့် အေ ဟဲ့ မုး ဟဲ့ မှာန်။ အေ ဘော နပ် ဆီချာ၊ ပီ တူ ယိုဝ် အေ ဟဲ့ မိုဝ်း အာခ်ု မှာန်။ 2 ဂေ ဒူအီ ဘာန် ဒေါ မွိုန် ဟဲ့ ညှိုမ် ပါယ် တီ။ ခုဝ်၊ ဇဝ်ဖြာ မိူဝ် ဟဲ့ အိူပ် မျုက် ဂေ။

3 ကူပ် ညှိုမ် အေ၊ အေ ဟဲ့ နပ်၊ ဇဝ်ဖြာ ဟဲ့ ကာလာင် တဲး န့ မိုဝ်း ဘ့လေန့် ဂေ ကာဒါယ်။ ဒေါ ဖာန် ဘ့လေး အန် ဇဝ် ဘဲန် မျုဝ် ဘဲန် မျုဝ်၊ အန် ဟဲ့ ဒိုဝ်း မျုဝ် အီ တူ ပွိုန် ယိုဝ်၊ ဘူင် တဲး န့ ဝီ ဘဲန် မျုဝ် အီ ဟဲ့ ပွိုန် ယိုဝ်။

4 ကူပ် ညှိုမ် အာဘဲ တွိုန်၊ အန် မိူဝ် လှူ အီ မွှိုမ် လွှိုမ် ပီ လှူ အာကန့် တွိုန်။ ကူပ် ညှိုမ် အန် ပါယ် တီ၊ ဇဝ်ဖြာ မိူဝ် တဝ်း၊ အန် မုး ဒူအီ အီ မိုဝ်း နဝ်း ဆိူဝ် နဝ်း မှာန်။ ဇဝ်ဖြာ မိူဝ် ဟဲ့ ကာလာင် ပါယ် တီ ကူပ် ယိုဝ် အန် ပီ လှူ အာဘဲ တီ။ ကူပ် ညှိုမ် အာဘဲ တီ၊ အန် ပီ ဘော ဟဲ့ ဟွတ့် ယမ် မိူဝ်၊ ပဲ့ ဟဲ့ ဘူင် အန်၊ န့ ယီ မာနုဝ် အေ ဇမ် ဒေါ တီ နီ။

5 ကူပ် ညှိုမ် အာဟေန် တွိုန်၊ အန် မိူဝ် တူ လုဝ် ယမ်။ ဇဝ်ဖြာ ဟဲ့ ဒိုဝ်း ဟုဝ့် အန် ဒူင် ကွယ် ဇဝ်ဖြာ။ အာဝ် ဟူ မိုဝ်း အာဆေ အီ ဝီ ယိုဝ် အန်။ ခုဝ်၊ ဇဝ်ဖြာ ဟဲ့ ဟွတ့် ဒိုဝ်း အန်။ အာတ့် ဒိုဝ်း ဟုဝ့် ဇဝ်ဖြာ ဒီ အန်၊ န့ မိုဝ်း အီ ကာလာင် လွင် အန် တဝ်း၊ အန် မုး ဒူအီ အီ လဝ့် နဝ်း ဇဝ်ဖြာ။ 6 ဆေ အေ ယီ တူ ညှိုမ်၊ ဇဝ်ဖြာ မိူဝ် တူ အိုင်။ အာဝ် လဝ့် နဝ်း ဇဝ်ဖြာ။ ခုဝ်၊ အာဆေ တး ကြိုပ် ဇဝ်ဖြာ၊ အန် လုဝ် ညှိုမ်၊ ဟဲ့ မိုဝ်း ဇဝ်ဖြာ။ အန် ဘော လုဝ် ညှိုမ်၊ အန် ဇဝ် ဒီ ဒွါ အာဂျိုဝ် ဒီ ဂေ ဒွန် အီ အီ ဆီ နပ် အန်။

7 ကူပ် ညှိုမ် အာနုဝ် တွိုန်၊ ဇဝ်ဖြာ မိူဝ် ကာလာင် တဲး အန် နပ် အီ ဒီ ပါယ် နာ အာတ့် ဟာဝ် ပီ ညှမ် ပွိုန် ယိုဝ်။ အန် ဘော ထူမ် ဂြုဝ်း ပီ ကာလာင် ဇဝ်ဖြာ တီ ဘော ဘူင် ရိုဝ် ဆင်ဖုဝ် တာင်၊ တဲး န့ ချွတ် ဘော အန် ဘော ဒူအီ ခဲင် န့ဟူမ် အန်။ အီ မုး ဂေ ဒူအီ ဟဝ်၊ ဂေ ဘောကာဂ့လျီတ် ယီ လုဝ် ခမ် မှာပ် ဂေ။ အာနုဝ် ယီ ဟဲ့ ပွိုန် နဝ်း ဆိူဝ် နဝ်း မှာန် ပီ ဒွါ ဇဝ်ဖြာ ကူပ် ညှိုမ် အန်။

8 ကူပ် ညှိုမ် ဒါ အာဘြာဟမ် တွိုန်၊ အန် မိူဝ် ထူမ် ဂြုဝ်း ဇဝ်ဖြာ ဒေါ တဝ်း ဇဝ်ဖြာ ဒီ အန်၊ တဲး အန် ဟာဝ် ဒီ မိူင် ပီ ဒီ ဒွါ ဇဝ်ဖြာ ဒီ အန်၊ တဲး န့ ဘဲန် မိူင် အန်။ အန် ပီ ဘော တူ နပ် နာ ဒီ ဟာဝ်၊ အန် ယီ လေး ဟာဝ် ဒူင် ကွယ် ဘြိမ် အန်။ 9 ကူပ် ညှိုမ် အန်၊ အန် ပွိုန် ဒီ ကွယ် ခဲင် မိူင် အီ ဟဝ် ပီ ခဲတ့်။ န့ မုး မိူင် ပဲ့ ဟဲ့ တဝ်း ဇဝ်ဖြာ ဒီ ဒွါ ဒီ အန်။ အန် ဘော ကွယ် ခဲင် ထိုပ် ဘိက်။ ဘော အာဆဲက် ဘော အာကူပ် ကွယ် ပါယ် တီ။ ခုဝ်၊ ကာဒိက် ဆတ်ဇာ ပဲ့ ဟဲ့ ဒွါ ဇဝ်ဖြာ ဒီ အာဘြာဟမ်၊ အန် ဟဲ့ ဒွါ ဘော ဒီ ဂါယ်။ 10 အာဘြာဟမ် ဟဲ့ ကွယ် ပါယ် တီ ခုဝ်၊ အန် နှဝ့် န့ဒဝ့် ဘော ဘ်ု ဒီ လိုပ် ခဲင် မိူင် ပဲ့ ဟဲ့ ဒဲ ဇဝ်ဖြာ၊ အီ ကွယ် ဆေဆေ။

11 ကူပ် ညှိုမ် အာဘြာဟမ်၊ အန် ပီ ဘော ဟဲ့ ကတ်၊ အန် ယီ ဟဲ့ ပွိုန် ဂွန်။ ဘော အီဘိုန့် အန် အီ မုး နာင် ဆာရာယ် အီ ဟဲ့ မှန်၊ အန် ယီ ဝီ ပွိုန် ဒီ ဒဲ ဘာဒိက် ဆန်ထေ ဒေါ ဟဲ့ ကတ် ကာဆဝ် အန်။ အာဘြာဟမ် ဟဲ့ နပ်၊ ဇဝ်ဖြာ ဒီ ဘူင် ဒူပ် ကာဒိက် ဆတ်ဇာ ပဲ့ ဟဲ့ ဒွိုမ် ဒွါ အန်။ 12 အာဘြာဟမ် တီ၊ အန် ပီ ဘော နှဲန် ဒူအီ အီ ဟဲ့ ဟွတ့် ယမ် မိူဝ်၊ အန် ယီ ဘဲန် ဂုန့် ဒင် ဂေ ဒူအီ ကိူန် ကာဆဝ်။ လှုက်လှာန် အန် မိူဝ် ကိူန် ကော ပီ ဆီမန့် အီ ကွယ် ခဲင် ဘ့လေန့်။ ဂေ ဘော ကိူန် ပီ ကာဟာတ့် အီ ကွယ် ခူပ် အိုမ် နမ်မုက်ဆာရာ ကော ဟူ နပ် ဒီ တိး။

13 ဒူအီ ဂေ တီ၊ ဒေါ ယမ် ဂေ၊ ဂေ ဘောကာဂ့လျီတ် ညှမ် ပွိုန် တူတ့် ခဲ့ ပီ တဝ်း ဇဝ်ဖြာ ဒီ ဒွါ။ ဂေ ယီ ညှိုမ် ဘိုင် ဇဝ်ဖြာ ဆေဆေ။ ဂေ ပီ ဆ ပွိုန် ပဲ့ ဟဲ့ ကာလာင် ဇဝ်ဖြာ ဒီ ဒွါ၊ န့ ယီ ပီ ဂေ ဟဲ့ ပွိုန် ယိုဝ်၊ ယီ ဆီ ကွယ် ကာတူင့်။ ဂေ ဘော ဘ်ု ဒီ ရပ်။ ဂေ မိူဝ် ဟဲ့ နပ် ဆီချာ၊ ဂေ ပီ ခဲတ့် ဒေါ ကွယ် ဂေ ဒဲင် ကာဒါယ် နီ။ 14 ဒူအီ အီ ဟဲ့ ဘ့လေး နဝ်း ဂေ ပါယ် တီ၊ န့ လိုဝ်း ဆီချာ၊ ဂေ ဟြေတ့် မိူင် ပေါ အူ မျုဝ်၊ ဒူင် ပွိုန် ကွယ် ဂေ ဆေဆေ။ 15 ဆေ ဂေ ယီ ဝီ လှုဝ်း မိူင် ဘြိမ် အီ မုး ဒူင် ဒွိုမ် လေး တး ဂေ၊ ဂေ ဟဲ့ ပွိုန် ဝီ ဝေန့်။ 16 မာလဲ၊ ဂေ ယီ နှဝ့် န့ဒဝ့် မိူင် အီ မွှိုမ် လွှိုမ် တီ၊ အီ မုး မိူင် ဂါင်ဟြာဝ်။ ခုဝ်၊ ဇဝ်ဖြာ မိူဝ် တူ ဆာယ် ဒေါ တဝ်း ဂေ၊ ဇဝ်ဖြာ မုး ဇဝ်ဖြာ ပီ ကြိုပ် ဂေ။ အန် မိူဝ် ဟဲ့ ရဲန် အုန် မိူင် အူ မိူင် အာဒါ ဂေ။

17 ကူပ် ညှိုမ် အာဘြာဟမ် တွိုန်၊ အန် ဘော ခမ် ဒီ လှူ ဂွန် အန် အီ စိူဝ် အာဆဲက်၊ တဲး န့ ပီ အီ လှူ ဒုဝ် ဆတ်။ ပါယ် တီ ဇဝ်ဖြာ ဟဲ့ တဝ်း ဒီ ထေဝ် နဝ်း အာဘြာဟမ်။ အန် ပီ ဘော ဟဲ့ ပွိုန် ကာဒိက် ဆတ်ဇာ ပီ ဒွါ ဇဝ်ဖြာ လွင် ဂွန် အန်၊ အန် ယီ ခမ် ဒီ လှူ ဂွန် ဝီ တီ။ 18 ဘူင့် မှာန် အန်၊ ဇဝ်ဖြာ ဟဲ့ ဟွတ့် ကာလာင် အုန် ဒီ အန် တဝ်း၊ “ကူပ် အာဆဲက် တီ၊ မဲ ဒီ မိုဝ်း လှုက်လှာန် ကိူန်။” 19 အာဘြာဟမ် ဟဲ့ ဟွတ့် နပ်၊ ဇဝ်ဖြာ ဟဲ့ မိုဝ်း ပွုန် ဒီ တဲး အာဆဲက် ဝီ အိမ် ဝါယ် ဟဲ့ ဟွတ့် ယမ် အန်။ ခုဝ်၊ အန် မိူဝ် ထူမ် ဂြုဝ်း ဇဝ်ဖြာ၊ တဝ်း ဒီ ငဝ်း လှူ အာဆဲက်။ ဝါယ် အန် တီ န့ ဘော ပီ၊ ဇဝ်ဖြာ ဟဲ့ ဝီ ဒွါ အာဆဲက် ဒီ အာဘြာဟမ် ဝါယ် ဟဲ့ ဟွတ့် ယမ် အန်။

20 အာဆဲက် တီ၊ ကူပ် ညှိုမ် အန်၊ အန် မိူဝ် မွင့်ကာရာ ဒွါ ဒီ အာကူပ် ဂါယ် အာဆုဝ်၊ တဲး ဂါယ် နပ် အီ ဒီ ပါယ် နာ အာတ့် ဟာဝ်။

21 ကူပ် ညှိုမ် အာကူပ် တွိုန်၊ အန် ဝီ မွင့်ကာရာ ဒွါ ဒီ ဂွန် အာယုဝ် အာ ဝီ တွိုန် ဒေါ ဟဲ့ ကာတတ် အန် ဒီ ယမ်။ ဒေါ အန် တီ အန် ဘော ဂိုပ် ဒီ န့ကြွုန် အန်၊ ဝီ ကြိုပ် ဇဝ်ဖြာ။

22 ကူပ် ညှိုမ် အာယုဝ်၊ အာတ့် ယမ် အန်၊ အန် ဟဲ့ ကာလာင် အုန် လွင် ဂေ ဒူအီ အီဆာရေလ ဒီ လေး ခဲင် မိူင် အဲဂိုပ်။ အန် ဘော ဒမ် ဂေ၊ တဲး ဂေ ဒိုဝ်း ဟာဝ် ဘော ကာအာင် အန်။

23 ကူပ် ညှိုမ် ဂုန့် မာ အာမုဝ်ဆဲ တွိုန်၊ ဒေါ ဂွိုတ် အာမုဝ်ဆဲ၊ ဂါယ် ဟဲ့ ဒိုဝ်း ချြီင် အန် အာဒါ အူယ် မာဂျီန်။ ကူပ် ဟဲ့ ယိုဝ် ဂါယ်၊ အာရိုပ် ဂွန် ဂါယ် တီ ဟဲ့ စှိတ်၊ ဂါယ် မိူဝ် အာဝ် ဟူ ယုဝ် အာမိင် ပီ ဒမ် အုန် ခုန်ဒီခမ် ဖာရုဝ် တွိုန်။

24 ကူပ် ညှိုမ် အာမုဝ်ဆဲ၊ ဒေါ ဟဲ့ ဝီ တာင် အန်၊ အန် တူ ဆီ တဲး အီ နပ် လွင် မုး အန် ဂွန် နာင် အီ မုး ဂွန် ဒီဘျာ ခုန်ဒီခမ် ဖာရုဝ်။ 25 အန် ဘော မိုဝ်း နဝ်း ဆီ ခမ် ဒုက် ဒီရိုမ် ဒူပ် ဂေ ဒူအီ အာမျုဝ် ပီ အိုပ် ဇဝ်ဖြာ။ အန် တူ ဆီ ကွယ် ဒူင် ဘျုဝ် ဒါခိုယ် အာဒါ အူ ကာစန် အူ ကာဘြိုဝ်း။ အန် မိူဝ် တူ ဆီ ဘူင် ဘဲန် မျုဝ် ဘဲန် မျုဝ် အီ ဘဲန် မှာပ် ဒီ အန်။ 26 အန် ဟဲ့ နပ်၊ ဆေ အန် ခမ် ဒုက် ခမ် အီ နဲန ပီ လုဝ် ခမ် ဒူအီ ကူပ် ညှိုမ် ဂေ ဇဝ် ယေဆူ၊ န့ ဟဲ့ မွှိုမ် လွှိုမ် ကြုဝ်ကြာမ် အီ ငဝ်း တာင် အီ ကွယ် ခဲင် မိူင် အဲဂိုပ်။ အန် ဘူင် ပါယ် တီ ခုဝ်၊ အန် နှဝ့် န့ဒဝ့် ဒီ ပွိုန် ရုး ပီ ဒီ ဒွါ ဇဝ်ဖြာ ဒီ အန် ဝါယ် နီ။ 27 ကူပ် ညှိုမ် အာမုဝ်ဆဲ၊ အန် မိူဝ် တူ ယုဝ် ခုန်ဒီခမ် ဖာရုဝ် ဒီ ရူ စာဝ် ဒီ အန်။ အန် ဘော လေး တ မိူင် အဲဂိုပ်။ ကူပ် ညှိုမ် ဘိုင် ဇဝ်ဖြာ၊ န့ ပီ အန် ဟဲ့ ယိုဝ် ဇဝ်ဖြာ ပီ တူ ပွိုန် ယိုဝ် ဒူအီ။ 28 ကူပ် ညှိုမ် အန်၊ အန် ဘော ဘူင် ပဲ့ ဟဲ့ စ်ု ဇဝ်ဖြာ အန် ဘူင်၊ အန် ဘော ကာလာင် တဲး ဂေ ဒိုဝ်း နှာမ် မာဘူ၊ ဖဝ်း ဒီ မာ မာလုဝ်း၊ ကွဲ့ တဲး အာမူ အာမာတ် ဇဝ်ဖြာ ငဝ်း ယမ် ဂွန် အီမာယ် ဂေ အီ မုး ဂွန် ဂိန့်၊ တဲး ဇဝ်ဖြာ ကာလုဝ်း ကာင် ဂေ။ ကွဲ့ တဲး အန် ဘူင် ဒီ ဒူအီ အီဆာရေလ ပီ ပီ ဘူင် အန် ဒီ ဒူအီ အဲဂိုပ်။

29 ကူပ် ညှိုမ် ဂေ ဒူအီ အီဆာရေလ၊ ဂေ မိူဝ် ပွိုန် ဒီ ကာလုဝ်း အိုမ် တာင် အီ စိူဝ် အိုမ် ဒီနှူင် ရေန့်။ ဂေ ကာလုဝ်း အိုမ် တီ ပီ ဂေ ဟာဝ် ဒဲင် ကာဒါယ် ဟေန့်။ ဒေါ ဝီ တး ဂေ ဒူအီ အဲဂိုပ်၊ ဒေါ ဆီငျာ ဟာဝ် ဒူပ် ဂေ ပါယ် တီ၊ အိုမ် ဘော ဝီ တး မ့ပုန် ယမ် တူတ့် ဂေ။

30 ကူပ် ညှိုမ် ဂေ ဒူအီ အီဆာရေလ၊ ဂေ ဟဲ့ လဲပ် ရဲင် မိူင် ယေရီခုဝ် တွိုန် အာဒါ ဘူ ဆီငဲ။ ဟဲ့ ဟွတ့်၊ ရဲင် မိူင် တီ ဘော ဒီဂ့လဝ်း စုဝ်း အူ ဇေန့်။

31 ကူပ် ညှိုမ် နာင် ရာဟာပ် အီ မုး ယာ မာလမ် တွိုန်၊ အန် မိူဝ် တူ လိုဝ် စှိုမ် ပီ ဂေ ဒူအီ အီ တူ ထူမ် ဂြုဝ်း ဇဝ်ဖြာ။ ခုဝ်၊ အန် ဟဲ့ ရွုး ချြီင် ဆီချာ ဂေ ဒူအီ အီဆာရေလ အီ ဟဲ့ ပြာ ဒီ တး ချွင် ဒီ လိုပ် မိူင် တွိုန်။

32 ဒဲင် တီ၊ ဘေ ဆီ တဲး အုဝ် ကာလာင် ပေါ န့ ပွါ။း န့ ဒီ တူင့် ကာဆဝ် ဆေ အုဝ် ကာလာင် ဘော လွင် အာကီဒီအူန်၊ ဘော အာဘာရက်၊ ဘော အာဆာမ်ဆူန်၊ ဘော အာယေဖာဒါ၊ ဘော လွင် အာဒါဝိတ် ဂေ အာဆာမူအေန်၊ ဘော လွင် ဂေ ဒူအီ အီ ဘျာန် ဂြုဝ်း ဇဝ်ဖြာ တွိုန်။ ဆေ အုဝ် ဒီ ကာလာင် လွင် ဂေ တီ၊ အာဝ် နပ် ဒီ တူတ့်။ 33 ဒူအီ ဂေ တီ၊ ကူပ် ညှိုမ် ဂေ၊ ဂေ ဟဲ့ ကာဂုဝ်း ဘော ပဲ မိူင် အီ ဟဝ်။ ဂေ ဟဲ့ ဆုင်ဖျာတ် အာမူ အီ ဘော ပွိုန် ခဲ့ ပီ တဝ်း ဇဝ်ဖြာ ဒီ ဒွါ။ ဂေ ဘော ပွိုန် ဒီ ကာဘိတ် မူတ့် မာခြင်ဆီ။ 34 ဂေ ဟဲ့ ဒွိုမ် ဘျတ် ဘော ငဝ် အီ ကုး ဟဲန့် ကာဆဝ်။ ဂေ မိူဝ် ဟဲ့ လွတ် အာဖေ အာရေ ဒီ မာပွါ့ လာင် ဂေ ဘ့လာ လျီး။ ဒေါ ဒီလှး န့စမ် ဂေ၊ ဂေ ဟဲ့ ဝီ မိုဝ်း ပ့လူမ် မိုဝ်း ဟဲန့် ကိူန်။ ဂေ ဝီ ပွိုန် ဒီ ကာဂုဝ်း ဒီ ဒါ ဆိုက် ဒူအီ အာမျုဝ် ဟဝ်။ 35 န့ ဘော မိုဝ်း အီဘိုန့်၊ ကူပ် ညှိုမ် ဂေ၊ ဂေ မိူဝ် ဟဲ့ ဝီ ပွိုန် ဝိဝ် ဂွန် ဂေ အီ ဟဲ့ ဝီ ယိတ့် ဝီ အိမ် ဝါယ် ဟဲ့ ဟွတ့် ယမ် ဂေ။ ဒူအီ ဂေ တီ မင် အီ၊ ဂေ ဟဲ့ ခမ် ပီ ခါနှာပ် အီ ဟဝ် ဘော ခမ် ဒုက် ကာဆဝ်။ ဂေ မိူဝ် တူ လုဝ် ဒီ ကွယ် ထင်ဟာင်။ ဂေ ဆီ ပွိုန် အာဆာက် အီ မွှိုမ် လွှိုမ် အာဆာက် ဂေ တီ။ 36 မင် အီ ဂေ ဟဲ့ ခမ် ပီ ဖျာက် ပီ နဲန အီ ဟဝ်၊ ဟဲ့ ကာဒုး ဘော အီ မး အီ ပက် ဂေ၊ ဟဲ့ စုဝ်း ဘော ခဲင် ကာပိုမ်။ 37 ဂေ ဟဲ့ ခမ် ဘော အီ ဟဝ် ဒိုဝ်း မာဝ်၊ ဝိုန့် ဒီ ဂေ။ ဂေ ဟဲ့ ခမ် ဘော အီ ဟဝ် ဒိုဝ်း လေက်လိုဝ်၊ ကာဆွာ့ ဂေ ဘဲန် တွန် ဘဲန် တွန်။ ဂေ ဘော ကာဒုး ဒီ ယမ် ဒီ မာပွါ့ လာင်။ ဂေ ကာဒုး ဒီ စှိုပ် ဒီ တာ ဟုန် မာဘူ ဂေ ဟုန် မာပဲ ကူပ် တူ မိုဝ်း ဂေ ခြိုင် ဒီ တာ။ ဂေ ဘော ခမ် ဒုက် ပီ ခါနှာပ် အီ ဟဝ်။ 38 ကူပ် ညှိုမ် ဒူအီ ဂေ တီ၊ ဂေ ဟဲ့ ကာအာပ် ကွယ် ဒူင် မွှိုမ် လွှိုမ် ကာဒါယ် နီ။ မာလဲ၊ ဒေါ ကွယ် ဂေ ဒဲင် ကာဒါယ် နီ၊ ဂေ ယီ လုဝ် ဟာဝ် ဝိဝ် ဟာဝ် ဝေန့် ခဲင် ပြဲ ကာဟဝ်း၊ ဘော လုဝ် ဟုဝ့် ကွယ် ဒဲင် နွန်။ ဂေ ဘော လုဝ် ချြီင် ခဲင် ကာဒဝ် မာဝ် ဘော ခဲင် ကာဒဝ် ကာဒါယ်။

39 ဇဝ်ဖြာ ဟဲ့ တဝ်း လွင် ဒူအီ ဂေ တီ၊ ဂေ ဟဲ့ ညှိုမ် ဆီချာ။ ဇဝ်ဖြာ ပီ ဘော အိူပ် ဂေ ပါယ် တီ၊ ဂေ ယီ တူ ပွိုန် ပီ တဝ်း ဇဝ်ဖြာ ဒီ ဒွါ ဒီ ဂေ။ 40 ခုဝ်၊ ဒေါ ကွယ် ဂေ ဒေါ မွိုန်၊ ဇဝ်ဖြာ ဟဲ့ ဟွတ့် ရဲန် အုန် အာဒါ အေ အာမျုဝ် အီ ဟဲ့ မွှိုမ် လွှိုမ် ကာဒိက် ဆတ်ဇာ ပဲ့ ဟဲ့ ဒွါ အန် ဒီ ဂေ။ ဇဝ်ဖြာ ယီ ဘူင် တဲး ဂေ ဇေ့ဇုင် ရိုမ် ဒူပ် အေ။