ဒါရာ ဂေ ဒူအီ အာယူဒါ တွိုန်၊ န့ တူ မုး အီ မှာန် အာခါခ်ု အီ ဒီ တး ဝါယ် နီ။ န့ ပီ ကာမိုက် အီ ဘျ လွင် န့ မိုဝ်း အီ မှာန် အာခါခ်ု အီ မုး အီ မွှိုမ်၊ အီ ဒီ တး ဝါယ် နီ။ ခုဝ်၊ ကြုဝ် ပီ လှူ ဂေ ဒွန် ဆီနမ် ဒွန် ဆီနမ်၊ န့ တူ ပွိုန် ဘူင် တဲး ဂေ အီ တး ကြိုပ် ဇဝ်ဖြာ တီ ဘဲန် ဒူအီ မွှိုမ် အီ ဇေ့ဇုင်။ 2 ဆေ ပီ ဒီ လှူ ဂေ တီ နပ် ဒီ တဲး ဂေ ဘဲန် ဒူအီ မွှိုမ် အီ ဇေ့ဇုင်၊ ဂေ အာဝ် ဟူ လုဝ် ဝီ လှူ ဘဲန် ဇေန့် ဘဲန် ဇေန့်။ မှာပ် ဂေ မိူဝ် အာဝ် ဟူ မိုဝ်း။ ခုဝ်၊ န့ ဟဲ့ ဟွတ့် ဂဝ်း ဝဲန်။ ပါယ် တီ၊ ဂေ မိူဝ် အာဝ် ဟူ လုဝ် ယုဝ် ဒီ ခမ် မှာပ် ဂေ။ 3 မာလဲ၊ ပီ ဒီ လှူ ဂေ ဒွန် ဆီနမ် တီ၊ န့ ဘဲန် အီ ဒမ် ဆာဒိက် ဒီ ဒူအီ၊ တဲး ဂေ လှုဝ်း မှာပ် ဂေ။ 4 ခုဝ်၊ နှာမ် မာမက် ဂေ နှာမ် မာပဲ၊ န့ တူ ပဲ ဒီ ဂဝ်း ဝဲန် မှာပ် ဒူအီ ဒေါ မှဝ်။

5 ခုဝ် အန် တီ ဒေါ တး ဇဝ် ယေဆူ ဒဲင် ကာဒါယ် နီ၊ အန် ဘော ကာလာင် ဒီ ဇဝ်ဖြာ တဝ်း၊ “မဲ ဇဝ် တူ ဆီ ပွိုန် ပီ ဒီ လှူ အီ မုး ဒုဝ် ဆတ်ဒါဝါ။ ဘော ပီ လှူ အာမျုဝ် ဟဝ် မဲ တူ လုဝ်။ မဲ ဇဝ် ယီ ဒွါ ဒုဝ် ဘူင့် ဒီ အုဝ်၊ တဲး န့ ဘဲန် ပီ ဒီ လှူ။ 6 မဲ ဇဝ် မိူဝ် တူ အိုင် ပီ လှူ အီ ဒုဝ့် ဒီ ငဝ် ဘော ပီ လှူ အီ ဂဝ်း ဝဲန် မှာပ်။ 7 အုဝ် ဝီ တဝ်း ဒီ မဲ၊ ‘အိုယ် မဲ ဇဝ်ဖြာ၊ အုဝ် ဟဲ့ ကွယ် ဒီ နီ၊ အုဝ် ဒီ ဘူင် ဒူပ် ပီ အိုင် မဲ ဇဝ်ဖြာ၊ တဲး န့ ဒူပ် ပဲ့ ဟဲ့ ဒဲမ် အုန် လွင် အုဝ် ခဲင် ဘပ် ဇဝ်ဖြာ။’” ဇဝ် ယေဆူ ဟဲ့ ကာလာင် ပါယ် တီ။ 8 ဒေါ ကာလာင် ဇဝ် ယေဆူ ဂြုဝ်း တီ၊ အန် ဟဲ့ တဝ်း ဒီ အာတ့်၊ “ပီ ဒီ လှူ ဒုဝ် ဆတ်ဒါဝါ ဘော ပီ ဒီ လှူ ဘဲန် မျုဝ် ဘဲန် မျုဝ်၊ ပီ လှူ အီ ဒုဝ့် ဒီ ငဝ် ဘော ပီ လှူ အီ ဂဝ်း ဝဲန် မှာပ်၊ အာဝ် မုး ပီ အိုင် မဲ ဇဝ်။ မဲ ဇဝ် မိူဝ် တူ ဆီ ပွိုန်။” ပီ ဒီ လှူ ဇိုဝ် တီ ဒွန် မျုဝ် ပီ ဘော မုး ပီ ဒမ် ဒါရာ၊ အန် မိူဝ် ဟဲ့ တဝ်း ပါယ် တီ။ 9 ဟဲ့ ဟွတ့် အန် ပီ ဝီ တဝ်း၊ “အိုယ် မဲ ဇဝ်၊ အုဝ် ဟဲ့ ဟွတ့် တး၊ တဲး အုဝ် ပွိုန် ဒီ ဘူင် ဒူပ် ပီ အိုင် မဲ ဇဝ်။” အန် ကာလာင် ဂြုဝ်း တီ ကူပ် ဟဲ့ ဝဲန် အန် အီ ဘြိမ်၊ တဲး န့ မိုဝ်း အီ ကာမာယ်။ 10 ကူပ် ပီ အိုင် ဇဝ်ဖြာ တီ၊ အေ ပွိုန် ဒီ ဘဲန် ဒူအီ အီ ဆီငါ ဘွတ်။ ခုဝ်၊ ဇဝ် ယေဆူ ဟဲ့ ခမ် ဒီ လှူ ဒုဝ် အန် အူ ဇေန့် တီ၊ ကွဲ့ တဲး န့ ဆီ လုဝ် လှူ ပေါ န့ ပွါ ဒေါ မှဝ်။

11 ဂေ ဒူအီ အီ လှူ ဒီ ဇဝ်ဖြာ အီ ကွယ် ဒဲင် ကာဒါယ် နီ၊ ဂေ ဘော လှူ ပီ ဒီ လုဝ် လှူ ဘဲန် ဇေန့် ဘဲန် ဇေန့်၊ ဒွန် ဆီငဲ ဒွန် ဆီငဲ။ ပီ လှူ ဂေ တီ ယီ တူ ပဲ ဒီ ဂဝ်း ဝဲန် မှာပ် ဒေါ မှဝ်။ 12 အီ မုး ဇဝ် ယေဆူ၊ အန် ယီ လှူ ပီ ဒီ လှူ အူ မျုဝ် အီ ဂဝ်း ဝဲန် မှာပ်။ ပီ လှူ အန် တီ၊ န့ ယီ မိုဝ်း အာဂျိုဝ် ဆေဆေ။ ဟဲ့ ဟွတ့် လှူ၊ အန် ဝီ ကွယ် ဘ့လာက် အာအး ဇဝ်ဖြာ။ 13 ဆိန့် ဒေါ ဟုဝ့် အန် ကော ဇမ် ဒေါ တီ နီ၊ အန် ဘော ကွယ် ဒီ တီ ဘ်ု၊ တဲး န့ ကော ဇမ် ပန် ဒီ တဲး ဇဝ်ဖြာ အန် ညဲတ့် တူတ့် ရန်ဆူ အန် ဘောကာဂ့လျီတ်။ 14 ကူပ် ဟဲ့ လှူ အန် ပီ ဒီ လှူ အူ ဇေန့် တီ၊ န့ တဲး ဂေ အီ ညှိုမ် ဘိုင် အန် ပွိုန် နဝ်း ဆီငါ ဘွတ် ဘော ဘဲန် ဒူအီ မွှိုမ်၊ အီ ဇေ့ဇုင် ဆေဆေ။

15 ဘော နဝ်း ဖွိုမ် ဇဝ်ဖြာ ဟဲ့ ကာလာင် လွင် အန် တီ ဒီ အေ။ အန် ဟဲ့ တဝ်း၊ 16 “အာနီ ဟဲ့ မုး ပီ ဒီ ကာဆဲန့် အုဝ် ဒီ ဂေ။ ဝါယ် အန် တီ အုဝ် ဇဝ်ဖြာ ဒီ ဝီ တဲး ဒါရာ အုဝ် လိုပ် ခဲင် နဝ်း ဂေ။ အုဝ် ဒီ တဲး ဂေ ဇေန့်ဇာ လွင် အန် တီ ဆေဆေ။” 17 ဟဲ့ ဟွတ့် အန် ဇဝ် ပီ ဝီ တဝ်း၊ “မှာပ် ပဲ့ ဟဲ့ ကာလိုပ် ဂေ၊ အုဝ် မိူဝ် ဟူ လှုဝ်း ဒေါ မှဝ်။” 18 ပါယ် တီ၊ ဆေ မှာပ် အေ ဟဲ့ ဟွတ့် ဂဝ်း ဝဲန်၊ အာဝ် ဟူ လုဝ် ဝီ လှူ ပီ ဒီ လှူ အီ ဂဝ်း ဝဲန် မှာပ် ပေါ အူ ဇေန့်။

19 အိုယ် ဘေ ဘီနွင် အုဝ်၊ ဇဝ် ယေဆူ ဟဲ့ ခမ် ဒီ ယမ် ကာဒါင် အေ၊ တဲး အေ မိုဝ်း နဝ်း ယ ဒီ လိုပ် ဇမ် ဒူင် အီ ဘွတ် လွှိုမ် တူတ့်။ 20 တဲး အေ ဒူပ် န့တေန့် ပီ မ့ပြာယ် ဇဝ် ယေဆူ ဒီ အေ။ န့ မုး န့တေန့် ကာမာယ် အီ တဲး အေ ပွိုန် အာဆာက် ကာမာယ်။ ဆေ အေ ဒူပ် န့တေန့် တီ၊ န့ ပီ အေ ဟဲ့ ပွိုန် ဒီ ကာလုဝ်း ဘိက် ဂွင့် တွိုန်၊ တဲး အေ လိုပ် ခဲင် ဒူင် ဘွတ် လွှိုမ် တူတ့်။ ဘိက် ဂွင့် တီ ယီ ဘျ လွင် ဇဝ် ယေဆူ အီ ဟဲ့ ခမ် ဒီ ယမ် ကာဒါင် အေ။ 21 ပါယ် တီ ဘော အေ ဟဲ့ မိုဝ်း ဒူအီ အီ လှူ ဒီ ဇဝ်ဖြာ အီ ဘွတ် မျာတ်၊ အီ ဟဲ့ အိုပ် ခဲင် ဂါင်ဟြာဝ်။ 22 ခုဝ် အန် တီ တဲး အေ တး ကွယ် ကာဒိုက် ကာဒဝ့် ဒီ ဇဝ်ဖြာ။ ကူပ် မိုဝ်း အေ နဝ်း ဆိူဝ် ဘော နဝ်း ညှိုမ် ဆီချာ၊ ကူပ် မိုဝ်း အေ ဘော နဝ်း ဟူ လှုဝ်း မှာပ် ဘော ကူပ် မိုဝ်း အေ ဒုဝ် ဘူင့် အီ ပီ ဟဲ့ ဘာယ် ခဲင် အိုမ် အီ ဆီငါ၊ အေ ပွိုန် ဒီ ကွယ် ကာဒိုက် ကာဒဝ့် ဒီ ဇဝ်ဖြာ။ 23 ကွဲ့ တဲး အေ မိုဝ်း နဝ်း ကာလိင် ကာလဲ၊ တဲး နဝ်း အေ မန် ဆီချာ လွင် ပီ နှဝ့် န့ဒဝ့် အေ ပီ ကာလာင် အေ ဒီ အီ ဟဝ်။ ခုဝ်၊ အန် ဇဝ် အီ ဟဲ့ ဒွါ ကာဒိက် ဆတ်ဇာ၊ အန် ဒီ ဘူင် ခဲ့ ပီ ကာလာင် အန် ဆေဆေ။ 24 တဲး အေ ကာဒွါ့ ကာဖာ၊ မှဝ် အေ ဒီ ပါယ် ဒီ လာယ် ကာဆုး၊ တဲး အေ လာယ် ရွက့် ဘော ဘူင် နာ ဘွတ် နာ မွှိုမ်။ 25 ဒေါ တး ကာဇု ဂေ ဒူအီ အီ ညှိုမ် ဇဝ် ယေဆူ၊ န့ မိုဝ်း မင် အီ အီ တူ တး။ ကွဲ့ တဲး အေ ဘူင် ပါယ် တီ။ တဲး အေ အွန် ဒီ လာယ် ကာလာင် တဲး န့ ဘဲန် ပ့လူမ် ဘဲန် ဟဲန့် ဒီ နဝ်း။ တဲး အေ ဝဲ ကာလာင် လွင် အန် တီ ကူပ် ဟဲ့ နပ် အေ၊ ဆီငဲ ဒီ တး ဇဝ်ဖြာ ဟဲ့ ကာတတ် ဒီ ဇမ်။

26 ဆေ အေ ဟဲ့ ဟွတ့် မိုဝ်း အာငျာန် အီ တဲး အေ နပ် နာ မုး နာ မှာန်၊ ဆေ အေ ယီ ဝီ ဘူင် ဟာဝ် မှာပ် ပီ ဘြိမ်၊ အာဝ် ဟူ မိုဝ်း ပီ ဒီ လှူ အီ ဒီ ပွိုန် ဂဝ်း ဝဲန် မှာပ် ပေါ အူ ဇေန့်။ 27 ဒူအီ ဇိုဝ် တီ၊ န့ ဂိတ် ဘ်ု မီ ပန် ဒီ ဒမ် ဇဝ်ဖြာ မှာပ် အီ မွှိုမ် ယုဝ် ကာဆဝ် ဒီ အန်။ အန် ဘ်ု မီ ပန် ဒီ ကာဆိုမ် ငဝ် ဒီ ဂေ အီ ကာဘး ဒီ ဇဝ်ဖြာ။ 28 ဒေါ မွိုန်၊ ဆေ န့ မိုဝ်း ဒူအီ အီ ဟဲ့ ဝဲန် ဒါရာ အာမုဝ်ဆဲ တွိုန်၊ ဆေ ဟဲ့ မိုဝ်း အာ ဝီ၊ အူယ် ဝီ အီ ဟဲ့ ယိုဝ် လွင် အန် တီ၊ အာဝ် ပွိုန် ကာဝေ အန်။ အန် ဒိူန် ဒီ လုဝ် ယမ်။ 29 ကူပ် န့ ပါယ် တီ၊ ဆေ န့ မိုဝ်း ဒူအီ အီ လုက်တာယ် ဂွန် ဇဝ်ဖြာ ဘော တဝ်း၊ ပီ ကာဆဲန့် ဇဝ်ဖြာ ဒီ ဒူအီ ကူပ် ဟဲ့ ခမ် ဇဝ် ယေဆူ ဒီ ယမ်၊ န့ တူ မိုဝ်း ဒီခုဝ်၊ ဆေ န့ ဘော မိုဝ်း ဒူအီ အီ တူ ရုဝ်ဆေ နဝ်း ဖွိုမ် ဇဝ်ဖြာ အီ နပ် ဒီ ဂေဇူ အေ၊ ဒူအီ ဝီ တီ ဒီ လုဝ် ခမ် မှာပ် ကိူန် လွှိုမ် ဒူအီ အီ ဟဲ့ ဝဲန် ဒါရာ တွိုန်။ 30 ခုဝ်၊ အေ ဟဲ့ နပ် အန် ဇဝ် အီ ဟဲ့ တဝ်း၊ “အုဝ် အီ ဒီ ဘူင် ဝျီ့ ပီ လုတ့် ဂေ။” အေ ဟဲ့ နပ်၊ အန် ဇဝ် ဟဲ့ ကာလာင် ပေါ အူ ဇေန့် တဝ်း၊ “ဇဝ်ဖြာ အီ ဒီ ဒမ် မှာပ် ဒီ ဂေ ဒူအီ ပီ အိုပ် အန်။” 31 ဇဝ်ဖြာ ယီ မုး အန် ဇဝ် အီ အိမ် ဆေဆေ။ ဆေ အန် ဒီ ဘျ ပွုန် အန် ဒီ အေ၊ န့ မွှိုမ် ယုဝ် ကာဆဝ်။

32 တဲး ဘေ ဝီ လှုဝ်း ပီ ပါယ် ဘေ အာတ့် နီ။ ဒေါ ဟဲ့ ဟွတ့် ဘေ တဲး ဘ့လာင် ဇဝ်ဖြာ လိုပ် ခဲင် နဝ်း ဘေ၊ ဘေ ပီ ဘော ဟဲ့ ခမ် ဒုက် တာင် ကာဆဝ် မိူဝ်၊ ဘေ ယီ တူ စှိုမ် မာဆေ ကူပ် အီ ဒုက် အီ ညှာပ် ဒီ နဝ်း ဘေ တီ။ 33 မင် ဇေန့် ဘေ ဟဲ့ ခမ် အီ ဟဝ် နဲန ဘေ ဘော ခါနှာပ် ဘေ။ မင် ဇေန့် ဘေ ဟဲ့ ဖြူမ် ဒီ ခမ် ဒုက် ဒူပ် အီ ဟဝ်။ 34 ဘေ မိူဝ် ဟဲ့ ကာဝေ ဂေ အီ ဟဲ့ စုဝ်း ခဲင် ကာပိုမ်။ ဒေါ မိုဝ်း အီ တး ဇူန် တး ဖာတ် ဒိုဝ်း ကြုဝ်ကြာမ် ဘေ၊ ဘေ ဘော ခူယ် ဒါခိုယ်၊ တူ ခြဲ ဂေ။ ခုဝ်၊ ဘေ ဟဲ့ နပ်၊ ဘေ မိုဝ်း ကြုဝ် အီ ကွယ် ဆေဆေ၊ အီ ဟဲ့ ဘွတ် ဟဲ့ မွှိုမ် လွှိုမ် ကြုဝ် ပီ ဖာတ် ဂေ တီ။

35 ကူပ် န့ ပါယ် တီ၊ ကွဲ့ တဲး ဘေ ဝဲန် နဝ်း ယ ဘေ၊ အီ ဒီ တဲး ဘေ ပွိုန် အာဂျိုဝ် အီ ကိူန် ကာဆဝ်။ 36 ဘေ လုဝ် မိုဝ်း နဝ်း အီ ခမ် ဒီ ယိူန် လှေန့်၊ တဲး ဘေ ပွိုန် ဒီ ဘူင် ဒူပ် ပီ အိုင် ဇဝ်ဖြာ။ ဆေ ဘေ ဟဲ့ ဟွတ့် ဘူင် ဇိုဝ် တီ ဒွန် မျုဝ်၊ ဘေ ဒီ ဘော ပွိုန် ပဲ့ ဟဲ့ ကာဆဲန့် ဇဝ်ဖြာ ဒီ ဒွါ ဒီ ဘေ။ 37 ခုဝ်၊ ခဲင် ဘပ် ဇဝ်ဖြာ န့ ဟဲ့ ဒဲမ် အုန် တဝ်း၊ “အာဝ် ဟူ လှေန့်၊ အန် ဇဝ် အီ ဟဲ့ တဝ်း ဒီ တး၊ အန် ဒီ တး ခြန် ခြန်၊ အန် တူ ကြဲ။ 38 မာလဲ၊ ဒူအီ ပီ အိုပ် အုဝ်၊ အီ မိုဝ်း နဝ်း ဆိူဝ် နဝ်း မှာန်၊ အန် ဒီ ညှိုမ် ဘိုင် အုဝ် ဆေဆေ။ ခုဝ်၊ အန် ဒီ ပွိုန် အာဆာက် ကာမာယ်။ အာဆေ ယီ တူ ညှိုမ် ဘိုင် အုဝ် ဆေဆေ၊ အုဝ် မိူဝ် တူ အိုင် ဒူအီ ဝီ တီ။” 39 အီ မုး အေ၊ အေ ယီ တူ မုး ဒူအီ အီ တူ ညှိုမ်၊ အီ ဒီ စှိုမ်။ အေ မုး ဒူအီ အီ ညှိုမ် ဆီချာ။ ဇဝ်ဖြာ မိူဝ် ဟဲ့ ချွတ် အေ။