ပီ ကာဆဲန့် ဇဝ်ဖြာ အီ ဘြိမ် တွိုန်၊ န့ ဘော စ်ု ဒူအီ ဘူင် ဘဲန် မျုဝ် ဘဲန် မျုဝ်၊ တဲး ဂေ ကြိုပ် ဆီချာ ဇဝ်ဖြာ။ န့ မိုဝ်း ဘော ဒူင် ဒီ လုဝ် ကြိုပ် ဒဲင် ကာဒါယ် နီ။ 2 ဂေ ဟဲ့ ဆမ် အုန် ထိုပ် ဘိက် ဘွတ်။ ခဲင် ထိုပ် တီ ဟူင် အီ လိုပ် ဒီ အာတ့်၊ န့ မိုဝ်း ဒင် ငဝ် အွမ်၊ ဘော ကာစှူင့် ဒူင် ဘ့လေး ဂေ ခါမုန် အီ လှူ ဒီ ဇဝ်ဖြာ။ ဟူင် တီ န့ စိူဝ် ဟူင် အီ ဆီငါ ဘွတ်။ 3 နာ ပန် ဘိက် ဂွင့် ပေါ အူ ဖိူန် တွိုန်၊ န့ ဘော မိုဝ်း ဟူင် အီ စိူဝ် ဒူင် ဆီငါ ဘွတ် လွှိုမ် တူတ့်။ 4 ခဲင် ဟူင် တီ၊ န့ ဘော မိုဝ်း ကာစှူင့် ခြိဝ် ပီ လှူ ဂေ ဆီနမ် အုး ငှုန်။ န့ ဘော မိုဝ်း ဘော ဇီဒိူက် ဇဝ်ဖြာ အီ ဟဲ့ ပိတ် ခြိဝ်။ ခဲင် ဇီဒိူက် တီ၊ န့ ဝီ မိုဝ်း ကာလုဝ့် ခြိဝ် အူ ဘူင့် ပီ ဟပ် အုန် ဂေ ခါမုန် မာနာ။ န့ မိုဝ်း ဘော န့ကြွုန် အာရူန် အီ ဟဲ့ န့လုဝ်း လေး ဘုဝ်း။ န့ မိုဝ်း ဘော မာဝ် အာ ဒီဖ့လာင် ပီ ဒဲမ် အုန် ဇဝ်ဖြာ ခဲ့ ပီ ကာဆဲန့် အန် ဒီ ဒူအီ။ 5 နာ ဒဲင် ဆီဘ့လိုက် ဇီဒိူက် တီ၊ န့ ဝီ မိုဝ်း ရာင် အာမူ အာမာတ် ဇဝ်ဖြာ အာ ကာဒင် အီ စိူဝ် ခေရုပ်^a အီ မိုဝ်း အာဖုင် ဒင်ခုဝ် တာင်။ ဖျီင် ရာင် အာမူ အာမာတ် ဇဝ်ဖြာ ဂါယ် တီ ဟဲ့ မ့ဘ့လး၊ တဲး န့ ဆီဘ့လိုက် ဒူင် ဘ့လေး ဂေ ပီ ဒီ လှူ အီ တဲး ဇဝ်ဖြာ ဂဝ်း ဝဲန် မှာပ် အီ။ ဒေါ တီ နီ၊ ယီ ညှမ် ပွိုန် ကာလာင် တဲး န့ ကော ဇေ့ လွင် အန် တီ။

6 ဝါယ် ဟဲ့ ဟွတ့် ဘ့လေး အုန် ဂေ ဇိုဝ် တီ ဒွန် မျုဝ်၊ ဒူအီ အီ လှူ ဒီ ဇဝ်ဖြာ မိူဝ် လိုပ် ဟာဝ် ခဲင် ဟူင် ရေတ့် တွိုန် ဘော ဘူင် ဂါန် ဇဝ်ဖြာ ဒွန် မှိုဝ် ဒွန် ညှာ။ 7 န့ ယီ မိုဝ်း မီ ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ။ အန် အူ ဝီ၊ အီ ပွိုန် ဒီ လိုပ် ခဲင် ဟူင် အီ ကွယ် နာ ခဲင် တွိုန်။ အန် မိူဝ် တူ လိုပ် ဒွန် ဆီငဲ။ အူ ဆီနမ် အူ ဇေန့် အန် ပွိုန် ဒီ လိုပ်။ အန် ယီ လုဝ် ဂူင့် ဘော နှာမ် ဒုဝ် ဆတ်ဒါဝါ၊ တဲး န့ ဘဲန် ပီ ဒီ လှူ အီ တဲး ဇဝ်ဖြာ ဂဝ်း ဝဲန် မှာပ် ဒုဝ် ဘြိမ် အန် ဘော မှာပ် ဂေ ဒူအီ ကိူန်။ ဆေ အန် ယီ တူ ဂူင့် နှာမ် တီ၊ အာဝ် ပွိုန် လိုပ် ဒေါ မှဝ်။ 8 ကူပ် ဟဲ့ လုဝ် ဘူင် ဂေ ပါယ် တီ၊ နဝ်း ဖွိုမ် ဇဝ်ဖြာ ဟဲ့ ဘျ လွင် ဒူအီ တူ ပွိုန် လိုပ် ဒူင် ကွယ် ဇဝ်ဖြာ။ ဒေါ ဆီ မိုဝ်း ထိုပ် ဘိက် ဘွတ် တီ၊ ဇဝ်ဖြာ ညှမ် နှဲ န့တေန့်၊ တဲး ဒွန် အီ ပွိုန် ဒီ လိုပ် ခဲင် ဒူင် အီ ဟဲ့ ဆီငါ ဘွတ် လွှိုမ် တူတ့်။ 9 လွင် ထိုပ် ဘိက် ဘွတ် တီ၊ န့ ဘော ဘဲန် အူဖာမာ ဒီ အေ ဘာန် ဒေါ တီ နီ။ ပီ ဒီ လှူ ဇိုဝ် တီ၊ ဘော မုး ဒုဝ် ဆတ်ဒါဝါ၊ ဘော မုး ပီ ဒီ လှူ ဘဲန် မျုဝ် ဘဲန် မျုဝ်၊ န့ တူ တဲး ဒူအီ အီ လှူ မိုဝ်း နဝ်း လုယ်။ န့ တူ တဲး အန် ပိဝ် မှာပ် အန် ဒေါ မှဝ်။ 10 ပီ ဒီ လှူ ဇိုဝ် တီ၊ န့ မုး မီ လွင် ပီ ဒီ ဟူမ် ပီ ဒီ ဒျီင် ဘော မုး လွင် လုဝ် ဘာယ် ဒဲ၊ တဲး န့ ဒူပ် ဒါရာ။ န့ ဘဲန် မီ ဟိတ် ပီ လုဝ် ဘူင် အေ၊ တဲး န့ ကော ဇမ် ပန် ဒီ ကာပ့လု ဇဝ်ဖြာ ဟိတ် တီ။

11 ဇဝ် ယေဆူ ယီ မုး ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။ အန် ဟဲ့ ဘဲန် ဒူအီ အီ လှူ ဒီ ဇဝ်ဖြာ အီ တဲး အေ ပွိုန် နာ မွှိုမ် ဘဲန် မျုဝ် ဘဲန် မျုဝ်။ အန် ဟဲ့ ဝီ လိုပ် ခဲင် ထိုပ် ဘိက် ဘွတ် အီ ဟဲ့ ဘွတ် ဟဲ့ တာင် လွှိုမ် ထိုပ် ဘိက် ဘြိမ်။ အာဝ် မုး ထိုပ် ပီ ဘူင် ဒူအီ။ န့ မိူဝ် တူ ကွယ် ဒဲင် ကာဒါယ် နီ။ 12 အန် ဇဝ် မိူဝ် တူ ဒိုဝ်း နှာမ် မာဘူ ဂေ နှာမ် ဂွန် မာမက်၊ တဲး အန် လှူ။ အန် ဇဝ် ဟဲ့ ဒိုဝ်း နှာမ် ဒုဝ် ဘြိမ် အန်၊ လိုပ် ဟာဝ် ခဲင် ဒူင် အီ ဆီငါ ဘွတ် လွှိုမ် တူတ့်။ အန် ဇဝ် မိူဝ် လိုပ် မီ အူ ဇေန့် တီ၊ တဲး အန် ပွိုန် ဒီ ချွတ် အေ၊ ကွဲ့ ဟူ တဲး အေ ခမ် မှာပ် အေ ဒေါ မှဝ်။ 13 ဂေ ဒူအီ အီ လှူ ဒီ ဇဝ်ဖြာ ဒဲင် ကာဒါယ် နီ၊ ဂေ နပ် ဒီ ဒိုဝ်း နှာမ် မာဘူ ဂေ နှာမ် မာမက် ဘော ဘြဝ် ပဲ့ ဟဲ့ ဒုဝ့် ကာဆိုမ် ဂေ မာမက် ဆိူဝ်၊ ဝီ ခြဝ်း ဒီ ဂေ ဒူအီ မိုဝ်း မှာပ်၊ တဲး ဒုဝ် ဂေ ဝီ ဆီငါ ဘွတ်၊ တဲး န့ ဒူပ် ဒါရာ။ 14 ဆေ န့ ပါယ် တီ၊ နှာမ် ဇဝ် ယေဆူ ဟဲ့ ဝဲ မိုဝ်း ပွုန် လွှိုမ် နှာမ် ဒုဝ် ဆတ် တီ။ ခုဝ်၊ အန် ဇဝ် တူ မိုဝ်း မှာပ်။ နဝ်း ဖွိုမ် ဇဝ်ဖြာ အီ ကွယ် ဆေဆေ ယီ ဟဲ့ တဲး အန် လှူ ဒုဝ် အန် တီ ဒီ ဇဝ်ဖြာ။ ခုဝ်၊ အန် ဟဲ့ ပွိုန် ဒီ ချွတ် အေ၊ ကွဲ့ ဟူ တဲး အေ လှုဝ်း ခဲင် နဝ်း အေ လွင် မှာပ် အေ အီ တဲး အေ ယမ်။ ဇဝ် ယေဆူ ဟဲ့ ချွတ် အေ ပါယ် တီ၊ တဲး အေ ပွိုန် ဒီ ဘူင် ပီ အိုင် ဇဝ်ဖြာ အီ အိမ် ဆေဆေ။

15 ကူပ် ဟဲ့ ခမ် အန် ဇဝ် ဒီ ယမ် တီ၊ အန် ဟဲ့ တဲး အေ လွတ် လေး ခဲင် မှာပ် ပဲ့ ဟဲ့ ဘူင် အေ ကူပ် တူ ဒူပ် အေ ပီ လာယ် ကာဆဲန့် အေ ဒီ ဇဝ်ဖြာ ဒေါ ဂုဝ် တွိုန်။ ပီ ကာဆဲန့် ဇဝ်ဖြာ အီ ကာမာယ်၊ ဇဝ်ဖြာ တဲး အေ ခမ် ကူပ် ညှိုမ် ဘိုင် အေ ဇဝ် ယေဆူ အီ မုး ဒူအီ ဒီ ကာတဲ။ ပါယ် တီ၊ ဒွန် အီ ပဲ့ ဟဲ့ ရဝ်း ဇဝ်ဖြာ၊ ဂေ ဒီ ပွိုန် ခါဂုန် ပဲ့ ဟဲ့ တဝ်း ဇဝ်ဖြာ ဒီ ဒွါ ဒီ ဂေ။ ခါဂုန် တီ တူ နပ် ဒီ ဟြာယ် ဒေါ မှဝ်။

16 ဆေ န့ ယီ မိုဝ်း ပဲ့ အီ ဒဲမ် လွင် ကာဆာင် ခါဂုန်၊ အာတ့် ယမ် ဒူအီ အီ ဟဲ့ ဒဲမ် ပဲ့ တီ၊ အာဝ် ပွိုန် ကာဆာင် ခါဂုန် တီ။ 17 ခုဝ်၊ ဆေ ဝီ အီ ဒဲမ် ပဲ့ တီ ယီ ဆီ အိမ်၊ ညှမ် ပွိုန် စ်ု ပဲ့ တီ။ ဆေ ဒါ အီ ဒဲမ် ပဲ့ တီ ယီ ဟဲ့ ဟွတ့် ယမ်၊ ဟဲ့ ပွိုန် စ်ု။ 18 ကူပ် န့ ပါယ် တီ၊ ဘော ပီ ကာဆဲန့် ဇဝ်ဖြာ ဒေါ ဂုဝ် တွိုန်၊ ဒွန် အီ လုဝ် ဒူပ် ဝါယ် ဟဲ့ ဟွတ့် လှူ ဂေ နှာမ် ဒုဝ် ဆတ်။ အာတ့် လှူ ဂေ နှာမ် တီ၊ ညှမ် လုဝ် ဒူပ်။ 19 ခုဝ်၊ ဝါယ် ဟဲ့ ဟွတ့် ကာလာင် အာမုဝ်ဆဲ ဒါရာ ပီ ဒွါ ဇဝ်ဖြာ ဒီ အန်၊ တဲး ဂေ ဒူအီ ကိူန် ထူမ်၊ အန် ဘော ဒိုဝ်း ဘော နှာမ် ဂွန် မာမက် ဘော နှာမ် မာဘူ ဝီ ကာဝ်ု ကာဆူ အိုမ်၊ ဝီ ဒိုဝ်း ဘော ဒဝ် ဟူဆူပ်၊ ဘော ဟိုက် မာဘူ ပဲ့ ဟဲ့ စုတ် ဂေ တဲး န့ ရေန့်။ ဟဲ့ ဟွတ့်၊ အန် ဘော ဝီ ခြဝ်း ဒီ ဘပ် ဒါရာ ဇဝ်ဖြာ ဘော ဒီ ဂေ ဒူအီ ဒွန် အီ။ 20 အန် ဝီ တဝ်း၊ “နှာမ် နီ ဟဲ့ မုး နှာမ် အီ ဘျ ပီ ကာဆဲန့် ဇဝ်ဖြာ ဒီ ဘေ။ ဇဝ်ဖြာ ဟဲ့ စ်ု ဘေ ဒူပ် ပါယ် တီ။” 21 ဟဲ့ ဟွတ့် ပါယ် တီ၊ အာမုဝ်ဆဲ ဘော ဝီ ဒိုဝ်း နှာမ် တီ၊ ခြဝ်း ဒီ ထိုပ် ဘိက် ဘွတ် ဘော ဒီ ခြိုင် ပီ ဒီ တာ ဒွန် မျုဝ် ဒေါ ကြိုပ် ဂေ ဇဝ်ဖြာ။ 22 ဘူင့် မှာန် အန်၊ န့ တူ ကူပ် မိုဝ်း မာဆေ ပီ တူ လုဝ် ခြဝ်း နှာမ်၊ တဲး န့ ဆီငါ ပီ ဒမ် ဒါရာ။ ဆေ တူ မိုဝ်း နှာမ် ပီ လှုဝ် ဒူအီ ဒီ အာတ့် ဇဝ်ဖြာ၊ အန် ဇဝ် တူ ပွိုန် ဂဝ်း ဝဲန် မှာပ်။

23 အီ မုး ကြုဝ် ဘဲန် မျုဝ် ဘဲန် မျုဝ် ဒဲင် ကာဒါယ် နီ၊ န့ ဘျ ပီ ပါယ် ဒွန် မျုဝ် ခဲင် ဂါင်ဟြာဝ်။ ကြုဝ် တီ ဟဲ့ ဘဲန် ကြုဝ် အီ ဆီငါ ဘွတ် ကူပ် လှူ ဂေ နှာမ် ဒုဝ် ဆတ် ဂေ တီ။ ဆေ န့ ယီ မုး မျုဝ် အီ ကွယ် ဂါင်ဟြာဝ်၊ န့ လုဝ် ပီ ဒီ လှူ အီ မွှိုမ် လွှိုမ် ဒုဝ် ဆတ်။ 24 ပါယ် တီ၊ ဇဝ် ယေဆူ တူ လုဝ် လိုပ် ဟာဝ် ခဲင် ဒူင် ဆီငါ ဘွတ် ပီ ဘူင် ဒူအီ အီ နှဲန်၊ အီ မှာန် အီ ကွယ် ခဲင် ဂါင်ဟြာဝ်။ အန် ဟဲ့ လိုပ် ဆိူဝ် ခဲင် ဂါင်ဟြာဝ်၊ တဲး အန် ကွယ် ဒီ အာတ့် ဇဝ်ဖြာ ကာဒါင် အေ။ 25 အန် ယီ တူ လုဝ် လှူ ဒုဝ် အန် ဘဲန် ဇေန့် ဘဲန် ဇေန့်။ အာဝ် လုဝ် ဘူင် ပီ ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ။ ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ တီ၊ အန် ဘော လုဝ် ဂူင့် နှာမ် ဒုဝ် ဆတ်၊ ဟာဝ် လိုပ် ခဲင် ဒူင် ဆီငါ ဘွတ် လွှိုမ် တူတ့် ဒွန် ဆီနမ် ဒွန် ဆီနမ်။ 26 ဆေ အန် ဇဝ် တဝ်း ဒီ လှူ ဒုဝ် အန် ပါယ် တီ၊ ဆိန့် ဒေါ ဖာန် ဘ့လေး ဇဝ်ဖြာ ကာဒါယ် နီ၊ အန် ဒီ ဘော လုဝ် ခမ် ဒီ ယမ် ဘဲန် ဇေန့် ဘဲန် ဇေန့်။ န့ ယီ တူ မုး ပါယ် တီ။ ဇဝ် ယေဆူ ဟဲ့ တး မီ အူ ဇေန့် ဘာင် ဒီ တူတ့် ဇာတ် နီ။ အန် ဒီ ဘူင် တဲး န့ ဟွတ့် တူတ့် ဒွန် မျုဝ်၊ တဲး အန် ဂဝ်း ဝဲန် မှာပ် ဂေ ဒူအီ ကူပ် ဟဲ့ ခမ် အန် ဒီ လှူ ဒုဝ် အန် တီ။ 27 ဘော အေ ဒူအီ ဒွန် အီ၊ အေ ဒီ ယမ် မီ အူ ဇေန့်။ ဟဲ့ ဟွတ့်၊ အေ ဒီ ဝီ လုဝ် ခမ် တဲး ဇဝ်ဖြာ ဆုင်ဖျာတ် အာမူ အေ။ 28 ဇဝ် ယေဆူ မိူဝ် ပါယ် တီ။ အန် ဟဲ့ လှူ ဒုဝ် အန် မီ အူ ဇေန့်။ အန် ဟဲ့ ခမ် တူတ့် ခဲ့ ကွယ် မှာပ် ဒူအီ ဘောကာဂ့လျီတ်။ အန် ဒီ ဝီ တး ပေါ အူ ဇေန့်။ ပန် ဒီ ဝီ တး အန်၊ အန် တူ တဝ်း ဒီ ဝီ ဂဝ်း ဝဲန် မှာပ်။ အန် ဒီ တး တဲး အန် ချွတ် ဂေ ဒူအီ အီ ဘ်ု အီ နှဝ့် န့ဒဝ့် အန်။