ဂြုဝ်း ပဲ့ ဟဲ့ ကာလာင် အုဝ် ဘောကာဂ့လျီတ် နီ၊ အီ ဟဲ့ အာရေ တာင်၊ န့ ပါယ် နီ။ အေ မိုဝ်း ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ အီ ဟဲ့ ဟွတ့် တုတ့် ဒဲင် မာလာင် အီ ကွယ် ဘ့လာက် အာအး ဇဝ်ဖြာ။ ဇဝ်ဖြာ ယီ ဟဲ့ မိုဝ်း အာဖုင် ဒင်ခုဝ် ဘော ပွုန် တာင် ကာဆဝ်။ အန် ဘော ကွယ် ခဲင် မိူင် ဂါင်ဟြာဝ်။ 2 ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ တီ၊ အန် ဘူင် ဂါန် အန် ဒီ အာတ့် ဇဝ်ဖြာ အီ ကွယ် ဒူင် ဆီငါ ဘွတ်။ ဒူင် တီ၊ န့ ဘော မုး ဒူင် ပဲ့ ဟဲ့ ဘူင် ဇဝ်ဖြာ။ န့ ဘော ပီ ထိုပ် ဘိက် ဘွတ် ပဲ့ ဟဲ့ စ်ု ဇဝ်ဖြာ ဒူအီ ဘူင်။ ဒူင် ကွယ် ဇဝ်ဖြာ တီ၊ န့ မုး ထိုပ် ဘိက် ဘွတ် အီ မှာန် အာခါခ်ု။

3 ခဲ့ ကွယ် ဂေ ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ ဒွန် အီ၊ ဇဝ်ဖြာ ဟဲ့ စ်ု ဂေ၊ တဲး ဂေ လှူ ပီ ဒီ လှူ ဘဲန် မျုဝ် ဘဲန် မျုဝ်။ ဂေ လုဝ် ငဝ်း လှူ ဘော ဒုဝ် ဆတ်ဒါဝါ။ ခုဝ် အန် တီ ဘော ဒါ တာင် အေ အီ အိုပ် တူတ့် ဒူအီ အီ လှူ ဒီ ဇဝ်ဖြာ အီ မုး ဇဝ် ယေဆူ တီ၊ ဘော အန် လုဝ် လှူ ပီ ဒီ လှူ အန်။ 4 ဆေ ဇဝ် ယေဆူ ကွယ် ဒဲင် ကာဒါယ် နီ၊ အန် တူ လုဝ် ဘဲန် ဒူအီ အီ လှူ ဒီ ဇဝ်ဖြာ။ ခုဝ်၊ န့ ဟဲ့ ဟွတ့် မိုဝ်း ဂေ ဒူအီ အီ လှူ ဒီ ဇဝ်ဖြာ အီ ဘူင် ဂါန် ဂေ၊ တဲး န့ ဒူပ် ဒါရာ။ 5 ဒူအီ အီ လှူ ဒီ ဇဝ်ဖြာ ဂေ တီ၊ ဂေ ဘော ဘူင် ဂါန် ဂေ ခဲင် ထိုပ် ဘိက် ဘွတ် အီ ပီ ဒူင် ကွယ် ဇဝ်ဖြာ ခဲင် ဂါင်ဟြာဝ်။ ဒေါ ဘူင် အာမုဝ်ဆဲ ထိုပ် ဘိက် ဘွတ် တီ၊ ဇဝ်ဖြာ ဟဲ့ တဝ်း ဒီ အန်၊ “မဲ လုဝ် ဆာဒိက် ဒီ ဘူင် တူတ့် ဒွန် မျုဝ်၊ တဲး န့ ပီ ပီ ဘျ အုဝ် ဒီ မဲ ဒေါ ကွယ် မဲ ဒဲင် နွန် တွိုန်။” 6 မာလဲ၊ ဂါန် ပီ ဘူင် ဇဝ် ယေဆူ၊ န့ ဟဲ့ မွှိုမ် လွှိုမ် ဂါန် ပီ ဘူင် ဂေ ဒူအီ အီ လှူ ဒီ ဇဝ်ဖြာ အီ ကွယ် ဒဲင် ကာဒါယ် နီ။ ခုဝ်၊ ပဲ့ ဟဲ့ ကာဆဲန့် ဇဝ်ဖြာ ဒီ ဒူအီ ကူပ် ညှိုမ် ဂေ ဇဝ် ယေဆူ၊ န့ ဟဲ့ မွှိုမ် လွှိုမ် ပဲ့ ဟဲ့ ကာဆဲန့် ဇဝ်ဖြာ ဒီ အာမုဝ်ဆဲ။ ဇဝ်ဖြာ မိူဝ် ဟဲ့ ဒွါ ကာဒိက် ဆတ်ဇာ ဘဲန် မျုဝ် ဘဲန် မျုဝ် ဒီ ဂေ ဒူအီ အီ ညှိုမ် ဇဝ် ယေဆူ။ ဘော ကာဒိက် ဆတ်ဇာ တီ၊ ဟဲ့ မွှိုမ် လွှိုမ် ကာဒိက် ဆတ်ဇာ ပဲ့ ဟဲ့ ဒွါ ဇဝ်ဖြာ ဒီ အာမုဝ်ဆဲ။

7 န့ ယီ မုး ပီ ကာဆဲန့် ဇဝ်ဖြာ ဒီ အာမုဝ်ဆဲ တီ၊ ဆေ အာဝ် ဟူ မိုဝ်း ဒူင် ဒီ လုဝ် နဲ၊ အာဝ် ဟူ လုဝ် ပီ ကာဆဲန့် ပေါ အူ မျုဝ်။ 8 ဇဝ်ဖြာ ယဲ့ ဟဲ့ ယိုဝ် ဒူင် ဒီ နဲ ဒီ ဂေ ဒူအီ ပီ အိုပ် အန်။ ခုဝ်၊ အန် တဝ်း ဒီ ဂေ၊ “န့ ဒီ ဇမ် အူ ဆီငဲ၊ အုဝ် ဒီ ဝီ လာယ် ကာဆဲန့် အီ ကာမာယ် ဒီ ဂေ ဒူအီ အီဆာရေလ ဘော ဂေ ဒူအီ အာယူဒါ။ 9 ပီ ကာဆဲန့် အုဝ် တီ၊ န့ တူ ပီ ပဲ့ ဟဲ့ ဒွိုမ် ကာဆဲန့် အုဝ် ဒီ ဂုန့် ဒင် ဂေ ဒေါ ယဲတ့် လေး အုဝ် ဒီ ဂေ ခဲင် မိူင် အဲဂိုပ် တွိုန်။ ခုဝ်၊ ဂေ တူ ဘူင် ဒူပ် ပဲ့ ဟဲ့ ကာဆဲန့် အုဝ် ဒီ ဂေ တီ။ ကူပ် တူ ဘူင် ဂေ ခဲ့ ပီ လုဝ် ဘူင် ဂေ အီ ဒူပ် ပဲ့ ဟဲ့ ကာဆဲန့် ဂေ၊ အုဝ် မိူဝ် ဟဲ့ ဘ့လေး ဂေ၊ တဲး ဂေ ဘူင် ခဲ့ ပီ အိုင် ဂေ။ 10 ပီ ဒီ ကာဆဲန့် အုဝ် ဒီ ဂေ ဒူအီ အီဆာရေလ နာ အာတ့် နီ ဟာဝ်၊ န့ ပါယ် နီ။ အုဝ် ဒီ တဲး ဒါရာ အုဝ် လိုပ် ခဲင် နဝ်း ဂေ၊ တဲး ဂေ ဇေန့်ဇာ လွင် အန် တီ ဆေဆေ။ အုဝ် ဒီ ဘဲန် ဇဝ်ဖြာ ပီ ကြိုပ် ဂေ၊ ဂေ မိူဝ် ဒီ ဘဲန် ဒူအီ ပီ အိုပ် အုဝ်။ 11 ဒေါ အန် တီ အာဝ် ဟူ မိုဝ်း အီ ဒီ မာနုဝ် ဒီ ဂိုက် အန်၊ အာဝ် ဟူ မိုဝ်း အီ ကာလာင် ဒီ ဘီနွင် ဝေါဝဲ အန် တဝ်း၊ ‘တဲး ဘေ နပ် လွင် ဇဝ်ဖြာ။’ ခုဝ်၊ ဂေ ဘောကာဂ့လျီတ် ဒီ နပ် လွင် ဇဝ်ဖြာ။ ဘော ဂေ ဒူအီ အီ တူ မိုဝ်း အာရေ မာဆေ ဘော ဂေ ဒါ တာင်၊ ဂေ ဒီ နပ် တူတ့် လွင် အုဝ် ဒွန် အီ။ 12 အုဝ် ဒီ ဂဝ်း ဝဲန် မှာပ် ဂေ၊ အာဝ် ဟူ လှုဝ်း မှာပ် ဂေ ဒေါ မှဝ်။” ပါယ် တီ ဇဝ်ဖြာ ဟဲ့ ကာလာင် အုန်။

13 ကူပ် ကာလာင် ဇဝ်ဖြာ လွင် ပဲ့ ဟဲ့ ကာဆဲန့် အန် တဝ်း၊ န့ မုး အီ ကာမာယ်၊ န့ ဘော လေး လွင် ပဲ့ ဟဲ့ ကာဆဲန့် အန် ဒေါ ဂုဝ် တွိုန်၊ န့ မုး အီ ဘြိမ်။ ဆေ န့ ယီ ဟဲ့ ဟွတ့် ဘြိမ်၊ အာဝ် လှေန့် န့ ဒီ ဟြာယ်၊ အာဝ် ဟူ မိုဝ်း။