အာမေခေဒေက် တီ၊ အန် မုး ခုန်ဒီခမ် အီ အိုပ် မိူင် ဆာလေမ်။ အန် ဘော မုး ဒူအီ အီ လှူ ဒီ ဇဝ်ဖြာ အီ မုး အန် ဇဝ် အီ တာင် လွှိုမ် တူတ့်။ ဝါယ် ကာဂုဝ်း ဒါ အာဘြာဟမ် ဒီ ဂေ ခုန်ဒီခမ် ဖွုန် ကာဒင် တွိုန်၊ ဝါယ် ဟဲ့ အွင် အန် ဒီ ဂေ၊ အန် ဝီ တး ဒူင် ကွယ် အန်။ ဒေါ အန် တီ အာမေခေဒေက် ဟဲ့ ဟာဝ် ဘ်ု ဒီ ရွုး အန် ဒူပ် န့တေန့် ဘော မွင့်ကာရာ ဒွါ ဒီ အန်။ 2 ဒါ အာဘြာဟမ် မိူဝ် ဒိုဝ်း ကြုဝ်ကြာမ် အန် ဂိုဝ် ဘုန် အူ ဘုန် ဝီ လှူ ဒီ အန်။ ဆီဖဝ် လွင် ဒါင် စိူဝ် အာမေခေဒေက် တီ၊ အူ မျုဝ် န့ လေး၊ “ခုန်ဒီခမ် အီ မိုဝ်း နဝ်း ဆိူဝ် နဝ်း မှာန်။” စိူဝ် ပေါ အူ မျုဝ် အီ မုး၊ “ခုန်ဒီခမ် အီ အိုပ် မိူင် ဆာလေမ်၊” န့ ဘော လေး၊ “ခုန်ဒီခမ် အီ အိုပ် မိူင် တဲး န့ ယေန်။” 3 အန် တူ မိုဝ်း ဂုန့် မာ၊ အာဝ် မိုဝ်း ဇာရာင် ဒါ ယာ ခြိုဝ် အန်။ အာဝ် မိုဝ်း ဆီငဲ ဒေါ ဂွိုတ် အန် ဘော ဆီငဲ ဒေါ ယမ် အန်။ အန် ဟဲ့ ပီ ဂွန် ဇဝ်ဖြာ၊ ဘဲန် ဒူအီ အီ လှူ ဒီ ဇဝ်ဖြာ အီ ကွယ် ဆေဆေ။

4 တဲး ဘေ ကာဒွါ့ ကာဖာ ခဲ့ တာင် ခဲ့ ဘွတ် အာမေခေဒေက် တီ။ ဂုန့် ဒင် အေ အီ မုး အာဘြာဟမ် တီ မိူဝ်၊ ဆီ ဘော လုဝ် ဒိုဝ်း ကြုဝ်ကြာမ် ပဲ့ ဟဲ့ ပွိုန် တး အန် ဒီ ဒူင် ကာဂုဝ်း အန် တွိုန်၊ ဝီ လှူ ဒီ အန် ဂိုဝ် ဘုန် အူ ဘုန်။ 5 ဒူအီ ခြိုဝ် အာလေဝီ၊ ဂေ ဟဲ့ ပွိုန် ဒီ ဘဲန် ဒူအီ အီ လှူ ဒီ ဇဝ်ဖြာ၊ တဲး န့ ဒူပ် ဒါရာ ဇဝ်ဖြာ။ ဇဝ်ဖြာ ဟဲ့ စ်ု ဂေ၊ တဲး ဂေ ဂဲပ် အုန် ပီ လှူ ဘီနွင် ဂေ ဂိုဝ် ဘုန် အူ ဘုန်။ ဂေ ပီ ဘော ဟဲ့ မုး ခြိုဝ် ဒါ အာဘြာဟမ် မိူဝ်၊ ဂေ ယီ ဆီ လုဝ် ဝီ လှူ။ 6 အီ မုး အာမေခေဒေက် တီ၊ အန် ပီ ဆ မုး ဒူအီ ခြိုဝ် အာလေဝီ မိူဝ်၊ အန် ယီ ဟဲ့ ပွိုန် ဒိုဝ်း ဂိုဝ် ဘုန် အူ ဘုန် ပီ လှူ ဒါ အာဘြာဟမ်။ အန် ပီ ဝီ မွင့်ကာရာ ဒွါ ဒီ အာဘြာဟမ် အီ မုး ဒူအီ ပဲ့ ဟဲ့ ဒွါ ဇဝ်ဖြာ ကာဒိက် ဆတ်ဇာ။ 7 ပါယ် တီ၊ န့ ဟဲ့ လိုဝ်း ဆီချာ၊ ဒူအီ တာင် ဟဲ့ မွင့်ကာရာ ဒွါ ဒီ ဒူအီ နာ ခြိုမ် အန်။ 8 ဂေ ဒူအီ အီ လှူ ဒီ ဇဝ်ဖြာ အီ ဟဲ့ ဂဲပ် အုန် ဂိုဝ် ဘုန် အူ ဘုန်၊ ဂေ မုး ဒူအီ အီ နပ် ဒီ ယမ်။ အီ မုး အာမေခေဒေက် အီ ဟဲ့ ဒိုဝ်း ဂိုဝ် ဘုန် အူ ဘုန်၊ ဂေ ဟဲ့ ကာလာင် လွင် အန်၊ အန် ကွယ် ဆေဆေ။ 9 ဒဲင် တီ၊ ဟဲ့ ပွိုန် တဝ်း အီ မုး ဂေ ဒူအီ ခြိုဝ် အာလေဝီ၊ ဂေ အီ ဂဲပ် အုန် ဂိုဝ် ဘုန် အူ ဘုန်၊ ဂေ ဟဲ့ ဟွတ့် လှူ ဂိုဝ် ဘုန် အူ ဘုန် ဒူပ် ဒါ အာဘြာဟမ် ကူပ် မုး ဂေ လှုက်လှာန် အန်။ 10 ခုဝ်၊ ဒေါ ကာတုန့် အာမေခေဒေက် ဒီ ဒါ အာဘြာဟမ် တီ၊ ဂေ ဒူအီ ခြိုဝ် အာလေဝီ ညှမ် ဂွိုတ် ဒီ ဂုန့် ဒင် ဂေ။ ဂေ ဆီ ကွယ် ခဲင် ဒုဝ် အန်။

11 န့ ယီ မုး ဂေ ဒူအီ အီဆာရေလ၊ ဇဝ်ဖြာ ဟဲ့ ဒွါ ဒါရာ ဒီ ဂေ ဒေါ စ်ု အန် ဂေ ဒူအီ ခြိုဝ် အာလေဝီ ဘဲန် ဒူအီ အီ လှူ ဒီ ဇဝ်ဖြာ။ ဆေ ဂေ ပွိုန် ဒီ ဘဲန် ဒူအီ အီ ဟဲ့ ဇေ့ဇုင် ကူပ် လှူ ဂေ ဒူအီ ခြိုဝ် အာလေဝီ ဒီ ဇဝ်ဖြာ ဒါင် ဂေ၊ အာဝ် ဟူ လုဝ် ဝီ မိုဝ်း ဒူအီ အီ လှူ ဒီ ဇဝ်ဖြာ ပေါ အူ ဝီ။ ပေါ အူ ဝီ တီ၊ အန် မုး ဒူအီ အီ လှူ ဒီ ဇဝ်ဖြာ ပီ အာမေခေဒေက်။ အာဝ် ပီ အာရူန် တွိုန်။ 12 ဆေ ဂါန် ဂေ ဒူအီ အီ လှူ ဒီ ဇဝ်ဖြာ ယီ လာယ် ကာပ့လု၊ ဒါရာ ဘော လုဝ် ကာပ့လု ဒီ အာတ့်။ 13 ခုဝ်၊ ဒူအီ အီ လှူ ဒီ ဇဝ်ဖြာ အီ ပီ အာမေခေဒေက် တီ၊ အန် တး ခဲင် ခြိုဝ် အီ ဟဝ်။ ခဲင် ခြိုဝ် အန် တီ၊ န့ ညှမ် မိုဝ်း ခေါ အူ ဝီ အီ ဟဲ့ ဒွိုမ် ဘဲန် ဒူအီ အီ လှူ ဒီ ဇဝ်ဖြာ။ 14 န့ ဟဲ့ လိုဝ်း ဆီချာ၊ အန် ဇဝ် အီ မုး ဒူအီ အီ လှူ ဒီ ဇဝ်ဖြာ တီ၊ အန် မုး ခြိုဝ် အာယူဒါ။ အာမုဝ်ဆဲ ယီ တူ မိုဝ်း ဒီ ကာလာင် ခြိုဝ် တီ ဒီ မိုဝ်း ဒူအီ အီ လှူ ဒီ ဇဝ်ဖြာ။ 15 လွင် အန် တီ၊ န့ ဟဲ့ ဝဲ လိုဝ်း ဆီချာ။ ဆေ န့ ဝီ မိုဝ်း ဒူအီ အီ လှူ ဒီ ဇဝ်ဖြာ ပေါ အူ ဝီ အီ ပီ အာမေခေဒေက်၊ 16 ဒူအီ ဝီ တီ၊ အန် တူ ဘူင် ဂါန် အန် ကူပ် မုး အန် လှုက်လှာန် အာလေဝီ။ အန် ဟဲ့ ဘဲန် ဒူအီ အီ လှူ ဒီ ဇဝ်ဖြာ ကူပ် မိုဝ်း အန် အာဆာက် အီ တူ နပ် ဒီ တူတ့်။ ပွုန် အန် တီ တဲး အန် ပွိုန် ဒီ ဘူင် ဂါန် အန်။ 17 ခုဝ်၊ ခဲင် ဘပ် ဇဝ်ဖြာ ဟဲ့ ဒဲမ် အုန် လွင် အန် တီ တဝ်း၊ “မဲ မုး ဒူအီ အီ လှူ ဒီ ဇဝ်ဖြာ ဆေဆေ၊ တဲး မဲ ပီ အာမေခေဒေက်။”

18 ပါယ် တီ၊ ဒါရာ ဘြိမ် တွိုန် ဟဲ့ ပွိုန် ဝဲန် ကူပ် တူ မိုဝ်း အန် ပွုန်၊ တူ မိုဝ်း ဒီခုဝ်။ 19 ခုဝ်၊ ဒါရာ ဘြိမ် တီ၊ အန် တူ ပွိုန် စွယ် တဲး ဒူအီ ဇေ့ဇုင်။ မာလဲ၊ အေ ဟဲ့ ဝီ ပွိုန် ဒီ ထူမ် ဒါရာ အီ တဲး အေ မိုဝ်း ပီ နှဝ့် န့ဒဝ့် အီ မွှိုမ် လွှိုမ် ဒါရာ ဘြိမ် တီ။ ကူပ် ပီ နှဝ့် န့ဒဝ့် အေ တီ၊ အေ ပွိုန် ဒီ တး ကွယ် ကာဒိုက် ကာဒဝ့် ဒီ ဇဝ်ဖြာ။

20 ခုဝ်၊ ဇဝ်ဖြာ ဟဲ့ ဟွတ့် ဒိူင် လွင် ဂါန် ပီ ဘူင် ဒူအီ အီ လှူ ဒီ ဇဝ်ဖြာ အီ ပီ အာမေခေဒေက် တီ။ ဒူအီ အီ လှူ ဒီ ဇဝ်ဖြာ ဝီ ဟဝ်၊ ဇဝ်ဖြာ တူ ဒွိုမ် မိုဝ်း ဒီ ဒိူင်။ 21 အီ မုး ဇဝ် ယေဆူ၊ ဇဝ်ဖြာ ယီ ဟဲ့ ဟွတ့် ဒိူင် လွင် အန် တဝ်း၊ “ဇဝ်ဖြာ ဟဲ့ ဒိူင် တဝ်း၊ ‘မဲ ဟဲ့ ဘဲန် ဒူအီ အီ လှူ ဒီ ဇဝ်ဖြာ ဆေဆေ။ မဲ ပီ အာမေခေဒေက်။’ အန် ဇဝ် တူ ကာပ့လု နဝ်း အန် တီ ဒေါ မှဝ်။” 22 ကူပ် ဟဲ့ ဒိူင် အန် ပါယ် တီ၊ န့ တဲး အေ နပ် ဆီချာ၊ ဇဝ် ယေဆူ ဟဲ့ တဲး အေ ပွိုန် ကာဒိက် ဆတ်ဇာ ဇဝ်ဖြာ အီ ဟဲ့ မွှိုမ် လွှိုမ် ဒါရာ ဘြိမ် တွိုန်။ 23 န့ ယီ ဒွိုမ် မိုဝ်း ဒူအီ ကိူန် အီ ဟဲ့ ဘဲန် ဒူအီ အီ လှူ ဒီ ဇဝ်ဖြာ။ ကူပ် မုး ဂေ ဒူအီ အီ နပ် ဒီ ယမ်၊ ဂေ တူ ပွိုန် ဒီ ဘူင် ဂါန် ဂေ ဆေဆေ။ 24 ဇဝ် ယေဆူ ယီ မိုဝ်း အာဆာက် အီ ကွယ် ဆေဆေ။ ခုဝ်၊ အန် ဘော ပွိုန် ဘူင် ဂါန် ဒူအီ အီ လှူ ဒီ ဇဝ်ဖြာ ဆေဆေ။ အာဝ် မိုဝ်း အီ လုဝ် ပ့လု အန် ဒေါ မှဝ်။ 25 ကူပ် န့ ပါယ် တီ၊ ဘော ဒေါ တီ နီ၊ ဘော နာ အာတ့် နီ ဟာဝ် ဆေဆေ၊ အန် ဘော ပွိုန် ချွတ် ဂေ အီ ညှိုမ် ဘိုင် အန်။ အန် ဒီ တဲး ဂေ ပွိုန် ဒီ ကွယ် ရိုမ် ဒူပ် ဇဝ်ဖြာ။ အန် မိုဝ်း အာဆာက် အီ အိမ် ဆေဆေ၊ တဲး အန် ပွိုန် ဒီ ဆာခိုဝ် ဒီ ဇဝ်ဖြာ ဒါင် ဂေ။

26 ဒူအီ အီ မုး ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ ဇိုဝ် တီ၊ အန် ဟဲ့ ကာဂိုင် ကာဒါန် ခဲ့ ပီ လုဝ် အေ။ အန် ဇဝ် ဟဲ့ ဘွတ်၊ အာဝ် မိုဝ်း အာဆေ အီ ပွိုန် ကာလာင် နာ တူ မွှိုမ် လွင် အန်။ အန် မိူဝ် တူ မိုဝ်း မှာပ်၊ တူ ကွယ် ရိုမ် ဒူပ် ဂေ ဒူအီ အီ မိုဝ်း မှာပ်။ ဇဝ်ဖြာ ဟဲ့ တဲး အန် ကွယ် ခဲင် ဂါင်ဟြာဝ်။ 27 အန် မိူဝ် တူ လုဝ် ရဲန် ပီ ဒီ လှူ ဒွန် ဆီငဲ ပီ ဂေ အီ ဟဝ် အီ မုး ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ။ ဂေ လုဝ် လှူ တဲး န့ ဂဝ်း ဝဲန် မှာပ် ဒုဝ် ဘြိမ် ဂေ ဒီ အာတ့်။ ဟဲ့ ဟွတ့်၊ ပီ ဝီ လုဝ် လှူ တဲး န့ ဂဝ်း ဝဲန် မှာပ် ဂေ ဒူအီ ဟဝ်။ အီ မုး ဇဝ် ယေဆူ၊ အန် ဟဲ့ လှူ ပီ ဒီ လှူ အန် အူ ဇေန့် ဒေါ လှူ အန် ဒုဝ် ဘူင့် အန် ဒီ ဇဝ်ဖြာ။ 28 ဒါရာ ဇဝ်ဖြာ ပီ ဒဲမ် အာမုဝ်ဆဲ တွိုန်၊ န့ တဲး ဒူအီ အီ တူ ဇေ့ဇုင် ဘဲန် ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ။ မာလဲ၊ ကာဒိက် ဆတ်ဇာ ပီ ဒိူင် အုန် ဇဝ်ဖြာ ဝါယ် အန် တီ န့ ယီ တဲး ဂွန် အန် ဇဝ် ဘဲန် ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ ဒါင် အေ၊ အီ ဟဲ့ ဇေ့ဇုင် ဘော ကွယ် ဆေဆေ။