1-2 ဆေ န့ ပါယ် တီ၊ ကွဲ့ တဲး အေ ဝီ စုး ဒီ ဒင် ပီ မာနုဝ် လွင် ဇဝ် ယေဆူ။ တဲး အေ ဝီ ဟေန် ပီ လုဝ် ဟေန် ဒူအီ အီ ဟဲ့ ညှိုမ် ဆီချာ အီ ပီ ဒူအီ တာင်။ အာဝ် လုဝ် ဝီ ဟေန် လွင် ဝဲန် ပီ ဘူင် ဒွန် မျုဝ် အီ တူ ဘဲန် အာဂျိုဝ် မာဆေ၊ ဘော လွင် ညှိုမ် အေ ဇဝ်ဖြာ၊ ဘော လွင် လုဝ် စိုပ် ခဲင် အိုမ် ဘော ဒါင် ဒဲ ဒဲင် ဂိန့် ဒူအီ၊ တဲး န့ မွင့်ကာရာ ဒွါ ဒီ ဂေ။ အာဝ် လုဝ် ဝီ စုး ဒီ မာနုဝ် ဘော လွင် ဂေ အီ ဟဲ့ ယမ် ဒီ ဝီ ယိတ့် ဝီ အိမ်၊ ဘော လွင် ဒီ ဒမ် ဇဝ်ဖြာ မှာပ် ဒီ အီ ပီ လုဝ် ခမ် ဂေ ဆေဆေ။ 3 အေ ဒီ ဘော ဘူင် ပါယ် တီ၊ ဆေ ဇဝ်ဖြာ ဟဲ့ တဲး အေ ဘူင်။

4-6 ဆေ န့ မိုဝ်း ဒူအီ အီ ဟဲ့ ဒွိုမ် ယိုဝ် နာ မုး နာ မှာန် လွင် ဇဝ်ဖြာ၊ န့ ပီ ဂေ ဟဲ့ ယိုဝ် ဘ့လာင် အန်။ ဂေ မိူဝ် ဟဲ့ ဟွတ့် ဒိုဝ်း ပီ ဒွါ ဇဝ်ဖြာ ဒီ ဂေ၊ တဲး န့ ပီ ဂေ ဟဲ့ စိမ် ပီ ဒီ ဟူမ် အီ ဆီငဲး။ နဝ်း ဖွိုမ် ဇဝ်ဖြာ မိူဝ် ဟဲ့ လိုပ် ခဲင် နဝ်း ဂေ။ ဂေ မိူဝ် ဟဲ့ ပွိုန် အီ မွှိုမ် ဒေါ ထူမ် ဂေ ဂြုဝ်း ဇဝ်ဖြာ၊ နပ် ဘော လွင် ပွုန် ဇဝ်ဖြာ အီ ဒီ လိုဝ်း ဆီချာ ဇာတ် ဒီ တး။ ဂေ ဒူအီ အီ ဟဲ့ ဟွတ့် ပွိုန် ဒွန် မျုဝ် ဇိုဝ် တီ၊ ဆေ ဂေ ယီ ဝဲန် ဇဝ်ဖြာ ဘော တူ ဝီ ညှိုမ် ဘိုင် ဇဝ်ဖြာ၊ အာဝ် ဟူ ပွိုန် ဘူင် မာဆေ၊ တဲး ဂေ ဝီ လှုဝ်း ဝဲန် မှာပ် ဂေ။ ခုဝ်၊ ဂေ ဘူင် တဲး ဂွန် ဇဝ်ဖြာ ဝီ ခမ် ဒီ ယမ် ဒဲင် ရွင့် ကာဝဲ့ ပေါ အူ ဇေန့်၊ တဲး ဂေ ဝီ ဖျာက် ဆာရေ အန်။ ပီ ဘူင် ဂေ တီ ဒီ တဲး ဂေ စှိုမ်။

7 န့ ဘော ပီ မာန် ပီ ရန့် ဒူအီ။ ဆေ ဂ့လာယ် ဘော စုဝ်း ဆေဆေ၊ န့ မုး မွင့်ကာရာ ပီ ဒွါ ဇဝ်ဖြာ အီ တဲး ဒဝ် ဂေ ပေတ့် စေဝ် တာင်၊ တဲး န့ ဘော ဘဲန် အာဂျိုဝ် ဒီ ဒူအီ အီ ဆမ်။ 8 မာလဲ၊ ဆေ ကာဒါယ် တီ ယီ ဝီ လတ့် မီ မာအာတ့် ဒီလူယ်၊ ကာဒါယ် တီ အာဝ် မိုဝ်း ဒီခုဝ် မာဆေ။ အန် ဒီ လုဝ် ခမ် ပီ ဒိူင် ဇဝ်ဖြာ။ ဒီ ကာဒဲ့ အန်၊ ဂေ ဒီ လုဝ် ဒုဝ့် ကာဆိုမ် ခဲင် ငဝ်။

9 အိုယ် ဘေ ဘီနွင် ပီ ရွက့် အုဝ်၊ အုဝ် ပီ ဘော ဟဲ့ တဝ်း ပါယ် တီ မိူဝ်၊ အုဝ် ယီ ဟဲ့ နပ်၊ ဘေ တူ ပီ ကာဒါယ် အီ တူ မွှိုမ် တီ။ ဘေ ဟဲ့ ပွိုန် ပီ မွင့်ကာရာ ဒွါ ဇဝ်ဖြာ တဲး န့ ချွတ် ဘေ။ 10 ခုဝ်၊ ဇဝ်ဖြာ တူ ဘူင် အီ တူ မုး တူ မှာန်။ အန် မိူဝ် တူ ပိဝ် ပဲ့ ဟဲ့ ဘူင် ဘေ။ ဘေ ဟဲ့ ဘျ ခဲ့ ရွက့် ဘေ ဇဝ်ဖြာ ဒေါ ဟဲ့ စွယ် ဟဲ့ ယွတ် မဲန် ဘေ ဒီ ဒူအီ အီ ညှိုမ် ဇဝ်ဖြာ။ ဘော ဒေါ တီ နီ၊ ဘေ ဘော ဘူင် ဟာဝ် ပါယ် တီ။ 11 ယေ ယီ ဆီ တဲး ဘေ ဒွန် အီ အွန် ဒီ ဘူင် တဲး ဘေ နပ် ဆီချာ လွင် ပီ နှဝ့် န့ဒဝ့် ဘေ။ တဲး ဘေ နပ် ဆီချာ၊ န့ ဟဲ့ မုး ဟဲ့ မှာန် အာခါခ်ု။ ယေ ဆီ တဲး ဘေ ဂျုဝ်ဂျာ လွင် အန် တီ၊ တဲး န့ ကော ဇမ် ပန် ဒီ တူတ့် အာဆာက် ဘေ။ 12 ယေ တူ ဆီ တဲး ဘေ ကြာန်။ ယေ ဆီ တဲး ဘေ ညိုင် ဂေ အီ ဟဲ့ ညှိုမ် ဆီချာ ဘော ခမ် ဒီ ယိူန် လှေန့်၊ တဲး ဂေ ပွိုန် ခဲ့ ပီ ကာဆဲန့် ဇဝ်ဖြာ ဒီ ဒွါ။

13 ဇဝ်ဖြာ ဟဲ့ ဒွါ ကာဒိက် ဆတ်ဇာ ဒီ အာဘြာဟမ် ဘော ဒိူင် တဲး အန် နပ် ဆီချာ ဂြုဝ်း အန် ဟဲ့ မှာန်။ န့ ယီ တူ မိုဝ်း အီ ဆီ ဒီ တာင် လွှိုမ် အန် ဇဝ်၊ အီ ဒီ ပွိုန် ထူမ် ပီ ဒိူင် အန်။ ခုဝ်၊ အန် ဟဲ့ ဒိူင် ရာင် အန် တဝ်း၊ 14 “အုဝ် အီ မုး ဇဝ်ဖြာ အီ တာင် လွှိုမ် တူတ့်၊ အုဝ် ကာလာင် ဂြုဝ်း မှာန် အာခါခ်ု။ အုဝ် ဒီ မွင့်ကာရာ ဒွါ ဒီ မဲ၊ တဲး ခြိုဝ် မဲ ဘြဲ ကိူန်။” 15 ပါယ် တီ၊ အာဘြာဟမ် ဘော အူတ် နဝ်း ဘော နှဝ့် လှေန့်၊ တဲး အန် ကော ပွိုန် ခဲ့ ပီ ကာဆဲန့် ဇဝ်ဖြာ ဒီ ဒွါ။

16 ဆေ န့ မုး အေ ဒူအီ၊ ဆေ န့ ဘော မိုဝ်း ပီ လာယ် ကာထဲန့်၊ အေ ဘော နပ် ဒီ ဒိူင်၊ တဲး ဒူအီ အီ ဟဲ့ ဘွတ် မျာတ် လွှိုမ် အေ ပွိုန် ဒီ ထူမ်။ ဆေ ဒူအီ တီ ဒီ ဘော တဝ်း၊ ဂြုဝ်း ပီ ဒိူင် အေ ဟဲ့ မှာန်၊ န့ ဘော ပဲ ပီယေန် ဂြုဝ်း ပီ လာယ် ကာထဲန့် အီ ဒွန် မျုဝ်။ 17 ဇဝ်ဖြာ ယီ ဆီ ဘျ ဒီ ဂေ ဒွန် အီ အီ ဒီ ပွိုန် ခဲ့ ပီ ဒွါ အန် ကာဒိက် ဆတ်ဇာ၊ တဲး ဂေ နပ် ပီ တဝ်း အန် ဇဝ်၊ န့ တူ ကာပ့လု တူ ဘျွင် ဒေါ မှဝ်။ ခုဝ်၊ အန် ဇဝ် ဟဲ့ ဒိူင်၊ တဲး အီ နပ် ဆီချာ၊ ဂြုဝ်း ကာဒိက် ဆတ်ဇာ အန် တီ ဟဲ့ မုး ဟဲ့ မှာန်။ 18 ဇဝ်ဖြာ အီ တူ နပ် ဒီ ကာလုဝ် ဒေါ မှဝ်၊ အန် ဟဲ့ ဒွါ ကာဒိက် ဆတ်ဇာ ဘော ဂြုဝ်း ပီ ဒိူင် အန် တီ။ အာ မျုဝ် တီ၊ န့ တူ ဘျွင် ဒေါ မှဝ်၊ တဲး အေ ပွိုန် ဒီ ဘိုင် အန် ဇဝ်။ န့ ပီ အေ ဟဲ့ ကာဘ့လဲပ် ဟာဝ် ဒူင် ကွယ် ဇဝ်ဖြာ တဲး အေ ဒိုဝ်း ပီ ဒီ နှဝ့် န့ဒဝ့် နာ အာတ့် နီ ဟာဝ်။ ကာဒိက် ဆတ်ဇာ ပီ ဒွါ ဇဝ်ဖြာ ဘော ဂြုဝ်း ပီ ဒိူင် အန် တီ၊ န့ ဒီ တဲး အေ မိုဝ်း နဝ်း တာင် ဘော ပွိုန် ဒီ ဘိုင် ဆီချာ အန် ဇဝ်။ 19 ပီ နှဝ့် န့ဒဝ့် အေ တီ၊ န့ ပီ ဟိန် ရိုဝ် ဆင်ဖုဝ် ပီ ဘျွာ လူင် အီ ခဲင် အိုမ်၊ တဲး န့ ကွယ် ဆီချာ။ န့ တဲး နဝ်း အေ ညှိုမ် ဆီချာ။ ပီ နှဝ့် န့ဒဝ့် အေ တီ၊ န့ တဲး အေ မိုဝ်း နဝ်း မန် ဆီချာ န့ ဘော တဲး အေ ကွယ် ရိုမ် ဒူပ် ဇဝ်ဖြာ။ န့ ပီ အေ ပွိုန် ဒီ လိုပ် ခဲင် ဟုဝ် ဇဝ်ဖြာ ခဲင် ဟူင် အီ မုး ဒူင် ဘွတ် လွှိုမ် တူတ့် အီ ကွယ် နာ ခဲင် ဘိက် ဂွင့် တွိုန်။ 20 ဇဝ် ယေဆူ ဟဲ့ ဟွတ့် လိုပ် ဟာဝ် ဒီ တီ ဒီ အာတ့် အေ၊ တဲး အန် လှူ နှာမ် အန် ကာဒါင် ဒုဝ် အေ။ အန် ဟဲ့ ဘဲန် ဒါ တာင် အေ အီ အိုပ် တူတ့် ဒူအီ အီ လှူ ဒီ ဇဝ်ဖြာ ဆေဆေ၊ တဲး အန် ပီ အာမေခေဒေက် တွိုန်။