ဆေ န့ မုး ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ၊ ဇဝ်ဖြာ ဟဲ့ ရဝ်း လေး အန် ကာတဲ ဂေ ဒူအီ ကိူန်။ ဇဝ်ဖြာ မိူဝ် တဲး အန် ကာဒါင် ဒူအီ ကိူန်၊ တဲး အန် ဘူင် ဂါန် ဇဝ်ဖြာ ဘော လှူ ပီ ဒီ လှူ ဘဲန် မျုဝ် ဘဲန် မျုဝ် ဒီ ဇဝ်ဖြာ။ အန် ဒီ လှူ ဘော ပီ ဒီ လှူ အီ ဂဝ်း ဝဲန် မှာပ်။ 2 အန် မုး ဒူအီ ပီ ဂေ အီ ဟဝ် အီ တူ မိုဝ်း ပ့လူမ် ဂေ ဟဲန့် မင် ဇေန့် မင် ဇေန့်။ ခုဝ်၊ အန် နပ် ဒီ ယိူန်၊ တူ ဘူင် တဲး န့ ကာဆဝ် ဒီ ဂေ အီ တူ နပ် မာဆေ ဘော ဂေ အီ ဟဲ့ ကာလိုပ်။ 3 ကူပ် န့ ပါယ် တီ၊ အန် ဘော လုဝ် လှူ ပီ ဒီ လှူ အီ ဂဝ်း ဝဲန် မှာပ် အာဒါ ဒူအီ ကိူန်၊ ဘော အာဒါ မှာပ် ဒုဝ် ဘြိမ် အန်။

4 အာဝ် မိုဝ်း အာဆေ အီ ပွိုန် ဝီ ဒါင် ဒုဝ် ဘြိမ် အန်၊ တဲး အန် ဘဲန် ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ။ န့ မုး ဇဝ်ဖြာ အီ ရဝ်း ဒူအီ ဇိုဝ် တီ၊ တဲး န့ ပီ ပဲ့ ဟဲ့ ရဝ်း အန် အာရူန် တွိုန်။ 5 ဇဝ် ယေဆူ မိူဝ် ပါယ် တီ၊ အန် တူ ပီဖုင် ဒုဝ် ဘြိမ် အန်၊ တဲး အန် ဘဲန် ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ။ ဇဝ်ဖြာ ယီ ဟဲ့ ရဝ်း အန် တဝ်း၊ “မဲ မုး ဂွန် အုဝ်။ အာတိုဝ် အုဝ် ဟဲ့ ဘဲန် ဂုန့် မဲ။” 6 ပေါ အူ ပ့လုဝ့် ဇဝ်ဖြာ ဟဲ့ တဝ်း၊ “မဲ မုး ဒူအီ အီ လှူ ဒီ ဇဝ်ဖြာ ဆေဆေ၊ တဲး မဲ ပီ အာမေခေဒေက် တွိုန်။”

7 ဒေါ ကွယ် ဇဝ် ယေဆူ ဒဲင် ကာဒါယ် နီ၊ အန် ဟဲ့ ဒွိုမ် ယာမ် ဘော ဒတ် တာင်၊ ဆာခိုဝ် မှာန့် ဒီ ဇဝ်ဖြာ အီ နပ် ဒီ တဲး အန် လွတ် ယမ်။ ကူပ် မိုဝ်း အန် နဝ်း ဂူမ် ဘော ရုဝ်ဆေ ဇဝ်ဖြာ၊ ဇဝ်ဖြာ မိူဝ် ဟဲ့ ထူမ် ဂြုဝ်း ပီ ဆာခိုဝ် အန်။ 8 အန် ပီ ဘော ဟဲ့ မုး ဂွန် ဇဝ်ဖြာ မိူဝ်၊ အန် ယီ လုဝ် ခမ် ဒုက် ဘဲန် မျုဝ် ဘဲန် မျုဝ်၊ တဲး အန် ဟေန် ဒီ ထူမ် ဂြုဝ်း ဇဝ်ဖြာ။ 9 ဝါယ် ဟဲ့ ခမ် ဇဝ် ယေဆူ ဒီ ဘူင် ဇေ့ဇုင် တူတ့် ဒွန် မျုဝ်၊ အန် မိူဝ် ပွိုန် ဒီ ချွတ် ဂေ ဒူအီ အီ ထူမ် ဂြုဝ်း အန်၊ တူ တဲး ဂေ ဝီ စှိုမ် ဒေါ မှဝ်။ 10 ဇဝ်ဖြာ မိူဝ် ဟဲ့ တဲး အန် ဘဲန် ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ အီ ပီ အာမေခေဒေက် တွိုန်။

11 လွင် အန် တီ၊ န့ ဟဲ့ မိုဝ်း ကိူန် ပီ ဒီ လုဝ် ကာလာင် အုဝ်။ ကူပ် ကြာန် ဘေ ဒီ ထူမ် ဆီချာ၊ န့ ဘော ညှာပ် ကာဆဝ် ဒီ ကာလာင် တဲး န့ ကာလှုး ဒီ နဝ်း ဘေ။ 12 ဘူင့် မှာန် အန်၊ ဘေ ဟဲ့ ကာဒါန် ဘဲန် ဆာရာ အီ မာနုဝ် အီ ဟဝ် ကူပ် ဟဲ့ ညှိုမ် လှေန့် ဘေ။ ဘေ ယီ ဝီ လုဝ် ခမ် အီ ဟဝ် မာနုဝ် ဘေ၊ တဲး ဘေ ဝီ ဟေန် စုး ဆိန့် ဒီ ဒင် အန် လွင် ဂြုဝ်း ဇဝ်ဖြာ။ န့ ပီ ဘေ ဆီ လုဝ် ဒျီင် အိုမ် ပူ ပီ ဂွန် င။ ဘေ ညှမ် ပွိုန် ဟူမ် ပီ ဒီ ဟူမ် အီ ပ့လူမ်။ 13 ဝီ အီ ဆီ ဒျီင် အိုမ် ပူ တီ၊ အန် ဆီ ပီ ဂွန် င၊ အန် ညှမ် နပ် ဆီချာ လွင် နဝ်း ဆိူဝ် နဝ်း မှာန် ပီ ဒွါ ဇဝ်ဖြာ ဒီ အန်။ 14 ဂေ ဒူအီ တာင် ယီ ပွိုန် ဒီ ဟူမ် ပီ ဒီ ဟူမ် အီ ပ့လူမ်။ ဂေ ဟဲ့ နပ် ဒီ ကာဒွါ့ ကာဖာ ဆီချာ ကူပ် တူ ကြာန် ဂေ ဒီ ဇေန့်ဇာ။ ခုဝ်၊ ဂေ ဘော နပ် ဒီ ကာယဝ်း အီ မွှိုမ် အီ တူ မွှိုမ်။