ဒေါ တီ နီ၊ ဇဝ်ဖြာ ဟဲ့ ဟွတ့် ဒွါ ကာဒိက် ဆတ်ဇာ ဒီ အေ။ အန် ဆီ တဲး အေ လိုပ် ဒီလှဝ် ခဲင် မိူင် ပီ ဒီ အာပ် အန် ဒီ အေ။ ဆေ န့ ပါယ် တီ၊ တဲး အေ ဆာဒိက်၊ ကွဲ့ တဲး န့ မိုဝ်း ဒူအီ မင် အီ ကာတဲ ဘေ အီ တူ ပွိုန် ဒီ လိုပ် ခဲင် မိူင် တီ။ 2 ခုဝ်၊ ဘော အေ ဘော ဂေ ဒူအီ ဒေါ မွိုန် ဟဲ့ ပွိုန် ဒီ ထူမ် လွင် ဒီ ပွိုန် ဒီ လိုပ် ဒီလှဝ် ခဲင် မိူင် ပီ ဒီ အာပ် ဇဝ်ဖြာ တီ။ မာလဲ၊ ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ် တီ၊ န့ ယီ တူ ဘဲန် အာဂျိုဝ် ဒီ ဂေ ဒူအီ ဒေါ မွိုန် တီ ကူပ် တူ ညှိုမ် ဂေ ခဲင် နဝ်း ဂေ။ 3 အေ ဒူအီ အီ ဟဲ့ ညှိုမ် နီ၊ အေ ယီ ပွိုန် ဒီလှဝ် ခဲင် မိူင် ပီ ဒီ အာပ် ဇဝ်ဖြာ ဒီ အေ။ ခုဝ်၊ အန် ဇဝ် ဟဲ့ ဒွိုမ် ကာလာင် လွင် အန် တီ တဝ်း၊ “အုဝ် ဟဲ့ ရူ ကာဆဝ် ဘော တဝ်း၊ ‘ဂေ ဒိူန် တူ ပွိုန် ဒီ လိုပ် ဒီလှဝ် ခဲင် မိူင် ပီ ဒီ အာပ် အုဝ် ဒီ ဂေ။’” ဇဝ်ဖြာ ပီ ဘော ဟဲ့ ဟွတ့် ခြာမ် တူတ့် ဒွန် မျုဝ် ပီ ဒီ ဘူင် အန် ဆိန့် ဒေါ ဖာန် ဘ့လေး အန် ဇဝ် ကာဒါယ် နီ၊ အန် ယဲ့ ဟဲ့ ကာလာင် ဂြုဝ်း တီ ဒီ ဂေ ဒူအီ အီ တူ ညှိုမ် ကာဒိက် ဆတ်ဇာ အန် တွိုန်။ 4 ခဲင် ဘပ် ဇဝ်ဖြာ န့ ဟဲ့ ဒဲမ် အုန် လွင် ဆီငဲ မ့ဘူ တွိုန်။ န့ တဝ်း၊ “ဝါယ် ဟဲ့ ဟွတ့် ဇဝ်ဖြာ ဘူင် တူတ့် ဒွန် မျုဝ်၊ ဒေါ ဇမ် ဆီငဲ မ့ဘူ၊ ဇဝ်ဖြာ ဒီလှဝ်၊ တူ ဘူင် မာဆေ။” 5 လွင် ပီ ဒီလှဝ် တီ၊ အန် ဟဲ့ တဝ်း ပဲ့ ဟဲ့ ဟွတ့် အုဝ် ဒဲမ် တွိုန်။ အန် ဟဲ့ တဝ်း၊ “ဂေ ဒိူန် တူ ပွိုန် ဒီ လိုပ် ဒီလှဝ် ခဲင် မိူင် ပီ ဒီ အာပ် အုဝ် ဒီ ဂေ။”

6 ကူပ် န့ ပါယ် တီ၊ အာဆေ ဆီ လိုပ် ဒီလှဝ် ခဲင် မိူင် တီ ဒေါ တီ နီ၊ အန် ဟဲ့ ပွိုန် ဒီ လိုပ်။ အီ မုး ဂေ အီ ဟဲ့ ပွိုန် ဒီ ယိုဝ် ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ် ဒေါ မွိုန်၊ ဂေ ယီ တူ ပွိုန် ဒီ လိုပ် ကူပ် တူ ထူမ် ဒူပ် ဂေ ဂြုဝ်း ဇဝ်ဖြာ တီ။ 7 ဇဝ်ဖြာ ဟဲ့ ဝီ အုန် ပေါ အူ ဆီငဲ အီ မုး အာတိုဝ် နီ။ ဝါယ် ဟဲ့ ဟွတ့် ကာလာင် ဇဝ်ဖြာ ဒီ ဂေ ဒူအီ အီဆာရေလ၊ န့ ဟဲ့ လှေန့် ကာဆဝ်၊ အန် ဇဝ် ဝီ တဲး အာဒါဝိတ် ဝီ ကာလာင် ပေါ အူ ဇေန့် တဝ်း၊ “အာတိုဝ် နီ၊ ဆေ ဘေ ထူမ် ဂြုဝ်း ဇဝ်ဖြာ၊ ကွဲ့ တဲး နဝ်း ဘေ ဒိူဝ်။” 8 ဆေ အာယောဆူ ဟဲ့ ဟွတ့် ဒွါ ဒူင် ဒီ ဒီလှဝ် ဒီ ဂေ ဒူအီ တွိုန်၊ ဝါယ် အန် တီ ဇဝ်ဖြာ မိူဝ် တူ လုဝ် ဝီ ဘ့လေး ပေါ အူ ဆီငဲ အီ တဲး ဒူအီ ပွိုန် ဒီ ဒီလှဝ်။ 9 ကူပ် န့ ပါယ် တီ၊ န့ လိုဝ်း ဆီချာ၊ န့ ဆီ မိုဝ်း ဆီငဲ ဒီ ပွိုန် ဒီ ဒီလှဝ် ဂေ ဒူအီ အီ ညှိုမ် ဇဝ်ဖြာ။ 10 ခုဝ်၊ အာဆေ ဒီ လိုပ် ဒီလှဝ် ခဲင် မိူင် ပီ ဒီ အာပ် ဇဝ်ဖြာ တီ၊ အန် မိူဝ် အာဝ် ဟူ လုဝ် ဘူင် ဂါန် မာဆေ၊ တဲး န့ ပီ ဇဝ်ဖြာ မိူဝ် တူ ဘူင် မာဆေ ဒေါ ဒီလှဝ် အန် ဆီငဲ မ့ဘူ တွိုန်။ 11 ဆေ န့ ပါယ် တီ၊ တဲး အေ ဂျုဝ်ဂျာ တဲး အေ ပွိုန် ဒီ လိုပ် ဇမ် ဒူင် ဒီ ဒီလှဝ် တီ။ ကွဲ့ တဲး န့ မိုဝ်း ဒူအီ အီ စှိုမ် ခေါ အူ ဝီ။ ကွဲ့ တဲး အေ ပီ ဂေ ဒူအီ အီ ဟဲ့ စှိုမ် တွိုန် ကူပ် တူ ထူမ် ဂေ ဂြုဝ်း ဇဝ်ဖြာ။

12 ဂြုဝ်း ဇဝ်ဖြာ၊ န့ ပီ ဟဲ့ မိုဝ်း အာဆာက်၊ မိုဝ်း ဘော ပွုန်။ န့ ဘော ပီ မာပွါ့ လာင် အီ မိုဝ်း ဘ့လာ အာ ဘ့လာက်။ န့ ယီ မွှိုမ် လွှိုမ် မာပွါ့ လာင် အီ ဟဲ့ လမ် ကာဆဝ်။ န့ ပီ၊ ဟဲ့ နပ် ဒီ ဒဲပ်၊ တဲး န့ ကာဒတ် ဘော နဝ်း ဘော ဖွိုမ်။ န့ ဘော ပီ၊ ဟဲ့ နပ် ဒီ ဒဲပ် တဲး ဘော ကာအာင် ဘော ကာငှဲတ့် ကာဒတ်။ ဟဲ့ နပ် ဘော ပီ ဇေန့်ဇာ အေ ခဲင် နဝ်း ဘော ပီ ခြာမ် အေ ဒီ ဘူင်၊ နပ် ဘော ဒီ ဆုင်ဖျာတ် ယုဝ် န့ မွှိုမ် တူ မွှိုမ်။ 13 ဒီ အာတ့် ဇဝ်ဖြာ အာဝ် မိုဝ်း အီ ပွိုန် ချြီင် ခေါ အူ မျုဝ်။ ပဲ့ ဟဲ့ ဖာန် ဘ့လေး ဇဝ်ဖြာ ဒွန် မျုဝ်၊ န့ ဟဲ့ လိုဝ်း ဆီချာ ဒီ အန် ဇဝ်။ ပါယ် တီ၊ ဘော အေ ဒီ လုဝ် ဘျ တူတ့် ပီ ပါယ် အေ ဒွန် မျုဝ် ဒီ အာတ့် ဇဝ်ဖြာ။

14 ဒေါ တီ နီ၊ အေ ဟဲ့ မိုဝ်း ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ အီ ဟဲ့ တာင် ကာဆဝ်၊ အီ ဟဲ့ ဝီ ဟုဝ့် ဂါင်ဟြာဝ်။ န့ မုး ဇဝ် ယေဆူ အီ မုး ဂွန် ဇဝ်ဖြာ။ ခုဝ်၊ ဆေ အေ တဝ်း၊ အေ ညှိုမ် ဇဝ် ယေဆူ တီ၊ တဲး အေ ညှိုမ် ဆီချာ ဆေဆေ။ 15 ဒါ တာင် အေ တီ အီ မုး ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ၊ အန် ဟဲ့ နပ် ဆီချာ အီ ဒုက် အီ ညှာပ် ဒီ နဝ်း အေ။ အန် ဘော နပ် ဒီ ကာဝေ အေ။ ခုဝ်၊ အန် မိူဝ် ဟဲ့ ဒွိုမ် ကာဒုး ဒုက် ခဲင် နဝ်း၊ ဟဲ့ ဒွိုမ် ခမ် တူတ့် ဒွန် မျုဝ် ပီ ကာဒုး အေ နီ။ အန် ဟဲ့ ခမ် ပီ ကာဆုး ဘုဝ် ကာနမ် ဒီ အန် အီ ပီ ပီ ကာဆုး ဘုဝ် ကာနမ် ဒီ အေ။ အန် ယီ တူ ဘူင် မှာပ် ဒေါ မှဝ်။ 16 ခုဝ် အန် တီ တဲး အေ ယ ဒီ တး ဒူင် ကွယ် ဇဝ်ဖြာ အီ မိုဝ်း နဝ်း ဆီ ဂေဇူ အေ။ အန် ဒီ ဘော ဂေဇူ အေ ဘော စွယ် အေ ဒေါ တူ မိုဝ်း အေ ဒူင် ဒီ ဘိုင်။