အိုယ် ဘေ ဘီနွင်၊ ဘေ ဟဲ့ ဟွတ့် ဘဲန် ဒူအီ အီ ဆီငါ ဘွတ်။ ဘော ဘေ ဟဲ့ ဟွတ့် ဒူပ် ဇဝ်ဖြာ ဒေါ ဒဲ့ အန် ဒီ ဘေ။ အုဝ် တဝ်း ဒီ ဘေ၊ တဲး ဘေ လှုဝ်း ဇဝ် ယေဆူ ဆေဆေ။ ခုဝ်၊ န့ မုး အန် ဝီ ပီ ရဝ်း ပီ တိုယ် ဇဝ်ဖြာ။ အန် မိူဝ် ဟဲ့ ဘဲန် ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ ဒါင် အေ။ အန် ဘော မုး ဝီ ပီ ညှိုမ် အေ။ 2 အန် ဇဝ် ဟဲ့ ဘူင် နာ မှာန် ဆေဆေ၊ တဲး န့ ဒူပ် ပီ အိုင် ဇဝ်ဖြာ အီ ဟဲ့ ရဝ်း အန်။ ပဲ့ ဟဲ့ ဘူင် အန်၊ န့ ဘော ပီ ပဲ့ ဟဲ့ ဘူင် အာမုဝ်ဆဲ အီ ဟဲ့ ဘူင် နာ မှာန် ဒွန် မျုဝ် ဒီ ဂေ ဒူအီ အီ မုး အာမျုဝ် ပီ ရဝ်း ဇဝ်ဖြာ။ 3 ဆေ န့ မုး ဒူအီ အီ ဆမ် ကာင်၊ အန် ဟဲ့ မိုဝ်း ဆာရေ လွှိုမ် ကာင် ပီ ဆမ် အန် တီ။ ဇဝ် ယေဆူ မိူဝ် ပါယ် တီ။ ဟဲ့ ကာအာပ် အန် မိုဝ်း ဆာရေ လွှိုမ် အာမုဝ်ဆဲ။ 4 ကာင် ဒွန် ကာတု၊ န့ မိုဝ်း ဒူအီ အီ ဘူင်။ ပါယ် တီ၊ ခဲ့ ကွယ် ဒွန် မျုဝ်၊ န့ မုး ဇဝ်ဖြာ အီ ဘူင်။ 5 အာမုဝ်ဆဲ၊ အန် မုး ဒဲစေန့် ဇဝ်ဖြာ။ အန် ဟဲ့ ဘူင် နာ မှာန် ဆေဆေ ဒေါ ဘူင် အန် ဂါန် ပဲ့ ဟဲ့ စ်ု ဇဝ်ဖြာ အန် ဘူင်။ ပါယ် တီ၊ အန် ဟဲ့ ဘျ ဘဲန် မျုဝ် ဘဲန် မျုဝ် လွင် ပီ ဒီ ကာလာင် ဇဝ်ဖြာ ဝါယ် အန် တီ။ 6 အီ မုး ဇဝ် ယေဆူ၊ အန် ယီ မုး ဂွန် ဇဝ်ဖြာ။ အန် ဟဲ့ ဘူင် နာ မှာန် ဆေဆေ ဒေါ ယွတ် မဲန် အန် ဂေ ဒူအီ ပီ အိုပ် ဇဝ်ဖြာ။ အေ ယီ မုး ဒူအီ ပီ အိုပ် ဇဝ်ဖြာ တီ။ အေ ယီ လုဝ် ညှိုမ် ဆီချာ ဘော ယ ဒီ ကာလာင် လွင် ပီ နှဝ့် န့ဒဝ့် အေ၊ တဲး န့ ကော ဇမ် ပန် ဒီ တူတ့် အာဆာက် အေ။

7 ခုဝ်၊ နဝ်း ဖွိုမ် ဇဝ်ဖြာ ဟဲ့ ဒွိုမ် တဝ်း၊ “အာတိုဝ် နီ ဆေ ဘေ ထူမ် ဂြုဝ်း ဇဝ်ဖြာ၊ 8 ကွဲ့ တဲး နဝ်း ဘေ ဒိူဝ် ပီ နဝ်း ဒါ ဒါ ဘေ ဟဲ့ ဒိူဝ် ဒေါ ကွယ် ဂေ ခဲင် ပြဲ ကာဟဝ်း တွိုန်။ 9 ဂေ ပီ ဘော ဟဲ့ ယိုဝ် ပီ ဘူင် အုဝ် ကော နုဝ့် ဖွုန် ဂိုဝ် ဆီနမ် မိူဝ်၊ ဂေ ယီ ဝီ ထေဝ် နဝ်း အုဝ် ဘဲန် မျုဝ် ဘဲန် မျုဝ်။ 10 ခုဝ် အန် တီ အုဝ် ဘော ရူ ဒီ ဒူအီ အာမျုဝ် တီ တဝ်း၊ ‘ဒူအီ ဂေ နီ၊ ဂေ မိုဝ်း နဝ်း ဆီ ဝး အုဝ် ဆေဆေ။ ဂေ ဟဲ့ ဝဲန် တူတ့် ဂြုဝ်း ပီ ကာလာင် အုဝ် ဒီ ဂေ။’ 11 အုဝ် ဟဲ့ ရူ ကာဆဝ် ဘော တဝ်း၊ ‘ဂေ ဒိူန် တူ ပွိုန် ဒီ လိုပ် ဒီလှဝ် ခဲင် မိူင် ပီ ဒီ အာပ် အုဝ် ဒီ ဂေ။’”

12 အိုယ် ဘေ ဘီနွင်၊ တဲး ဘေ ဆာဒိက်။ ကာတဲ ဘေ တီ၊ ကွဲ့ တဲး န့ မိုဝ်း ခေါ အူ ဝီ အီ မိုဝ်း နဝ်း ဟာယ် ကာဆဝ်၊ အီ တူ ဝီ ညှိုမ် ဘိုင် ဇဝ်ဖြာ၊ အီ ဟဲ့ ဝီ ဝဲန် ဇဝ်ဖြာ အီ အိမ် ဆေဆေ။ 13 ဒွန် ဆီငဲ၊ တဲး ဘေ လာယ် စွယ် ဒီ ညှိုမ် ဆီချာ။ ဒေါ ဆီ မိုဝ်း အာခြာဝ် ဒီ ပွိုန် တဝ်း၊ “အာတိုဝ် နီ၊” တဲး ဘေ ဒူပ် ဆီချာ ဇဝ်ဖြာ။ ကွဲ့ တဲး န့ မိုဝ်း ခေါ အူ ဝီ အီ မိုဝ်း နဝ်း ဒိူဝ် ကူပ် ဟဲ့ ကာလုဝ် ကာနမ် ဒီ အန် ဘော ကာဆုး အန် ဘူင် မှာပ်။ 14 ခုဝ်၊ အေ ဟဲ့ ဘဲန် ဒူအီ အီ ဘူင် ဂါန် ရိုမ် ဒူပ် ဇဝ် ယေဆူ။ အေ ယီ လုဝ် ညှိုမ် ဆီချာ ပီ ညှိုမ် အေ ဆိန့် ဒေါ ဂုဝ် အန်၊ တဲး န့ ကော ဇမ် ပန် ဒီ တူတ့် အာဆာက် အေ။ 15 ပါယ် တီ၊ န့ ဟဲ့ ဟွတ့် ဒဲမ် အုန် ခဲင် ဘပ် ဇဝ်ဖြာ တဝ်း၊ “အာတိုဝ် နီ၊ ဆေ ဘေ ထူမ် ဂြုဝ်း ဇဝ်ဖြာ၊ ကွဲ့ တဲး နဝ်း ဘေ ဒိူဝ် ပီ နဝ်း ဒါ ဒါ ဘေ ဟဲ့ ဒိူဝ် ဒေါ ကွယ် ဂေ ခဲင် ပြဲ ကာဟဝ်း တွိုန်။”

16 ဂေ အီ ဟဲ့ ယိုဝ် ဂြုဝ်း ဇဝ်ဖြာ ဘော ကာဘး ဒီ အန်၊ န့ မုး အာဆေ။း န့ မုး ဂေ ဒူအီ ပီ ယဲတ့် လေး အာမုဝ်ဆဲ ခဲင် မိူင် အဲဂိုပ် တွိုန်။ 17 ဇဝ်ဖြာ ဟဲ့ ရူ ဒီ အာဆေ အာဒါ ဖွုန် ဂိုဝ် ဆီနမ် တီ။း န့ မုး ဂေ အီ ဘူင် မှာပ်၊ ဂေ အီ ဟဲ့ ယမ် ခဲင် ပြဲ ကာဟဝ်း တွိုန်။ 18 ဒူအီ ပီ ဒိူင် ပီ တဝ်း ဇဝ်ဖြာ၊ “ဂေ ဒိူန် တူ ပွိုန် ဒီ လိုပ် ဒီလှဝ် ခဲင် မိူင် ပီ ဒီ အာပ် အုဝ် ဒီ ဂေ၊” န့ ဘော မုး ဂေ အီ တူ ညှိုမ် တီ။ 19 ဆေ န့ ပါယ် တီ၊ အေ ဟဲ့ ဟွတ့် နပ် ဆီချာ၊ ဂေ ဒူအီ ဇိုဝ် တီ၊ ဂေ တူ ပွိုန် ဒီ လိုပ် ခဲင် မိူင် တီ ကူပ် တူ ညှိုမ် ဂေ။