ကူပ် န့ ပါယ် တီ၊ အာရေ အန် ဟဲ့ တာင် ကာဆဝ်၊ တဲး အေ ဝဲ ထူမ် ဆီချာ ဂြုဝ်း ဇဝ်ဖြာ ပဲ့ ဟဲ့ ဒွိုမ် ထူမ် အေ၊ ကွဲ့ တဲး အေ ပိဝ် ဒေါ မှဝ်၊ ကွဲ့ တဲး အေ ကြဲ ဒီ လာယ် ကာယာန် ဒီ ဇဝ်ဖြာ။ 2 ခုဝ်၊ ဒါရာ ပီ ကာလာင် ဂေ အာမူ အာမာတ် ဇဝ်ဖြာ ဒီ ဂေ ဂုန့် ဒင် အေ ဒေါ မွိုန်၊ န့ ဟဲ့ မုး ဟဲ့ မှာန်။ အာဆေ ဟဲ့ ကာလိုပ် ဟဲ့ လုတ့် ဒါရာ တီ၊ အန် မိူဝ် ဟဲ့ ကာဒုး ဒီ ခမ် မှာပ် အန်။ 3 န့ ဘော ပါယ် တီ။ ဆေ အေ တူ ထူမ် ဂြုဝ်း ဇဝ်ဖြာ အီ မိုဝ်း ပွုန် တာင် အီ ပွိုန် ချွတ် အေ၊ မှဝ် အေ ဒီ ပါယ် ဒီ လွတ်။း ဂြုဝ်း အီ ပွိုန် ချွတ် အေ တီ၊ ဇဝ်ဖြာ ဟဲ့ ကာလာင် အုန် ဒီ အာတ့်၊ တဲး ဂေ အီ ဟဲ့ ပွိုန် ဒီ ထူမ် ဝီ ကာလာင် ဒီ အေ တဝ်း၊ န့ ဟဲ့ မုး ဟဲ့ မှာန်။ 4 ဘော ဇဝ်ဖြာ ဟဲ့ တဲး အေ နပ်၊ ဂြုဝ်း တီ ဟဲ့ မုး ဟဲ့ မှာန်။ ခုဝ်၊ အန် ဟဲ့ ဘူင် အီ မွှိုမ် အာမ် ကာဆဝ် ဘဲန် မျုဝ် ဘဲန် မျုဝ် အီ ဘျ ပွုန် အန်။ အန် ဇဝ် မိူဝ် ဟဲ့ တဲး ဂေ ပွိုန် ဂေဇူ ဘဲန် မျုဝ် ဘဲန် မျုဝ် ပီ ဒွါ နဝ်း ဖွိုမ် ဇဝ်ဖြာ၊ တဲး န့ ဒူပ် ပီ အိုင် ဇဝ်ဖြာ။

5 ဆေ အေ ကာလာင် လွင် ကာဒါယ် ကာမာယ် ပီ ဒီ ဘူင် ဇဝ်ဖြာ ဒီ တဲး အေ ကွယ် နာ ခဲင်၊ ဇဝ်ဖြာ တူ အာပ် ကာဒါယ် တီ ဒီ အာမူ အာမာတ် အန်၊ တဲး ဂေ ဘဲန် ဒါ တာင် အီ အိုပ် ကာဒါယ် တီ။ 6 န့ ယီ ဟဲ့ မိုဝ်း ဒူအီ အူ ဝီ၊ အန် ဟဲ့ ဒွိုမ် ကာလာင် လွင် အန် တီ။ အန် ဟဲ့ ဒဲမ် အုန် ခဲင် ဘပ် ဇဝ်ဖြာ တဝ်း၊ “အိုယ် မဲ ဇဝ်ဖြာ၊ ဒူအီ တူ မိုဝ်း ဒီခုဝ် မာဆေ။ မဲ ယီ တူ ပိဝ် ဂေ။ အာမျုဝ် ဒူအီ ဘော ဒွန် မျုဝ် အာဝ် ခိုက်ခမ် မာဆေ။ မဲ ယီ ယွတ် မဲန် ဂေ။ 7 မဲ ဇဝ် ဟဲ့ တဲး အာယာ ဒူအီ ယူမ် ဂေ အာမူ အာမာတ် ဇဝ်ဖြာ အီ စဲက်။ မဲ ဇဝ် ယီ တဲး ဒူအီ ဝီ မိုဝ်း အာဖုင် ဒင်ခုဝ် ဘော ဆာရေ၊ တဲး န့ ပီ မဲ ဟဲ့ စှိုပ် မင်ဂိုမ် ဒီ ဂိန့် ဂေ။ 8 မဲ ဇဝ် ဟဲ့ ဝီ တဲး ဂေ အိုပ် တူတ့် ဒွန် မျုဝ်။” ခဲင် ဘပ် ဇဝ်ဖြာ ဟဲ့ ဒဲမ် ပါယ် တီ။ ပီ တဝ်း ဇဝ်ဖြာ ဒီ တဲး ဒူအီ အိုပ် တူတ့် ဒွန် မျုဝ် တီ၊ န့ တူ မိုဝ်း ခေါ အူ မျုဝ် ပီ တူ ပွိုန် အန် ဒီ အိုပ်။ မာလဲ၊ အေ ယီ ညှမ် ယိုဝ် ဂေ ဒူအီ အိုပ် တူတ့် ဒွန် မျုဝ် တီ။

9 အေ ယီ ဟဲ့ ယိုဝ် ဇဝ် ယေဆူ။ ဇဝ်ဖြာ ဟဲ့ တဲး အန် ယူမ် ဂေ အာမူ အာမာတ် ဇဝ်ဖြာ အာဒါ အီ စဲက်။ ကူပ် ခမ် အန် ဒီ ယမ် ကာဒါင် ဒူအီ ဒွန် အီ၊ အန် ဟဲ့ ဝီ မိုဝ်း ဆာရေ ဘော အာဖုင် ဒင်ခုဝ် အီ ပီ အန် စှိုပ် မင်ဂိုမ်။ ပါယ် တီ၊ န့ မုး ပီ ဂေဇူ ဇဝ်ဖြာ အီ ဟဲ့ တဲး အန် ခမ် ဒုက်၊ ခမ် ဒီ ယမ်၊ ကွဲ့ တဲး အေ ဒွန် အီ ဝီ လုဝ် ခမ်။

10 ဇဝ်ဖြာ အီ ဟဲ့ ဖာန် ဘ့လေး ဒွန် မျုဝ် ဘော လိုမ်လာ ယွတ် မဲန် ဒွန် မျုဝ်၊ အန် ဟဲ့ တဲး ဒူအီ ကိူန် ဝီ ဘဲန် ဂွန် အန် ဘော ပွိုန် အာဖုင် ဒင်ခုဝ် အီ ပီ အာဖုင် ဒင်ခုဝ် ဇဝ်ဖြာ။ ပီ ဘူင် အန် တီ၊ န့ ဟဲ့ ကာဂိုင် ကာဒါန် ဒီ ပဲ့ ဟဲ့ စ်ု ဇဝ်ဖြာ ဇဝ် ယေဆူ ဘူင်။ ဇဝ် ယေဆူ ဟဲ့ ယဲတ့် ဂေ ဒူအီ ကိူန်၊ တဲး န့ ချွတ် ဂေ။ ကူပ် ဟဲ့ ခမ် အန် ဒုက် တာင်၊ အန် မိူဝ် ဟဲ့ ပွိုန် ဒီ ဘူင် တဲး န့ ဇေ့ဇုင် တူတ့် ဒွန် မျုဝ်။ 11 ဇဝ် ယေဆူ အီ တဲး ဒူအီ မိုဝ်း နဝ်း ဆီငါ ဘွတ် ဘော ဂေ ဒူအီ အီ ဟဲ့ ပွိုန် နဝ်း ဆီငါ ဘွတ်၊ ဂေ ဟဲ့ တး ဒီ ဂုန့် အူ ကာဒင် အီ မုး ဇဝ်ဖြာ။ ခုဝ်၊ ဇဝ် ယေဆူ မိူဝ် တူ ဆာယ် ဒီ တဝ်း၊ ဂေ အီ ဟဲ့ မိုဝ်း နဝ်း ဆီငါ ဘွတ်၊ ဂေ မုး ဝါ အန်။ 12 အန် မိူဝ် တဝ်း ဒီ ဇဝ်ဖြာ၊ “အုဝ် ဒီ ကာလာင် လွင် မဲ ဇဝ်ဖြာ ဒီ ဂေ ဝါ အုဝ် ဒွန် အီ။ အုဝ် ဒီ တဝ်း မှုဝ် အီ အိူပ် မဲ ဇဝ်ဖြာ ကာတဲ ဂေ ဒူအီ ကိူန်။” 13 အန် ပီ ဝီ တဝ်း ပေါ အူ ဇေန့်၊ “အုဝ် ဒီ ဘိုင် မီ ဇဝ်ဖြာ။” ဟဲ့ ဟွတ့်၊ အန် ပီ ဝီ တဝ်း၊ “ဘော အုဝ် ဘော ဂေ ဒူအီ ပီ ဒွါ မဲ ဇဝ်ဖြာ ဒီ အုဝ်၊ ယေ ဟဲ့ ကွယ် ဒီ နီ။” 14 ဒူအီ ဂေ တီ၊ ဂေ ဘော မုး ဒူအီ အီ မိုဝ်း ဒုဝ် ဘူင့်။ ခုဝ်၊ ဘော ဇဝ် ယေဆူ ဟဲ့ ဘဲန် ပီ ဂေ၊ တဲး အန် ခမ် ဒီ ယမ်၊ တဲး အန် ပွိုန် ဒီ ပျာတ့် ဝဲန် ပွုန် ဇဝ် မာရာန အီ တဲး ဒွန် အီ ယမ်၊ အီ မုး ဘုဝ် ကာနမ်။ 15 ဂေ ဒူအီ အီ ယုဝ် ဒီ ယမ်၊ ဂေ ပီ ဒူအီ အီ ဟဲ့ ဘဲန် မှာယ် ဇဝ် မာရာန တီ ဘော စုဝ် အာဆာက် ဂေ။ ဇဝ် ယေဆူ ယီ တဲး ဂေ လွတ်၊ တဲး ဂေ ဝီ ပွိုန် ဒီ ကွယ် ထင်ဟာင် ကူပ် ခမ် အန် ဒီ ယမ် ကာဒါင် ဂေ။ 16 ကူပ် န့ ပါယ် တီ၊ အာဝ် မုး အန် စွယ် ဂေ အာမူ အာမာတ် ဇဝ်ဖြာ။ န့ လိုဝ်း ဆီချာ လွင် စွယ် အန် ဂေ ဒူအီ အီ မုး လှုက်လှာန် အာဘြာဟမ်။

17 ကူပ် န့ ပါယ် တီ၊ ပီ ဘူင် ပီ ပါယ် ဇဝ် ယေဆူ ဒွန် မျုဝ်၊ န့ လုဝ် ဘဲန် ပီ အေ ဒူအီ အီ မုး ဝါ အန်။ ပါယ် တီ၊ အန် ဟဲ့ ပွိုန် ဒီ ဘဲန် ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ ဒါင် အေ။ အန် ဒီ ဘော မိုဝ်း နဝ်း ကာဝေ အေ ဘော နပ် ဒီ ဘူင် ဆီချာ ဂါန် ဇဝ်ဖြာ။ အန် ဒီ ဘော ပွိုန် ဒီ ဘူင် တဲး အေ ဒူအီ ဘောကာဂ့လျီတ် ဝီ ဒါခိုယ် ဒီ ဇဝ်ဖြာ။ 18 အန် ဇဝ် ဟဲ့ ဒွိုမ် ခမ် ဒုက် တာင် ဒေါ ဟဲ့ ကာဆုး ဘုဝ် ကာနမ် ဒီ အန်၊ တဲး အန် ဘူင် မှာပ်။ ခုဝ်၊ အန် ပီ ဝီ ပွိုန် စွယ် ဂေ ဒွန် အီ အီ ကာဒုး ပီ ကာဆုး ဘုဝ် ကာနမ်၊ တဲး ဂေ ဘူင် မှာပ်။