အာတ့် နီ ဟဲ့ လှေန့် ကာဆဝ်၊ ဇဝ်ဖြာ ဟဲ့ စ်ု ဂေ ဒူအီ အီ ဘျာန် ဂြုဝ်း ဇဝ်ဖြာ တဲး ဂေ ကာလာင် ဒီ ဂေ ဂုန့် ဒင် အေ ဘဲန် ဇေန့် ဘဲန် ဇေန့်။ န့ ဘော ဟဲ့ မိုဝ်း ဘဲန် မျုဝ် ဘဲန် မျုဝ် ပီ ပါယ် ဇဝ်ဖြာ ဒီ ကာလာင် ဂြုဝ်း ဒီ ဂေ။ 2 အာတ့် ဒီ တူတ့် ဇာတ် နီ၊ ဇဝ်ဖြာ ယီ ဟဲ့ တဲး ဂွန် အန် ကာလာင် ဂြုဝ်း ဒီ အေ။ ဇဝ်ဖြာ ဟဲ့ ဒွိုမ် တဲး ဂွန် အန် တီ ဘူင် ဒွန် မျုဝ်၊ တဲး န့ မိုဝ်း။ အန် ဒီ ဘော အာပ် တူတ့် ဒွန် မျုဝ် ဒီ ဂွန် အန် တီ။ 3 ဂွန် ဇဝ်ဖြာ တီ၊ အန် ဘော ပီ ဘ့လာင် အီ တဲး န့ လိုဝ်း အာဖုင် ဒင်ခုဝ် ဇဝ်ဖြာ။ အန် မိူဝ် ဘျ ဆီချာ တူတ့် ဒွန် မျုဝ် ပီ ပါယ် ဇဝ်ဖြာ။ ဂြုဝ်း ပီ ကာလာင် အန် ဘော မိုဝ်း ပွုန် ဒီ ယွတ် မဲန် တူတ့် ဒွန် မျုဝ် ဒဲင် ကာဒါယ် နီ၊ ကွဲ့ တဲး န့ လိုဝ်။ ဝါယ် ဟဲ့ ဟွတ့် အန် ဂဝ်း ဝဲန် မှာပ် ဒူအီ ဘောကာဂ့လျီတ်၊ အန် ဟဲ့ ဝီ ဟုဝ့် ဂါင်ဟြာဝ် ဝီ ကွယ် ဘ့လာက် အာအး ဇဝ်ဖြာ အီ အိုပ် တူတ့် ဒွန် မျုဝ်။ 4 ဂွန် ဇဝ်ဖြာ တီ မိူဝ်၊ ဟဲ့ ဘွတ် ဟဲ့ မျာတ် လွှိုမ် ဂေ အာမူ အာမာတ် ဇဝ်ဖြာ ဘောကာဂ့လျီတ်။ ခုဝ်၊ အာယာ ပဲ့ ဟဲ့ ဒွါ ဇဝ်ဖြာ ဒီ အန်၊ န့ ဟဲ့ တာင် လွှိုမ် အာယာ ပဲ့ ဟဲ့ ဒွါ ဇဝ်ဖြာ ဒီ ဂေ အာမူ အာမာတ် အန်။

5 ဇဝ်ဖြာ တူ ဒွိုမ် ကာလာင် ဒီ ဂေ အာမူ အာမာတ် အန် ခေါ အူ ကာဒင် တဝ်း၊ “မဲ မုး ဂွန် အုဝ်။ အာတိုဝ် နီ အုဝ် ဟဲ့ ဘဲန် ဂုန့် မဲ။” အန် မိူဝ် တူ ကာလာင် လွင် အာမူ အာမာတ် ဒေါ ဟဲ့ တဝ်း အန်၊ “အုဝ် ဒီ ဘော ဘဲန် ဂုန့် အန်၊ အန် ဒီ ဘော ဘဲန် ဂွန် အုဝ်။” 6 ဒေါ တိုယ် ဇဝ်ဖြာ ဂွန် အန် အီ မုး ဂွန် ဂိန့်၊ တဲး အန် လူင် ဒဲင် ကာဒါယ် နီ၊ အန် ပီ ဝီ တဝ်း၊ “တဲး ဂေ အာမူ အာမာတ် ဇဝ်ဖြာ ဘောကာဂ့လျီတ် ကြိုပ် အန်။”

7 လွင် ဂေ အာမူ အာမာတ် ဇဝ်ဖြာ တီ၊ ဇဝ်ဖြာ ယီ တဝ်း၊ “ဇဝ်ဖြာ ဒီ တဲး ဂေ ပီ ခုန်။ ဂေ ဒီ ဘဲန် ပီ ဆုတ့် ပီ စ်ု အန်။ ဇဝ်ဖြာ ဒီ တဲး ဂေ ပီ ပ့လဲ့ ငဝ်။”

8 လွင် ဂွန် ဇဝ်ဖြာ တီ၊ အန် ပီ ဝီ တဝ်း၊ “အိုယ် မဲ ဇဝ်ဖြာ၊ မဲ ဒီ ဘော အိုပ် မိူင် မဲ ဆေဆေ။ မဲ ဇဝ် ဒီ ဘော အိုပ် ဆိူဝ် ဆိူဝ် မှာန် မှာန် ဒူအီ ခဲင် မာန် မိူင် မဲ။ 9 မဲ ဇဝ် ဘော ရွက့် နာ ဆိူဝ် နာ မှာန်၊ ယီ ဇွင့် နာ စီစိဝ်။ ခုဝ်၊ ဇဝ်ဖြာ ပီ ကြိုပ် မဲ တီ၊ အန် ဟဲ့ တဲး မဲ မိုဝ်း နဝ်း ဒါခိုယ်၊ တဲး န့ ပီ အန် ဟဲ့ ဒိုဝ်း နာမန် ဖဝ်း ဒီ ဂိန့် မဲ။ အန် ဘော မျုက် မဲ၊ တဲး မဲ တာင် လွှိုမ် ဂေ ဂိုက် မဲ ဒွန် အီ။”

10 အန် ဇဝ် ပီ ဝီ ကာလာင် ပေါ အူ မျုဝ် တဝ်း၊ “အိုယ် မဲ ဇဝ်၊ ဒေါ ဂုဝ် မဲ ဟဲ့ ဖာန် ဘ့လေး ကာဒါယ်။ မဲ ဟဲ့ ဘူင် ဘော ဂါင်ဟြာဝ်။ 11 ဇိုဝ် တီ၊ ဒွန် မျုဝ် န့ ဒီ လိုဝ် တူတ့်။ မဲ ဇဝ် ယီ ကွယ် ဆေဆေ။ ပဲ့ ဟဲ့ ဘူင် မဲ ဒွန် မျုဝ်၊ န့ ဒီ ဘော လိုဝ် ပီ ခြိုင် ပီ တာ အီ။ 12 မဲ ဇဝ် ဒီ ဘော ကာဘွာ ဇိုဝ် တီ၊ ပီ ဒူအီ ကာဘွာ ခြိုင် ဘြိမ်။ မဲ ဇဝ် ဒီ ဘော ကာပ့လု ဇိုဝ် တီ၊ ပီ ဒူအီ ကာပ့လု ခြိုင် ပီ တာ ဂေ။ မဲ ဇဝ် ယီ တူ ဘ့လိူင် ဒေါ မှဝ်။ အာဆာက် မဲ မိူဝ် တူ နပ် ဒီ တူတ့် ဒေါ မှဝ်။”

13 ဇဝ်ဖြာ မိူဝ် တူ ဒွိုမ် ကာလာင် ဒီ ဂေ အာမူ အာမာတ် အန် ခေါ အူ ကာဒင် တဝ်း၊ “တး တုတ့် ဘ့လာက် အာအး အုဝ်၊ တဲး န့ ကော ဇမ် ပန် ဒီ တဲး အုဝ် မဲ အွင် တူတ့် ရန်ဆူ မဲ ဘောကာဂ့လျီတ်၊ တဲး န့ ပီ မဲ ဟဲ့ ညဲတ့် ဂေ။”

14 အာမူ အာမာတ် ဇဝ်ဖြာ ဂေ တီ၊ ဂေ ဘော မုး ဝီညာန် ပီ စ်ု ဇဝ်ဖြာ၊ တဲး ဂေ စွယ် ဒူအီ ပီ ဒီ ချွတ် ဇဝ်ဖြာ။