ခုဝ် အန် တီ တဲး ဘေ ဝဲန် အီ ဟာယ် အီ မိူက် ဒွန် မျုဝ်။ ကွဲ့ တဲး ဘေ ကာလုဝ်၊ ကွဲ့ တဲး ဘေ ညိုင်ရာင် ဘွတ် ဘော လာယ် လှယ့်၊ လာယ် ဖျာက် ဒေါ မှဝ်။ 2-3 ကူပ် ဟဲ့ ခမ် ဘေ ပီ ဂေဇူ ဇဝ်ဖြာ၊ ဘေ ဟဲ့ ပီ ဂွန် င အီ ဂွိုတ် ကာမာယ်။ ခုဝ်၊ တဲး ဘေ ဆီ ထူမ် ဂြုဝ်း ဇဝ်ဖြာ အီ ဆီငါ ဘွတ်၊ တဲး န့ ပီ ဂွန် င အီ ကာပြာန့် မီ အိုမ် ပူ ဒီလူယ်။ ဆေ ဘေ ဘူင် ပါယ် တီ၊ ဘေ ဒီ ဘော ကြဲ ဒီ ညှိုမ် ဆီချာ ဇဝ်ဖြာ၊ တဲး န့ ချွတ် ဘေ။

4 တဲး ဘေ ဘော တး ဘိုင် အန် ဇဝ် အီ ပီ မာဝ် အီ နပ် ဒီ ဒွါ အာဆာက် ကာမာယ် ဒီ အီ။ န့ ပီ ဂေ ဒူအီ အီ ဆမ် ကာင် ဟဲ့ ဝဲန် မာဝ် တီ တဝ်း၊ အာဝ် မိုဝ်း ဒီခုဝ်။ မာလဲ၊ ဇဝ်ဖြာ ယီ ဟဲ့ ရဝ်း အုန်၊ ဟဲ့ တဝ်း၊ ငဝ်း အန် ဟဲ့ တာင် ကာဆဝ်။ 5 ဘော ဘေ ဟဲ့ ပီ မာဝ် အီ ဟဲ့ မိုဝ်း အာဆာက်။ ဇဝ်ဖြာ ဟဲ့ တဲး ဘေ ကွယ် ရိုမ်၊ တဲး ဘော နဝ်း ဖွိုမ် အန် ကွယ် ကာတဲ ဘေ။ ပီ ဘူင် ဇဝ်ဖြာ တီ၊ န့ ပီ အန် ဆမ် ဟုဝ် အာဒါ ဘေ အီ ဟဲ့ ပီ ဒူအီ အီ လှူ ဒီ ဇဝ်ဖြာ။ ပီ လှူ ဘေ တီ ယီ တူ မုး ကြုဝ်ကြာမ်။ န့ မုး ပီ ဒွါ နဝ်း ဖွိုမ် ဇဝ်ဖြာ ဒီ ဘေ။ ပီ ဒီ လှူ ဇိုဝ် တီ၊ န့ ဟဲ့ လဝ့် နဝ်း ဇဝ်ဖြာ ကူပ် ညှိုမ် ဘေ ဒီ ဇဝ် ယေဆူ။ 6 ခုဝ်၊ ခဲင် ဘပ် ဇဝ်ဖြာ ဟဲ့ ဒဲမ် အုန် တဝ်း၊ “တဲး ဘေ ယွတ် ဒေါ တီ နီ၊ အုဝ် ဟဲ့ ရဝ်း ဒူအီ အူ ဝီ အီ ပီ မာဝ် အီ ငဝ်း တာင် ကာဆဝ်။ အုဝ် ဟဲ့ ဘ့လေး အုန် အန် ခဲင် မိူင် ဇီအူန်၊ တဲး အန် ဘဲန် စေန့် ရွင့်။ အာဆေ ညှိုမ် အန်၊ အန် တူ လုဝ် ဆာယ် အီ ဒေါ မှဝ်။” 7 အီ မုး ဘေ အီ ဟဲ့ ညှိုမ်၊ ဘော ဘေ ဟဲ့ ထာင် မာဝ် တီ ဟဲ့ ငဝ်း တာင် ကာဆဝ်။ အီ မုး ဂေ အီ တူ ညှိုမ်၊ ဂေ ယီ ထာင်၊ န့ မုး မာဝ် ပီ ဝဲန် ဂေ ဒူအီ အီ ဆမ် ကာင်။ မာလဲ၊ မာဝ် တီ ဟဲ့ ဝီ ဘဲန် စေန့် ရွင့်။ 8 ပေါ အူ ပ့လုဝ့် န့ ဘော တဝ်း၊ “မာဝ် ဘူင့် တီ၊ န့ ဒီ တဲး ဒူအီ တး ဒုး၊ တး ကာဝှး။ န့ မုး မာဝ် အီ တဲး ဂေ ကေး။” ခုဝ်၊ ဂေ ကာဝှး ကေး ကူပ် တူ ထူမ် ဂေ ဂြုဝ်း ဇဝ်ဖြာ။ အန် ဇဝ် ဟဲ့ တဲး ဂေ ကာဒုး ပါယ် တီ။

9 အီ မုး ဘေ၊ ဘေ ဟဲ့ ဘဲန် ဒူအီ ပီ ရဝ်း အန် ဇဝ်။ အန် ဟဲ့ တဲး ဘေ ဘဲန် ဒူအီ အီ လှူ ဒီ ဇဝ်ဖြာ ဘော ဘဲန် ပီ ခုန်ဒီခမ်။ ဘေ ဟဲ့ ဘဲန် ဒူအီ အာမျုဝ် အီ ဆီငါ ဘွတ်။ ဘေ မုး ဒူအီ ပီ အိုပ် ဇဝ်ဖြာ။ အန် တဲး ဘေ ကာလာင် ပဲ့ ဟဲ့ ဘူင် အန် ဇဝ် အီ မွှိုမ် အာမ် ကာဆဝ်။ အန် ဟဲ့ တဲး ဘေ လေး ခဲင် အပ် ဝွင့်၊ တဲး ဘေ ဝီ ကွယ် ခဲင် ဘ့လာင် အန် ဇဝ်။ ဘ့လာင် တီ ယီ မွှိုမ် အာမ် ကာဆဝ်။ 10 အာတ့် နီ၊ ဘေ တူ မုး ဒူအီ ပီ အိုပ် ဇဝ်ဖြာ။ ဒေါ တီ နီ၊ ဘေ ဟဲ့ ဝီ ဘဲန် ဒူအီ ပီ အိုပ် ဇဝ်ဖြာ။ အာတ့် နီ ဘေ မိူဝ် ညှမ် ပွိုန် ပီ ဂေဇူ ဇဝ်ဖြာ။ ဒေါ တီ နီ၊ အန် ဇဝ် ယီ ဟဲ့ ဂေဇူ ဘေ။

11 အိုယ် ဘေ ဘီနွင် ပီ ရွက့် အုဝ်၊ အုဝ် ဆီ ကာဆုး ဘေ။ ကူပ် မုး ဘေ ဒူအီ အီ ပီ ခဲတ့် ဘော ဒူအီ အီ တူ မိုဝ်း ဒူင် ဒီ ကွယ် ဆေဆေ ဒဲင် ကာဒါယ် နီ၊ ကွဲ့ တဲး ဘေ ဒူပ် နဝ်း ကာဝါတ့် ဘေ အီ ဆီ ပျာတ့် နဝ်း ဖွိုမ် ဘေ။ 12 တဲး ဘေ ဘူင် နာ ဘွတ် နာ မွှိုမ် ကာတဲ ဂေ ဒူအီ အာမျုဝ် ဟဝ် အီ တူ ညှိုမ် ဇဝ်ဖြာ။ ဂေ ပီ ဘော တဝ်း၊ ဘေ မုး ဒူအီ ဟာယ် ဒူအီ မိူက် မိူဝ်၊ ဆေ ဂေ ဝီ ယိုဝ် ပီ ဘူင် ဘေ နာ ဘွတ် နာ မွှိုမ်၊ န့ ဒီ တဲး ဂေ အိူပ် ဇဝ်ဖြာ ပန် ဒီ ဝီ တး လူင် ဇဝ် ယေဆူ။

13 ကူပ် ညှိုမ် ဘေ ဇဝ် ယေဆူ၊ တဲး ဘေ ခမ် ဒီ ထူမ် အာမိင် ပီ ဘ့လေး အုန် ဒါ ကာညာ အီ အိုပ် ဘေ။ ဘော မုး ခုန်ဒီခမ် အီ အိုပ် တူတ့်၊ 14 ဘော မုး ဂေ အာမူ အာမာတ် အီ တာင် ပဲ့ ဟဲ့ ဒါင် ခုန်ဒီခမ်၊ ဘေ လုဝ် ထူမ် ဂြုဝ်း ဂေ တီ။ ခုဝ်၊ ဂေ ဒီ ဆုင်ဖျာတ် ဘော ဒမ် မှာပ် ဒီ ဒူအီ ဟာယ် ဒူအီ မိူက်။ ဂေ ဒီ ဘော ဝီ အိူပ် ဒူအီ အီ ဘူင် နာ ဘွတ် နာ မွှိုမ်။ 15 ခုဝ်၊ ဇဝ်ဖြာ ဆီ တဲး ဘေ ဘူင် နာ ဘွတ် နာ မွှိုမ်၊ တဲး န့ ဘော ကာဘိတ် မူတ့် ဂေ ဒူအီ ရိုဝ် အီ တူ နပ် မာဆေ၊ အီ တူ မိုဝ်း အာငျာန်။ 16 တဲး ဘေ ပီ ဒူအီ အီ ဟဲ့ ကွယ် ထင်ဟာင်။ မာလဲ၊ ဘေ ကွဲ့ ဒိုဝ်း လွင် ထင်ဟာင် ဘေ တီ၊ တဲး န့ ဝီ ဆီဘ့လိုက် ပီ ဘူင် ဘေ အီ တူ ဘွတ် တူ မွှိုမ်။ တဲး ပီ ဘူင် ဘေ ယီ ပီ ပီ ဘူင် ဂေ ဒဲစေန့် ဇဝ်ဖြာ။ 17 တဲး ဘေ ရီမာတ် ဒူအီ ဒွန် အီ။ တဲး ဘေ ရွက့် ဂေ ဘီနွင် အီ ညှိုမ် ဇဝ် ယေဆူ၊ တဲး ဘေ ဘော ယုဝ် ဘော ရုဝ်ဆေ ဇဝ်ဖြာ။ တဲး ဘေ ရုဝ်ဆေ ဘော ခုန်ဒီခမ် အီ အိုပ် ဘေ။

18 ဘေ အီ မုး မှာယ် အီ ဟဝ်၊ တဲး ဘေ ခမ် ဒီ ထူမ် ဘော ရုဝ်ဆေ ဒါ ကာညာ ဘေ ဒွန် မျုဝ်။ အာဝ် မုး ထူမ် မီ ဒါ ကာညာ အီ မိုဝ်း နဝ်း ဒါခိုယ် နဝ်း မွှိုမ်။ တဲး ဘေ ထူမ် ဘော ဒါ ကာညာ အီ ဆီမာ အေး။ 19 ခုဝ်၊ ဆေ ဒူအီ အူ ဝီ လုဝ် ခမ် ဒုက် ကူပ် နဲန အီ ဟဝ် ဒီ အန်၊ ဆေ အန် ဘော ခမ် ဇိုဝ် တီ ကူပ် လှုဝ်း အန် ဇဝ်ဖြာ ဆေဆေ၊ န့ ဟဲ့ ကာအာပ် အိူပ် ဒူအီ ဝီ တီ။ 20 ဆေ ဘေ ယီ ခမ် ဒုက် ကူပ် ဘူင် ဘေ မှာပ်၊ အာဝ် ဘဲန် အာဂျိုဝ် မာဆေ။ ဆေ ဘေ ယီ ခမ် ဒုက် ကူပ် ဘူင် ဘေ နာ ဘွတ် နာ မွှိုမ်၊ ဇဝ်ဖြာ ဒီ ဝီ ဂေဇူ ဘေ။ 21 ခုဝ်၊ ဇဝ်ဖြာ ဆီ တဲး ဘေ ဘူင် ပါယ် တီ။ ဇဝ် ယေဆူ မိူဝ် ဟဲ့ ခမ် ဒုက်၊ တဲး န့ ဘဲန် အူဖာမာ ဒီ ဘေ၊ တဲး ဘေ ဝီ ဒူပ် ဝီ ညိုင် ပီ ပါယ် အန် တီ။ 22 ခဲင် ဘပ် ဇဝ်ဖြာ န့ ဘော တဝ်း၊ “အန် ဇဝ် မိူဝ် တူ ဘူင် မှာပ် ဒေါ မှဝ်။ အာဝ် မိုဝ်း ခေါ အူ ဝီ အီ ဒွိုမ် ယိုဝ် အန် ဇဝ် ကာလာင် ဂြုဝ်း တူ မှာန်။”

23 ဒေါ ကာလာင် ဂေ ဂြုဝ်း စီစိဝ် ဒီ အန်၊ အန် တူ ဝီ ဝျီ့ ဂြုဝ်း ဂေ။ ဒေါ ခမ် အန် ဒုက် တာင်၊ အန် မိူဝ် တူ ကာစွှာ့ ဂေ။ အန် တဲး နဝ်း အန် ဝီ လှုဝ်း ဇဝ်ဖြာ အီ နပ် ဒီ ဆုင်ဖျာတ် ဒူပ် နာ မုး နာ မှာန်။ 24 အန် ဇဝ် ဟဲ့ ခမ် ဒီ ဒိုဝ်း တူတ့် မှာပ် ပဲ့ ဟဲ့ လုတ့် အေ ဘောကာဂ့လျီတ်၊ တဲး အန် ခမ် မှာပ် တီ ဒေါ ယမ် အန် ဒဲင် ရွင့် ကာဝဲ့။ န့ ပီ ဘော အေ ဟဲ့ ခမ် ဒီ ယမ်။ အေ အာဝ် ဟူ မိုဝ်း မှာပ် မာဆေ။ အေ ဟဲ့ ပွိုန် အာဆာက် ကာမာယ် အီ ဒူပ် နာ မုး နာ မှာန်။ ကူပ် ဟဲ့ ခမ် အန် ဇဝ် ဒီ ဆဝ် ဒီ ဒိမ် ကာဒါင် ဘေ၊ န့ တဲး ဘော ဆဝ် ရောဂါ ဘေ ဟြာယ်။ 25 အာတ့် နီ ဘော ဘေ ဟဲ့ ကာလိုပ်။ ဘေ ဟဲ့ ပီ မာဘူ အီ ဟဲ့ ဘျုဝ်း။ ဒေါ တီ နီ၊ ဘေ ယီ ဝီ ပွိုန် ဒီ ဒူပ် ဒါ အီ ဟျီင် မာဘူ အီ မုး အန် ဇဝ် အီ အိုပ် နဝ်း ဖွိုမ် ဘေ။