အုဝ် ဟဲ့ ဟွတ့် ကာလာင် လွင် ဂေ မှာယ် အီ၊ တဲး ဂေ ခမ် ဒီ ဂူမ် ဒါ ကာညာ ဂေ။ ပါယ် တီ၊ ဘော ဘေ အီ မုး အီဘိုန့်၊ ဘေ လုဝ် ခမ် ဒီ ဂူမ် ဘော ထူမ် ဂြုဝ်း အီမာယ် ဘေ။ ဆေ ဘေ ဘူင် ပါယ် တီ၊ ဘော အီမာယ် ဘေ အီ တူ ညှိုမ် ဇဝ်ဖြာ၊ ဘေ ပီ ဆ ကာလာင် ဂြုဝ်း မာဆေ ဒီ ဂေ မိူဝ်၊ န့ ဒီ ကာဆုး နဝ်း ဂေ၊ တဲး ဂေ ဝီ ညှိုမ် ကူပ် ယိုဝ် ဂေ ပီ ဘူင် ဘေ အီဘိုန့်။ 2 ဒေါ ယွတ် ဂေ နာ ဘွတ် နာ မွှိုမ် ပီ ဘူင် ဘေ အီ မုး အီဘိုန့် ဂေ၊ ဆေ ဘေ ဘော နပ် ဒီ ရုဝ်ဆေ ဂေ၊ ဂေ ဒီ ဘော ဖြူမ် ဒီ ညှိုမ် ဒူပ် ဘေ။ 3 ဘေ ယီ တူ လုဝ် မ့ပြာယ် ပီစှိတ် ဒုဝ် ဘေ၊ တဲး န့ စှိတ် မီ နာ ရေတ့်။ ဘေ တူ လုဝ် ဒွန် ဟိုက် ဂိန့် ဘေ၊ ဘော ဟွယ် မာကာဝဲ့ ခြိဝ်၊ ဘော စှိုပ် ခြိုင် စှိတ် အီ ငဝ်း တာင်။ 4 ပီ လုဝ် ဘေ မ့ပြာယ် တဲး န့ စှိတ် တဲး န့ မွှိုမ်၊ န့ မုး နဝ်း ဘေ။ အီ ဘွတ် အီ မွှိုမ် ခဲင် နဝ်း ဘေ၊ န့ တူ လိုဝ်း အူ ဇေန့်။ န့ မိူဝ် တူ နပ် ဒီ လိုဝ်။ အီ မုး နဝ်း န့စု န့စမ် ဘော နဝ်း နှိမ်၊ ဇိုဝ် တီ ဇဝ်ဖြာ မိူဝ် တဝ်း၊ ဟဲ့ ငဝ်း တာင် ကာဆဝ်။ 5 ဂေ အီဘိုန့် အီ မိုဝ်း နဝ်း ဆီငါ အီ ညှိုမ် ဇဝ်ဖြာ ဘာန် ဒေါ မွိုန်၊ ဂေ ဟဲ့ ပီစှိတ် ဂေ ပါယ် တီ။ ဂေ မိူဝ် ဟဲ့ ခမ် ဒီ ထူမ် ဂြုဝ်း အီမာယ် ဂေ။ 6 ဘော နာင် ဆာရာယ် တွိုန် မိူဝ် ဟဲ့ ဘူင် ပါယ် တီ။ အန် ဟဲ့ ခမ် ဒီ ဂူမ်၊ ခမ် ဒီ ထူမ် ဂြုဝ်း အာဘြာဟမ်၊ ဘော တဝ်း ဒီ အီမာယ် အန်၊ “မဲ မုး ဒါ ကာညာ အုဝ်။” ဒေါ တီ နီ၊ ဆေ ဘေ ဝီ ဘူင် နာ ဘွတ် နာ မွှိုမ် ဘော တူ ယုဝ် မာဆေ၊ ဘေ ဟဲ့ ဘဲန် ပီ ဂွန် နာင် ဆာရာယ် တီ။

7 ပါယ် တီ၊ ဘော ဘေ အီ မုး အီမာယ်၊ တဲး ဘေ ကွယ် ရိုမ် ဒူပ် အီဘိုန့် ဘေ ဘော ကာဖာ ဒါင် ဂေ။ တဲး ဘေ မာတ် ဂေ တူ မိုဝ်း ပ့လူမ် ဂေ ဟဲန့် ပီ ဘေ။ တဲး ဘေ ဘော ရီမာတ် ဂေ။ တဲး ဘေ မာတ် ဂေ ဟဲ့ ပွိုန် အာဆာက် ကာမာယ် ပီ ဘေ။ ဂေ မိူဝ် ဟဲ့ ပွိုန် ပီ ဂေဇူ ဇဝ်ဖြာ ပီ ဘေ။ ဘေ လုဝ် ဘူင် ပါယ် တီ၊ ကွဲ့ တဲး န့ မိုဝ်း မာဆေ အီ ဒီ ဂွင့် ဒီ ရဲ ပီ ဆာခိုဝ် ပီ မှာန့် ဘေ ဒီ ဇဝ်ဖြာ။

8 ဘာင် ဒီ ဟွတ့် ဂြုဝ်း နီ၊ အုဝ် တဝ်း၊ တဲး ဘေ ဒွန် အီ လာယ် ဖြူမ် ရိုမ်၊ ဘဲန် အူ နဝ်း။ တဲး ဘေ ဘော လာယ် ကာဖာ ဒါင်၊ ဘော ရွက့် ဘီနွင် ဘေ။ တဲး ဘေ နပ် ဒီ လာယ် ကာဝေ ဘော မိုဝ်း နဝ်း ဂူမ် နဝ်း တျီမ် ဒွန် အီ။ 9 ကွဲ့ ဝီ ဘူင် ဝျီ့ နာ ဟာယ် ဒီ အီ။ ကွဲ့ နဲန ဂေ အီ နဲန ဘေ။ တဲး ဘေ ဝီ မွင့်ကာရာ ဒွါ နာ ဘွတ် နာ မွှိုမ် ဒီ ဂေ အီ ဘူင် နာ စီစိဝ် ဒီ ဘေ။ ခုဝ်၊ ဇဝ်ဖြာ ဆီ တဲး ဘေ ဘူင် ပါယ် တီ။ တဲး ဘော ဘေ ပွိုန် ပီ မွင့်ကာရာ ဒွါ ဇဝ်ဖြာ။ 10 ခုဝ်၊ အာဆေ ဆီ ပွိုန် နဝ်း ဒါခိုယ်၊ အာဆေ ဆီ ကွယ် ဒါခိုယ် ဘဲန် ဆီငဲ ဘဲန် ဆီငဲ၊ ကွဲ့ တဲး အန် ကာလာင် ဂြုဝ်း အီ တူ ဘွတ် အီ တူ မွှိုမ် ဒေါ မှဝ်။ ကွဲ့ တဲး အန် ကာလာင် ဂြုဝ်း ကာလုဝ်။ 11 တဲး အန် ဝး အီ တူ မွှိုမ်၊ ဝီ ဘူင် နာ မွှိုမ်။ တဲး အန် ဘော ဂျုဝ်ဂျာ ဒီ လာယ် ကာလဝ့် ဒီ အီ ဟဝ်။ 12 ခုဝ်၊ ဇဝ်ဖြာ ဒီ ဘော ယွတ် ဂေ အီ မိုဝ်း နဝ်း ဆိူဝ် နဝ်း မှာန်။ အန် ဒီ ဘော ထူမ် ဂြုဝ်း ပီ ဆာခိုဝ် ဂေ။ ဂေ အီ ဘူင် နာ တူ မွှိုမ်၊ ဇဝ်ဖြာ ယီ တူ ယွတ် ဂေ ဒေါ မှဝ်။

13 ဆေ ဘေ အွန် ဒီ ဘူင် နာ ဘွတ် နာ မွှိုမ်၊ အာဝ် မိုဝ်း အီ ဒီ ပွိုန် ပျာတ့် ဘေ။ 14 ဆေ ဘေ ဘူင် နာ မုး နာ မှာန်၊ ဆေ ဘေ ယီ လုဝ် ခမ် ဒုက် ကူပ် ဘူင် ဘေ နာ မုး နာ မှာန်၊ န့ ဘဲန် အာဂျိုဝ် ဒီ ဘေ။ ဘေ ကွဲ့ ယုဝ် ပီ ယုဝ် အီ ဟဝ်၊ ကွဲ့ တဲး န့ ဘဲန် နဝ်း မှဲ၊ နဝ်း ကာဟွာ့ ဒီ ဘေ။ 15 ခဲင် နဝ်း ဘေ၊ တဲး ဘေ ရုဝ်ဆေ မီ ဇဝ် ယေဆူ၊ တဲး ဘေ မာတ် အန် မုး ဇဝ်ဖြာ အီ အိုပ် ဘေ။ ဆေ အီ ဟဝ် ဘော ဒီမွှတ် လွင် ပီ နှဝ့် န့ဒဝ့် ဘေ၊ တဲး ဘေ ဘော ဒန် ဝျီ့ ဒွန် ဇေန့်။ 16 မာလဲ၊ တဲး ဘေ ဝီ ဝျီ့ ဂြုဝ်း ဒါခိုယ် ဂြုဝ်း န့စမ်၊ ဂြုဝ်း အီ ရုဝ်ဆေ ဂေ။ တဲး ဘေ ဘော ဆာဒိက် ဆီချာ နဝ်း ဘေ၊ ကွဲ့ တဲး န့ ဆီ မိုဝ်း ပီ ဒီ လုဝ် ဖျာက် မာဆေ။ ဆေ ဘေ ဘူင် ပါယ် တီ၊ ဂေ အီ နဲန ဘေ ကူပ် ဒူပ် ဘေ ဇဝ် ယေဆူ ဘော ပီ ဘူင် ဘေ နာ ဘွတ် နာ မွှိုမ်၊ ဂေ ဒီ ဝီ ဆာယ် ဘေ။ ဂေ ဒီ ဝီ ဆာယ် ကူပ် ဟဲ့ ဖျာက် ကာလိုပ် ဂေ ဒီ ဘေ။ 17 ခုဝ်၊ ဆေ ဇဝ်ဖြာ ယီ တဲး အေ ခမ် ဒုက် ကူပ် ဘူင် အေ နာ ဘွတ် နာ မွှိုမ်၊ န့ ဟဲ့ မွှိုမ် လွှိုမ် အေ ခမ် ဒုက် ကူပ် ဘူင် အေ နာ ဟာယ် နာ မိူက်။ 18 ဇဝ် ယေဆူ ယီ မုး ဒူအီ အီ မိုဝ်း နဝ်း ဆိူဝ် နဝ်း မှာန်၊ အန် ဟဲ့ ခမ် ဒီ ယမ် ကာဒါင် ဒူအီ အီ တူ မိုဝ်း နဝ်း ဆိူဝ် နဝ်း မှာန်။ အန် ခမ် ဒီ ယမ် အူ ဇေန့် တီ၊ တဲး အေ ပွိုန် ဒီ ကွယ် ဒူင် ကွယ် ဇဝ်ဖြာ။ ဒုဝ် ဘူင့် အန် ဟဲ့ ခမ် ဒီ ယမ်၊ နဝ်း ဖွိုမ် ဇဝ်ဖြာ ယီ ဟဲ့ တဲး အန် ဝီ ယိတ့် ဝီ အိမ်။ 19 နဝ်း ဖွိုမ် ဇဝ်ဖြာ တီ၊ တဲး အန် ဟာဝ် ကာလာင် ဂြုဝ်း ဇဝ်ဖြာ ဒီ ဂေ ကာပြဝ် အီ ကွယ် ခဲင် ကာပိုမ်။ 20 ကာပြဝ် ဂေ တီ၊ န့ ဘော မုး ကာပြဝ် ဂေ အီ တူ ထူမ် ဂြုဝ်း ဇဝ်ဖြာ ဆိန့် ဘာန် ဒေါ မွိုန်၊ ဒေါ မုး ဘာန် အာနုဝ် တွိုန်။ ဒေါ ဘူင် အာနုဝ် ရိုဝ် ဆင်ဖုဝ် အန် တီ၊ အန် ဇဝ် ဘော အူတ် ဘော ယိူန် ကာဆဝ် နဝ်း အန်။ ဒေါ အန် တီ န့ ယီ မိုဝ်း ဒူအီ ပြေတ့် ကာဆဝ် အီ လွတ် ယမ် ဒီ အိုမ် အီ ပုန် ကာဒါယ်။ န့ မိုဝ်း မီ ဂေ ဒါ ဝီ။ 21 အိုမ် အီ မ့ပုန် ကာဒါယ် တီ၊ ဟဲ့ ဘဲန် အူဖာမာ လွင် လုဝ် စိုပ် ခဲင် အိုမ်။ ဇမ် ဘာန် ဒေါ တီ နီ ဘေ လုဝ် စိုပ် ခဲင် အိုမ်၊ တဲး န့ ချွတ် ဘေ။ စိုပ် ခဲင် အိုမ် တီ၊ အာဝ် မုး တဲး န့ ဘာယ် ဝဲန် ကာဒိး ဒီ ဒုဝ် ဘူင့် အေ။ န့ တဲး အေ နပ်၊ ဇဝ်ဖြာ ဟဲ့ ဒွါ နဝ်း လုယ်၊ ကွဲ့ တဲး န့ ဆီ မိုဝ်း အီ ဖျာက် အေ ခဲင် နဝ်း အေ။ ဇဝ်ဖြာ ဟဲ့ ပွိုန် ဒီ ဘူင် ပါယ် တီ ကူပ် ဟဲ့ ဝီ ယိတ့် ဝီ အိမ် ဇဝ် ယေဆူ ဝါယ် ဟဲ့ ဟွတ့် ယမ် အန်။ 22 အန် ဇဝ် မိူဝ် ဟဲ့ ဝီ ဟုဝ့် ဂါင်ဟြာဝ်၊ ကွယ် ဘ့လာက် အာအး ဇဝ်ဖြာ။ အန် ဘော အိုပ် ဂေ အာမူ အာမာတ် ဇဝ်ဖြာ၊ ဘော ဂေ မျုဝ် အီ မိုဝ်း ပွုန် အီ ကွယ် ခဲင် ဘ့လေန့်၊ ဘော မျုဝ် အီ မိုဝ်း ပွုန် ဘောကာဂ့လျီတ်။