ကူပ် ဟဲ့ ခမ် ဇဝ် ယေဆူ အီ ဟဝ် ဒွါ ဒုက် ဒီ ဒုဝ် ဘူင့် အန်၊ ဘော ဘေ လုဝ် ဘ့လေး နဝ်း၊ တဲး န့ ပီ နဝ်း အန် တီ။ ဘေ လုဝ် ဘူင် မျုဝ် အီ ဒီ ဘဲန် ပ့လူမ် ဘဲန် ဟဲန့် ဒီ နဝ်း ဘေ။ ခုဝ်၊ အာဆေ ဟဲ့ ခမ် ဒုက် ခဲင် ဒုဝ် ဘူင့် အန် ပါယ် တီ၊ အန် မိူဝ် ဟူ ဘူင် မှာပ်။ 2 ပါယ် တီ၊ ဆိန့် ဒေါ တီ နီ ဟာဝ်၊ ဒေါ ဆီ ကွယ် ဘေ ဒဲင် ကာဒါယ် နီ၊ ဘေ တူ လုဝ် ဘူင် ဒူပ် ပီ အိုင် နဝ်း ဘြိမ် ဘေ။ ဘေ ဟဲ့ ပွိုန် ဘူင် ဒူပ် ပီ အိုင် ဇဝ်ဖြာ။ 3 အာခြာဝ် ပဲ့ ဟဲ့ ဘူင် ဘေ ပီ ပီ ဘူင် ဂေ ဒူအီ အီ တူ နပ် ဇဝ်ဖြာ ဟဲ့ ဟွတ့် လှေန့်။ ဘေ ဟဲ့ ဘူင် ပီ တူ ကာအာပ် ဘူင်၊ ဒူပ် နဝ်း ကာဝါတ့် ဘေ၊ ဒျီင် ပဝ်း ကော ယိုတ့်၊ ဘူင် ဘ့လွယ် တာင် ဘော ဆီနန် ဆီနိူင်၊ ဘော ကြိုပ် အာရိုပ် အီ မွှိုမ် ကာအိး။ 4 ဒေါ တီ နီ၊ ဟဲ့ ဝီ ဘ့လိူင် ဒီ နဝ်း ဂေ ကူပ် ဟူ ဘူင် ဘေ အီ ဟာယ် အီ မိူက် ပီ ဂေ။ ခုဝ်၊ ဂေ ဝီ လုက်တာယ် ဘေ။ 5 ဒူအီ ဂေ တီ ဒွန် အီ ဒီ လုဝ် ကာလာင် လုဝ် ဝျီ့ ဂြုဝ်း ပီ ဒီမွှတ် ဇဝ်ဖြာ ဒီ ဂေ။ ဘော မုး ဒူအီ အိမ် ဘော မုး ဒူအီ ယမ်၊ အန် ဇဝ် မိူဝ် ဟဲ့ ဖြူမ် ဒီ ဆုင်ဖျာတ် အာမူ ဂေ ဘောကာဂ့လျီတ်။ 6 ခုဝ် အန် တီ ဘော ဂေ ဒူအီ အီ ဟဲ့ ဟွတ့် ယမ်၊ ဂေ ဟဲ့ ဒွိုမ် ထူမ် ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ်။ န့ တဲး ဇဝ်ဖြာ ဆုင်ဖျာတ် ဘော အာမူ ဂေ၊ တဲး န့ ပီ အန် ဆုင်ဖျာတ် အာမူ ဂေ အီ ဆီ အိမ်။ ဒုဝ် ဘူင့် ဂေ ယီ ဟူ မိုဝ်း။ န့ ဂိတ် မီ နဝ်း ဖွိုမ် ဂေ အီ ဆီ အိမ် ပီ နဝ်း ဖွိုမ် ဇဝ်ဖြာ။

7 ဒေါ တီ နီ၊ န့ ဟဲ့ ကာတတ် ဒီ ဇမ် အာခြာဝ် ဒီ တူတ့် ဒွန် မျုဝ် အီ ကွယ် ဒဲင် ကာဒါယ် နီ။ ခုဝ်၊ တဲး ဘေ ဘော ပဲ ဒီ အိုပ် ဒုဝ် ဘြိမ် ဘေ ဘော ဘ်ု ဆေဆေ၊ တဲး ဘေ ဘော လှုဝ်း ဒီ ဆာခိုဝ် ဆေဆေ။ 8 ဆေ ဘေ လာယ် ရွက့်၊ န့ ဟဲ့ အာရေ တာင် လွှိုမ် မျုဝ် ဟဝ်။ ခုဝ်၊ နဝ်း ရွက့် တီ၊ န့ ဘော ပဲ ဒီ ဂဝ်း ဝဲန် ကိူန် မှာပ် အီ ဟဝ်။ 9 တဲး ဘေ လာယ် ရွုး လာယ် ဘဲန် ခဲတ့်။ ကွဲ့ တဲး ဘေ ပိုန့်။ 10 တဲး ဘေ ဒွန် အီ ဘော နပ် ဒီ စ်ု ပီ ဂေဇူ ဇဝ်ဖြာ၊ ပဲ့ ဟဲ့ အာပ် ဒွါ အန် ဒီ ဘေ ဘဲန် မျုဝ် ဘဲန် မျုဝ်။ တဲး ဘေ ဘော ဖြူမ် ဒီ စ်ု ပဲ့ ဟဲ့ ဒွါ ဇဝ်ဖြာ ဒီ ဘေ ဝီ မှဝ် ဝီ အန်။ တဲး န့ ဘဲန် အာဂျိုဝ် ဒီ အီ ဟဝ်။ 11 ဆေ န့ မိုဝ်း ဒူအီ အီ ကာလာင် ဂြုဝ်း၊ တဲး အန် ကာလာင် ပီ ပီ ကာလာင် ဇဝ်ဖြာ။ ဆေ န့ မိုဝ်း ဒူအီ အီ စွယ် အီ ဟဝ်၊ တဲး အန် စွယ် ခဲ့ ပီ ဒွါ ဇဝ်ဖြာ ပ့လူမ် ဒီ အန်။ ဆေ ဘေ ဘူင် ပါယ် တီ၊ အီ ဟဝ် ဒီ ပွိုန် ဒီ အိူပ် မျုက် ဇဝ်ဖြာ ကူပ် ဒူပ် ဘေ ဒီ ဇဝ် ယေဆူ။ ဘော အေ အိူပ် ဇဝ်ဖြာ အီ မိုဝ်း အာဖုင် ဒင်ခုဝ် တာင် ဆေဆေ ဒွန် စုဝ် ဒွန် ဘာန်။ ဆာတူ။

12 အိုယ် ဘေ ဘီနွင် ပီ ရွက့် အုဝ်၊ ဘေ ကွဲ့ တဲး နဝ်း ဘေ ဘ့လိူင် ကူပ် ခမ် ဘေ ဒုက် အီ ညှာပ် ကာဆဝ်။ ပါယ် တီ ဇဝ်ဖြာ ထေဝ် ဒီ ယွတ် နဝ်း ဘေ။ ကွဲ့ တဲး ဘေ ထာင် ပဲ့ ဟဲ့ ကာဒုး ဘေ တီ ဟဲ့ ဘ့လိူင်။ 13 န့ ဘော ပီ ဘေ ဟဲ့ ခမ် ဒုက် ဒူပ် ဇဝ် ယေဆူ။ ခုဝ်၊ တဲး ဘေ ယီ ဒါခိုယ် လွင် အန် တီ။ ဆေ အာဖုင် ဒင်ခုဝ် ဇဝ်ဖြာ ဟီ လိုဝ်း ဆီချာ၊ ဘေ မိူဝ် ဒီ ခူယ် ကာဆဝ်။ 14 ဆေ အီ ဟဝ် လုက်တာယ် ဘေ ကူပ် ဘဲန် ဘေ ဒီဘဲ ဇဝ် ယေဆူ၊ တဲး ဘေ ဘျုဝ် ဒါခိုယ်။ ခုဝ်၊ နဝ်း ဖွိုမ် ဇဝ်ဖြာ အီ မိုဝ်း အာဖုင် ဒင်ခုဝ် တာင် ဟဲ့ ကွယ် ရိုမ် ဒူပ် ဘေ။ 15 ဆေ ဘေ ဘော ကာဒုး ဒုက်၊ ကွဲ့ တဲး န့ မုး ကူပ် ငဝ်း ယမ် ဘေ အာဆာက် အီ၊ ကွဲ့ တဲး န့ မုး ကူပ် ပြာ ဘေ ကြုဝ် အီ ဟဝ် ဘော ဘူင် လုတ့် အီ ဟဝ်။ ကွဲ့ တဲး န့ မုး ကူပ် ဝိန် ဒီ ပီ နပ် ဘေ ဂါန် အီ ဟဝ်။ 16 ဆေ ဘေ ယီ ခမ် ဒုက် ကူပ် ညှိုမ် ဘေ ဇဝ် ယေဆူ၊ အာဝ် လုဝ် ဆာယ်။ တဲး ဘေ အိူပ် ဇဝ်ဖြာ ကူပ် ဟဲ့ နပ် ဂေ လွင် ဟဲ့ ဒူပ် ဘေ ဇဝ် ယေဆူ။ 17 ခုဝ်၊ ဟဲ့ ကာတတ် ဒီ ဇမ် အာခြာဝ် ဒီ ဆုင်ဖျာတ် ဇဝ်ဖြာ အာမူ ဒူအီ။ ဂေ ဒူအီ ခဲင် န့ဟူမ် ဇဝ်ဖြာ၊ အန် ဇဝ် ယီ လုဝ် ဆုင်ဖျာတ် ဂေ ဒီ အာတ့်။ ဆေ န့ ပါယ် တီ၊ အာဝ် နပ် ဒီ ကာလာင် ပီ ဒီ ပါယ် ဒီ ဂေ ဒူအီ အီ တူ ထူမ် ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ် တွိုန်။ 18 ဟဲ့ မှာန် ပဲ့ ဟဲ့ ဒဲမ် အုန် ခဲင် ဘပ် ဇဝ်ဖြာ တဝ်း၊ “ဆေ န့ တူ ငှိုယ် ချွတ် ဒူအီ အီ မိုဝ်း နဝ်း ဆိူဝ် နဝ်း မှာန်၊ ဂေ ဒူအီ အီ တူ ရုဝ်ဆေ ဇဝ်ဖြာ ဘော ဂေ ဒူအီ အီ မိုဝ်း မှာပ်၊ မှဝ် ဂေ ဒီ ပါယ် ဒီ လွတ်။း”

19 ခုဝ်၊ ဂေ အီ ခမ် ဒုက် တာင် ကူပ် ဘူင် ဂေ ပီ အိုင် ဇဝ်ဖြာ၊ တဲး ဂေ အာပ် နဝ်း ဖွိုမ် ဂေ ဒီ အန် ဇဝ် အီ ဟဲ့ ဖာန် ဘ့လေး ဂေ အီ တူ ဝဲန် ဂေ ဒေါ မှဝ်။ ဟဲ့ ဟွတ့်၊ တဲး ဂေ ဘော ဘူင် ဟာဝ် နာ ဘွတ် နာ မွှိုမ် ပီ ဒွိုမ် ဘူင် ဂေ။