န့ ယီ မုး အုဝ်၊ အုဝ် မုး ဒါ တာင် အူ ဝီ ခဲင် ဖိုင် ဇဝ် ယေဆူ။ အုဝ် မိူဝ် ဟဲ့ ဒွိုမ် ယိုဝ် ဒုက် တာင် ပဲ့ ဟဲ့ ခမ် ဇဝ် ယေဆူ။ ပန် ဒီ ဝီ တး ဇဝ် ယေဆူ ဘော အုဝ် ဒီ မိုဝ်း အာဖုင် ဒင်ခုဝ် ပီ အန်။

2 ခုဝ်၊ အုဝ် ကာဆုး ဘေ အီ မုး ဒါ တာင် ခဲင် ဖိုင် ဇဝ် ယေဆူ၊ တဲး ဘေ ယွတ် မဲန် ဘော ဟျီင် ဂေ ဒူအီ အီ ညှိုမ် ဇဝ် ယေဆူ။ ဂေ ပီ ဖိုင် မာဘူ ပဲ့ ဟဲ့ အာပ် အန် ဇဝ် ဒီ ဘေ။ ကွဲ့ ဘူင် ဇိုဝ် တီ ကူပ် စ်ု အီ ဟဝ် ဒီ ဘေ။ တဲး န့ မုး နဝ်း ဘေ၊ အီ ဆီ ဘူင် ပါယ် တီ ကူပ် ရွက့် ဘေ ဒီ ဇဝ်ဖြာ။ ကွဲ့ ဘူင် ကူပ် ဆီ ပွိုန် ဘေ ရွိုန်။ တဲး ဘေ ယီ အွန် ဒီ ဘူင် ဂါန် အန် ဇဝ်။

3 ကွဲ့ တဲး ဘေ စ်ု ကာဆဝ် ဂေ ဒူအီ ပီ ယွတ် မဲန် ဘေ။ တဲး ဘေ ယဲတ့် ဂေ၊ ဘူင် တဲး ဂေ ပွိုန် ဒီ ညိုင် ဘေ။

4 ဇဝ် ယေဆူ ယီ ပီ ဒါ တာင် အီ အိုပ် ဒူအီ အီ ဟျီင် မာဘူ။ ဆေ ဟီ ဇမ် ပန် ဒီ ဝီ တး လူင် အန် ဇဝ် ဒဲင် ကာဒါယ် နီ၊ အန် ဒီ ဝီ ဒွါ ရုး ပီ ဘူင် ဘေ အီ ပီ မင်ဂိုမ် အီ မိုဝ်း အာဖုင် ဒင်ခုဝ် အီ တူ နပ် ဒီ လိုဝ်။ 5 ဘော ဘေ အီ မုး ဒူအီ ဒီရွယ်၊ တဲး ဘေ ထူမ် ပီ ကာလာင် ဂေ ဒါ တာင်။ တဲး ဘေ ဒွန် အီ မိုဝ်း နဝ်း လာယ် ဂူမ်။ ခုဝ်၊ ခဲင် ဘပ် ဇဝ်ဖြာ ဟဲ့ ဒဲမ် တဝ်း၊ “ဇဝ်ဖြာ တူ စွယ် ဂေ အီ မိုဝ်း နဝ်း ပီခိုက်။ အန် ယီ ဘျ ပီ ဂေဇူ အန် ဒီ ဂေ အီ မိုဝ်း နဝ်း ဂူမ်။”

6 ခုဝ် အန် တီ တဲး ဘေ မိုဝ်း နဝ်း ဂူမ် ဒီ ဇဝ်ဖြာ အီ မိုဝ်း ပွုန် တာင်။ ဆေ ဟီ ဇမ် အာခြာဝ် ဒေါ ဆင်ဒုဝ်၊ အန် ဇဝ် ဒီ ဝီ အိူပ် မျုက် ဘေ။ 7 အန် ဇဝ် ဒီ ဘ်ု ဒီ ယွတ် ဘေ ဆေဆေ။ ခုဝ်၊ အီ ကာဟွာ့ အီ မှဲ ခဲင် နဝ်း ဘေ၊ တဲး ဘေ ကာလာင် တူတ့် ဒီ ဇဝ်ဖြာ။ တဲး ဘေ ဘော ဘိုင် အန်။

8 တဲး ဘေ ဆာဒိက် ဘော ဘ်ု ဆီချာ။ ဘုဝ် ကာနမ် အီ မုး ရန်ဆူ ဘေ အီ ပီ မာခြင်ဆီ အီ နပ် ဒီ ရျီင် တာင်၊ အန် ဘော လဲ လဲပ် ဒီ ယွတ် ဝီ ပီ ဒီ ပွိုန် အန် ဒီ ကဝ့် ဟူမ်။

9 တဲး ဘေ ညှိုမ် ဆီချာ၊ တဲး ဘေ ပွိုန် ဒီ ရဲ ဘုဝ် ကာနမ်။ တဲး ဘေ ဘော လှုဝ်း ဂေ ဘီနွင် ဘေ အီ ညှိုမ်၊ အီ ကွယ် ဒဲင် ကာဒါယ် နီ ဒွန် ပ့လုဝ့်။ ဘော ဂေ လုဝ် ခမ် ဒုက် ပီ ဘေ။

10 ဘေ ယီ လုဝ် ခမ် ဒုက် အာဒါ အူ ကာစန်။ ဟဲ့ ဟွတ့်၊ ဇဝ်ဖြာ အီ နပ် ဒီ ဂေဇူ ဘေ ဒွန် မျုဝ်၊ အီ ဟဲ့ ရဝ်း ဘေ တဲး ဘေ ညှိုမ် ဇဝ် ယေဆူ၊ တဲး ဘေ ကွယ် ဒူင် မိုဝ်း အာဖုင် ဒင်ခုဝ်၊ အန် ဇဝ် တီ၊ အန် ဒီ ဝီ တဲး ဘေ မိုဝ်း တူတ့် ဒွန် မျုဝ် ခဲ့ ပီ လုဝ် ဘေ။ အန် ဒီ တဲး ဘေ လေး ခဲင် ဒုက် တီ၊ တဲး ဘေ မိုဝ်း နဝ်း မန် ဆီချာ၊ တဲး ဘေ ဘော ညှိုမ် ဆီချာ။

11 အေ အိူပ် ဇဝ်ဖြာ အီ မိုဝ်း ပွုန် တာင်၊ အီ ကွယ် ဒွန် စုဝ် ဒွန် ဘာန်။ ဆာတူ။

12 ဒေါ တီ နီ၊ အာဆီလာတ် ဟဲ့ ကွယ် ရိုမ် ဒူပ် အုဝ်။ အန် ပီ ဝါ အုဝ် အီ ဘူင် ဆီချာ ဂါန် ဇဝ်ဖြာ။ အုဝ် ဟဲ့ စ်ု အန် စွယ် အုဝ် ဒဲမ် ပဲ့ နီ တိုယ် ဒီ ဘေ။ အုဝ် ပီ ဆ ဒဲမ် ကိူန် မိူဝ်၊ အုဝ် ယီ ဆီ တဲး န့ မာနုဝ် ဘေ၊ တဲး ဘေ ညှိုမ် ဆီချာ။ အုဝ် မိူဝ် ဆီ တဲး ဘေ နပ် ဆီချာ လွင် ပီ ဂေဇူ ဇဝ်ဖြာ အီ ဟဲ့ မှာန် အာခါခ်ု။

13 ဂေ ဒူအီ ခဲင် ဖိုင် ဇဝ် ယေဆူ အီ မုး ဒူအီ ပီ ရဝ်း ဇဝ်ဖြာ ပီ အန် ဇဝ် ဟဲ့ ရဝ်း အုဝ်၊ ဂေ အီ ကွယ် ခဲင် မိူင် ဘာဘဲ၊ ဂေ ဘော နမ်လှုဝ်း ဘေ။ ဘော အာမာကူ အီ ပီ ဝါ အုဝ်၊ ဘော အန် ဟဲ့ နမ်လှုဝ်း ဘေ။

14 တဲး ဘေ ဒွန် အီ လာယ် ရွုး လာယ် အုး၊ တဲး န့ ဘျ ဘေ မုး ဒူအီ အီ လာယ် ရွက့် ကူပ် ညှိုမ် ဘေ ဇဝ် ယေဆူ။ တဲး ဇဝ် ယေဆူ ဒွါ နဝ်း ဂျီတ် ဒီ ဘေ ဒွန် အီ၊ အီ ညှိုမ် အန်။