ဒေါ မွိုန်၊ န့ ဘော မိုဝ်း ဘဲန် ဝီ ဘဲန် ဝီ အီ ညိုင်ရာင် ဒီ ဘျာန် ဂြုဝ်း ဇဝ်ဖြာ။ ပါယ် တီ၊ ကာတဲ ဘေ မိူဝ်၊ န့ ဒီ မိုဝ်း ဒါ ဆာရာ အီ မာနုဝ် ကာလိုပ်။ ဂေ ဒီ ပြာ ဒီ မာနုဝ် ဂြုဝ်း အီ တူ မှာန်၊ တဲး ဂေ အီ ထူမ် စှိုမ်။ ဂေ ဘော ဝဲန် ဇဝ်ဖြာ အီ အိုပ် တူတ့် အီ ဟဲ့ ထုတ် လေး ဂေ ခဲင် မှာပ်။ ပီ ဘူင် ဂေ ဇိုဝ် တီ၊ န့ တဲး ဂေ စေဝ် လိုဝ်၊ စေဝ် စှိုမ်။ 2 ဒူအီ ကိူန် ဒီ ညိုင် ဂေ ဘော ဘူင် အီ မွှိုမ် ဆာယ်။ ကူပ် ပီ ဘူင် ဂေ တီ၊ ဂေ အီ ဟဝ် ဒီ ဘော လုက်တာယ် နာ မုး နာ မှာန်။ 3 ဒူအီ ဂေ တီ၊ ဂေ မိုဝ်း နဝ်း လောဖ။ ဂေ ဒီ ဘော ကာလာင် ဂြုဝ်း ဒါခိုယ် အီ လေး ခဲင် အာငျာန် ဂေ ဘော ကဝ် ဒီ ဟူမ် ဘေ။ ဆိန့် အာတ့် နီ ဟဲ့ လှေန့်၊ အန် ဇဝ် ဟဲ့ တဝ်း ဒီ ဒမ် မှာပ် ဒီ ဂေ။ အန် ဒိူန် ဒီ ဘူင် တဲး ဂေ လိုဝ် စှိုမ်။

4 ဘော ဂေ အာမူ အာမာတ် ဇဝ်ဖြာ အီ ဘူင် မှာပ်၊ ဇဝ်ဖြာ မိူဝ် တူ လှယ့် ဂေ။ အန် ဟဲ့ တဲး ဂေ စုဝ်း ကာလုဝ့် ငါရာယ်။ အန် ဟဲ့ ပက် အုန် ဂေ ခဲင် အပ် ဝွင့်၊ တဲး ဂေ ဘ်ု ဆီငဲ ပန် ဒီ ဆုင်ဖျာတ် အန် ဇဝ် အာမူ ဂေ။ 5 ဘော ဂေ ဒူအီ အီ ကွယ် ဘာန် ဒေါ မွိုန်၊ ဇဝ်ဖြာ မိူဝ် တူ လှယ့် ဂေ။ န့ မိုဝ်း မီ အာနုဝ် အီ ကာလာင် နာ မုး နာ မှာန် ဒီ ဒူအီ ဘော ဂေ အီ ဟဝ် ဘူ ဝီ ပဲ့ ဟဲ့ ချွတ် ဇဝ်ဖြာ။ ဒဲင် တီ၊ ဂေ အီ တူ ညှိုမ် ဇဝ်ဖြာ၊ အန် ဇဝ် ဟဲ့ တဲး အိုမ် မ့ပုန် တူတ့် ဂေ ဘောကာဂ့လျီတ်။ 6 ဘော မိူင် ဆုဝ်ဒူမ် ဂါယ် မိူင် ဂုဝ်မုဝ်ရာ၊ ဇဝ်ဖြာ ဟဲ့ ဒွိုမ် ဒမ် မှာပ် ဒီ ဂေ၊ တဲး ငဝ် ကာဆိုမ် အာ မိူင် တီ။ လွင် အန် တီ၊ အန် ဇဝ် ဟဲ့ တဲး န့ ဘဲန် အူဖာမာ ဒီ ဂေ အီ တူ ညှိုမ် ဇဝ်ဖြာ။ 7 အန် ဇဝ် ယီ ဟဲ့ ချွတ် အာလူတ် အီ မိုဝ်း နဝ်း ဆိူဝ် နဝ်း မှာန်။ ဒေါ ကွယ် အန် ကာတဲ ဂေ ဒူအီ ဟာယ် ဒူအီ မိူက် အီ ဘူင် နာ စီစိဝ်၊ န့ ဘော ဘဲန် နဝ်း ကာပျာတ့် ဒီ အန်။ 8 ဒူအီ အီ မိုဝ်း နဝ်း ဆိူဝ် နဝ်း မှာန် တီ၊ အန် ဘော ကာဒုး ဒီ ယိုဝ် ကာဒုး ဒီ ထူမ် ပီ ဘူင် ဂေ အီ တူ မွှိုမ် ဒွန် မျုဝ်။ အန် မိူဝ် လုဝ် ခမ် အီ ဒုက် ဒီ နဝ်း အန် ဒွင် ခိူန် ဒွင် ဝန်။ 9 ပါယ် တီ၊ ဇဝ်ဖြာ နပ် ဒီ ချွတ် ဂေ အီ ဘျုဝ် ဒီ ဒူပ် အန်။ အန် တဲး ဂေ လွတ် ခဲင် ဒုက် ဘဲန် မျုဝ် ဘဲန် မျုဝ်။ အန် ဘော ဝီ ခြွင့် အုန် ဂေ အီ ဘူင် နာ တူ ဘွတ် နာ တူ မွှိုမ်၊ တဲး ဂေ ခမ် မှာပ် ဂေ။ ဂေ ဘော လုဝ် ကွယ် ပါယ် တီ ဘော ဘ်ု ဆီငဲ ပန် ဒီ ဒမ် အန် ဇဝ် မှာပ် ဒီ ဂေ။ 10 န့ ယီ မုး ဂေ အီ ဘူင် ဒူပ် နဝ်း ဘြိမ် ဂေ၊ ဘူင် အီ မွှိုမ် ကာအိး အီ မွှိုမ် ကာဒါတ့်၊ ဘော လုက်တာယ် ပွုန် ဇဝ်ဖြာ၊ ဂေ ဒီ လုဝ် ခမ် ကိူန် မှာပ် ဂေ လွှိုမ် အီ ဟဝ်။ ဂေ ပီခိုက် နဝ်း ဂေ ဘော တူ ယုဝ် ဒီ လုက်တာယ် မျုဝ် အီ မိုဝ်း ပွုန် ခဲင် ဂါင်ဟြာဝ်။

11 န့ ယီ မုး ဂေ အာမူ အာမာတ် ဇဝ်ဖြာ၊ ဂေ ပီ ဘော မိုဝ်း ပွုန် လွှိုမ် ဂေ ဒါ ဆာရာ အီ မာနုဝ် ကာလိုပ် တီ မိူဝ်၊ ဂေ ယီ တူ နဲ တူ ဖျာက် ဂေ အီ မိုဝ်း ပွုန် တီ ဒီ အာတ့် ဇဝ်ဖြာ။ 12 ဒူအီ ဂေ တီ၊ ဂေ နပ် ဒီ ခဲန့် ပီ တူ နပ် ဂေ။ ဂေ ဘော ပီ ဒုဝ် ဆတ် အီ တူ နပ် ဒီ ကာဖာ။ န့ ဂိတ် မီ ဒီ မှေတ့် ငဝ်း ယမ် ဂေ။ ဒူအီ ဟာယ် ဂေ တီ၊ ဂေ ဒီ ဘော စှိုမ် ပီ မာဒုဝ် ပြဲ တီ။

13 ဂေ လုဝ် ဝီ ခမ် ဒုက် ခဲ့ ပီ ဒွိုမ် ဘူင် ဂေ ဒီ အီ ဟဝ်။ ဂေ ဘော အိုင် ဒီ ဒျီင် ပဝ်း ဘော ဘူင် ဆီနန် ဆီနိူင် ကာတဲ ဆီငဲ။ ဂေ ဘူင် တဲး န့ ဘြေ့ ဒီ နဝ်း ဂေ၊ တဲး န့ ဒူပ် နဝ်း ကာဝါတ့် ဂေ။ ဒေါ ဟူမ် ရိုမ် ဂေ ဒူပ် ဘေ၊ ဂေ ဘော ဘျုဝ် ဒါခိုယ် ဒီ ဘူင် တဲး န့ ဘဲန် အီ မွှိုမ် ဆာယ် ဘော အီ စှိုမ် ဆာရေ ဒီ ဘေ။ 14 ငါယ် ဂေ မိူဝ် ယွတ် ဒူပ် နဝ်း ကာဝါတ့် ဂေ အီ ဆီ လုတ့် အီဘိုန့် အီ ဟဝ်။ နဝ်း ဆီ ဘူင် ဂေ မှာပ် မိူဝ်၊ အာဝ် နပ် ဒီ ဂိူတ်၊ အာဝ် နပ် ဒီ စူ ဒေါ မှဝ်။ ဂေ ဘော နပ် ဒီ ကာဆုး ဂေ အီ မိုဝ်း နဝ်း တူ မန် ဆီချာ။ ဂေ ဘော မိုဝ်း အာဂျာင် လာမာက် ကာဆဝ်။ ဂေ ဒိူန် ဒီ ဘဲန် ဒူအီ ပီ ဒိူင် ပီ အေး ဇဝ်ဖြာ။ 15 ဂေ မိူဝ် ဝဲန် နာ မုး နာ မှာန်၊ တဲး ဂေ ဒူပ် ပီ ဘူင် အာဘာလာအမ် အီ မုး ဂွန် အာပေါဆော၊ အီ ဘူင် နာ တူ မွှိုမ် ကူပ် ဆီ ပွိုန် အန် ရွိုန်။ 16 န့ မုး မာလာ အန် အီ တူ နပ် ဒီ ကာလာင် ဂြုဝ်း။ အန် ယီ ကာဒုး ဒီ ကာလာင် ဂြုဝ်း ဒူအီ ဘော ခြဲ နာ ရိုဝ် နာ မိူက် ပီ ဘူင် ဒူအီ အီ ဘျာန် ဂြုဝ်း ဇဝ်ဖြာ တီ။

17 ဒူအီ ဇိုဝ် တီ၊ ဂေ ဘော ပီ အိုမ် ခိုမ် အီ တူ မိုဝ်း အိုမ်။ ဂေ ပီ ဘော န့အု ပီ ဘုတ် ဟာဝ် ခုန်။ ဇဝ်ဖြာ မိူဝ် ဟဲ့ ရဲန် ဒူင် ဒီ ကွယ် ဂေ အီ မုး ဒူင် အပ် ဝွင့် ကာဆဝ်။ 18 ခုဝ်၊ ဂေ ကာလာင် ဂြုဝ်း ပီခိုက် အီ တူ မိုဝ်း ဒီခုဝ်။ ဂေ ဘော အိုင် ဒီ ဘူင် ဒူပ် နဝ်း ဘြိမ် ဂေ အီ ကာဒါတ့် ကာဆဝ်။ ဂေ ကာဆုး ဘော အီ ဟဝ် ဒူပ်။ ဂေ ဘော ဝီ ပျာတ့် နဝ်း ဂေ ဒူအီ အီ ဟဲ့ ကာစုး ဒီ ဝး ဂေ ဒူအီ အီ ဘူင် ကာလိုပ် ဘဲန် မျုဝ် ဘဲန် မျုဝ်။ 19 ဂေ ဘော ကာဆဲန့် ဒီ တဲး ဒူအီ ပွိုန် ဒီ ကွယ် ထင်ဟာင်။ ဒုဝ် ဘြိမ် ဂေ ယီ တူ ကွယ် ထင်ဟာင်။ ဂေ နပ် ဒီ ဘူင် ကာလိုပ် ဆေဆေ။ န့ ပီ မှာပ် ဟဲ့ အိုပ် ဂေ။ ခုဝ်၊ ပီ တူ ပဲ ဒူအီ ဒီ အိုပ်၊ န့ ဒီ ဝီ အိုပ် ဂေ။ 20 ဆေ ဒူအီ အူ ဝီ ဟဲ့ ဟွတ့် လွတ် လေး ဒီ မျုဝ် အီ မွှိုမ် ကာဒါတ့် ဒဲင် ကာဒါယ် နီ ကူပ် ဟဲ့ နပ် အန် ဇဝ်ဖြာ ဘော ဇဝ် ယေဆူ အီ ဟဲ့ ချွတ် အေ၊ ဆေ အန် ပီ ဝီ ဘူင် ဒူပ် ဂေ ဒူအီ အီ တူ ပဲ ဒီ အိုပ် နာ တူ မွှိုမ်၊ အန် ဒီ ဝီ ခမ် ဒုက် လွှိုမ် ပီ ဒွိုမ် ခမ် အန် အာတ့် နီ။ 21 ဆေ အန် ယီ တူ ဒွိုမ် နပ် နာ မုး နာ မှာန်၊ န့ ဟဲ့ မွှိုမ် လွှိုမ် အန် ဟဲ့ ဟွတ့် နပ်၊ ယီ ဝီ ဝဲန် ဂြုဝ်း ဘွတ် ပဲ့ ဟဲ့ ဒွိုမ် ထူမ် အန်။ 22 န့ မုး ဂြုဝ်း အာငျာန် အီ မှာန် အာခါခ်ု တဝ်း၊ “မာဆုဝ် ဘော ဝီ ဟူမ် ဟိုဝ် ဘြိမ် အန်။” ပေါ အူ မျုဝ် န့ တဝ်း၊ “ဆေ ဒူအီ ဟဲ့ ဟွတ့် ဘာယ် မာလေတ့်၊ တဲး ဒုဝ် အန် ဆီငါ၊ အန် ပီ ဝီ ရဲ ခဲင် ညုဝ့် ပီ ဘြိမ်။” ပီ ဘူင် ဒူအီ ဂေ တီ၊ န့ ဘော ပါယ် တီ။