အိုယ် ဘေ ဘီနွင် ပီ ရွက့် အုဝ်၊ ပဲ့ ပီ ဒဲမ် အုဝ် နီ၊ န့ မုး ဖိူန် ဟာအာ ပီ တိုယ် အုဝ် ဒီ ဘေ။ ခဲင် ပဲ့ ပီ ဒဲမ် အုဝ် ဘော အာ ဖိူန် အုဝ် ဟဲ့ ဒမ် ဆာဒိက် ဒီ ဘေ ဘော ကာဆုး နဝ်း ဘေ၊ တဲး ဘေ ဒူပ် အာငျာန် ဘွတ်။ 2 ဆိန့် ဒေါ မွိုန် ဂေ ဒူအီ ဘွတ် ဟဲ့ ဘျာန် ဂြုဝ်း ဇဝ်ဖြာ။ ဘော ဂေ ဒူအီ ပီ ရဝ်း ပီ တိုယ် ဇဝ် ယေဆူ ဟဲ့ ကာလာင် ဒီ ဘေ လွင် ဇဝ် ယေဆူ အီ ဟဲ့ ချွတ် အေ။ ဂြုဝ်း ဇိုဝ် တီ ဒွန် မျုဝ်၊ အုဝ် ဆီ တဲး ဘေ လှုဝ်း ဆေဆေ။

3 ပီ လုဝ် နပ်၊ လုဝ် လှုဝ်း ဘေ ဒီ အာတ့်၊ န့ မုး လွင် ပန် ဒီ တူတ့် ဇာတ် နီ။ ဒေါ အန် တီ န့ ဒီ မိုဝ်း ဒူအီ အီ အွန် ဒီ ပီ ဝါညာက် ဒီ ဇဝ်ဖြာ။ ဂေ ဒီ ဘော ကာညး အန် ကူပ် ဟဲ့ ဝီ ဒူပ် ဂေ နဝ်း ဘြိမ် ဂေ အီ တူ မွှိုမ်။ 4 ဂေ ဘော နပ် ဒီ တဝ်း၊ “ဇဝ်ဖြာ ဟဲ့ ဒွါ အုန် ကာဒိက် ဆတ်ဇာ တဝ်း၊ အန် ဒီ ဝီ တး။ အေ ယီ တူ ယိုဝ် မာဆေ လွင် ဒီ တး အန် တီ။ ဆိန့် ဘာန် ဒါ ဒါ အေ အီ ဟဲ့ ဟွတ့် ယမ်၊ ဒွန် မျုဝ် ဘော ပီ ဘြိမ်။ န့ ဘော ပီ ဆိန့် ဒေါ ဂုဝ် ဒေါ ဖာန် ဘ့လေး ဇဝ်ဖြာ ဒွန် မျုဝ်။” 5 ဂေ အီ တဝ်း ပါယ် တီ၊ ဂေ ဒိူန် အုန် နဝ်း ဒီ ပိဝ် ဂြုဝ်း ဇဝ်ဖြာ အီ ဟဲ့ မိုဝ်း ဆိန့် ဘာန် ဒေါ မွိုန်။ ကူပ် ကာလာင် ဇဝ်ဖြာ ဂြုဝ်း တီ၊ န့ ဘော မိုဝ်း ဂါင်ဟြာဝ် ဂေ ကာဒါယ်။ အန် ဟဲ့ ကာလာင် တဲး ကာဒါယ် ဘော အိုမ် လာယ် ကာယဝ်း၊ တဲး ကာဒါယ် ဘော လေး တး ခဲင် အိုမ်။ 6 န့ ဘော မုး အိုမ် တီ၊ အီ ဟဲ့ မ့ပုန် ကာဒါယ် အီ ဟဲ့ တဲး ဒူအီ လိုဝ် စှိုမ် တူတ့် အီ ကွယ် ဘာန် ဒေါ မွိုန်။ 7 ကူပ် ဟဲ့ ကာလာင် ဇဝ်ဖြာ ဂြုဝ်း တီ၊ ဘော ဘ့လေန့် ဘော ကာဒါယ် အီ ကွယ် ဒေါ တီ နီ ဒီ ကာဆိုမ် ဟြာယ် ခဲင် ငဝ်။ ဇဝ်ဖြာ ယီ ညှမ် ဘူင် ပါယ် တီ။ အန် နှဝ့် ပန် ဒီ ဇမ် ဆီငဲ ဒီ ဆုင်ဖျာတ် အန် အာမူ ဂေ ဒူအီ အီ တူ ညှိုမ် အန်။ ပန် အန် တီ၊ အန် ဒီ ဘော တဲး န့ လိုဝ် စှိုမ် တူတ့် ဒွန် မျုဝ်။

8 အိုယ် ဘေ ဘီနွင် ပီ ရွက့် အုဝ်၊ ကွဲ့ တဲး ဘေ ပိဝ် လွင် အာခြာဝ် အေ ဒေါ တီ နီ။ ကာဆိူဝ် ဇဝ်ဖြာ၊ အူ ဆီငဲ ဘော ပီ အူ ဟြဲန့် ဆီနမ်။ အူ ဟြဲန့် ဆီနမ် ဘော ပီ အူ ဆီငဲ။ 9 ဇဝ်ဖြာ မိူဝ် တူ ကြဲ တူ လွယ် လွယ် ဒီ ဘူင် ဒူပ် ပဲ့ ဟဲ့ ဒွါ အန် ကာဒိက် ဆတ်ဇာ။ အာဝ် ပီ ပီ ထာင် ဂေ ဒူအီ မင် အီ။ ဂေ ထာင် အန် ကြဲ ဒီ ဘူင်။ ဇဝ်ဖြာ ယီ ဟဲ့ အူတ် ကာဆဝ် နဝ်း အန် ကူပ် တူ ဆီ တဲး အန် အာဆေ စှိုမ်။ အန် ယီ ဆီ တဲး ဒူအီ ဘောကာဂ့လျီတ် လှုဝ်း ဝဲန် မှာပ် ဂေ။

10 ဆီငဲ ဒီ ဝီ တး အန် ဇဝ် တဲး အန် ဆုင်ဖျာတ် အာမူ အီ၊ အန် ဒီ တး ပီ ဒါ ပြာ တး။ ဆီငဲ တီ၊ ဘ့လေန့် ဂေ ဂါင်ဟြာဝ် ဒီ ဟြာယ် ဒူပ် အီ ဟမ် တာင် ကာဆဝ်။ ခဲ့ ကွယ် ထာတ် ဒွန် မျုဝ်၊ န့ ဒီ ဟြာယ် ကူပ် ဟဲ့ ကာဟွာ့ ကာဆဝ်။ ကာဒါယ် ဘော ဒူအီ အီ ကွယ် ဒဲင် ကာဒါယ် န့ ဒီ ဝီ လိုဝ်း ဆီချာ တူတ့် ဒွန် မျုဝ်။

11 ဆေ ဒွန် မျုဝ် ဒီ လိုဝ် စှိုမ် ဟြာယ် တူတ့် ပါယ် တီ၊ တဲး ဘေ ဇေန့်ဇာ လွင် ပီ ကာအာပ် ဘေ ဘူင်။ ဘေ လုဝ် ဘူင် တဲး နဝ်း ဘေ ဆီငါ ဘော ဒူပ် ဆီချာ ဇဝ်ဖြာ။

12 တဲး ဘေ ဘ်ု ဆီငဲ တီ၊ ဘော ဘူင် ခဲ့ ပီ လုဝ် ဘေ ဘူင်၊ တဲး န့ စေဝ် တး။ ဆီငဲ တီ၊ ဟဲ့ မုး ဆီငဲ ဒီ လိုဝ် တူတ့် ဒွန် မျုဝ်။ ဘော အီ ကွယ် ခဲင် ဘ့လေန့် ဘော အီ ကွယ် ဒဲင် ကာဒါယ် ဒီ လာတ့် တူတ့် ကူပ် ဟဲ့ ကာဟွာ့ ကာဆဝ်။ 13 မာလဲ၊ ကာဒိက် ဆတ်ဇာ ပဲ့ ဟဲ့ ဒွါ အန် ဇဝ် ဒီ အေ၊ န့ တဲး အေ ဝီ နှဝ့် အာခြာဝ် ဒီ မိုဝ်း ဂါင်ဟြာဝ် ကာမာယ် ဘော ကာဒါယ် ကာမာယ်။ ဒူင် တီ၊ န့ မိုဝ်း မီ နာ ဆိူဝ် နာ မှာန်။

14 ခုဝ် အန် တီ ဘေ ဘီနွင် ပီ ရွက့် အုဝ်၊ ဒေါ နှဝ့် ဘေ အာခြာဝ် တီ၊ တဲး ဘေ ခတ် နဝ်း ဒီ ဘူင် နာ မွှိုမ် ဆေဆေ၊ ကွဲ့ တဲး အာဆေ ပွိုန် ဒီ ကာလာင် နာ တူ မွှိုမ် လွင် ဘေ။ တဲး ဘော ဘေ ဘော ဇဝ်ဖြာ လာယ် ကာလဝ့်။ 15 တဲး ဘေ လှုဝ်း ဆေဆေ၊ ဇဝ်ဖြာ အူတ် နဝ်း အန်၊ တဲး န့ ချွတ် ဒူအီ ကိူန်။ န့ ဟဲ့ ဒူပ် ပီ ဒဲမ် အာပေါလူ အီ မုး ဘီနွင် ပီ ရွက့် အေ။ အန် ဟဲ့ ဒူပ် အာငျာန် ပီ ဒွါ ဇဝ်ဖြာ ဒီ အန်၊ ဒဲမ် ပဲ့ တိုယ် ဒီ ဘေ။ 16 ခဲင် ပဲ့ ပီ ဒဲမ် အန် တီ ဒွန် ဖိူန်၊ အန် မိူဝ် ကာလာင် လွင် ပဲ့ ဟဲ့ ဒဲမ် အုဝ် နီ။ ပီ ဒဲမ် အန် တီ၊ မင် မျုဝ် ယီ ညှာပ် ဒီ ကာလှုး ဒီ နဝ်း။ ခုဝ်၊ ဂေ အီ တူ နပ် ဆီချာ၊ ဂေ အီ တူ မိုဝ်း နဝ်း မန်၊ နဝ်း နှိမ်၊ ဂေ ဘော ဝီ ဘျွင် ပီ ပါယ် ဆီဖဝ် အန်။ ဂေ ဘော နပ် ဒီ ဘျွင် ဘော ပီ ဒဲမ် အုန် မင် မျုဝ် ခဲင် ဘပ် ဇဝ်ဖြာ။ ပီ ဘူင် ဂေ ဇိုဝ် တီ၊ န့ ဒီ တဲး ဘော ဒုဝ် ဂေ လိုဝ် စှိုမ်။

17 အိုယ် ဘေ ဘီနွင် ပီ ရွက့် အုဝ်၊ ဆေ ဘေ ဟဲ့ ဟွတ့် နပ် လွင် အန် တီ၊ တဲး ဘေ ဆာဒိက်၊ ကွဲ့ တဲး ဘေ ကာလိုပ် ဒီ ဘူင် မှာပ် ပီ ဂေ ဒူအီ အီ တူ မွှိုမ် တီ။ ဒေါ တီ နီ၊ ဘေ ဟဲ့ ညှိုမ် ဆီချာ။ ကွဲ့ တဲး နဝ်း တီ ဝီ ဟြာယ်၊ ဝီ စှိုမ်။ 18 တဲး ဘေ ဒိုဝ်း ကိူန် ပီ ဂေဇူ ဇဝ်ဖြာ ဒီ ဘေ၊ တဲး ဘေ ဘော ကြဲ ဒီ နပ် ဆီချာ ဇဝ် ယေဆူ အီ ဟဲ့ ချွတ် အေ။ အေ ဒီ အိူပ် အန် ဇဝ် တီ၊ တဲး အန် ဘော မိုဝ်း ပွုန် မိုဝ်း ဆာရေ ဆိန့် ဒေါ တီ နီ ဘော နာ အာတ့် နီ ဟာဝ် ဆေဆေ။ ဆာတူ။