တဲး ဘေ ကာဒွါ့ ကာဖာ ခဲ့ ရွက့် ဇဝ်ဖြာ ဒီ အေ။ အန် ဟဲ့ ရွက့် အေ ကော တဝ်း၊ အေ မုး ဂွန် ဇဝ်ဖြာ။ န့ မိူဝ် ဟဲ့ မှာန်၊ အေ ဟဲ့ ဘဲန် ဂွန် ဇဝ်ဖြာ။ ခုဝ်၊ ဒူအီ ဒဲင် ကာဒါယ် နီ တူ နပ် အေ ကူပ် တူ နပ် ဂေ ဇဝ်ဖြာ။

2 အိုယ် ဘေ ဂိုက် ပီ ရွက့် အုဝ်၊ ဒေါ တီ နီ အေ ဟဲ့ ဟွတ့် ဘဲန် ဂွန် ဇဝ်ဖြာ။ အေ ပီ ဆ နပ် ဆီချာ နာ အာတ့် အေ ဒီ ပါယ် မှဝ် မိူဝ်၊ အေ ယီ နပ် ဆေ ဇဝ် ယေဆူ ဟီ တး၊ အေ ဒီ ပီ အန်။ အေ မိူဝ် ဒီ ယိုဝ် အန် ဇဝ် ခဲ့ ပီ ပါယ် အန်။ 3 ပါယ် တီ၊ အာဆေ နှဝ့် န့ဒဝ့် ဇဝ် ယေဆူ၊ အန် ဒီ ဝဲန် မှာပ် ဒွန် မျုဝ်၊ တဲး အန် မိုဝ်း နဝ်း ဆီငါ ဘွတ်၊ တဲး နဝ်း အန် ပီ နဝ်း ဇဝ် ယေဆူ အီ ဟဲ့ ဆီငါ ဘွတ်။

4 အာဆေ ဘူင် မှာပ်၊ အန် ဟဲ့ ဘူင် လုတ့် ဒါရာ ဇဝ်ဖြာ။ မှာပ် ဒွန် မျုဝ် ဟဲ့ ဟာယ် ကာဆဝ်၊ ဟဲ့ မိူက် ဘော ဘူင် ကာဘး ဒီ ဇဝ်ဖြာ။ 5 ဘေ ယီ ဟဲ့ နပ်၊ ဇဝ် ယေဆူ ဟဲ့ တး၊ တဲး အန် ပွိုန် ဒီ ဂဝ်း ဝဲန် မှာပ် အေ။ ဘေ မိူဝ် ဟဲ့ နပ်၊ အန် တူ မိုဝ်း မှာပ် မာဆေ။ 6 အာဆေ ကွယ် ကာဒိုက် ကာဒဝ့် ဒီ ဇဝ် ယေဆူ၊ အန် တူ ဘူင် ဟာဝ် မှာပ် ပီ ဘြိမ်။ အာဆေ ယီ ဘူင် ဟာဝ် မှာပ် ပီ ဘြိမ်၊ အန် တူ ဒွိုမ် နပ်၊ တူ ဒွိုမ် ယိုဝ် ဇဝ် ယေဆူ။

7 အိုယ် ဘေ အီ ပီ ဂွန် ပီ ရွက့် အုဝ်၊ ကွဲ့ တဲး အာဆေ ပွိုန် ဒီ ကာလုဝ် ဘေ။ အာဆေ ဘူင် နာ ဆိူဝ် နာ မှာန်၊ အန် မိုဝ်း နဝ်း ဆိူဝ် နဝ်း မှာန် ပီ ဇဝ် ယေဆူ မိုဝ်း နဝ်း ဆိူဝ် နဝ်း မှာန်။ 8 ဆေ ဒူအီ ယီ ဆီ နဲ့ ဘူင် မှာပ်၊ န့ မုး ဘုဝ် ကာနမ် အီ ဆီ အိုပ် အန်။ ခုဝ်၊ ဘုဝ် ကာနမ် ဟဲ့ ဒွိုမ် ဘူင် မှာပ် ဆိန့် ဒေါ ဂုဝ် အန်။ မာလဲ၊ ဂွန် ဇဝ်ဖြာ ဟဲ့ တး၊ တဲး အန် ပွိုန် ဒီ ပျာတ့် ဝဲန် ပီ ဘူင် ဘုဝ် ကာနမ် ဒွန် မျုဝ်။ 9 ခုဝ်၊ အာဆေ ဟဲ့ ဘဲန် ဂွန် ဇဝ်ဖြာ၊ အန် ဟူ ဘူင် မှာပ်။ ဇဝ်ဖြာ ဟဲ့ ဟပ် အာမျုဝ် ပီ ပါယ် အန် ခဲင် နဝ်း ဝီ တီ၊ ကွဲ့ တဲး အန် ဘူင် မှာပ် ပီ ဘြိမ်။ ဇဝ်ဖြာ ဟဲ့ တဲး အန် ဘဲန် ဒူအီ ကာမာယ်။ 10 န့ ဒီ ဘော လိုဝ်း ဆီချာ၊ တဲး အေ နပ် ဆီချာ၊ အာဆေ မုး ဂွန် ဇဝ်ဖြာ ဘော အာဆေ မုး ဂွန် ဘုဝ် ကာနမ်။ အာဆေ တူ ဘူင် နာ မုး နာ မှာန်၊ တူ ရွက့် ဘီနွင် ဝေါဝဲ အန်၊ အန် တူ မုး ဂွန် ဇဝ်ဖြာ။

11 လွင် ပဲ့ ဟဲ့ ဒွိုမ် ယိုဝ် ဒွိုမ် ထူမ် ဘေ အူ ဆိန့် ဒေါ ဂုဝ် တွိုန်၊ န့ တဝ်း၊ တဲး အေ လာယ် ရွက့်။ 12 ကွဲ့ တဲး ဘေ ပီ အာကန့် တွိုန်။ အန် ဟဲ့ တဲး ဘုဝ် ကာနမ် အိုပ် အန်၊ ဝီ ငဝ်း ယမ် ဝါ အန်။ အန် ငဝ်း ယမ် ဝါ အန် ကူပ် ပီ ဘူင် အန် ဟဲ့ မိူက်။ ပီ ဘူင် ဝါ အန် ယီ ဟဲ့ ဆိူဝ် ဟဲ့ မှာန်။ 13 အိုယ် ဘေ ဘီနွင်၊ ဆေ ဒူအီ ဒဲင် ကာဒါယ် နီ ဇွင့် ဘေ၊ ကွဲ့ တဲး နဝ်း ဘေ ဘ့လိူင်။ 14 အေ ယီ ဟဲ့ နပ်၊ အေ ဟဲ့ ပွုန် ယမ်။ ဟဲ့ နပ်၊ အေ ဟဲ့ ပွိုန် အာဆာက် ကာမာယ် ကူပ် ရွက့် အေ ဘီနွင် အေ။ အာဆေ ယီ ဆီ ဇွင့် ဘီနွင် အန်၊ အန် ညှမ် ပွုန် ယမ်။ 15 ခုဝ်၊ အာဆေ ဇွင့် ဘီနွင် အန်၊ န့ ပီ အန် ငဝ်း ယမ် အာဆာက် အီ။ ဘေ ယီ ဟဲ့ နပ်၊ အာဆေ ငဝ်း အာဆာက် အီ၊ အန် တူ မိုဝ်း အာဆာက် ကာမာယ်။

16 န့ ပါယ် နီ၊ အေ ဒီ နပ် ပီ ပါယ် နဝ်း ရွက့်။ ဇဝ် ယေဆူ ဟဲ့ ခမ် ဒီ ယမ် ကာဒါင် အေ။ ခုဝ်၊ အေ လုဝ် ဝီ ခမ် ဒီ ယမ် ကာဒါင် ဘီနွင် အေ။ 17 ဆေ န့ မိုဝ်း ဒူအီ အီ ဟဲ့ ခြမ်၊ ဟဲ့ မိုဝ်း ကြုဝ်ကြာမ် ကိူန်၊ အန် ပီ ဘော ဟဲ့ ယိုဝ် ဘီနွင် အန် ဟဲ့ အေတ့် ဟဲ့ ဂိန် မိူဝ်၊ ဆေ အန် ယီ တူ မိုဝ်း နဝ်း ကာဝေ၊ အန် တူ ရွက့် ပီ တဲး ဇဝ်ဖြာ အန် ရွက့်။ 18 အိုယ် ဘေ အီ ပီ ဂွန် ပီ ရွက့် အုဝ်၊ ကွဲ့ တဲး အေ လာယ် ရွက့် မီ ခဲ့ ဂြုဝ်း ခဲ့ မူတ့် ပီယေန့်။ တဲး အေ လာယ် ရွက့် ဘော ဘူင် နာ မုး နာ မှာန်။ 19 ကူပ် လာယ် ရွက့် အေ၊ အေ ဒီ နပ် ဆီချာ၊ အေ ဟဲ့ ကာဒိုက် ကာဒဝ့် ဒီ နာ မုး နာ မှာန်။ နဝ်း အေ မိူဝ် ဒီ ဒါခိုယ် ဆေ အေ ကွယ် ရိုမ် ဒူပ် ဇဝ်ဖြာ။ 20 ဆေ နဝ်း အေ ယီ ဆီ ဒမ် မှာပ် ဒီ အေ၊ အေ မိူဝ် ဟဲ့ နပ်၊ ဇဝ်ဖြာ ဆီ တာင် လွှိုမ် နဝ်း အေ တီ။ အန် ဘော ဟဲ့ နပ် တူတ့် ဒွန် မျုဝ်။

21 ဘေ ဘီနွင် ပီ ရွက့် အုဝ်၊ ဆေ နဝ်း အေ အာဝ် ဟူ မိုဝ်း ဒီ ဒမ် မှာပ် ဒီ အေ၊ အေ မိူဝ် ဒီ မိုဝ်း နဝ်း ယ ဒေါ ကွယ် အေ ဒီ အာတ့် ဇဝ်ဖြာ။ 22 ခဲ့ ပီ ဆာခိုဝ် ပီ မှာန့် အေ ဒီ ဇဝ်ဖြာ၊ ဇဝ်ဖြာ မိူဝ် ဒွါ ဒီ အေ ကူပ် ဘူင် ဒူပ် အေ ပီ စ်ု အန် ဘော ပီ အိုင် အန်။ 23 အန် ဇဝ် မိူဝ် ဟဲ့ စ်ု အေ၊ တဲး အေ ညှိုမ် ဘိုင် ပွုန် ဇဝ် ယေဆူ အီ မုး ဂွန် ဇဝ်ဖြာ၊ တဲး အေ လာယ် ရွက့်၊ တဲး န့ ဘော ဒူပ် ဒါရာ ပီ ဒွါ ဇဝ် ယေဆူ ဒီ အေ။ 24 အာဆေ ဟဲ့ ဘူင် ဒူပ် ဒါရာ အန် ဇဝ်၊ အန် မိူဝ် ဟဲ့ ကွယ် ကာဒိုက် ကာဒဝ့် ဒီ အန် ဇဝ်။ အန် ဇဝ် မိူဝ် ဟဲ့ ကွယ် ကာဒိုက် ကာဒဝ့် ဒီ ဝီ တီ။ အီ တဲး အေ နပ်၊ ဇဝ်ဖြာ ကွယ် ရိုမ် ဒူပ် အေ၊ န့ ပါယ် နီ။ န့ မုး နဝ်း ဖွိုမ် ဇဝ်ဖြာ ပဲ့ ဟဲ့ ဒွါ အန် ဒီ အေ၊ အန် တဲး အေ နပ်။