အာဆေ ညှိုမ်၊ ဇဝ် ယေဆူ မုး အန် ဇဝ် ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ၊ ဒူအီ ဝီ တီ ဟဲ့ ဘဲန် ဂွန် ဇဝ်ဖြာ။ အာဆေ ရွက့် ဂုန့် အန် ဇဝ်၊ အန် ဒီ ဘော ရွက့် ဘော ဂွန် အန်။ 2 အေ ဒီ နပ် အေ ရွက့် ဂေ အီ မုး ဂွန် ဇဝ်ဖြာ ပါယ် နီ။ ဆေ အေ ရွက့် ဇဝ်ဖြာ ဘော ဘူင် ဒူပ် ပီ စ်ု အန် ဒီ အေ၊ အေ ဒီ ရွက့် ဘော ဂေ အီ မုး ဂွန် ဇဝ်ဖြာ။ 3 ဆေ အေ ရွက့် ဇဝ်ဖြာ၊ အေ ဒီ ဘော ဘူင် ပီ စ်ု အန် အေ ဘူင်။ ပီ စ်ု ဇဝ်ဖြာ ဒီ အေ တီ၊ အာဝ် မုး အီ ညှာပ် ဘူင်။ 4 ခုဝ်၊ ဂွန် ဇဝ်ဖြာ ဒွန် အီ၊ ဂေ ဒီ အွင် ဒွန် မျုဝ် အီ ကွယ် ဒဲင် ကာဒါယ်။ ဂေ ဟဲ့ အွင် ဒွန် မျုဝ် ဒဲင် ကာဒါယ် နီ ကူပ် မိုဝ်း ဂေ နဝ်း ညှိုမ်။ 5 န့ မုး အာဆေ အီ ဟဲ့ အွင် ဒွန် မျုဝ် အီ ကွယ် ဒဲင် ကာဒါယ် နီ။း န့ မုး မီ ဂေ အီ ညှိုမ်၊ ဇဝ် ယေဆူ မုး ဂွန် ဇဝ်ဖြာ။ ဂေ ဟဲ့ ပဲ ဟဲ့ အွင်။

6 ဒေါ တး ဇဝ် ယေဆူ အန် ဟဲ့ ခမ် ဒီ စိုပ် ခဲင် အိုမ် ဘော ခမ် ဒီ ယမ်၊ တဲး နှာမ် အန် လေး။ အာဝ် မုး၊ အန် ခမ် မီ ဒီ စိုပ် ခဲင် အိုမ်။ အန် ဟဲ့ ခမ် ဒီ စိုပ် ခဲင် အိုမ် ဘော ခမ် ဒီ ယမ် တဲး နှာမ် အန် လေး။ 7 နဝ်း ဖွိုမ် ဇဝ်ဖြာ မိူဝ် ဟဲ့ ဘဲန် ဆက်ဆေ၊ ကာလာင် လွင် အန် တီ။ နဝ်း ဖွိုမ် ဇဝ်ဖြာ တီ၊ အာဝ် ပွိုန် ကာလုဝ် ဒေါ မှဝ်။ အန် ကာလာင် နာ မုး နာ မှာန် ဆေဆေ။ 8 ပါယ် တီ၊ န့ ဟဲ့ မိုဝ်း အူယ် မျုဝ် အီ ဘဲန် ဆက်ဆေ၊ ကာလာင် လွင် ဇဝ် ယေဆူ။ န့ မုး နဝ်း ဖွိုမ် ဇဝ်ဖြာ၊ ဘော အိုမ်၊ ဘော နှာမ်။ အူယ် မျုဝ် တီ၊ ဟဲ့ လာယ် ဖြူမ် ဒီ ကာလာင် ဘဲန် အူ မျုဝ်။ 9 ဆေ န့ မုး ပီ ကာလာင် ဒူအီ၊ အေ နပ် ဒီ ညှိုမ်။ ဆေ န့ ယီ မုး ပီ ကာလာင် ဇဝ်ဖြာ၊ န့ ဟဲ့ ဝဲ မွှိုမ် ညှိုမ်။ ခုဝ်၊ ဟဲ့ မုး ဇဝ်ဖြာ အီ ဟဲ့ ကာလာင် လွင် ဂွန် အန် တီ။ 10 ပါယ် တီ၊ အာဆေ ညှိုမ် ဂွန် ဇဝ်ဖြာ တီ၊ အန် ဟဲ့ မိုဝ်း ဆက်ဆေ အီ ကာလာင် လွင် ဇဝ် ယေဆူ ခဲင် နဝ်း အန်။ အာဆေ ယီ တူ ညှိုမ် ဇဝ်ဖြာ၊ န့ ပီ အန် တဝ်း၊ ဇဝ်ဖြာ ဆီမာ ကာလုဝ်။ ခုဝ်၊ အန် တူ ညှိုမ် ပဲ့ ဟဲ့ ကာလာင် ဇဝ်ဖြာ လွင် ဂွန် အန် တီ။ 11 မာလဲ၊ ဇဝ်ဖြာ ဟဲ့ တဝ်း၊ အန် ဟဲ့ ဒွါ အာဆာက် ကာမာယ်။ ဇဝ်ဖြာ ဟဲ့ ဒွါ အာဆာက် ကာမာယ် တီ ဒီ အေ ကူပ် ညှိုမ် ဘိုင် အေ ဇဝ် ယေဆူ အီ မုး ဂွန် ဇဝ်ဖြာ တီ။ 12 အာဆေ ညှိုမ် ဘိုင် ဂွန် ဇဝ်ဖြာ၊ အန် ဟဲ့ ပွိုန် အာဆာက် ကာမာယ်။ အာဆေ တူ ညှိုမ် ဂွန် ဇဝ်ဖြာ၊ အန် တူ ပွိုန် အာဆာက် ကာမာယ်။

13 အုဝ် ဟဲ့ ဒဲမ် လွင် အန် တီ ဒီ ဘေ အီ ဟဲ့ ညှိုမ် ဂွန် ဇဝ်ဖြာ၊ တဲး ဘေ နပ်၊ ဘေ ဟဲ့ ပွိုန် အာဆာက် ကာမာယ် အီ ကွယ် ဆေဆေ။ 14 ဒေါ ဟဲ့ ကွယ် ဆာခိုဝ် အေ ဒီ အာတ့် ဇဝ်ဖြာ၊ နဝ်း ယ အေ ဒီ လိုဝ်း ဆီချာ။ ဆေ အေ ဆာခိုဝ် မှာန့် ဘော မုး မျုဝ် မှဝ်၊ ဆေ န့ မုး အီ လဝ့် နဝ်း အန် ဇဝ်၊ အန် မိူဝ် ဒီ ထူမ် ဂြုဝ်း ပီ ဆာခိုဝ် အေ။ 15 ဆေ အေ ဟဲ့ နပ်၊ အန် ဇဝ် ဟဲ့ ထူမ် ဂြုဝ်း ပီ ဆာခိုဝ် ပီ မှာန့် အေ၊ အေ မိူဝ် ဟဲ့ နပ် အန် ဟဲ့ ဒွါ ခဲ့ ပီ ဆာခိုဝ် ပီ မှာန့် အေ။ 16 ဆေ န့ မိုဝ်း အီ ဟဲ့ ယိုဝ်၊ ဘီနွင် အန် ဟဲ့ ဘူင် မှာပ် အီ မုး မှာပ် ပီ ဒီ ဂဝ်း ဝဲန် ဇဝ်ဖြာ၊ တဲး အန် ဆာခိုဝ် ဒီ ဇဝ်ဖြာ၊ တဲး ဇဝ်ဖြာ ဒွါ အာဆာက် ဒီ ဘီနွင် အန် အီ ဟဲ့ ဘူင် မှာပ် ဇိုဝ် တီ။ အာတီ အုဝ် ကာလာင် မီ လွင် ဂေ အီ ဘူင် မှာပ် ပီ ဒီ ဂဝ်း ဝဲန် ဇဝ်ဖြာ။ န့ ဘော မိုဝ်း မှာပ် ပီ တူ ဂဝ်း ဝဲန် ဇဝ်ဖြာ။ အုဝ် တူ တဝ်း၊ တဲး ဘေ ဆာခိုဝ် ဒီ ဇဝ်ဖြာ လွင် မှာပ် ဇိုဝ် တီ။ 17 ပီ ဘူင် ကာလိုပ် အေ ဒွန် မျုဝ်၊ န့ ဘဲန် မှာပ် အီ တဲး ဒူအီ ယမ်။ မာလဲ၊ ဇဝ်ဖြာ ဒီ ဂဝ်း ဝဲန် မှာပ် တီ။

18 အေ နပ်၊ ဂေ အီ ဟဲ့ ဘဲန် ဂွန် ဇဝ်ဖြာ၊ ဂေ တူ ဘူင် ဟာဝ် မှာပ် ပီ ဘြိမ်။ ခုဝ်၊ ဂွန် ဇဝ်ဖြာ အူ ဝီ တွိုန်၊ အန် ဒီ ယွတ် လိုမ်လာ ဂေ။ ဘုဝ် ကာနမ် မိူဝ် တူ ပွိုန် ဒီ တာ ဒိုဝ်၊ တာ ပါ ဂေ။ 19 အေ ယီ ဟဲ့ နပ်၊ အေ ဟဲ့ ဘဲန် ဂွန် ဇဝ်ဖြာ။ အေ မိူဝ် ဟဲ့ နပ်၊ ဘုဝ် ကာနမ် ဟဲ့ အိုပ် ဂေ ဒူအီ ဘောကာဂ့လျီတ် အီ ကွယ် ဒဲင် ကာဒါယ်။ 20 အေ ဟဲ့ နပ် ဂွန် ဇဝ်ဖြာ ဟဲ့ တး၊ တဲး အန် ဒွါ အာငျာန် ဒီ အေ၊ တဲး အေ နပ် ဇဝ်ဖြာ အီ ဟဲ့ မှာန် ဟဲ့ မုး။ အေ မိူဝ် ဟဲ့ ကွယ် ကာဒိုက် ကာဒဝ့် ဒီ ဇဝ်ဖြာ အီ ဟဲ့ မှာန် ဟဲ့ မုး။ အေ ဘော ကွယ် ကာဒိုက် ကာဒဝ့် ဒီ ဇဝ် ယေဆူ အီ မုး ဂွန် ဇဝ်ဖြာ။ အန် ဇဝ် တီ ဟဲ့ မုး ဇဝ်ဖြာ အာခါခ်ု ဘော နပ် ဒီ ဒွါ အာဆာက် ကာမာယ် အီ ကွယ် ဆေဆေ။ 21 အိုယ် ဘေ အီ ပီ ဂွန် ပီ ရွက့် အုဝ်၊ တဲး ဘေ ဆာဒိက်။ တဲး ဘေ ဝး အာရိုပ် ရာင်၊ ကွဲ့ တဲး ဘေ ကြိုပ်။