တဲး မဲ နပ် ပေါ မျုဝ်။ ဆေ ဇာတ် နီ ဟီ ကာတတ် ဒီ တူတ့်၊ န့ ဒီ မိုဝ်း အာခြာဝ် ဒီ ဒုက် ဒီ ညှာပ် ကာဆဝ်။ 2 ဂေ ဒူအီ၊ ဂေ ဒီ ရွက့် မီ ဒုဝ် ဘြိမ် ဂေ၊ ရွက့် ရွိုန် ဂေ ခြိဝ်။ ဂေ ဘော မိုဝ်း နဝ်း ပီခိုက်၊ ထာင် ဒုဝ် ဘြိမ် ဂေ ဟဲ့ ကျ။ ဂေ ဒီ ဘော ဖျာက် အီ ဟဝ်၊ အာဝ် ဟူ ထူမ် ဂြုဝ်း ဂုန့် မာ၊ အာဝ် ဟူ နပ် ဂုင် ဂေဇူ အီ၊ အာဝ် နပ် နာ ဘွတ် နာ မွှိုမ်။

3 ဂေ မိူဝ် တူ ရွက့် အာဆေ၊ တူ ကာဝေ အီ ဟဝ်။ ဂေ နပ် ဒီ ခဲ အာဂျာင် အီ၊ တူ နပ် ဒီ အူတ် နဝ်း၊ ဘော ဟာယ် ကာဆဝ်။ ဂေ ဘော ဇွင့် အီ ဘွတ် အီ မွှိုမ် ဒွန် မျုဝ်။ 4 ဂေ ညိုင်ရာင် ဒီ ဘဲန် ဂိုက်၊ ယီ ဘူင် နာ စီစိဝ်။ ဂေ အာဝ် ဟူ နပ် ဒီ ဆာဒိက် ပီ ဘူင် ဂေ၊ ယီ ဘူင် ပီ တူ ဇေန့်ဇာ ဂေ။ ဂေ မိုဝ်း နဝ်း ပီခိုက် ဘော ရွက့် အီ ကျဝ် အီ ဘျုဝ် ဒီ နဝ်း။ ဂေ ဘူင် ဇိုဝ် တီ ဒွန် မျုဝ်၊ ယီ တူ ရွက့် ဇဝ်ဖြာ။ 5 ဂေ ဘော နပ် ဒီ ဘူင် ပီ ဘူင် ဂေ ဒူအီ အီ ရုဝ်ဆေ ဇဝ်ဖြာ။ မာလဲ၊ ဂေ ဘော နပ် ဒီ တဝ်း၊ ဇဝ်ဖြာ အာဝ် မိုဝ်း ပွုန်။ တဲး မဲ ဝး ဒူအီ ဇိုဝ် တီ။ 6 ဂေ နပ် ဒီ တး လိုပ် ခဲင် ကာင် အီ ဟဝ် ဘော ကာလာင် တဲး ဂေ ပွိုန် ဒီ အိုပ် အီဘိုန့် အီ တူ မိုဝ်း နဝ်း မန် ဆီချာ။ ဂေ အီဘိုန့် ဇိုဝ် တီ ဟဲ့ ဒွိုမ် ဘူင် မှာပ် ကိူန် ဘော မိုဝ်း နဝ်း ကာလိင် ကာလဲ ကူပ် ဆီ ပွိုန် ဂေ အီ တူ မွှိုမ် ဘဲန် မျုဝ် ဘဲန် မျုဝ်။ 7 ဂေ ပီ ဘော ဟဲ့ နပ် ဒီ ဟေန်၊ နပ် ဒီ ထူမ် မိူဝ်၊ ဂေ ယီ တူ နပ် နာ မုး နာ မှာန်။ 8 ဂေ ဒူအီ အီ တူ မွှိုမ် ဇိုဝ် တီ၊ ဂေ ဘော ပီ အာယန်နေ ဂါယ် အာယမ်ဘေ အီ ဟဲ့ လာယ် ကာခဲန့် ဒီ အာမုဝ်ဆဲ တွိုန်။ ပါယ် တီ ဘော ဂေ ဟဲ့ ကာဘး ဒီ နာ မုး နာ မှာန်။ ပီ ဇေန့်ဇာ ဂေ ဘော မွှိုမ် ကာအိး။ ဘော ပီ ညှိုမ် ဂေ ဟဲ့ ကာလိုပ်။

9 မာလဲ၊ ဂေ တူ ပွိုန် ဒီ ဘူင် လှေန့် လွင် အန် တီ။ နာ ဟာယ် ပီ ဘူင် ဒူအီ ဇိုဝ် တီ၊ န့ ဒီ လိုဝ်း ဆီချာ ဒီ ဒွန် အီ။ န့ ဒီ ပီ ပီ ဘူင် ဂါယ် အာ ဝီ တွိုန်။ 10 မဲ ယီ ဟဲ့ နပ် ဆီချာ ဂြုဝ်း ပီ မာနုဝ် အုဝ် ဘော ပီ ဘူင် အုဝ် ဒွန် မျုဝ်။ မဲ မိူဝ် ဟဲ့ နပ် ပီ ခြာမ် အုဝ်၊ ပီ ညှိုမ် အုဝ် ဘော ပီ ခမ် အုဝ် ဒီ ယိူန်၊ ပီ ရွက့် အုဝ် ဘော ခဲ့ ပဲ့ ဟဲ့ ခမ် အုဝ် ဒုက် ဒီ အီ ဟဝ်။ 11 အုဝ် မိူဝ် ဟဲ့ ခမ် အီ ဟဝ် ခါနှာပ် အုဝ် ဘော ခမ် ဒုက် ဒွန် မျုဝ်။ မဲ မိူဝ် ဟဲ့ နပ် ပဲ့ ဟဲ့ ဘူင် အီ ဟဝ် ဒီ အုဝ် ဒေါ ကွယ် အုဝ် ခဲင် မိူင် အန်ထီအုဝ့်၊ ခဲင် မိူင် အီခုဝ်နီ ဘော ခဲင် မိူင် လူထာရာ။ မဲ ဟဲ့ နပ် အုဝ် ဟဲ့ ခမ် ခဲ့ မှဝ် ပီ ခါနှာပ် အီ ဟဝ် ဒီ အုဝ်။ မာလဲ၊ ဇဝ်ဖြာ ဟဲ့ ဝီ ချွတ် အုဝ်၊ တဲး အုဝ် လွတ် ခဲင် ဒုက် ဇိုဝ် တီ ဒွန် မျုဝ်။ 12 န့ ဟဲ့ မှာန်၊ ဂေ အီ ဘူင် ဒူပ် ဂြုဝ်း ဇဝ်ဖြာ ပီ မာနုဝ် ဇဝ် ယေဆူ ဒွန် မျုဝ်၊ ဂေ ဒီ လုဝ် ခမ် ပီ ခါနှာပ် အီ ဟဝ်။ 13 မာလဲ၊ ဂေ ဒူအီ ဟာယ် ဒူအီ မိူက် ဘော ဂေ ဒါ ဆာရာ အီ မာနုဝ် ကာလိုပ်၊ ဂေ ဒီ ဝဲ ဘူင် ဟာဝ် အီ ကာဒါတ့်။ ဂေ ဒီ ကာလုဝ် အီ ဟဝ်၊ ဘော အီ ဟဝ် ပီ ဒီ ဝီ ကာလုဝ် ဂေ။

14 အီ မုး မဲ၊ တဲး မဲ ဘူင် ဒူပ် ခဲ့ ပီ ဒွိုမ် ဟေန် မဲ ဘော ပီ ညှိုမ် ဆီချာ မဲ။ မဲ ဟဲ့ နပ် ဒါ ဆာရာ အီ မာနုဝ် မဲ၊ အန် မုး အာဆေ။ 15 တဲး မဲ လှုဝ်း၊ ဆိန့် ဒေါ မုး မဲ ဂွန် ဒီတဲတ်၊ မဲ ဟဲ့ နပ် ဂြုဝ်း ဇဝ်ဖြာ အီ ဟဲ့ ဒဲမ် အုန်၊ အီ ဟဲ့ တဲး မဲ မိုဝ်း အာငျာန်၊ တဲး န့ ချွတ် မဲ ကူပ် ညှိုမ် မဲ ဇဝ် ယေဆူ။ 16 ဂြုဝ်း ခဲင် ဘပ် ဇဝ်ဖြာ ဒွန် ဒဲ၊ န့ ဘော မုး ဇဝ်ဖြာ အီ ဟဲ့ ကာလာင် ခဲင် နဝ်း ဒူအီ၊ တဲး ဂေ ဒဲမ် အုန်။ အန် ဒွါ ဘပ် အန် တီ ဒီ အေ၊ တဲး န့ ဘဲန် အာဂျိုဝ် ဒီ အေ။ န့ ဒီ မာနုဝ် အေ၊ တဲး အေ နပ် ပီ အိုင် အန် ဇဝ်။ န့ ဘော ဘျ ပဲ့ ဟဲ့ ကာလိုပ် အေ။ န့ ဘော စွယ် အေ ကွဲ့ တဲး အေ ဘူင် ဟာဝ် အီ တူ မွှိုမ်။ န့ ဘော ဖိုက် အေ၊ တဲး အေ နပ် ဒီ ဘူင် ဆိူဝ် ဆိူဝ် မှာန် မှာန်။

17 ပါယ် တီ၊ န့ ဘော စွယ် တဲး ဒူအီ ပီ အိုပ် ဇဝ်ဖြာ နပ် ဒီ ဘူင် နာ ဘွတ် နာ မွှိုမ်၊ တဲး န့ ကော ဇေ့ဇုင် တူတ့် ဒွန် မျုဝ်။