အီ မုး မဲ အီ ဟဲ့ ဘဲန် ဂွန် အုဝ်၊ တဲး မဲ ဒိုဝ်း ကိူန် ဂေဇူ ပီ ဒွါ ဇဝ် ယေဆူ ဒီ မဲ။ 2 ဂြုဝ်း ပဲ့ ဟဲ့ ကာလာင် အုဝ် ဒေါ ဟဲ့ မိုဝ်း ဒူအီ ကိူန် ထူမ် တွိုန်၊ တဲး မဲ ဒိုဝ်း ဂြုဝ်း တီ၊ ဝီ မာနုဝ် ဒီ ဒူအီ အီ မိုဝ်း နဝ်း ဆိူဝ် နဝ်း မှာန်၊ အီ နပ် ဒီ ဝီ မာနုဝ် အီ ဟဝ်။ 3 တဲး မဲ ခမ် ဒုက် ပီ ယေ၊ တဲး မဲ ဒူပ် ဇဝ် ယေဆူ ပီ ဒါ ဆိုက် အီ ကျ ဒီ ကာဂုဝ်း။ 4 ဒါ ဆိုက် အီ ဘူင် ဂါန် အန်၊ အန် မိူဝ် ဘူင် တဲး န့ လဝ့် နဝ်း ဒါ အီ အိုပ် အန်။ အန် မိူဝ် တူ ကာဝှ်ု ကာဝျှီန် ဒီ ဂါန် ရဝ် ဂါန် ကာင်။ 5 ပါယ် တီ၊ ဘော ဒူအီ အီ လာယ် ကာခဲန့် ကာဘ့လဲပ် ခဲင် ဘ့လွယ် မိူဝ်၊ ဆေ အန် ယီ တူ ဘူင် ဒူပ် ဟိတ် ပီ ဘ့လေး အုန် အီ ခဲင် ဘ့လွယ် တီ၊ အန် မိူဝ် တူ ပွိုန် ရုး အန်။ 6 ဘော ဒူအီ အီ ရန့် ဒူင် နာ မိူဝ်၊ ဆေ အန် ဟီ ရန့် နုန် ကာဆဝ်၊ အန် ဒီ ဝီ ပွိုန် ငှုဝ် ခဲ့ လုဝ် ပွိုန် အန် လွှိုမ် အီ ဟဝ်။ 7 ဂြုဝ်း ပီ ကာလာင် အုဝ် နီ၊ တဲး မဲ ဘော ကာဒွါ့ ကာဖာ။ ဇဝ်ဖြာ အီ ဒီ တဲး န့ ကာလှုး ဒီ နဝ်း မဲ ဒွန် မျုဝ်။

8 တဲး မဲ လှုဝ်း ဇဝ် ယေဆူ အီ ဟဲ့ ယမ်၊ ဝီ ယိတ့် ဝီ အိမ်။ အန် မုး လှုက်လှာန် ခုန်ဒီခမ် အာဒါဝိတ်။ ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ် ပီ ကာလာင် အုဝ် နီ၊ န့ ဘော မုး လွင် အန် တီ။ 9 ကူပ် ကာလာင် အုဝ် ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ် တီ၊ အုဝ် မိူဝ် ကာဒုး ဒီ ခမ် ဒုက်၊ ကာဒုး ပက် အီ ဟဝ် ပီ ဒူအီ ဟာယ်။ ပီ ဘော ဟဲ့ ပါယ် တီ မိူဝ်၊ ယီ တူ မိုဝ်း အာဆေ အီ ပွိုန် ခြဲ ဂြုဝ်း ဇဝ်ဖြာ။ 10 ခုဝ် အန် တီ အုဝ် မိူဝ် ခမ် ဒီ ယိူန် ဒွန် မျုဝ်၊ တဲး ဇဝ် ယေဆူ ပွိုန် ဒီ ချွတ် ဂေ ဒူအီ ပဲ့ ဟဲ့ ရဝ်း ဇဝ်ဖြာ၊ တဲး ဂေ ဘော မိုဝ်း အာဖုင် ဒင်ခုဝ် ဇဝ်ဖြာ အီ ကွယ် ဆေဆေ။

11 န့ ဟဲ့ မှာန် ဂြုဝ်း အီ တဝ်း၊

14 တဲး မဲ ကာလာင် ဂြုဝ်း တီ ဒီ ဒူအီ ပီ မာနုဝ် မဲ ဘဲန် ဇေန့် ဘဲန် ဇေန့်။ တဲး မဲ ဘော ဒမ် ဆာဒိက် ဒီ ဂေ၊ တဲး ဘော ဇဝ်ဖြာ ထူမ်။ တဲး ဂေ ဝဲန် ဂြုဝ်း ပီ လာယ် ကာထဲန့် ဂေ လွင် အီ တူ မိုဝ်း ဒီခုဝ်။ န့ တူ မိုဝ်း အာဂျိုဝ် ဘော နပ် ဒီ ပျာတ့် နဝ်း ဂေ ဒူအီ အီ ထူမ်။ 15 အီ မုး မဲ၊ တဲး မဲ ခတ် နဝ်း ဒီ ဘူင် ဂါန် ဇဝ်ဖြာ၊ တဲး န့ လဝ့် နဝ်း အန်။ ကွဲ့ တဲး မဲ ဆာယ် ဒီ ဘူင် ဂါန် အန် ဇဝ်။ တဲး မဲ ကာလာင် ဆိူဝ် ဆိူဝ် ဂြုဝ်း ဇဝ်ဖြာ အီ မုး အီ မှာန်။ 16 တဲး မဲ ဝး ဂြုဝ်း ပီ ကာလာင် ဂေ အီ တူ နပ် ဇဝ်ဖြာ၊ အီ မုး ဂြုဝ်း ပီယေန့်၊ အီ တူ မိုဝ်း ဒီခုဝ်။ ဂေ အီ ကာလာင် ဂြုဝ်း ဇိုဝ် တီ၊ ဂေ ဟဲ့ ကြဲ ဒီ ကာယာန် တူင့် ဒီ ဇဝ်ဖြာ။ 17 ဂြုဝ်း ဂေ တီ၊ န့ ဘော ပီ ယဲန် အီ နပ် ဒီ ဘြဲ လိုပ် ခဲင် ယင် ခဲင် ဟုန် အေ။ ဒူအီ အီ ကာလာင် ဂြုဝ်း ဇိုဝ် တီ၊ န့ ဘော ဘာ့ ဘော အာဟူမဲန် ဂါယ် အာဖီလေက်။ 18 ဂါယ် ဟဲ့ ကြဲ ဒီ ကာယာန် ဒီ နာ မုး နာ မှာန်။ ဂါယ် ဟဲ့ မာနုဝ် တဝ်း၊ ဇဝ်ဖြာ ဟဲ့ ဟွတ့် တဲး ဒူအီ အီ ညှိုမ် အန် ဝီ ယိတ့် ဝီ အိမ်။ ပါယ် တီ ဂါယ် ဘူင် တဲး မင် အီ ဝဲန် ပီ ညှိုမ် ဂေ 19 မာလဲ၊ ဂေ အီ ညှိုမ် ဆီချာ ဇဝ်ဖြာ၊ ဂေ ပီ စေန့် ရွင့် ခဲင် ကာင် အီ မန် ဆီချာ။ ဒဲင် စေန့် ရွင့် တီ၊ န့ ပီ ဇဝ်ဖြာ ဟဲ့ ဒွက် အုန် ဇိုမ် အန် အီ တဝ်း၊ “ဇဝ်ဖြာ ဟဲ့ နပ် ဂေ အီ မုး ဒူအီ ပီ အိုပ် အန်။” န့ ဘော တဝ်း၊ “အာဆေ တဝ်း၊ အန် ညှိုမ် ဇဝ်ဖြာ၊ အန် လုဝ် ဝး အီ တူ မွှိုမ်။”

20 ပါယ် တီ၊ ခဲင် ကာင် တာင် အူ ကာင်၊ န့ ဘော မိုဝ်း ကာလုဝ့် ဆီလယ့် ဒွန် မျုဝ်။ မင် မျုဝ် ဟဲ့ ဒိုဝ်း ရွိုန် ဂေ ခြိဝ် ဘူင်။ မင် မျုဝ် ဘော မုး ကာဒါယ် ဂေ ဟေ။ မင် မျုဝ် ဟဲ့ တာ အာခြာဝ် ဘ့လွယ်၊ တဲး ဂေ မိုဝ်း ဆာရေ။ မင် မျုဝ် န့ တာ မီ ခဲင် ကာင်၊ အာဝ် ဘော မိုဝ်း ဆာရေ။ 21 ခုဝ်၊ အာဆေ ဟဲ့ ဝး ဟဲ့ ဝဲန် လွင် အီ တူ မိုဝ်း ဆာရေ၊ ဟဲ့ တဲး ဒုဝ် ဘူင့် အန် ဆီငါ ဘွတ်၊ အန် မိူဝ် ဒီ ပီ ကာလုဝ့် ဂေ ဆီလယ့် အီ ဟဲ့ ဆီငါ၊ အီ ဟဲ့ မိုဝ်း ဆာရေ။ အန် ဟဲ့ ကာအာပ် ဘူင် ဂါန် ဒါ ကာညာ အန် ဒွန် မျုဝ် အီ ဘွတ် အီ မွှိုမ်။

22 တဲး မဲ ဝး နဝ်း ကာဝါတ့် ပီ ကာဒိုက် ကာဒဝ့် ဂေ ကာညူမ်။ တဲး မဲ နင်ဂန် ဒီ ဘူင် ဒူပ် နာ မုး နာ မှာန်၊ တဲး မဲ ဘော မိုဝ်း နဝ်း ညှိုမ် ဘော နဝ်း ရွက့် ဘော နဝ်း ဂျီတ်။ တဲး မဲ ကာလဝ့် ဒီ ဂေ အီ မိုဝ်း နဝ်း လုယ် ဘော ဆာခိုဝ် မှာန့်၊ တဲး ဇဝ်ဖြာ စွယ် ဂေ။ 23 မဲ ယီ ဟဲ့ နပ်၊ အာဝ် လုဝ် ကာလာင် ဂြုဝ်း တူ မွှိုမ် အီ တူ မိုဝ်း ဒီခုဝ်။ ဂြုဝ်း ဇိုဝ် တီ၊ န့ တဲး အီ လာယ် ကာအေး လာယ် ကာထဲန့် ပီယေန့်။ 24 ဆေ န့ မုး ဒဲစေန့် ဇဝ်ဖြာ၊ အန် တူ ပွိုန် လာယ် ကာလုတ့် ဒီ အီ။ အန် လုဝ် မိုဝ်း နဝ်း ဒါခိုယ်၊ နဝ်း မွှိုမ် ဒီ ဒူအီ ဒွန် အီ။ အန် လုဝ် နပ် ဒီ မာနုဝ် ဆီချာ အီ၊ တူ အုန် နဝ်း ဒီ အီ။ 25 အန် ဘော လုဝ် နပ် ဒီ ကာလာင် ဂြုဝ်း ဒါခိုယ်၊ ဂြုဝ်း န့စမ် ဒီ ဂေ အီ လာယ် ကာဘး ဒီ အန်။ အန် ဒီ တဲး ဇဝ်ဖြာ ဘူင် တဲး ဂေ လှုဝ်း ဝီ ဝဲန် ပီ ကာလိုပ် ဂေ။ တဲး ဂေ ဝီ ဘျွင် နဝ်း၊ ဝီ နပ် နာ မှာန်။ 26 ဆေ မဲ ဘူင် ပါယ် တီ၊ ဂေ ဒီ ဝီ လှုဝ်း ဒုဝ် ဂေ၊ ဝီ ပွိုန် ဒီ လွတ် လေး တ ဘုဝ် ကာနမ် အီ ဟဲ့ ပက် ဂေ၊ တဲး ဂေ ဘူင် ပီ အိုင် အန်။