1-2 အုဝ် အာပေါလူ ဒဲမ် ပဲ့ နီ ဒီ မဲ အာထီမုဝ်ထေ။ မဲ ဟဲ့ ပီ ဂွန် ပီ ရွက့် အုဝ်။ ဇဝ်ဖြာ ဟဲ့ အိုင် ဒီ တဲး အုဝ် ဘဲန် ဒူအီ ပီ ရဝ်း ပီ တိုယ် ဇဝ် ယေဆူ၊ တဲး အုဝ် ပွိုန် ဒီ ကာလာင် ဒီ အီ ဟဝ် လွင် အာဆာက် ကာမာယ် ပီ ဒွါ ဇဝ် ယေဆူ ဒီ ဂေ။

တဲး ဇဝ်ဖြာ အီ မုး ဂုန့် အေ ဘော ဇဝ် ယေဆူ အီ မုး ဒါ ကာညာ အီ အိုပ် အေ ဂေဇူ မဲ ဘော ကာဝေ မဲ၊ ဒွါ ဘော နဝ်း ဂျီတ် ဒီ မဲ။ 3 ဒေါ ကြိုပ် အုဝ် ဒီ ဇဝ်ဖြာ၊ အုဝ် တူ မိုဝ်း နဝ်း အီ ဖျာက် ဒုဝ် ဘြိမ် အုဝ်။ ပါယ် တီ အုဝ် ဆာခိုဝ် ပီ ဒွိုမ် ဆာခိုဝ် ဂေ ဒါ ဒါ အုဝ်။ ဒေါ ဆာခိုဝ် အုဝ် ဒွန် မှိုဝ် ဒွန် ညှာ၊ ဒွန် ဇေန့် အုဝ် ဘော ဒါင် ဂုင် ဂေဇူ ဒီ ဇဝ်ဖြာ ဘော လှုဝ်း မဲ။ 4 ဆေ အုဝ် လှုဝ်း ဒေါ ဟဲ့ ယာမ် မဲ၊ န့ တဲး အုဝ် ဒီကေန် မဲ။ န့ တဲး အုဝ် ဆီ ယိုဝ် ကာဆဝ် မဲ၊ တဲး န့ ဘဲန် နဝ်း ဒါခိုယ် ဒီ အုဝ်။ 5 အုဝ် ဘော လှုဝ်း ပီ ညှိုမ် ဆီချာ မဲ။ န့ ပီ ပီ ညှိုမ် ယာ မဲ အီ စိူဝ် ယာ လောအီ။ န့ ပီ ဘော ပီ ညှိုမ် မာ မဲ အီ စိူဝ် အူနိက် အီ ဟဲ့ ညှိုမ် ဒီ အာတ့်။ ဒေါ တီ နီ၊ အုဝ် ဟဲ့ နပ် ဆီချာ၊ ပီ ညှိုမ် ဂါယ် တီ ဟဲ့ ဝီ လိုပ် ကွယ် ဘော ခဲင် နဝ်း မဲ။ 6 ခုဝ် အန် တီ အုဝ် စ်ု မဲ၊ တဲး မဲ ဘူင် ဒူပ် နင်ဂန် ပီ ဂေဇူ ဇဝ်ဖြာ ဒီ မဲ၊ ပဲ့ ဟဲ့ အာပ် အန် ဒီ မဲ ဒေါ ဟဲ့ ဆာခိုဝ် အုဝ် ဘော ဒါင် ဒဲ ဒဲင် ဂိန့် မဲ တွိုန်။ 7 ခုဝ်၊ ဇဝ်ဖြာ တူ တဲး အေ မိုဝ်း နဝ်း ဖွိုမ် အီ နပ် ဒီ ယုဝ်။ အန် ဟဲ့ ဒွါ နဝ်း ဖွိုမ် အီ မိုဝ်း ပွုန်၊ အီ နပ် ဒီ ရွက့်၊ ဘော နဝ်း ဖွိုမ် အီ ပဲ ဒီ အိုပ် ဒုဝ် ဘြိမ် အေ။

8 ခုဝ် အန် တီ ကွဲ့ ဆာယ် ဒီ ကာလာင် ဒီ အီ ဟဝ် လွင် ဇဝ်ဖြာ။ ကွဲ့ ဆာယ် ဘော လွင် ဟဲ့ စုဝ်း အုဝ် ခဲင် ကာပိုမ် ကူပ် ဒူပ် အုဝ် အန် ဇဝ်။ တဲး မဲ ယီ ခမ် ဒုက် ပီ အုဝ် ဟဲ့ ခမ် ဒုက် ကူပ် ကာလာင် အုဝ် လွင် အန် ဇဝ် အီ တဲး နဝ်း ဒူအီ ဒါခိုယ်။ တဲး မဲ ဘော ဘိုင် ပွုန် ဇဝ်ဖြာ အီ ဟဲ့ ချွတ် ဘော မဲ ဘော အုဝ်။ 9 အန် ဇဝ် ဟဲ့ ချွတ် အေ၊ တဲး အေ ဘဲန် ဒူအီ အီ ဆီငါ ဘွတ်။ အာဝ် မုး အာဂျိုဝ် ကူပ် ဘူင် အေ နာ ဘွတ်။ အန် ဇဝ် ဟဲ့ ဘူင် ဒူပ် ပီ ခြာမ် အန် ဒီ ဘူင်။ အန် မိူဝ် ဟဲ့ ချွတ် အေ ကူပ် မိုဝ်း အန် နဝ်း ဆီ ဂေဇူ အေ။ ပီ ဂေဇူ အန် တီ ဇဝ်ဖြာ ဟဲ့ ဟွတ့် ဒွါ ဒီ အေ ဆိန့် အာတ့် မိုဝ်း ကာဒါယ်။ ဒေါ အန် တီ အန် ဟဲ့ ဟွတ့် ဆုင်ဖျာတ် တဲး ဇဝ် ယေဆူ ချွတ် အေ။ 10 မာလဲ၊ ပီ ဂေဇူ ဇဝ်ဖြာ တီ၊ န့ ဟဲ့ ဝီ လိုဝ်း ဆီချာ ဒေါ တး ချွတ် ဇဝ် ယေဆူ ဒီ အေ။ ခုဝ်၊ အန် ဟဲ့ ပျာတ့် ဝဲန် ပွုန် ဇဝ် မာရာန။ အာဆာက် ကာမာယ် အီ တူ တဲး အီ ယမ် ဒေါ မှဝ် မိူဝ်၊ န့ ဟဲ့ ဝီ လိုဝ်း ဆီချာ ကူပ် ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ်။ 11 ကူပ် ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ် တီ၊ အန် ဇဝ် ဟဲ့ တဲး အုဝ် ဘဲန် ဒူအီ အီ ကာလာင် တဲး ဒွန် အီ နပ်။ အန် တဲး အုဝ် ဘဲန် ဒူအီ ပီ ရဝ်း ပီ တိုယ် ဇဝ် ယေဆူ၊ ဘဲန် ဒါ ဆာရာ အီ မာနုဝ် အီ ဟဝ်။ 12 ခုဝ် အန် တီ အုဝ် မိူဝ် ကော ခမ် ဒုက် ပါယ် နီ။ ပီ ဘော ပါယ် တီ မိူဝ်၊ အုဝ် တူ ဆာယ်။ အုဝ် ဟဲ့ နပ် ဆီချာ ဝီ ပီ ညှိုမ် အုဝ်။ အုဝ် ဘော နပ် ဆီချာ၊ ပဲ့ ဟဲ့ အာပ် အုဝ် ဒီ အန် ဇဝ်၊ အန် ဒီ ဘ်ု ဆီချာ၊ တဲး န့ ကော ဇမ် ဆီငဲ ပန် ဒီ ဝီ တး အန်။

13 တဲး မဲ ဝီ မာနုဝ် အီ ခဲ့ ပီ မာနုဝ် အုဝ် နီ ဒီ မဲ။ ဆေ မဲ မာနုဝ် ဟာဝ် ပါယ် တီ၊ တဲး မဲ မိုဝ်း နဝ်း ညှိုမ် ဘော နဝ်း အီ ရွက့် ဇဝ် ယေဆူ။ 14 တဲး မဲ ယွတ် မဲန် ဆီချာ ဂြုဝ်း ဇဝ်ဖြာ ပဲ့ ဟဲ့ အာပ် ဒွါ အန် ဒီ မဲ။ နဝ်း ဖွိုမ် ဇဝ်ဖြာ အီ ကွယ် ခဲင် နဝ်း မဲ၊ အန် ဒီ စွယ် မဲ။

15 မဲ ယီ ဟဲ့ နပ်၊ ဂေ ဒူအီ အီ ညှိုမ် ဇဝ် ယေဆူ အီ ကွယ် ခဲင် အိူင် အာဆီယာ၊ ဂေ ဒွန် အီ ဟဲ့ တဝ် အုဝ်။ ခဲင် ဖိုင် ဂေ တီ၊ န့ ဘော ဘာ့ ဘော အာဖူဂေလူ ဘော အာဟေရာမောကေန်။

16 တဲး ဇဝ်ဖြာ ကာဝေ န့ဟူမ် အာအောနေဆီဘုဝ်။ ခုဝ်၊ အန် ဟဲ့ တဲး ဟဲန့် ဒီ နဝ်း အုဝ် ဆေဆေ။ အုဝ် ပီ ဘော ဟဲ့ စုဝ်း ကာပိုမ် မိူဝ်၊ အန် တူ ဆာယ် အီ ကူပ် အုဝ်။ 17 ဒဲင် တီ၊ ဒေါ ဇမ် အန် ခဲင် မိူင် ရုဝ်မာ၊ အန် ဘော ဂျုဝ်ဂျာ ဒီ ဟြေတ့် အုဝ်၊ တဲး အန် ကော ကာတုန့် အုဝ်။ 18 ဆေ ဟီ ဇမ် ဆီငဲ ဒီ ဆုင်ဖျာတ် ဇဝ်ဖြာ အာမူ အီ၊ တဲး ဇဝ်ဖြာ ကာဝေ ဘော အန်။ မဲ မိူဝ် ဟဲ့ နပ်၊ ခဲ့ ဟဲ့ စွယ် အန် ဒီ အုဝ် ခဲင် မိူင် အဲဖဲ တွိုန်။