1-4 အုဝ် အာပေါလူ အီ မုး ဒဲစေန့် ဇဝ်ဖြာ၊ အုဝ် ဒဲမ် ပဲ့ နီ ဒီ မဲ အာထီထူ အီ ပီ ဂွန် အာရာင် အုဝ် ကူပ် ညှိုမ် မဲ ပီ အုဝ်။ အုဝ် ဘော မုး ဒူအီ ပီ ရဝ်း ပီ တိုယ် ဇဝ် ယေဆူ။ ဇဝ်ဖြာ မိူဝ် ဟဲ့ အိုင် ဒီ ရဝ်း အုဝ်၊ တဲး အုဝ် စွယ် ဂေ ဒူအီ ပဲ့ ဟဲ့ ရဝ်း ဇဝ်ဖြာ၊ တဲး ဂေ ညှိုမ် အန်။ အုဝ် ဘော လုဝ် စွယ် တဲး ဂေ နပ် နာ မုး နာ မှာန် အီ တဲး ဂေ ဒူပ် ဆီချာ ဇဝ်ဖြာ။ ပီ ညှိုမ် ဂေ ဘော ပီ နပ် ဂေ၊ န့ တဲး ဂေ နှဝ့် န့ဒဝ့် ဒီ ပွိုန် အာဆာက် ကာမာယ် အီ ကွယ် ဆေဆေ။ ဇဝ်ဖြာ အီ တူ နပ် ဒီ ကာလုဝ် မိူဝ်၊ အန် ဟဲ့ ဒွိုမ် ဒွါ ကာဒိက် ဆတ်ဇာ လွင် အန် တီ။ ဆိန့် အာတ့် မိုဝ်း ကာဒါယ် ဂေ ဂါင်ဟြာဝ် ဇဝ်ဖြာ ဟဲ့ တဝ်း၊ အန် ဒီ ဒွါ အာဆာက် ကာမာယ် တီ ဒီ အေ။ ဒေါ ဇမ် အာခြာဝ် အန်၊ ဇဝ်ဖြာ ဟဲ့ စ်ု အုဝ်၊ တဲး အုဝ် ကာလာင် ဂြုဝ်း ဇဝ်ဖြာ တီ၊ တဲး န့ လိုဝ်း ဆီချာ ဒီ အီ။ အန် ဇဝ် ဟဲ့ အာပ် တဲး န့ ဘဲန် ဂါန် အုဝ်။ အုဝ် မိူဝ် လုဝ် ကာလာင် ဒူပ် ဂြုဝ်း ဇဝ်ဖြာ အီ မုး အန် ဇဝ် အီ ချွတ် အေ။ မဲ အာထီထူ၊ မဲ ဘော ညှိုမ် ပီ အုဝ်။ တဲး ဇဝ်ဖြာ အီ မုး ဂုန့် အေ ဘော ဇဝ် ယေဆူ အီ ဟဲ့ ချွတ် အေ ဂေဇူ မဲ ဘော ဒွါ နဝ်း ဂျီတ် ဒီ မဲ။

5 အုဝ် ဟဲ့ တဲး မဲ ကွယ် ခဲင် ဂုန် အိုမ် အီ စိူဝ် ကြေထာ။ ခုဝ်၊ အုဝ် ဆီ တဲး မဲ ဝီ ဘူင် ဟွတ့် ခဲ့ ပီ ညှမ် ပွိုန် အုဝ် ဒီ ဘူင် ဒေါ လေး ဟာဝ် အုဝ် ဒူင် ကွယ် ဘေ တီ။ အုဝ် စ်ု မဲ၊ တဲး မဲ ဒါင် ဒါ တာင် အီ အိုပ် ဖိုင် ဇဝ် ယေဆူ အီ ကွယ် ခဲင် ရဝ် ဒွန် ရဝ် ဘော ခဲင် မိူင် ဒွန် မိူင်။ 6 ဒါ တာင် အီ ပွိုန် ဒီ အိုပ် ဖိုင် ဇဝ် ယေဆူ တီ၊ ကွဲ့ တဲး အီ ဟဝ် မိုဝ်း ဒီ ကာလာင် နာ တူ မွှိုမ် လွင် အန်။ အန် လုဝ် ကွယ် ဆီချာ၊ လုဝ် မိုဝ်း အီဘိုန့် အူ ဝီ။ ဂွန် အန် လုဝ် ညှိုမ် ဇဝ် ယေဆူ၊ ကွဲ့ တဲး အီ ဟဝ် မိုဝ်း ဒီ နဲ ဂွန် အန် တဝ်း၊ ဂေ မုး ဂွန် ဟာယ်၊ ဂွန် တူ ထူမ် ဂြုဝ်း ဂုန့် မာ။ 7 ဒါ အီ ဘဲန် ဒါ တာင် ခဲင် ဖိုင် ဇဝ် ယေဆူ တီ၊ အန် ဟဲ့ ပွိုန် ဒီ ဘူင် ဂါန် ဇဝ်ဖြာ။ ခုဝ်၊ အန် လုဝ် ကွယ် ဆီချာ။ ကွဲ့ တဲး အီ ဟဝ် မိုဝ်း ဒီ ကာလာင် နာ တူ မွှိုမ် လွင် အန်။ အန် လုဝ် မုး ဒူအီ အီ တူ ခါနှာပ် အီ၊ အီ တူ မိုဝ်း နဝ်း ကာဟဝ်း၊ အီ တူ မွက့် ပဝ်း၊ အီ တူ မိုဝ်း နဝ်း ဟာယ် နဝ်း မိူက်၊ အီ တူ ပီလွှက့် ဒီ အီ တဲး အန် ခြမ်။ 8 အန် လုဝ် မုး ဒူအီ အီ ဒါခိုယ် ဒီ ရွုး ခဲတ့်၊ အီ နပ် ဒီ ရွက့် နာ ဘွတ် နာ မွှိုမ်၊ အီ ပဲ ဒီ အိုပ် ဒုဝ် ဘြိမ် အန်။ အန် လုဝ် မုး ဒူအီ ဘွတ် အီ မိုဝ်း ဆာရေ၊ အီ မိုဝ်း နဝ်း ဆိူဝ် နဝ်း မှာန်။ 9 အန် လုဝ် ဒူပ် ဆီချာ ဂြုဝ်း ဇဝ်ဖြာ အီ ကာအာပ် ညှိုမ် ပဲ့ ဟဲ့ ဒွိုမ် ဟေန် အန်။ အန် ဘော လုဝ် နပ် ဒီ ဒိုဝ်း ဂြုဝ်း ဇဝ်ဖြာ အီ မုး အီ မှာန် တီ၊ ဝီ မာနုဝ် အီ ဟဝ် ဘော တဲး ပ့လူမ် တဲး ဟဲန့် ဒီ အီ။ အန် ဘော လုဝ် နပ် ဒီ ဝီ ဝျီ့ ဆီချာ ဂြုဝ်း ဂေ အီ ကာလာင် ကာဘး ဒီ ဂြုဝ်း ဇဝ်ဖြာ အီ မုး အီ မှာန် တီ။

10 ခုဝ်၊ ဟဲ့ မိုဝ်း ဒူအီ ကိူန် အီ ဟဲ့ ကာဘး ဒီ ဒွန် မျုဝ်။ ဂေ ဘော ဝီ ကာလာင် ဂြုဝ်း အီ တူ မိုဝ်း ဒီခုဝ် ဘော ကာလုဝ် အီ ဟဝ်။ ကာတဲ ဒူအီ ဇိုဝ် တီ၊ န့ ဘော မုး ဂေ အီ မာနုဝ် တဝ်း၊ ဒူအီ ညှိုမ် ဇဝ် ယေဆူ လုဝ် ဒူပ် ဟိတ် ဒူအီ အာယူဒါ၊ လုဝ် ဆွာ့ ဝဲန် ဟုန် လခါနာ အီမာယ်။ 11 ဒူအီ ဂေ တီ၊ မဲ လုဝ် ခြဲ ဂေ၊ ကွဲ့ တဲး ဂေ ပွိုန် ဒီ မာနုဝ် အီ။ ကူပ် ဆီ ပွိုန် ဂေ ရွိုန် ဂေ ခြိဝ်၊ ဂေ ဟဲ့ အိုပ် ဘဲန် န့ဟူမ် ဘဲန် န့ဟူမ်၊ ဝီ မာနုဝ် ပီ တူ ကာအာပ် မာနုဝ်။ 12 ကာတဲ ဒူအီ အီ ကွယ် ခဲင် ဂုန် အိုမ် အီ စိူဝ် ကြေထာ၊ ဟဲ့ ဒွိုမ် မိုဝ်း ဒါ ဆာရာ အူ ဝီ၊ အန် ဟဲ့ ဒွိုမ် ကာလာင် လွင် ဒူအီ အာမျုဝ် အန်။ အန် တဝ်း၊ “ဒူအီ ကြေထာ၊ ဂေ ဆီမာ ကာလုဝ် ဆေဆေ။ ဂေ ဘော ပီ ဒုဝ် ဆတ် အီ ဟာယ် ကာဆဝ် ဘော ကြာန် ဘော ဟူမ် တာင် ဟူမ် ကိူန်။” 13 ပီ ကာလာင် အန် တီ၊ ဟဲ့ မှာန်။ ခုဝ် အန် တီ တဲး မဲ မာနုဝ် ရာမ် ကာဆဝ် ဂေ၊ တဲး ဂေ ဝီ ညှိုမ် ဒူပ် နာ မုး နာ မှာန်၊ 14 ကွဲ့ တဲး ဂေ ဝီ ထူမ် အာဘိုမ် အီ တူ မိုဝ်း ဒီခုဝ် ပီ ခဲ ဂေ ဒူအီ အာယူဒါ တွိုန်။ ကွဲ့ တဲး ဂေ ဒူပ် ဒါရာ ဂေ ဒူအီ အီ ဘူင် ကာဘး ဒီ ဂြုဝ်း ဇဝ်ဖြာ အီ မုး အီ မှာန်။ 15 အာဒါ ဂေ ဒူအီ အီ ဆီငါ ဘွတ် ဘော ဒွန် မျုဝ် ဟဲ့ ဆီငါ ဘွတ်။ မာလဲ၊ အာဒါ ဂေ အီ မိုဝ်း နဝ်း ကာဒါတ့် အီ တူ ညှိုမ် တွိုန် အာဝ် မိုဝ်း ခေါ အူ မျုဝ် အီ ဆီငါ ဘွတ်။ ခုဝ်၊ ပီ ဇေန့်ဇာ ဂေ ဘော ပီ ဆုင်ဖျာတ် ဂေ ခဲင် နဝ်း ဂေ၊ န့ ဟဲ့ ဟွတ့် ကာဒါတ့်။ 16 မူတ့် ဂေ ပီ ဘော တဝ်း ဂေ နပ် ဇဝ်ဖြာ မိူဝ်၊ ပီ ဘူင် ဂေ န့ ဘော ဘျ၊ ဂေ ဟဲ့ ဝဲန် ဇဝ်ဖြာ။ ဂေ ဘော မုး ဒူအီ အီ မွှိုမ် ကာအိး မွှိုမ် ဇွင့်။ ဂေ မုး ဒူအီ တူ ထူမ် ဂြုဝ်း၊ တူ နပ် ဒီ ဘူင် နာ ဘွတ် နာ မွှိုမ်။