အီ မုး မဲ၊ တဲး မဲ မာနုဝ် ဒါရာ အီ ဒူပ် နာ မုး နာ မှာန်။ 2 တဲး မဲ မာနုဝ် ဂေ အီမာယ် အီ ဟဲ့ ကတ် ဟဲ့ ဂဲ၊ တဲး ဂေ ပဲ ဒီ အိုပ် ဒုဝ် ဘြိမ် ဂေ၊ တဲး ဂေ မိုဝ်း ဆာရေ၊ ဘော နပ် ဒီ ဘူင် ဒူပ် အာငျာန် ဘွတ်။ တဲး ဂေ ဘော ညှိုမ် ဘော ရွက့် ဆီချာ ဘော မိုဝ်း နဝ်း ခမ် ဒီ ယိူန် လှေန့်။

3 ဘော ဂေ ယာ ကတ် မိူဝ် ပါယ် တီ၊ တဲး ဂေ ဘူင် အီ ကာအာပ် ဘူင်၊ တဲး ဂေ ရုဝ်ဆေ ဇဝ်ဖြာ။ ကွဲ့ တဲး ဂေ ဘဲန် ဒူအီ အီ ခဲ အာဂျာင် အီ ဟဝ် ဘော ယိုတ့် ပဝ်း၊ တဲး ဂေ ယီ နပ် ဒီ မာနုဝ် အီ ဟဝ် ဘူင် နာ ဘွတ် နာ မွှိုမ်။ 4 ဆေ န့ ပါယ် တီ၊ ဂေ ဒီ ပွိုန် ဒီ မာနုဝ် ဂေ ယာ ဘာနှိုမ် တျီ့၊ တဲး ဂေ ယာ ဘာနှိုမ် တျီ့ တီ၊ ဝီ နပ် ဒီ ရွက့် အီမာယ် ဂေ ဘော ဂွန် ဂေ။ 5 တဲး ဂေ ဘဲန် အီဘိုန့် အီ ပဲ ဒီ အိုပ် ဒုဝ် ဘြိမ် ဂေ ဘော မိုဝ်း နဝ်း လုယ် နဝ်း ဆီငါ။ တဲး ဂေ ဘော နပ် ဒီ ယွတ် လိုမ်လာ န့ဟူမ် ဂေ၊ ဘော မိုဝ်း နဝ်း ကာဝေ အီ။ တဲး ဂေ ဘော ခမ် ဒီ ထူမ် ဂြုဝ်း အီမာယ် ဂေ။ ဆေ ဂေ ဘူင် ပါယ် တီ၊ အာဝ် မိုဝ်း အာဆေ အီ ပွိုန် ဒီ လုက်တာယ် ဂြုဝ်း ဇဝ်ဖြာ။

6 ဘော ဂေ အီမာယ် အီ ဆီ နှိုမ် မိူဝ်၊ တဲး မဲ မာနုဝ် ပါယ် တီ။ မဲ လုဝ် ကာဆုး ဂေ၊ တဲး ဂေ ပဲ ဒီ အိုပ် ဒုဝ် ဘြိမ် ဂေ။ 7 ဘော မဲ၊ ခဲ့ ပီ ဘူင် မဲ ဒွန် မျုဝ်၊ တဲး မဲ ဘူင် နာ ဘွတ် နာ မွှိုမ်၊ တဲး ဂေ ဘော နပ် ဒီ ညိုင် မဲ။ တဲး မဲ ဘော မိုဝ်း နဝ်း ဆိူဝ် ဒီ မာနုဝ်၊ အာဝ် လုဝ် လင်ဂ့လွိုန်။ 8 တဲး မဲ ကာလာင် နာ မုး နာ မှာန် ဆေဆေ။ ကွဲ့ တဲး အီ ဟဝ် မိုဝ်း ဒီ နဲ ဘော ကာလာင် နာ တူ မွှိုမ် လွင် မဲ။ ကွဲ့ တဲး ဂေ အီ ဘူင် ကာဘး တွိုန် မိုဝ်း ဒီ နဲန ခေါ အူ မျုဝ်၊ တဲး ဂေ ဝီ ဆာယ် အီ။

9 ဘော ဂေ အီ မုး မှာယ် အီ၊ တဲး မဲ မာနုဝ် ဂေ၊ တဲး ဂေ ခမ် ဒီ ထူမ် ဂြုဝ်း ဒါ ကာညာ ဂေ ဆေဆေ၊ တဲး ဂေ ဘော ဘူင် ပီ အိုင် ဒါ ကာညာ ဂေ ဒွန် မျုဝ်၊ ကွဲ့ တဲး ဂေ ဝီ ထဲန့် ဒါ ကာညာ ဂေ။ 10 ကွဲ့ တဲး ဂေ ပြာ ဒီ ဒိုဝ်း ကြုဝ် ဒါ ကာညာ ဂေ၊ တဲး ဒါ ကာညာ ဂေ ဘော ပွိုန် ညှိုမ် နဝ်း ဂေ အာခါခ်ု။ ပါယ် တီ န့ ဒီ တဲး ဒါ ကာညာ ဂေ ဘော နပ်၊ ဂြုဝ်း ပီ မာနုဝ် အေ လွင် ဇဝ်ဖြာ အီ ချွတ် အီ၊ န့ မိုဝ်း အာဂျိုဝ်။

11 ခုဝ်၊ ဇဝ်ဖြာ ဟဲ့ ဟွတ့် ဘျ ဂေဇူ အန် ဒီ ဒူအီ ဒွန် အီ၊ တဲး အန် ပွိုန် ဒီ ချွတ် ဒွန် အီ။ 12 ပီ ဂေဇူ ဇဝ်ဖြာ တီ၊ န့ တဲး အေ နပ် ဒီ ဝး ပီ တူ အိုင် ဇဝ်ဖြာ၊ ဘော တူ ဒူပ် ပီ အိုင် ဒူအီ အီ တူ ညှိုမ် ဇဝ်ဖြာ။ ဒေါ ကွယ် အေ ဇာတ် နီ၊ န့ ဘော စွယ် တဲး အေ နပ် ဒီ အိုပ် ဒုဝ် ဘြိမ် အေ၊ တဲး အေ မိုဝ်း ဆာရေ ဘော နပ် ဒီ ရုဝ်ဆေ ဇဝ်ဖြာ။ 13 အေ လုဝ် ဘူင် ဇိုဝ် တီ ဒွန် မျုဝ် ဒေါ နှဝ့် အေ ဇဝ် ယေဆူ အီ မုး ပီ နှဝ့် န့ဒဝ့် အေ။ ပန် ဒီ တး ဇဝ် ယေဆူ အီ ဟဲ့ ချွတ် အေ၊ အီ မုး ဇဝ်ဖြာ အီ ဘွတ် မျာတ် ပီ ကြိုပ် အေ၊ အန် ဒီ မိုဝ်း အာဖုင် ဒင်ခုဝ် တာင်။ 14 ဇဝ် ယေဆူ ဟဲ့ ခမ် ဒီ ဝဲန် အာဆာက် ဒုဝ် ဘြိမ် အန် ကူပ် အေ၊ တဲး အန် ပွိုန် ဒီ ထုတ် လေး အေ ခဲင် အီ တူ မွှိုမ် ဒွန် မျုဝ်၊ အန် တဲး အေ ဝီ မိုဝ်း နဝ်း လုယ် နဝ်း ဆီငါ၊ တဲး အေ ဘဲန် အာမျုဝ် အန်၊ တဲး အေ ဘော မိုဝ်း နဝ်း ဆီ ဘူင် နာ ဘွတ် နာ မွှိုမ် ဆေဆေ။

15 လွင် အန် တီ ဒွန် မျုဝ် တဲး မဲ မာနုဝ် ဂေ အီ ညှိုမ် ဇဝ် ယေဆူ ခဲင် မိူင် ကြေထာ။ မဲ မိုဝ်း ပွုန် ဒီ ကာဆုး ဂေ၊ တဲး ဂေ ဘူင် နာ မွှိုမ် ဘော ဒမ် ဆာဒိက် ဒီ ဂေ၊ ကွဲ့ တဲး ဂေ ကာလိုပ်။ ကွဲ့ တဲး အာဆေ ပွိုန် ဒီ လုက်တာယ် မဲ။