တဲး မဲ ကာလာင် ဒီ ဂေ ဒူအီ၊ တဲး ဂေ လှုဝ်း လွင် လုဝ် ခမ် ဂေ ဒီ ဂူမ် ဒါ တာင် အီ အိုပ် မိူင်၊ ဘော ဂေ အီ မိုဝ်း ပွုန်။ တဲး ဂေ ထူမ် ဂြုဝ်း ဂေ ဒါ တာင် ဘော ဖြူမ် ဒီ ဘူင် နာ ဘွတ် နာ မွှိုမ် ဒွန် မျုဝ်။ 2 တဲး မဲ ကာလာင် ဒီ ဂေ၊ ကွဲ့ တဲး ဂေ လုက်တာယ် အာဆေ။ တဲး ဂေ ကာလဝ့် ဒီ ဒွန် အီ၊ တဲး ဂေ ခမ် ဒီ ယိူန် ဘော ကာဖာ ဒါင် အီ ဟဝ်၊ တဲး ဂေ မိုဝ်း နဝ်း ဂူမ် နဝ်း တျီမ်။

3 အာတ့် နီ ဘော အေ ဟဲ့ ကာလိုပ်၊ တူ နပ် ဒီ ကာဖာ၊ တူ နပ် ဒီ ထူမ် ဂြုဝ်း အီ။ အေ မိူဝ် ဟဲ့ ဒွိုမ် ဘဲန် ပီ မှာယ် အီ လုဝ် ဘူင် နာ တူ မွှိုမ် ဒွန် မျုဝ် ဘော ဘူင် မီ အီ ကျဝ် ဒီ နဝ်း အေ။ ဒေါ အန် တီ အေ မိူဝ် ဟဲ့ ဘူင် နာ ဟာယ် နာ မိူက် ဘော လှယ့် အီ ဟဝ်။ ဆေ အီ ဟဝ် ဟဲ့ ဇွင့် အေ၊ အေ မိူဝ် ဝီ ဇွင့် ဂေ။ 4 မာလဲ၊ အေ ပီ ဘော ဟဲ့ ဘူင် ပါယ် တီ မိူဝ်၊ ဇဝ်ဖြာ ယဲ့ ဟဲ့ ဘျ ဒီ အေ ခဲ့ ရွက့် အန် ဘော ခဲ့ ကာဝေ အန် ဒီ အေ။ အန် မုး အန် ဇဝ် အီ ချွတ် အေ။ 5 အန် ဇဝ် ဟဲ့ ချွတ် အေ တဲး အေ လွတ်။ လွင် အန် တီ၊ အာဝ် မုး ကူပ် ဘူင် အေ နာ ဘွတ် နာ မွှိုမ်။ န့ မုး ကူပ် ရွက့် ကာဝေ ဇဝ်ဖြာ ဒီ အေ။ အန် ဟဲ့ ချွတ် အေ ဒေါ ဝဲန် အန် မှာပ် အေ၊ တဲး န့ ပီ အီ ဘာယ် ဝဲန် ကာဒိး ခဲင် အိုမ်။ အန် ဟဲ့ ဒွါ နဝ်း ဖွိုမ် အန် ဒီ အေ၊ တဲး အေ မိုဝ်း အာဆာက် ကာမာယ်၊ တဲး အေ ဘဲန် ပီ ဒူအီ ကာမာယ်။ 6 ကူပ် ညှိုမ် အေ ဇဝ် ယေဆူ၊ ဇဝ်ဖြာ ဟဲ့ ဒွါ နဝ်း ဖွိုမ် အန် ဒီ အေ၊ တဲး န့ ကိူန် ကာဆဝ်။ 7 ကူပ် ဟဲ့ ဂေဇူ အန် ဇဝ် ဒီ အေ၊ အန် အာဝ် ဟူ တဝ်း အေ မိုဝ်း မှာပ်။ အန် ဟဲ့ တဲး အေ ဝီ ဘဲန် ဂွန် ဇဝ်ဖြာ၊ ဝီ တဲး အေ နှဝ့် န့ဒဝ့် ဒီ ကွယ် ရိုမ် ဒူပ် အန် ဆေဆေ။ 8 ဂြုဝ်း နီ ဟဲ့ မုး ဂြုဝ်း မှာန်၊ ဟဲ့ မွှိုမ် ညှိုမ်။ အုဝ် မိူဝ် ဆီ တဲး မဲ ကာလာင် ခဲမ် ဂြုဝ်း နီ၊ တဲး ဂေ အီ ဟဲ့ ညှိုမ် ဇဝ်ဖြာ ဘော မိုဝ်း နဝ်း ဆီ ဘူင် နာ ဘွတ် နာ မွှိုမ်။ လွင် အန် တီ၊ ဒဲင် ဟဲ့ မုး နာ မွှိုမ်၊ န့ ဘဲန် အာဂျိုဝ် ဘော ဒီ ဂေ ဒူအီ ဘောကာဂ့လျီတ်။

9 တဲး မဲ ဝး ဂြုဝ်း အီ တူ မိုဝ်း ဒီခုဝ်၊ ဂြုဝ်း အီ လာယ် ကာအေး ကာထဲန့် ကူပ် ဇာရာင် န့ကြိုဝ်း ဂေ ခြိုဝ် ဘော ကူပ် ဒါရာ။ လွင် ဇိုဝ် တီ၊ န့ တူ မိုဝ်း ဒီခုဝ်။ အာဝ် ဘဲန် အာဂျိုဝ် မာဆေ။ 10 ဆေ န့ မိုဝ်း ဒူအီ အီ ဘူင် တဲး အီ လာယ် ကာယဝ်း ကာရေး၊ ဒမ် ဆာဒိက် ဒီ အန် အူ ဇေန့် အာ ဇေန့်။ ဆေ အန် တူ ထူမ်၊ ကွဲ့ ဟူ မာတ် အန် မုး ဒူအီ အီ ညှိုမ် ဇဝ်ဖြာ။ 11 တဲး မဲ နပ် ဆီချာ၊ ဒူအီ ဇိုဝ် တီ၊ အန် မုး ဒူအီ အီ ကဝ် အီ ပျာတ့် အီ ဟဝ်။ အန် ပီ ဘော ဟဲ့ နပ်၊ အန် ဟဲ့ ကာလိုပ် မိူဝ်၊ အန် နဲ့ အီ ဘူင် မှာပ်။ နဝ်း ဘြိမ် အန် ဟဲ့ ဝီ ဒမ် မှာပ် ဒီ အန်။

12 အုဝ် ဟဲ့ တဝ်း ဒီ စ်ု အာဒေမာတ် ဟာဝ် ဒူင် ကွယ် မဲ။ ဆေ အာဝ် မုး အန်၊ အာထူခိတ် အီ ဒီ ဟာဝ် ဒူင် ကွယ် မဲ။ ဆေ ဝီ မှဝ် ဘော ဟဲ့ တး ဇမ်၊ တဲး မဲ ဝီ ဂျုဝ်ဂျာ ဒီ တး ဒူင် ကွယ် အုဝ် ဒီ မိူင် နီကောဘာလီ။ အုဝ် ဟဲ့ ဆုင်ဖျာတ် ဒီ ကွယ် ဒီ တီ၊ တဲး န့ ကော ပွုန် အာခြာဝ် ဂတ်။

13 တဲး မဲ ဂျုဝ်ဂျာ ဒီ စွယ် ဒါ ဆာရာ အာစေနာ အီ မုး ဒါ တာင် အီ ဆုင်ဖျာတ် အာမူ အီ။ တဲး မဲ စွယ် ဘော ဒါ ဆာရာ အာဖောလူန်။ တဲး ဂါယ် ပွိုန် ဒီ စေဝ် လေး န့တေန့်၊ တဲး ဂါယ် မိုဝ်း ခဲ့ ပီ လုဝ် ဂါယ်။ 14 တဲး ဖိုင် အေ ဒွန် အီ ဖိုက် ဒီ ဟေန် ဒီ ဘူင် နာ မွှိုမ်၊ တဲး အေ ပွိုန် ဒီ စွယ် ဒူအီ အီ တူ မိုဝ်း မာဆေ။ ကွဲ့ တဲး အေ ဘဲန် ဒူအီ အီ တူ မိုဝ်း ဒီခုဝ်။

15 ဂေ အီ ကွယ် ရိုမ် ဒူပ် အုဝ် ဒွန် အီ ဘော နမ်လှုဝ်း မဲ။ ဘော အုဝ် နမ်လှုဝ်း ဂေ ဘီနွင် အီ ရွက့် အုဝ် ကူပ် ညှိုမ် အေ ဇဝ် ယေဆူ။

တဲး ဇဝ်ဖြာ ဂေဇူ ဘေ ဒွန် အီ။