ပီ ကာလာင် အုဝ် ဒီ မဲ၊ အုဝ် ဆီ တဲး ဘော ဇဝ်ဖြာ ဘော ဇဝ် ယေဆူ ထူမ်။ ဇဝ် ယေဆူ ဒီ တး အိုပ် ကာဒါယ်။ အန် ဒီ ဘော ဆုင်ဖျာတ် အာမူ ဒူအီ ဘောကာဂ့လျီတ်၊ ဘော ဒူအီ အိမ် ဘော ဒူအီ အီ ဟဲ့ ဟွတ့် ယမ်။ 2 ကူပ် န့ ပါယ် တီ၊ အုဝ် ဒီ ဒမ် မဲ၊ တဲး မဲ ကာလာင် ဂြုဝ်း ဇဝ်ဖြာ ဒေါ ဟဲ့ ဆင်ဒုဝ် ဘော ဒေါ တူ ဆင်ဒုဝ်။ တဲး မဲ စွယ် ဒူအီ၊ ကွဲ့ တဲး ဂေ ဘူင် ဟာဝ် အီ တူ မွှိုမ်။ တဲး မဲ ဘော ဘျ ပဲ့ ဟဲ့ ကာလိုပ် ဂေ ဘော မာနုဝ် တဲး န့ ဘဲန် ပ့လူမ် ဘဲန် ဟဲန့် ဒီ အီ ဟဝ်။ တဲး ဂေ ဘော ခမ် ဒီ ယိူန် လှေန့် ဒေါ မာနုဝ် ဆီချာ မဲ ဒီ ဂေ။ 3 ခုဝ်၊ အာခြာဝ် ဒီ တူ ထူမ် ဒူအီ နာ မုး နာ မှာန် ဟဲ့ ကာတတ် ဒီ ဇမ်။ ကူပ် ဆီ ဒူပ် ဂေ ပီ အိုင် ဒုဝ် ဘြိမ် ဂေ၊ ဂေ ဒီ ဘော ဟြေတ့် ဒါ ဆာရာ ဘဲန် ဝီ ဘဲန် ဝီ တး မာနုဝ် ဂေ၊ တဲး န့ ဒူပ် ပီ ဆီ ထူမ် ဂေ၊ တဲး န့ ကာလဝ့် ဒီ ဂေ။ 4 ဂေ ဒီ ဘော ဝဲန် ပီ မာနုဝ် နာ မုး နာ မှာန်၊ ဝီ ထူမ် အာဘိုမ် အီ တူ မုး တူ မှာန် ပီ ခဲ အီ ဟဝ်။ 5 အီ မုး မဲ၊ တဲး မဲ ဆာဒိက်၊ ဇေန့်ဇာ ဆီချာ ဆေဆေ။ တဲး မဲ ခမ် ဒုက် ဘော ကာလာင် လွင် ဇဝ် ယေဆူ အီ တဲး နဝ်း ဒူအီ ဒါခိုယ်။ တဲး မဲ ဘူင် ဂါန် မဲ တီ၊ တဲး န့ ကော ဟွတ့် တူတ့်။

6 အီ မုး အုဝ်၊ ဟဲ့ ဟွတ့် ကာတတ် ဒီ ဇမ် အာခြာဝ် ဒီ တူတ့် အာဆာက် အုဝ်။ အာဆာက် အုဝ် တီ၊ န့ ပီ ပီ ဒီ ဒျီင် ပီ လှုဝ် အီ တဲး န့ ဘဲန် ပီ လှူ ဒီ ဇဝ်ဖြာ။ 7 အုဝ် မိူဝ် ဟဲ့ ဘူင် ဂါန် အုဝ် ပီ ဒါ ဆိုက် အီ ကျ ဒီ ကာဂုဝ်း ဒီ ရန်ဆူ။ အုဝ် မိူဝ် ပီ ဒူအီ အီ ဟဲ့ ကာခဲန့် ကာဘ့လဲပ် ခဲင် ဘ့လွယ်။ အုဝ် ဟဲ့ ဟွတ့် ဇမ် ဒူင် ကွယ် လွှက့် အန်။ အုဝ် မိူဝ် ဟဲ့ ညှိုမ် ဆီချာ ဆေဆေ။ 8 ခုဝ်၊ အာဝ် လှေန့် အုဝ် ဒီ ပွိုန် ရုး အန် အီ ပီ မင်ဂိုမ်။ မင်ဂိုမ် တီ၊ ဇဝ်ဖြာ ဒီ ဒွါ ဒီ အုဝ် ပန် ဒီ ဇမ် ဆီငဲ အန်။ ဒေါ အန် တီ ဇဝ်ဖြာ ဒီ တဝ်း၊ အုဝ် ဟဲ့ ဘူင် ဆိူဝ် ဆိူဝ် မှာန် မှာန် ဆေဆေ။ အာဝ် မုး အန် ဒွါ မင်ဂိုမ် တီ မီ ဒီ အုဝ်။ အန် ဒီ ဒွါ ဘော ဒီ ဂေ ဒူအီ ဒွန် အီ၊ ဂေ အီ မိုဝ်း နဝ်း ဒီကေန် အန် ဇဝ် ဘော နှဝ့် န့ဒဝ့် ဆီငဲ ဒီ ဝီ တး အန်။

9 တဲး မဲ ဂျုဝ်ဂျာ၊ တဲး မဲ ပွိုန် ဒီ စေဝ် တး ဒူင် ကွယ် အုဝ်။ 10 ခုဝ်၊ အာဒေမာတ် ဟဲ့ ဝီ ရွက့် အာမျုဝ် အီ မိုဝ်း ဒဲင် ကာဒါယ် နီ။ အန် ဟဲ့ ဝဲန် အုဝ်၊ ဝီ ဟာဝ် မိူင် ထေဆာလူန်။ အာကြိတ်ဒေ မိူဝ်၊ ဟဲ့ ဟာဝ် ခဲင် အိူင် ဂါလာထီ။ အာထီထူ မိူဝ်၊ ဟဲ့ ဟာဝ် ခဲင် အိူင် ဒါလာမာတ် 11 ဟဲ့ ဂိတ် အာလူကာ အူ ဝီ ကွယ် ရိုမ် ဒူပ် အုဝ်။ တဲး မဲ ဒဲ့ ဘော အာမာကူ တး ဒူပ် မဲ။ အန် ဒီ ပွိုန် ဒီ စွယ် အုဝ်။ 12 အုဝ် ဟဲ့ ဝီ စ်ု အာထူခိတ် ဟာဝ် ဒီ မိူင် အဲဖဲ။ 13 ပန် ဒီ တး မဲ တီ၊ တဲး မဲ ဒိုဝ်း တး ဘော ဆီတုဝ် တာင် အုဝ် ပဲ့ ဟဲ့ အုန် အုဝ် ခဲင် ကာင် အာခါဖူ ဒီ မိူင် ထာရုဝ် တွိုန်။ တဲး မဲ ဒိုဝ်း တး ဘော ဘပ် အုဝ် ဂေ တွိုန်။ ဘပ် အီ ဟဲ့ ဒဲမ် ဒဲင် ဟုန် ယီ ဟဲ့ အာရေ တာင် လွှိုမ် မျုဝ် ဟဝ်။

14 အာလေဆန်ဒါ အီ နပ် ဒီ စိုမ် ဟိန် တွိုန်၊ အန် ဟဲ့ ဘူင် တဲး အုဝ် ဇမ် ဒုက် တာင်။ ဇဝ်ဖြာ ယီ ဒီ ဝီ ဘူင် ဝျီ့ ဒီ အန် ခဲ့ ပီ ဘူင် အန် ဒီ အုဝ်။ 15 ဘော မဲ လုဝ် ဆာဒိက် ဒီ အန်။ အန် ဟဲ့ ကာဘး ကာဆဝ် ဒီ ဂြုဝ်း ဇဝ်ဖြာ ပီ ကာလာင် အေ။

16 ဂေ ဒါ တာင် အီ ဆုင်ဖျာတ် အာမူ အုဝ်၊ ဒေါ ထူမ် ဂေ ဂြုဝ်း အုဝ် ဒေါ ဂုဝ် အန်၊ ဂိုက် အူ ဝီ မိူဝ် အာဝ် မိုဝ်း အီ ကွယ် ဘ့လာက် အုဝ်။ ဂေ ဒွန် အီ ဟဲ့ တဝ် တူတ့် အုဝ်။ လွင် အန် တီ၊ ကွဲ့ တဲး န့ ဘဲန် မှာပ် ဒီ ဂေ။ 17 မာလဲ၊ ဇဝ်ဖြာ ယီ ကွယ် ရိုမ် ဒူပ် အုဝ်၊ ဝီ တဲး ပ့လူမ် တဲး ဟဲန့် ဒီ အုဝ်။ တဲး အုဝ် ဝီ ပွိုန် ဒီ ကာလာင် ဆီချာ ဂြုဝ်း ဇဝ်ဖြာ၊ တဲး ဘော ဒူအီ အာမျုဝ် ဟဝ် ဒွန် မျုဝ် ပွိုန် ဒီ ထူမ်။ ဒဲင် တီ ဇဝ်ဖြာ ဟဲ့ ချွတ် အုဝ်၊ ကွဲ့ တဲး မာခြင်ဆီ ပွိုန် ဒီ ကဝ့် အုဝ်။ 18 ဇဝ်ဖြာ ဟဲ့ စွယ် အုဝ်၊ တဲး အုဝ် လွတ် ဒီ မျုဝ် အီ ဟာယ် အီ တူ မွှိုမ် ဒွန် မျုဝ်။ အန် ဇဝ် ဒီ ဘော ယွတ် ဆီချာ အုဝ် တဲး အုဝ် ဇမ် ဂါင်ဟြာဝ်။ အုဝ် အိူပ် အန် ဇဝ် အီ မိုဝ်း အာဖုင် ဒင်ခုဝ် တာင် ဆေဆေ။ ဆာတူ။

19 တဲး မဲ ကာလာင် ဒီ အာခီလာ ဂါယ် ဖီခီလာ လွင် ဟဲ့ နမ်လှုဝ်း အုဝ် ဒီ ဂါယ်။ တဲး မဲ ကာလာင် ဂြုဝ်း တီ ဘော ဒီ ဂေ ဒူအီ ခဲင် န့ဟူမ် အာအောနေဆီဘုဝ် တွိုန်။ 20 အာရာထူ ဟဲ့ ဝီ ဂိူတ် ကွယ် ဒီ မိူင် ခုဝ်ရိန်ထူ။ ဘော အာထုဝ်ဖီမူ၊ အုဝ် ဟဲ့ တဲး အန် ဝီ ဂိူတ် ကွယ် ဒီ မိူင် မီလေတ် ကူပ် ဟဲ့ ဆဝ်ဖိုဝ် အန်။ 21 တဲး မဲ ဂျုဝ်ဂျာ ဒီ တး အာတ့် ဇမ် အာခြာဝ် ဂတ်။ အာအူပူလူ၊ အာပူဒေ၊ အာလီနူ ဘော နာင် ကာလောဒီ ဘော ဂေ ဘီနွင် ခဲင် ဖိုင် ဇဝ် ယေဆူ ဘောကာဂ့လျီတ် ဟဲ့ နမ်လှုဝ်း မဲ။

22 တဲး ဇဝ်ဖြာ ကွယ် ရိုမ် ဒူပ် နဝ်း ဖွိုမ် မဲ ဘော ဂေဇူ ဘေ ဒွန် အီ။