အုဝ် အာပေါလူ အီ မုး ဒူအီ ပီ ရဝ်း ပီ တိုယ် ဇဝ် ယေဆူ၊ အုဝ် ဒဲမ် ပဲ့ နီ တိုယ် ဒီ မဲ အာထီမုဝ်ထေ။ ဘော ဇဝ်ဖြာ အီ ဟဲ့ ချွတ် အေ၊ ဘော ဇဝ် ယေဆူ အီ မုး အန် ဇဝ် ပီ ဘိုင် အေ ဟဲ့ စ်ု အုဝ် ဘူင် ဂါန် ဇဝ်ဖြာ။ 2 မဲ အာထီမုဝ်ထေ၊ အုဝ် ဟဲ့ စွယ် မဲ၊ တဲး မဲ ညှိုမ် ဆီချာ ဇဝ် ယေဆူ။ ခုဝ်၊ မဲ ဟဲ့ ဘဲန် ပီ ဂွန် အာရာင် အုဝ် အာခါခ်ု။ တဲး ဇဝ်ဖြာ အီ မုး ဂုန့် အေ ဘော ဇဝ် ယေဆူ အီ မုး ဒါ ကာညာ အီ အိုပ် အေ ဂေဇူ မဲ ဘော ကာဝေ မဲ၊ ဒွါ ဘော နဝ်း ဂတ် ဂျီတ် ဒီ မဲ။

3 ဒေါ ဟာဝ် အုဝ် ဒီ အိူင် မာခေဒူန်၊ အုဝ် ဟဲ့ ဒွိုမ် ကာလာင် ဒီ မဲ၊ တဲး မဲ ကွယ် ဂိူတ် ခဲင် မိူင် အဲဖဲ။ အုဝ် ဟဲ့ တဲး မဲ ခြဲ ဂေ ဒူအီ မင် အီ အီ မာနုဝ် ကာလိုပ်၊ ကွဲ့ တဲး ဂေ မာနုဝ် ဟာဝ် ပါယ် တီ။ 4 အုဝ် ဟဲ့ ဆီ တဲး မဲ မာနုဝ် ဂေ၊ ကွဲ့ တဲး ဂေ ခဲ အာဘိုမ် ဘဲန် မျုဝ် ဘဲန် မျုဝ် ဘော ကာလာင် လွင် စိူဝ် ဘော ခြိုဝ် ဂေ အီ တူ နပ် ဒီ ဟွတ့်။ ကွဲ့ တဲး ဂေ ဒီလိန့် ဒီ ဇေန့်ဇာ မီ လွင် အန် တီ။ လွင် ဇိုဝ် တီ၊ န့ တဲး မီ အီ လာယ် ကာအေး၊ ကာထဲန့်။ န့ တူ တဲး အီ ဘူင် ပီ အိုင် ဇဝ်ဖြာ၊ တူ စွယ် တဲး အီ ညှိုမ် ဆီချာ။

5 အုဝ် ဟဲ့ စ်ု မဲ ဘူင် ပါယ် တီ၊ ကူပ် ဆီ တဲး အုဝ် ဘေ လာယ် ရွက့်။ ဆေ အီ မိုဝ်း နဝ်း လုယ်၊ နဝ်း အီ တူ ဖျာက် ဒုဝ် ဘြိမ်၊ ဘော နဝ်း အီ တူ ညိုင်ရာင် ဒီ ညှိုမ်၊ ဂေ ဒီ ဘော နပ် ဒီ လာယ် ရွက့် ပါယ် တီ။ 6 ဒူအီ မင် အီ၊ ဂေ ယီ တူ မိုဝ်း နဝ်း ဇိုဝ် တီ။ ဂေ ဟဲ့ ကာလိုပ် ဘဲန် မျုဝ် ဘဲန် မျုဝ်။ ဂေ ဘော ကာလာင် ဂြုဝ်း အီ တူ မိုဝ်း ဒီခုဝ်။ 7 ဂေ ဆီ မာနုဝ် ဒါရာ ဇဝ်ဖြာ။ ပီ ဆီ မာနုဝ် ဂေ ဒီ အီ ယီ တူ ကာလှုး ဒီ နဝ်း ဂေ။ ဂေ ဘော ညိုင်ရာင် ဟဲ့ နပ် ဆီချာ ပီ ကာလာင် ဂေ၊ ဂေ ယီ တူ နပ်။

8 ဆေ အေ မာနုဝ် ဒါရာ ဇဝ်ဖြာ ပီ ကာအာပ် မာနုဝ်၊ အေ ယဲ့ ဟဲ့ နပ် ဆီချာ၊ ဒါရာ တီ ဟဲ့ ဘွတ်။ 9 အေ ဘော ဟဲ့ နပ်၊ ဒါရာ တီ ဇဝ်ဖြာ တူ ဒွါ ဒီ ဂေ ဒူအီ အီ မိုဝ်း နဝ်း ဆိူဝ် နဝ်း မှာန်။ အန် ဒွါ ဒါရာ တီ ဒီ ဂေ ဒူအီ အီ ဝဲန် ဂြုဝ်း ဇဝ်ဖြာ၊ အီ ကာဘး ဒီ ဂြုဝ်း ဇဝ်ဖြာ။ အန် ဒွါ ဒါရာ အန် တီ ဘော ဒီ ဒူအီ အီ တူ ကြိုပ် ဇဝ်ဖြာ၊ အီ ဘူင် မှာပ် ဆေဆေ။ အန် ဇဝ် ဒွါ ဒါရာ တီ ဘော ဒီ ဂေ ဒူအီ အီ တူ ဘွတ် အီ တူ ရုဝ်ဆေ ဇဝ်ဖြာ ဘော ဒီ ဂေ အီ ငဝ်း ဂုန့် မာ၊ ငဝ်း ဘော အီ ဟဝ်။ 10 ဇဝ်ဖြာ ဘော ဒွါ ဒါရာ အန် တီ ဒီ ဂေ ဒူအီ အီ လာယ် လုတ့် လာယ် လာယ် ဘော ဒီ အီမာယ် နင်ဂန်၊ ဘော ဒီ ဒူအီ အီ ယွင့် ဒူအီ ဟဝ် ဘဲန် မှာယ် အီ ဘော ဒီ ဒူအီ အီ ဆီမာ ကာလုဝ်၊ ဒူအီ အီ ဘဲန် ဆက်ဆေ၊ ကာလာင် နာ တူ မှာန် ဘော ဒီ ဂေ အီ နပ် ဒီ ဘူင် ဘဲန် မျုဝ် ဘဲန် မျုဝ် အီ ကာဘး ဒီ ဒါရာ ဇဝ်ဖြာ အီ မုး အီ မှာန်။ 11 ဒါရာ ဇဝ်ဖြာ တီ၊ န့ ဘော ဒူပ် ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ်။ ဇဝ်ဖြာ ပီ ကာအာပ် အေ အိူပ် ဆေဆေ၊ အန် ဟဲ့ တဲး အုဝ် ကာလာင် ဒီ အီ ဟဝ် လွင် ဒါရာ အန် တီ၊ အီ ဟဲ့ မိုဝ်း အာဖုင် ဒင်ခုဝ် တာင်။

12 အုဝ် ဒါင် ဂုင် ဂေဇူ ဒီ ဇဝ် ယေဆူ အီ မုး ဒါ ကာညာ အီ အိုပ် အေ။ အန် ဟဲ့ ဒွါ ပ့လူမ် ဒွါ ဟဲန့် ဒီ အုဝ်၊ တဲး အုဝ် ပွိုန် ဒီ ဘူင် ဂါန် အန်။ အန် ဇဝ် မိူဝ် ဟဲ့ မာတ် အုဝ် မုး ဒူအီ အီ မိုဝ်း နဝ်း ဆိူဝ် နဝ်း မှာန်၊ တဲး အုဝ် ဘူင် ဂါန် အန်။ 13 အုဝ် ပီ ဘော ဟဲ့ ဒွိုမ် ကာလာင် နာ စီစိဝ် လွင် အန် ဘော ဒွါ ဒုက် ဘဲန် မျုဝ် ဘဲန် မျုဝ် ဒီ ဂေ အီ ညှိုမ် အန်၊ ဘူင် နာ စီစိဝ် ဒီ ဂေ မိူဝ်၊ ဇဝ်ဖြာ ယီ ရွက့် ကာဝေ အုဝ်။ ခုဝ်၊ ဒေါ ဘူင် အုဝ် ဇိုဝ် တီ ဒွန် မျုဝ်၊ အုဝ် ညှမ် ညှိုမ် အန်၊ ညှမ် နပ် လွင် ပီ ဘူင် အုဝ် တီ။ 14 ဇဝ်ဖြာ ယီ ဒွါ ဂေဇူ အန် အီ ဟဲ့ ကိူန် ကာဆဝ် ဒီ အုဝ်။ ဇဝ် ယေဆူ ဘော ဟဲ့ တဲး အုဝ် မိုဝ်း နဝ်း ညှိုမ်၊ နဝ်း ရွက့် အန်။

15 ဂြုဝ်း အီ တဝ်း၊ “ဇဝ် ယေဆူ တး လူင် ဒဲင် ကာဒါယ် နီ၊ တဲး အန် ချွတ် ဂေ ဒူအီ အီ မိုဝ်း မှာပ်၊” ဂြုဝ်း တီ၊ ဟဲ့ မုး ဂြုဝ်း မှာန် အာခါခ်ု။ အေ ဒူအီ ဘောကာဂ့လျီတ် လုဝ် နုဝ် အုန် ဂြုဝ်း တီ။ ခဲ့ ကွယ် ဒူအီ အီ မိုဝ်း မှာပ်၊ ဟဲ့ မုး အုဝ် နီ အီ မိုဝ်း မှာပ် ကိူန် လွှိုမ် အီ ဟဝ် ဒွန် အီ။ 16 မာလဲ၊ ဇဝ်ဖြာ ယီ ဝီ ကာဝေ အုဝ်၊ ပီ ဝီ တဲး ဇဝ် ယေဆူ ဘျ နဝ်း အန် အီ ခမ် ဒီ ယိူန် လှေန့်။ အန် ဘော ချွတ် အုဝ် အီ မုး ဒူအီ အီ မိုဝ်း မှာပ် ကိူန် တီ။ အန် ဇဝ် ဘူင် ပါယ် တီ၊ တဲး အန် ပွိုန် ဒီ ဘျ နှဲ အုဝ် ဒီ အီ ဟဝ်၊ တဲး ဘော ဂေ ဝီ ညှိုမ် ဝါယ် နီ၊ တဲး ဘော ဂေ ပွိုန် အာဆာက် ကာမာယ် အီ ကွယ် ဆေဆေ။ 17 ခုဝ် အန် တီ အုဝ် အိူပ် ဇဝ်ဖြာ အီ မုး ခုန်ဒီခမ် အီ ကွယ် ဆေဆေ ဒွန် စုဝ် ဒွန် ဘာန်၊ အီ တူ နပ် ဒီ ယမ် ဒေါ မှဝ်။ အေ ဒူအီ တူ ပွိုန် ယိုဝ် အန် ဒီ ငါယ် အေ။ န့ ယီ မိုဝ်း မီ ဇဝ်ဖြာ အူ ကာဒင် တီ။ တဲး ဒွန် အီ ရုဝ်ဆေ အန်။ တဲး အန် ဇဝ် မိုဝ်း အာဖုင် ဒင်ခုဝ် ဘော မိုဝ်း ဆာရေ ဆေဆေ။ ဆာတူ။

18 အိုယ် အာထီမုဝ်ထေ၊ မဲ ပီ ဂွန် အုဝ်၊ ဂြုဝ်း နီ အုဝ် ကာလာင် အုန် ဒီ မဲ။ န့ ပီ ဂြုဝ်း ပီ ဒွိုမ် ကာလာင် ဒူအီ အီ ဘျာန် ဂြုဝ်း ဇဝ်ဖြာ ဒီ မဲ။ တဲး မဲ ဒူပ် ဂြုဝ်း တီ။ တဲး မဲ ယ ဒီ ကာလာင် ဂြုဝ်း ဆိူဝ် ဒီ ဂေ အီ မာနုဝ် ကာလိုပ်၊ တဲး န့ ပီ ဒါ ဆိုက် အီ ယ ဒီ ကာဂုဝ်း။ 19 တဲး မဲ ညှိုမ် ဆီချာ ဆေဆေ၊ တဲး မဲ ဘူင် နာ မုး နာ မှာန် ဆေဆေ၊ ကွဲ့ တဲး နဝ်း မဲ ဖျာက် ဒုဝ် ဘြိမ် မဲ။ ဒူအီ မင် အီ ဂေ ဟဲ့ ဝဲန် နာ မုး နာ မှာန်။ န့ တဲး ပီ ညှိုမ် ဂေ လိုဝ် စှိုမ် တူတ့်။ 20 ကာတဲ ဒူအီ ဂေ တီ၊ န့ မိုဝ်း အာ ဝီ ဘော မုး အာဟူမဲန် ဘော အာလေဆန်ဒါ။ အုဝ် ဟဲ့ တဲး ဘုဝ် ကာနမ် အိုပ် ဂါယ်၊ တဲး န့ မာနုဝ် ဂါယ်၊ တဲး ဂါယ် ဝဲန် ဂြုဝ်း အီ လုက်တာယ် အီ ခဲန့် ဇဝ်ဖြာ။