အုဝ် အာပေါလူ ဘော အာဆီလာတ် ဘော အာထီမုဝ်ထေ၊ ယေ ဒဲမ် ပဲ့ နီ၊ တိုယ် ဒီ ဘေ ဒူအီ ခဲင် ဖိုင် ဇဝ် ယေဆူ အီ ကွယ် ခဲင် မိူင် ထေဆာလူန်။ ဘေ မုး ဒူအီ အီ ညှိုမ် ဘိုင် ဇဝ်ဖြာ အီ မုး ဂုန့် အေ။ ဘေ ညှိုမ် ဘိုင် ဘော ဇဝ် ယေဆူ အီ မုး ဒါ ကာညာ အီ အိုပ် အေ။

2 တဲး ဇဝ်ဖြာ အီ မုး ဂုန့် အေ ဘော ဇဝ် ယေဆူ အီ မုး ဒါ ကာညာ အေ ဂေဇူ ဘေ ဘော ဒွါ နဝ်း ဂတ် ဂျီတ် ဒီ ဘေ။

3 အိုယ် ဘေ ဘီနွင်၊ ယေ ဒါင် ဂုင် ဂေဇူ ဒီ ဇဝ်ဖြာ ဆေဆေ ကူပ် ဘေ။ န့ ဟဲ့ ကာအာပ် ယေ ဘူင် ပါယ် တီ။ ခုဝ်၊ ဘေ ဟဲ့ ကြဲ ဒီ ညှိုမ် ဆီချာ။ ဘေ မိူဝ် ဟဲ့ နပ် ဒီ ရွက့် ကာဝေ အီ ဟဝ် လွှိုမ် ဘြိမ်။ 4 ခုဝ် အန် တီ ယေ မိူဝ် အိူပ် ဘေ ဒီ ဂေ ဒူအီ ခဲင် ဖိုင် ဇဝ် ယေဆူ အီ ကွယ် ဘဲန် ပ့လုဝ့် ဘဲန် ပ့လုဝ့်။ ယေ အိူပ် ဘေ ကူပ် ညှိုမ် ဆီချာ ဘေ ဘော ခမ် ဒီ အူတ် နဝ်း ဒေါ ကာဒုး ဘေ ဒုက် ဘော ခမ် ပီ ခါနှာပ် အီ ဟဝ် ဒီ ဘေ ဒွန် မျုဝ်။

5 ကူပ် ခမ် ဘေ ဒုက် ဇိုဝ် တီ၊ န့ လိုဝ်း ဆီချာ လွင် ဇဝ်ဖြာ နပ် ဒီ ဆုင်ဖျာတ် နာ မုး နာ မှာန် ဆေဆေ။ အန် ဒီ ဆုင်ဖျာတ် တဝ်း၊ ဘေ မုး ဒူအီ အီ ကာအာပ် ကွယ် ခဲင် မိူင် ပီ အိုပ် အန်။ ခုဝ်၊ ဘေ ဟဲ့ ခမ် ဒုက် ကူပ် ရွက့် ဘေ မိူင် တီ။ 6 ဇဝ်ဖြာ ဒီ ဘော ဘူင် ဆိူဝ် ဆိူဝ် မှာန် မှာန်။ အန် အီ ဒီ ဝီ ဘူင် ဝျီ့ ဒုက် ဒီ ဂေ အီ ဟဲ့ ဒွိုမ် ဒွါ ဒုက် ဒီ ဘေ။ 7 ပန် ဒီ တး လူင် ဇဝ် ယေဆူ ခဲင် ဂါင်ဟြာဝ်၊ ဒွန် အီ ဒီ ပွိုန် ယိုဝ် အန်။ ဒေါ လူင် အန် ပါယ် တီ၊ န့ ဒီ မိုဝ်း ဘော ငဝ် အီ ကုး တာင် ဘော အာမူ အာမာတ် ဇဝ်ဖြာ အီ မိုဝ်း ပွုန် တာင် ကာဆဝ်။ ဒေါ အန် တီ ဇဝ်ဖြာ ဒီ တဲး ဘော ဘေ ဘော ယေ ဝီ ဘျုဝ် ဒါခိုယ်။ 8 အန် ဒီ ဒမ် မှာပ် ဒီ ဂေ ဒူအီ အီ တူ နပ် ဇဝ်ဖြာ ဘော ဒီ ဂေ ဒူအီ အီ တူ ထူမ် လွင် ဇဝ် ယေဆူ အီ တဲး ဒူအီ ဘဲန် နဝ်း ဒါခိုယ်၊ အီ မုး ဒါ ကာညာ အီ အိုပ် အေ။ 9 ဒူအီ ဂေ တီ၊ ဂေ ဒီ လုဝ် ခမ် မှာပ် ဂေ။ ဂေ ဒီ စှိုမ် လိုဝ် တူတ့်။ ဂေ မိူဝ် တူ ပွိုန် ကွယ် ရိုမ် ဒူပ် ဇဝ်ဖြာ၊ အာဝ် ပွိုန် ယိုဝ် အာဖုင် ဒင်ခုဝ် အန် ပန် ဒီ ဇမ် ဆီငဲ ဒီ တး လူင် အန် ခဲင် ဂါင်ဟြာဝ်။ 10 ဆီငဲ တီ၊ ဇဝ် ယေဆူ ဒီ တး၊ တဲး ဂေ ဒူအီ ဘောကာဂ့လျီတ် အိူပ် အန် ကူပ် ပဲ့ ဟဲ့ ဘူင် အန် ဒီ ဂေ ဒူအီ အီ ဆီငါ ဘွတ်။ ဂေ ဒီ ဘော အာမ် ဘော အိူပ် မျုက် အန် ကူပ် ပဲ့ ဟဲ့ ဘူင် အန် ဒီ ဂေ ဒူအီ ဘောကာဂ့လျီတ် အီ ဟဲ့ ညှိုမ် အန်။ ဒေါ အန် တီ ဘော ဘေ ဒီ အိူပ် မျုက် အန် ကူပ် ဟဲ့ ညှိုမ် ဘေ ဂြုဝ်း ပီ ကာလာင် ယေ ဒီ ဘေ။

11 ခုဝ် အန် တီ ယေ ဘော ဆာခိုဝ် ဒါင် ဘေ ဆေဆေ၊ တဲး ဇဝ်ဖြာ တဝ်း၊ ဘေ ဟဲ့ ဘူင် ခဲ့ ပီ ကာအာပ် ဘူင် ဒူအီ ပီ ရဝ်း အန်။ ယေ ဘော ဆာခိုဝ် တဲး ပွုန် ဇဝ်ဖြာ စွယ် ဘေ၊ တဲး ဘေ ပွိုန် ဒီ ဘူင် နာ ဘွတ် နာ မွှိုမ် ဒွန် မျုဝ် ပီ ဆီ ဘူင် ဘေ။ တဲး ဘေ ဘော ဘူင် တူတ့် ဒွန် မျုဝ် ကူပ် ညှိုမ် ဘေ။

12 ယေ ဘော ဆာခိုဝ် တဲး အီ ဟဝ် ယိုဝ် အာဖုင် ဒင်ခုဝ် ဇဝ် ယေဆူ အီ ကွယ် ခဲင် နဝ်း ဘေ။ တဲး ဘေ မိူဝ် မိုဝ်း ဆာရေ ကူပ် ကာဒိုက် ကာဒဝ့် ဘေ ဒီ ဇဝ် ယေဆူ။ တဲး အာဖုင် ဒင်ခုဝ် အီ ကွယ် ဒီ ဘေ ကာဒါန် ဂေဇူ ပီ ဒွါ ဇဝ်ဖြာ ဘော ဇဝ် ယေဆူ ဒီ ဘေ။ ဇဝ် ယေဆူ ယီ မုး ဒါ ကာညာ အီ အိုပ် အေ။