အိုယ် ဘေ ဘီနွင်၊ လွင် ပန် ဒီ တး ဇဝ် ယေဆူ ဘော လွင် ပန် ဒီ ဒဲ့ အန် ဒီ အေ တဲး အေ ကွယ် ရိုမ် ဒူပ် အန်၊ ယေ မှာန့် ဘေ၊ 2 ကွဲ့ တဲး ဘေ ညှိုမ် ငှိုယ် ငှိုယ် ဂြုဝ်း အီ ဟဝ်။ ကွဲ့ တဲး န့ ဘဲန် နဝ်း ကာဆူ ကာဝ်ု ဒီ ဘေ။ ဂေ အီ ဟဝ် ဘော နပ် ဒီ တဝ်း၊ ဂေ ဘျာန် ဂြုဝ်း ဇဝ်ဖြာ။ ဂေ ဘော နပ် ဒီ ကာလာင် လွင် အန် တီ ဘော နပ် ဒီ ဒဲမ် ပဲ့ တိုယ် ဒီ ဘေ၊ တဝ်း န့ မုး ယေ အီ ဟဲ့ ကာလာင်၊ အီ ဟဲ့ ဒဲမ် လွင် ဇဝ် ယေဆူ ဟဲ့ ဟွတ့် တး။ 3 ကွဲ့ တဲး အာဆေ ပွိုန် ဒီ ကာလုဝ် ဘေ။ အာတ့် တး ဇဝ် ယေဆူ တီ၊ န့ ဒီ မိုဝ်း ဒူအီ ကိူန် အီ ဒီ ဝဲန် ဇဝ်ဖြာ။ န့ ဒီ မိုဝ်း ဘော ဒူအီ အူ ဝီ အီ ဟာယ် အီ မိူက်၊ အီ ဒီ ဘူင် ကာပျာတ့် လိုဝ် ဒွန် မျုဝ် အန် ဒီ တး ဒီ အာတ့်။ 4 အန် ဒီ ဘူင် ကာဘး တူတ့် ဒွန် မျုဝ် ပီ တဝ်း ဒူအီ န့ မုး ဇဝ်ဖြာ။ ဒူင် ကြိုပ် ဆာခိုဝ် ဒူအီ မိူဝ် အန် တူ ရုဝ်ဆေ။ အန် ဒီ ပီခိုက် အန် လွှိုမ် တူတ့် ဒွန် မျုဝ် ဘော ဟာဝ် လိုပ် ခဲင် ဟုဝ် ဇဝ်ဖြာ၊ တဝ်း အန် မုး ဇဝ်ဖြာ။

5 ဘေ တူ နုဝ် လွင် ဇိုဝ် တီ ဒွန် မျုဝ်။း အုဝ် ဟဲ့ ဟွတ့် ဒွိုမ် ကာလာင် ဒီ ဘေ ဒေါ ကွယ် ရိုမ် အုဝ် ဒူပ် ဘေ။ 6 ဒေါ တီ နီ ဘေ ယီ နပ်၊ မာဆေ န့ မုး အီ ခြဲ အီ ဂွင့် အန်၊ တဲး အန် တး မီ ပန် ဒီ ဇမ် အာခြာဝ် ဒီ လုဝ် တး အန်။ 7 ခုဝ်၊ အီ ဟာယ် အီ မိူက် တီ၊ အန် ဟဲ့ ဟွတ့် ကာစုး ဒီ ဘူင် ဂါန် အန်၊ ကွဲ့ တဲး အီ ယိုဝ်။ န့ ယီ မိုဝ်း အီ ခြဲ အီ ဟာယ် အီ မိူက် တီ။ ဝီ တီ ဒီ ဘော ပဲ ဒီ ခြဲ တဲး ကော ဇမ် ပန် ဒီ ဒိုဝ်း ဝဲန် ဇဝ်ဖြာ အီ ခြဲ တီ။ 8 ဝါယ် အန် တီ အီ ဟာယ် အီ မိူက် တီ၊ အန် ဒီ တး တဲး ဒွန် အီ ယိုဝ်။ ဇဝ် ယေဆူ ယီ ဒီ ပဲ အန်။ န့ ပီ အန် ဒီ ဟိုဝ်း ဖွိုမ် အန်၊ ဝီ တဲး ခုန် လေး ခဲင် မူတ့် အန် ဘူင် တဲး အီ ဟာယ် တီ ယမ်။ ဘော ပန် ဒီ တး အာရူင် ဘ့လာင် ဇဝ် ယေဆူ၊ န့ ဒီ ဘူင် တဲး ဒူအီ ဟာယ် တီ လိုဝ် စှိုမ်။ 9 ဆေ အီ ဟာယ် အီ မိူက် တီ ဟီ တး၊ အန် ဒီ တဲး ဘော ပွုန် ဘုဝ် ကာနမ် အိုပ် အန်၊ တဲး အန် ဘူင် အီ မွှိုမ် အာမ် ဘဲန် မျုဝ် ဘဲန် မျုဝ် အီ တူ မှာန်၊ တဲး ဒူအီ ကိူန် ကာလိုပ်။ 10 အန် ဒီ ဘူင် အီ တူ မွှိုမ် အီ စီစိဝ် ဒွန် မျုဝ်၊ ပီလွှက့် ဒီ ဒူအီ၊ တဲး ဂေ စှိုမ်။ ဒူအီ ဂေ တီ၊ ဂေ ဒီ စှိုမ် ကူပ် တူ အိုင် ဂေ နာ မုး နာ မှာန်၊ တူ တဲး န့ ချွတ် ဂေ။ 11 ခုဝ် အန် တီ ဇဝ်ဖြာ မိူဝ် ဒီ ခ့ဝါင် တဲး အီ တူ မှာန် တီ အိုပ် ဂေ၊ တဲး ဂေ ညှိုမ် ကာလိုပ်။ 12 ဇဝ်ဖြာ မိူဝ် ဒီ ဒမ် မှာပ် ဒီ ဂေ ကူပ် တူ ညှိုမ် ဂေ နာ မုး နာ မှာန်၊ ယီ အိုင် နာ ဟာယ်။

13 န့ ယီ မုး ဘေ ဘီနွင် ယေ၊ အီ မုး ဒူအီ ပီ ရွက့် ဇဝ်ဖြာ၊ ယေ ယီ လုဝ် ဒါင် ဂုင် ဂေဇူ ဒီ ဇဝ်ဖြာ ဆေဆေ ကူပ် ဘေ။ ခုဝ်၊ ဆိန့် ဒေါ ဂုဝ် အန်၊ ဇဝ်ဖြာ ဟဲ့ ရဝ်း ဘေ တဲး အန် ကော ပွိုန် ဒီ ချွတ် ဘေ။ နဝ်း ဖွိုမ် ဇဝ်ဖြာ ဟဲ့ ဘူင် တဲး ဘေ ဘဲန် ဒူအီ ဆီငါ ဘွတ်၊ တဲး ဘေ ဘော ပွိုန် ဒီ ညှိုမ် နာ မုး နာ မှာန်။ 14 ကူပ် ကာလာင် ယေ လွင် ဇဝ် ယေဆူ အီ တဲး နဝ်း ဒူအီ ဒါခိုယ်၊ ဇဝ်ဖြာ မိူဝ် ဟဲ့ ဒဲ့ ဘေ၊ တဲး ဘေ လွတ်၊ တဲး ဘေ ပွိုန် ဘော အာဖုင် ဒင်ခုဝ် ပီ ဒွါ ဇဝ် ယေဆူ အီ မုး ဒါ ကာညာ အီ အိုပ် အေ။ 15 ခုဝ် အန် တီ တဲး ဘေ ဘီနွင် ဒူပ် ဆီချာ ဂြုဝ်း ပီ မာနုဝ် ယေ ဒီ ဘေ။ ဘော ပီ ကာလာင် ယေ ဒီ ဘေ၊ ဘော ပဲ့ ပီ တိုယ် ယေ ဒီ ဘေ၊ တဲး ဘေ ဘော ညှိုမ် ဆီချာ။

16 ဘော ဇဝ် ယေဆူ အီ မုး ဒါ ကာညာ အီ အိုပ် အေ ဘော ဇဝ်ဖြာ အီ ဟဲ့ ရွက့် အေ၊ ဂါယ် ဟဲ့ ဂေဇူ အေ၊ ဟဲ့ ဒွါ ဂျာမ်ဆာ အီ ကွယ် ဆေဆေ ဒီ အေ။ ဇဝ်ဖြာ မိူဝ် ဟဲ့ တဲး အေ မိုဝ်း ပီ နှဝ့် န့ဒဝ့်။ 17 ယေ ဆာခိုဝ်၊ တဲး ဇဝ်ဖြာ တဲး ဘေ မိုဝ်း နဝ်း ဒါခိုယ် ဘော နဝ်း အီ မန် ဆီချာ၊ တဲး ဘေ ပွိုန် ဒီ ဘူင် နာ ဘွတ် နာ မွှိုမ် ဒွန် မျုဝ်၊ တဲး ဘေ ဘော နပ် ဒီ ကာလာင် ဂြုဝ်း အီ ဘွတ် အီ မွှိုမ် ဒွန် ဒဲ။