အုဝ် အာပေါလူ ဘော အာဆီလာတ် ဘော အာထီမုဝ်ထေ၊ ယေ ဒဲမ် ပဲ့ နီ တိုယ် ဒီ ဘေ ဒူအီ ခဲင် ဖိုင် ဇဝ် ယေဆူ အီ ကွယ် ခဲင် မိူင် ထေဆာလူန်။ ဘေ မုး ဒူအီ ပီ အိုပ် ဇဝ်ဖြာ၊ အီ မုး ဂုန့် အေ။ ဘေ ဘော မုး ဒူအီ ပီ အိုပ် ဇဝ် ယေဆူ၊ အီ မုး ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် အေ။ တဲး ဇဝ်ဖြာ ဂေဇူ ဘေ၊ ဒွါ နဝ်း ဂတ် ဂျီတ် ဒီ ဘေ။

2 ဆေဆေ ယေ ဒါင် ဂုင် ဂေဇူ ဒီ ဇဝ်ဖြာ ဒေါ ဆာခိုဝ် ယေ ဒါင် ဘေ။ 3 ဆေ ယေ ဆာခိုဝ် ဒီ ဇဝ်ဖြာ အီ မုး ဂုန့် အေ၊ ယေ ဘော လှုဝ်း ဘေ ဆေဆေ။ နဝ်း ဘေ ဟဲ့ ညှိုမ် ဆီချာ ဇဝ်ဖြာ။ န့ တဲး ဘေ ဘူင် နာ မွှိုမ်။ ဘေ ဘော ရွက့် ကာဆဝ် ဇဝ် ယေဆူ၊ တဲး ဘေ ဘော ရန့် နင်ဂန် ကာဆဝ် ဂါန် အန်။ ဘေ မိူဝ် နှဝ့် န့ဒဝ့် ဇဝ် ယေဆူ။ ခုဝ်၊ ဘေ ခမ် ဒုက် ဘဲန် မျုဝ် ဘဲန် မျုဝ်။

4 ခုဝ် အန် တီ ယေ ဘော နပ်၊ ဘေ ဘီနွင်၊ ဘေ မုး ဒူအီ ပီ ရွက့် ဇဝ်ဖြာ။ ဇဝ်ဖြာ မိူဝ် ဟဲ့ ရဝ်း ဘေ။ 5 ဒေါ တး ကွယ် ယေ ဒူပ် ဘေ တွိုန်၊ ယေ ကာလာင် ဂြုဝ်း ဇဝ်ဖြာ ဒီ ဘေ၊ တဲး နဝ်း ဘေ ဒါခိုယ်။ ဂြုဝ်း ဇဝ်ဖြာ တီ အာဝ် မုး ဂြုဝ်း ပီယေန့်။ န့ ဘော မိုဝ်း ပွုန် တာင်၊ မိုဝ်း ဘော နဝ်း ဖွိုမ် ဇဝ်ဖြာ။ ဘေ ဘော နပ် ဆီချာ၊ ပဲ့ ဟဲ့ ကာလာင် ယေ ဒီ ဘေ၊ န့ ဟဲ့ မှာန် အာခါခ်ု။ ဘေ မိူဝ် ဟဲ့ နပ်၊ ယေ ဟဲ့ ကွယ် ရိုမ် ဒူပ် ဘေ၊ တဲး န့ ဘဲန် အာဂျိုဝ် ဒီ ဘေ။ 6 ပန် တီ ဘေ မိူဝ် ဒူပ် ဆီချာ ဇဝ် ယေဆူ၊ ညိုင် ခဲ့ ပီ ဘူင် ယေ။ ဒေါ ကာဒုး ဘေ ဒုက် ဒွန် မျုဝ်၊ ဘေ ဟဲ့ ညှိုမ် ဂြုဝ်း ဇဝ်ဖြာ။ နဝ်း ဖွိုမ် ဇဝ်ဖြာ မိူဝ် ဟဲ့ တဲး နဝ်း ဘေ ဒါခိုယ်။ ပါယ် တီ ဘေ ဟဲ့ တဲး ဂြုဝ်း ဇဝ်ဖြာ လိုပ် ခဲင် နဝ်း ဘေ။ 7 ပါယ် တီ ဘေ ဟဲ့ ဘျ ဒီ အီ ဟဝ်၊ တဲး ဘော ဂေ နပ်၊ မှဝ် ဂေ ဒီ ပါယ် ဒီ ဒူပ် ဇဝ် ယေဆူ။ ဘော ဂေ ဒူအီ အီ ညှိုမ် ဇဝ် ယေဆူ အီ ကွယ် ခဲင် အိူင် မာခေဒူန်၊ ဘော ဂေ ဒူအီ အီ ကွယ် ခဲင် အိူင် အာခါယာ၊ ဂေ နပ် ဒီ ညိုင် ဒူပ် ဘေ၊ ဘူင် ခဲ့ ပီ ဘူင် ဘေ။ 8 ဘေ မိူဝ် ဟဲ့ ဟွတ့် ကာလာင် ဂြုဝ်း ဇဝ်ဖြာ တဲး ဂေ ဒူအီ ခဲင် အိူင် မာခေဒူန် ဘော ဂေ ဒူအီ ခဲင် အိူင် အာခါယာ ကော နပ်။ အာဝ် ဝန် ခဲ့ တီ။ ဘော ဂေ ဒူအီ အီ ကွယ် ဒွန် ဘ့လာက် ဒွန် နာ မိူဝ် ဟဲ့ နပ် လွင် ညှိုမ် ဘေ ဇဝ် ယေဆူ။ ခုဝ်၊ ယေ တူ လုဝ် ဝီ ကာလာင် လွင် အန် တီ။ 9 န့ မုး ဒူအီ ဂေ တီ၊ ဂေ ဟဲ့ ကာလာင် လွင် ဘေ။ ဂေ နပ် ဒီ ခဲ လွင် ပဲ့ ဟဲ့ ရွုး ဘေ ဒီ ယေ ဒေါ တး ယေ ဒီ ဘေ။ ဂေ ဘော နပ် ဒီ ခဲ လွင် ပဲ့ ဟဲ့ ဝဲန် ဘေ အာရိုပ် ရာင် ပီ ကြိုပ် ဘေ။ ဟဲ့ ဟွတ့် ဘေ ဟဲ့ ဒူပ် ဇဝ်ဖြာ အာခါခ်ု အီ မုး ဇဝ်ဖြာ အိမ်။ ဘေ မိူဝ် ဟဲ့ ဘူင် ပီ အိုင် အန်။ 10 ဘေ ဘော နှဝ့် ပန် ဒီ ဝီ တး လူင် ဇဝ် ယေဆူ အီ မုး ဂွန် ဇဝ်ဖြာ ခဲင် ဂါင်ဟြာဝ်။ ခါ အာတ့် ဇဝ် ယေဆူ ဟဲ့ ဟွတ့် ယမ်။ ဇဝ်ဖြာ ယဲ့ ဟဲ့ တဲး အန် ဝီ ယိတ့် ဝီ အိမ်။ န့ မုး ဇဝ် ယေဆူ တီ၊ အန် ဒီ ချွတ် အေ၊ ကွဲ့ တဲး အေ ခမ် ဒုက် ဒေါ ရူ ကာဆဝ် ဇဝ်ဖြာ ဒီ ဒူအီ အီ မိုဝ်း မှာပ်။ ခဲ့ တီ ဂေ ဒူအီ ဟဝ် နပ် ဒီ ကာလာင် ဒီ ယေ လွင် ဘေ။