1-2 အုဝ် အာပေါလူ ဟဲ့ ဒဲမ် ပဲ့ နီ ဒီ ဘေ ဒူအီ အီ ညှိုမ် ဇဝ် ယေဆူ အီ ကွယ် ခဲင် မိူင် ကောလောဆဲ။ ဇဝ်ဖြာ ဟဲ့ တဲး အုဝ် ဘဲန် ဒူအီ ပီ ရဝ်း ပီ တိုယ် ဇဝ် ယေဆူ။ ဘေ မိူဝ် မုး ဘီနွင် အီ ဘွတ်၊ အီ ညှိုမ် ဆီချာ ဇဝ် ယေဆူ။

တဲး ဇဝ်ဖြာ အီ မုး ဂုန့် အေ ဂေဇူ ဘေ ဘော တဲး ဘေ မိုဝ်း နဝ်း ဂတ် ဂျီတ်။ ဘော အုဝ် ဘော အာထီမုဝ်ထေ အီ မုး ဘီနွင် အေ၊ ယာယ် မွင့်ကာရာ ဒွါ ဒီ ဘေ ပါယ် တီ။

3 ဒွန် ဇေန့် ဒေါ ဆာခိုဝ် ယေ ဒါင် ဘေ၊ ယေ ဘော ဒါင် ဂုင် ဂေဇူ ဒီ ဇဝ်ဖြာ အီ မုး ဂုန့် ဇဝ် ယေဆူ။ ဇဝ် ယေဆူ ဘော မုး ဒါ ကာညာ အီ အိုပ် အေ။ 4 ယေ ဟဲ့ ယိုဝ် လွင် ညှိုမ် ဆီချာ ဘေ ဇဝ် ယေဆူ ဘော လွင် ရွက့် ဘေ ဒူအီ အီ ညှိုမ် ဇဝ် ယေဆူ ဒွန် အီ။ ခုဝ်၊ ယေ ဒါင် ဂုင် ဂေဇူ ဒီ ဇဝ်ဖြာ။ 5 ဘေ ဟဲ့ ညှိုမ် ဆီချာ ဇဝ်ဖြာ ဘော ရွက့် အီ ဟဝ် ကူပ် ပီ နှဝ့် န့ဒဝ့် ဘေ။ ဘေ နှဝ့် န့ဒဝ့် ဇဝ်ဖြာ ဒီ ဒွါ ဒီ ဘေ ခဲ့ ပီ အုန် အန် အာဒါ ဘေ ခဲင် ဂါင်ဟြာဝ်။ လွင် အန် တီ၊ ဘေ ဟဲ့ ဒွိုမ် ယိုဝ် ဒေါ ထူမ် ဘေ ဂြုဝ်း ဇဝ်ဖြာ အီ မှာန် အာခါခ်ု။ ဂြုဝ်း ဇဝ်ဖြာ တီ တဲး န့ ဘဲန် နဝ်း ဒါခိုယ် ဒီ အီ။ 6 လွင် အန် တီ၊ ဂေ ဒူအီ အီ ကွယ် ဒဲင် ကာဒါယ် နီ ဟဲ့ ယိုဝ် ဒွန် နာ ဒွန် ပ့လုဝ့်။ န့ ဟဲ့ ဘဲန် အာဂျိုဝ် ဒီ ဂေ။ ပါယ် တီ န့ ဟဲ့ ဘဲန် အာဂျိုဝ် ဘော ဒီ ဘေ။ ဆိန့် ဆီငဲ ယိုဝ် ဘေ လွင် အန် တီ၊ န့ ကာလှုး ဒီ နဝ်း ဘေ၊ တဲး ဘေ ဘော နပ် ဆီချာ ဂုင် ဂေဇူ ဇဝ်ဖြာ အီ မှာန် အာခါခ်ု။ 7 အာအေပါဖ ဟဲ့ ဒွိုမ် ကာလာင် ဒီ ဘေ လွင် အန် တီ။ အန် မုး ဒူအီ ပီ ရွက့် အုဝ်၊ ဘူင် ဂါန် ဒူပ် အုဝ်။ အန် ဘူင် ဆီချာ ဂါန် ပီ စ်ု ဇဝ် ယေဆူ အန် ဘူင်။ အန် ဘော ဘူင် ဂါန် တီ ကာဒါင် ယေ။ 8 န့ မုး အန် အီ ဟဲ့ ကာလာင် ဒီ ယေ လွင် မိုဝ်း ဘေ နဝ်း ရွက့် ပီ ဒွါ နဝ်း ဖွိုမ် ဇဝ်ဖြာ ဒီ ဘေ။

9 ခုဝ် အန် တီ ဆိန့် ဆီငဲ ယိုဝ် ယေ လွင် အန် တီ၊ ယေ ဘော ဆာခိုဝ် ဒါင် ဘေ ဆေဆေ၊ တူ မိုဝ်း ဒေါ ပိဝ်။ ယေ မှာန့် ဒီ ဇဝ်ဖြာ၊ တဲး ဘေ နပ် ပီ လုဝ် ပီ အိုင် ဇဝ်ဖြာ၊ တဲး ဘေ မိုဝ်း အာငျာန် ဘော နပ် ပီ ပါယ် ဘဲန် မျုဝ် ဘဲန် မျုဝ် လွင် နဝ်း ဖွိုမ် ဇဝ်ဖြာ။ 10 ယေ ဆာခိုဝ် ပါယ် တီ၊ တဲး ဘေ ဘူင် အီ ကာအာပ် ဘူင်၊ အီ ကာဒါန် ဒီ ဇဝ်ဖြာ၊ တဲး ပီ ဘူင် ဘေ ဒွန် မျုဝ် ဘော လဝ့် နဝ်း အန်။ တဲး ဘေ ဘူင် ဘဲန် မျုဝ် ဘဲန် မျုဝ် အီ ဘွတ် အီ ဒီ ဘဲန် အာဂျိုဝ် ကိူန်။ တဲး ဘေ ဘော ကြဲ ဒီ နပ် ဆီချာ ဇဝ်ဖြာ။

11 တဲး အန် ဇဝ် ပွါ ဟဲန့် ဒီ ဘေ၊ တဲး ဘေ မိုဝ်း ပွုန် အီ ကာဒါန် ပွုန် ဘော အာဖုင် ဒင်ခုဝ် အန် ဇဝ်၊ တဲး ဘေ ဘော ပဲ ဒီ ယိူန်၊ ပဲ ဒီ အူတ် နဝ်း။ ယေ ဘော ဆာခိုဝ်၊ တဲး နဝ်း ဘေ ဘော ဘျုဝ် ဒါခိုယ်။ 12 တဲး ဘော ဘေ ဝီ ဒါင် ဂုင် ဂေဇူ ဒီ ဇဝ်ဖြာ။ အန် တဲး အေ ဘော ဒွန် အီ အီ ညှိုမ် ဇဝ် ယေဆူ ဘိုင် ခါဂုန် အီ ကွယ် ခဲင် မိူင် ဘ့လာင်။ 13 အန် ဇဝ် ဟဲ့ ချွတ် အေ၊ ကွဲ့ တဲး အေ ကွယ် ခဲင် အပ် ဝွင့်။ ကွဲ့ ဟူ တဲး ကာနမ် အိုပ် အေ။ အန် ဟဲ့ ဝီ တဲး အေ ကွယ် ခဲင် မိူင် ပီ အိုပ် ဇဝ် ယေဆူ အီ မုး ဂွန် ပီ ရွက့် ဇဝ်ဖြာ။ 14 ဂွန် အန် ဇဝ် တီ မိူဝ်၊ ဟဲ့ ခမ် ဒီ ထုတ် လေး အေ၊ ဟဲ့ ဂဝ်း ဝဲန် မှာပ် အေ။

15 ဇဝ် ယေဆူ ဘော မိုဝ်း အာရိုပ် ပီ ဇဝ်ဖြာ၊ ပီ တူ ပွိုန် ယိုဝ် အေ။ အန် ဘော မုး ဂွန် ဇဝ်ဖြာ အီ ဟဲ့ ကွယ် ဆိန့် အာတ့် ဖာန် ဘ့လေး ဇဝ်ဖြာ ဒွန် မျုဝ်။ 16 ခုဝ်၊ ဒေါ ဖာန် ဘ့လေး ဇဝ်ဖြာ ဘဲန် မျုဝ် ဘဲန် မျုဝ်၊ အန် တဲး ဇဝ် ယေဆူ စွယ် အန်။ န့ ဘော မုး မျုဝ် အီ ကွယ် ခဲင် ဂါင်ဟြာဝ်၊ မျုဝ် အီ ကွယ် ဒဲင် ကာဒါယ်၊ မျုဝ် ပီ ပွိုန် ယိုဝ် ဘော ပီ တူ ပွိုန် ယိုဝ်၊ ဘော မုး ကာနမ် အီ မိုဝ်း ပွုန် တာင်၊ အီ ကွယ် ခဲင် ဘ့လေန့် ဘော အီ အိုပ် ကာဒါယ်၊ ဇဝ် ယေဆူ ဟဲ့ ဖာန် ဘ့လေး တူတ့် ဇိုဝ် တီ၊ တဲး ဒွန် မျုဝ် ဘဲန် အာဂျိုဝ် ဒီ အန်။ 17 ဇဝ် ယေဆူ ဟဲ့ ကွယ် ဆိန့် အာတ့် မိုဝ်း ဒွန် မျုဝ်။ ခဲ့ ကွယ် ဒွန် မျုဝ်၊ န့ ဘော ကွယ် ဆီချာ ကူပ် ဇဝ် ယေဆူ။ 18 အန် ဘော မုး ဂိန့် ဂေ ဒူအီ ခဲင် ဖိုင် အီ ညှိုမ် အန်၊ ဂေ အီ ပီ ဒုဝ် ဘူင့် အန်။ အန် ဘော မုး ဒင် ရျီး ဖိုင် တီ။ အန် ဘော မုး ဂိန့် ဂေ အီ ဟဲ့ ဟွတ့် ယမ်၊ ဝီ ယိတ့် ဝီ အိမ်။ ပါယ် တီ၊ န့ ဘော မုး ဇဝ် ယေဆူ တီ၊ အီ ဘွတ် မျာတ် လွှိုမ် မျုဝ် ဟဝ် ဒွန် မျုဝ်။ 19 ဇဝ်ဖြာ ဟဲ့ တဲး န့ ဘဲန် ပါယ် တီ ဒွန် မျုဝ်။ ခုဝ်၊ အန် ဆီ တဲး ဂွန် အန် ပီ ဇဝ်ဖြာ၊ တဲး အန် မိုဝ်း ဇေ့ဇုင် တူတ့် ဒွန် မျုဝ်။ 20 ပါယ် တီ၊ ဇဝ်ဖြာ ဟဲ့ တဲး ဇဝ် ယေဆူ ဘူင် တဲး ဒွန် မျုဝ် ဝီ လာယ် ကာလဝ့် ဒီ အန်။ န့ ဘော မုး မျုဝ် အီ ကွယ် ဒဲင် ကာဒါယ် ဘော မျုဝ် အီ ကွယ် ခဲင် ဂါင်ဟြာဝ်။ ကူပ် ဟဲ့ ခမ် ဇဝ် ယေဆူ ဒီ ယမ် ဒဲင် ရွင့် ကာဝဲ့၊ အန် ဟဲ့ ဘူင် တဲး ဂေ အီ ကွယ် ကာဂဝ်း ဒီ ဇဝ်ဖြာ ဝီ ပွိုန် ဒီ ကွယ် ရိုမ်၊ ကွယ် ဒါခိုယ်။

21 အာတ့် နီ ဘော ဘေ ဟဲ့ ဒွိုမ် ကွယ် ကာဂဝ်း ဒီ ဇဝ်ဖြာ။ ဘော အာငျာန် ဘေ ဟဲ့ တဲး ဘေ ဘဲန် ရန်ဆူ ဇဝ်ဖြာ၊ တဲး ဘေ ဘူင် အီ တူ ဘွတ် အီ တူ မွှိုမ်။ 22 ဒေါ တီ နီ၊ အန် ဇဝ် ဟဲ့ တဲး ဘေ ဝီ ဒါခိုယ် ဒီ အန် ကူပ် ဟဲ့ ယမ် ဇဝ် ယေဆူ ကာဒါင် ဘေ။ အန် ဟဲ့ ဘူင် တဲး ဘေ ဝီ ဆီငါ ဘွတ်၊ တူ မိုဝ်း မှာပ်၊ ကွဲ့ တဲး န့ မိုဝ်း အာဆေ အီ ပွိုန် ဒီ ဖျာက် ဘေ ဘော ကာလာင် နာ တူ မွှိုမ် လွင် ဘေ။ ပါယ် တီ ဇဝ် ယေဆူ ဟဲ့ တဲး ဘေ ဝီ ပွိုန် ဒီ ကွယ် ရိုမ် ဒူပ် ဇဝ်ဖြာ။ 23 ဘေ ယီ လုဝ် ညှိုမ် ဆီချာ ဆေဆေ၊ တဲး န့ ပီ ဘေ ညှိုမ် ဒေါ တီ နီ။ ကွဲ့ တဲး ဘေ ဝဲန် ပီ နှဝ့် န့ဒဝ့် ဘေ။ န့ မုး ပီ နပ် ဘေ ဒေါ ထူမ် ဘေ ဂြုဝ်း ဇဝ်ဖြာ အီ တဲး နဝ်း ဘေ ဒါခိုယ်။ ဂြုဝ်း ဇဝ်ဖြာ တီ၊ ဘေ ဟဲ့ ယိုဝ်။ ဘော ဒူအီ အီ ကွယ် ဒွန် နာ ဒွန် ပ့လုဝ့် ဒဲင် ကာဒါယ် နီ ဟဲ့ ပွိုန် ဒီ ယိုဝ်။

24 ဒေါ တီ နီ အုဝ် ဟဲ့ ခူယ် ကူပ် ခမ် အုဝ် ဒုက် အာဒါ ဘေ။ ဂေ ဒူအီ ခဲင် ဖိုင် ဇဝ် ယေဆူ၊ အီ ပီ ဒုဝ် ဘူင့် အန်၊ ဂေ လုဝ် ခမ် ဒုက် ဘဲန် မျုဝ် ဘဲန် မျုဝ်၊ အီ ပီ ဒုက် ပီ ခမ် ဇဝ် ယေဆူ။ ပီ ခမ် အုဝ် ဒေါ တီ နီ၊ အုဝ် ဟဲ့ ဒါခိုယ် ဒီ ခမ် အာဒါ ဘေ။ ခုဝ်၊ န့ ဒီ စွယ် တဲး ဒုက် တီ စေဝ် တူတ့်။ 25 အုဝ် ဘော ဘဲန် ဒဲစေန့် ဘေ ခဲင် ဖိုင် အီ ညှိုမ် ဇဝ် ယေဆူ။ ဇဝ်ဖြာ ဟဲ့ စ်ု အုဝ် ကာလာင် တူတ့် ဂြုဝ်း အန် ဒီ ဘေ၊ ကွဲ့ တဲး န့ ဆီ ဂိတ် မာဆေ။ 26 ဂြုဝ်း ဇဝ်ဖြာ တီ၊ အန် တူ ဒွိုမ် ကာလာင် ဒီ အီ ဟဝ်။ အာတ့် နီ ဒွန် ဇာတ် ဒွန် စုဝ် အန် တူ တဲး အီ နပ်။ မာလဲ၊ ဒေါ တီ နီ၊ အန် ဟဲ့ ဝီ တဲး အုဝ် ကာလာင် လွင် အန် တီ ဒီ ဂေ ဒူအီ အီ ညှိုမ် ဇဝ် ယေဆူ။ 27 ဇဝ်ဖြာ ဆီ တဲး ဂေ ဒူအီ ဒွန် မျုဝ် နပ် လွင် အန် တီ။ န့ မုး အီ မွှိုမ် အာမ် ကာဆဝ်၊ ပီ ဒီ ဘူင် အန်။ အန် တဲး ဇဝ် ယေဆူ ကွယ် ခဲင် နဝ်း ဘေ၊ တဲး ဘေ နှဝ့် န့ဒဝ့် ပန် ဒီ တး ကွယ် အာဖုင် ဒင်ခုဝ် ဇဝ်ဖြာ ဒီ ဘေ။

28 ယေ ဘော ကာလာင် လွင် ဇဝ် ယေဆူ တီ ဒီ ဘေ၊ ဘော ဒမ် ဆာဒိက် ဒီ ဒူအီ ဒွန် အီ။ ယေ ဘော ဒိုဝ်း အာငျာန် ပီ ဒွါ ဇဝ်ဖြာ ဒွန် မျုဝ်၊ မာနုဝ် ဒူအီ ဒွန် အီ၊ တဲး ဂေ ဘဲန် ပီ ဒူအီ တာင်၊ အာဝ် ဟူ မိုဝ်း နဝ်း ဂွန်၊ တဲး ဇဝ် ယေဆူ ကွယ် ခဲင် နဝ်း ဂေ၊ တဲး ပီ ညှိုမ် ဂေ ဇေ့ဇုင် ပန် ဒီ တး ဇမ် ဂေ ဒူင် ကွယ် ဇဝ်ဖြာ။ 29 ဂါန် ပီ ဘူင် အုဝ် နီ၊ အုဝ် ဘော ဂျုဝ်ဂျာ ဒီ ဘူင်။ အုဝ် ဘော ဒိုဝ်း ပွုန် ပီ ဒွါ ဇဝ် ယေဆူ ဒီ အုဝ်၊ အီ ဟဲ့ တာင် ကာဆဝ်၊ အီ လိုဝ်း ဆီချာ ဒေါ ဘူင် အုဝ် ဂါန် အုဝ်။