အုဝ် အာပေါလူ အီ မုး ဒဲစေန့် ဇဝ် ယေဆူ၊ အုဝ် ဒဲမ် ပဲ့ နီ တိုယ် ဒီ ဘေ ဒူအီ ခဲင် ဖိုင် ဇဝ် ယေဆူ ဒွန် အီ အီ ကွယ် ခဲင် မိူင် ဖီလီဖီ။ အုဝ် ဒဲမ် ဘော ဒီ ဂေ ဒါ တာင် ခဲင် ဖိုင် ဇဝ် ယေဆူ ဘော ဒီ ဂေ ဒူအီ အီ စွယ် ဂေ ဒါ တာင် ဒွန် အီ။

2 ဘော အုဝ် ဘော အာထီမုဝ်ထေ မှာန့်၊ တဲး ဇဝ်ဖြာ ဂေဇူ ဘေ။ တဲး ဇဝ်ဖြာ အီ မုး ဂုန့် အေ ဘော ဇဝ် ယေဆူ အီ မုး ဒါ ကာညာ အေ ဒွါ နဝ်း ဂျီတ် ဒီ ဘေ။

3 ဒေါ နမ်လှုဝ်း အုဝ် ဒီ ဘေ ဒွန် ဇေန့်၊ အုဝ် ဘော ဒါင် ဂုင် ဂေဇူ ဒီ ဇဝ်ဖြာ ဒါင် ဘေ ဒွန် အီ။ 4 ဒေါ ဆာခိုဝ် အုဝ် ဒါင် ဘေ ဒွန် ဇေန့်၊ နဝ်း အုဝ် ဟဲ့ ဒါခိုယ် ဒီ ဆာခိုဝ် ဒါင် ဘေ ဒွန် အီ။

5 အုဝ် ဟဲ့ ဒါခိုယ် ကူပ် ဟဲ့ စွယ် ဘေ ဒီ အုဝ် ဒေါ ကာလာင် အုဝ် လွင် ဇဝ်ဖြာ အီ တဲး နဝ်း ဒူအီ ဒါခိုယ်။ ဘေ မိူဝ် ဟဲ့ စွယ် ပါယ် တီ၊ ဆိန့် ဒေါ ကာစုး ဘေ ဒီ ညှိုမ် ကော ဇမ် ဒေါ တီ နီ။ 6 ကူပ် န့ ပါယ် တီ၊ အုဝ် ထာင် ဇဝ်ဖြာ အီ ဟဲ့ ကာစုး ဒီ ဘူင် နာ ဘွတ် နာ မွှိုမ် ခဲင် နဝ်း ဘေ၊ အန် ဒီ ဘော ဘူင် ဟာဝ် ပါယ် တီ၊ တဲး န့ ဟွတ့် ဆီငဲ ပန် ဒီ ဝီ တး လူင် ဇဝ် ယေဆူ။

7 ဟဲ့ ကာအာပ် အုဝ် ကာဒွါ့ ကာဖာ ပါယ် တီ။ ခုဝ်၊ အုဝ် ဟဲ့ ရွက့် ကာဆဝ် ဘေ ခဲင် နဝ်း အုဝ်။ ဘေ မိူဝ် ဒီ ပွိုန် ဂေဇူ အန် ဒူပ် အုဝ်။ ဒေါ ကွယ် အုဝ် ခဲင် ကာပိုမ် ဘော ဒေါ ပွိုန် အုဝ် ဒီ ကာလာင် ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ်၊ ဘေ ဟဲ့ စွယ် အုဝ် ဆေဆေ။ 8 ကူပ် ဟဲ့ ရွက့် အုဝ် ဒီ ဘေ ပီ ဇဝ် ယေဆူ ဟဲ့ ရွက့် ဘေ၊ အုဝ် ဘော ဒီကေန် ကာဆဝ် ဘေ။ ဘော ဇဝ်ဖြာ ဟဲ့ နပ် နဝ်း အုဝ်၊ ဝီ ဘဲန် ဆက်ဆေ လွင် အန် တီ။

9 အုဝ် ဘော ဆာခိုဝ် ဒါင် ဘေ၊ တဲး ဘေ ဝဲ မိုဝ်း နဝ်း ရွက့် ကာပွါ ကူပ် နပ် ဘေ ပီ ပါယ် ဘဲန် မျုဝ် ဘဲန် မျုဝ်၊ ဘော ကူပ် နပ် ဘေ ဒီ ကာယဝ်း အီ မွှိုမ် အီ တူ မွှိုမ်။ 10 တဲး ဘေ ဘော နပ် ဒီ ရဝ်း အီ မွှိုမ် လွှိုမ် တူတ့်။ တဲး ဘေ မိုဝ်း နဝ်း လုယ် နဝ်း ဆီငါ၊ ကွဲ့ တဲး န့ ဆီ မိုဝ်း ဒူအီ အီ ပွိုန် ကာလာင် နာ တူ မွှိုမ် လွင် ဘေ။ တဲး န့ ပါယ် တီ ဆေဆေ၊ တဲး န့ ကော ဇမ် ဆီငဲ ဒီ ဝီ တး လူင် ဇဝ် ယေဆူ။ 11 တဲး ဇဝ် ယေဆူ စွယ် ဘေ၊ တဲး ဘေ ဘူင် နာ မုး နာ မှာန် ဆေဆေ၊ တဲး န့ ဘဲန် အာဂျိုဝ် ဒီ ဘေ၊ တဲး အာဖုင် ဒင်ခုဝ် ဇဝ်ဖြာ ဘော လိုဝ်း ဒီ အီ။

12 အိုယ် ဘေ ဘီနွင်၊ အုဝ် ဆီ တဲး ဘေ နပ် ပဲ့ ဟဲ့ ကာဒုး တး အုဝ်၊ န့ ဟဲ့ ဝီ တဲး ဒူအီ ကိူန် နပ် လွင် ဇဝ်ဖြာ အီ တဲး နဝ်း ဒူအီ ဒါခိုယ်။ 13 ခုဝ်၊ ဂေ ဒူအီ အီ ဘ်ု ဟုဝ် ခုန်ဒီခမ် ဒွန် အီ ဘော ဂေ အီ ဟဝ်၊ ဂေ ဘောကာဂ့လျီတ် ဟဲ့ နပ်၊ အုဝ် ကွယ် ခဲင် ကာပိုမ် ကူပ် ညှိုမ် အုဝ် ဇဝ် ယေဆူ။ 14 ဒဲင် တီ၊ န့ ဘော စွယ် တဲး ဂေ ဘီနွင် အီ ညှိုမ် ဇဝ် ယေဆူ ဘိုင် ဆီချာ ဇဝ်ဖြာ။ န့ မိူဝ် တူ တဲး ဂေ မိုဝ်း နဝ်း ယုဝ်။ န့ တဲး ဂေ ဝဲ ယ ကာလာင် လွင် ဇဝ်ဖြာ။

15 မာလဲ၊ ဒူအီ မင် အီ ဂေ ယီ လာယ် ကာထဲန့်၊ လာယ် လှယ့် ဒီ ကာလာင် လွင် ဇဝ် ယေဆူ။ မင် အီ ဂေ ဘော မိုဝ်း နဝ်း ဆိူဝ် နဝ်း မှာန် ဒီ ကာလာင်။ 16 ဂေ အီ မိုဝ်း နဝ်း ဆိူဝ် နဝ်း မှာန် တီ၊ ဂေ ကာလာင် လွင် ဇဝ်ဖြာ ကူပ် ရွက့် ဂေ ဒီ အုဝ်။ ဂေ နပ်၊ အုဝ် ဟဲ့ ကွယ် ဒီ နီ တဲး အုဝ် ပွိုန် ဒီ ကာလာင် လွင် ဇဝ် ယေဆူ ဒီ အီ အီ တဲး နဝ်း ဒူအီ ဒါခိုယ်။ 17 ဂေ အီ တူ မိုဝ်း နဝ်း ဆိူဝ် နဝ်း မှာန်၊ ဂေ ဘော ကာဖာ မီ ဒုဝ် ဘြိမ် ဂေ ဘော ဆီ ဘူင် တဲး န့ ဝဲ ဒုက် ကာဆဝ် ဒီ အုဝ် ဒေါ ကွယ် အုဝ် ခဲင် ကာပိုမ် နီ။ 18 မာလဲ၊ ဂေ ပီ ဘော မိုဝ်း နဝ်း ဇိုဝ် မှဝ် အာဝ် လိူက်။ ဆေ ဂေ ဘော မိုဝ်း နဝ်း ဆိူဝ် ဒီ ကာလာင်၊ ဘော မိုဝ်း နဝ်း တူ ဆိူဝ် ဒီ ကာလာင်၊ ဂေ ယီ ကာလာင် လွင် ဇဝ် ယေဆူ။ အာတီ ဟဲ့ မုး အီ အာရေ တာင်၊ အီ တဲး န့ ဘဲန် နဝ်း ဒါခိုယ် ဒီ အုဝ်။ ဘော နာ အာတ့် ဟာဝ် န့ ဒီ ဒါခိုယ် ဒီ အုဝ်။

19 နဝ်း အုဝ် ဟဲ့ ဒါခိုယ်။ ခုဝ်၊ အုဝ် ဟဲ့ နပ်၊ ကူပ် ဆာခိုဝ် ဘေ ဒါင် အုဝ် ဘော ကူပ် စွယ် နဝ်း ဖွိုမ် ဇဝ် ယေဆူ ဒီ အုဝ်၊ အုဝ် ဒီ ပွိုန် ဒီ လေး ခဲင် ကာပိုမ် နီ။ 20 ပီ နှဝ့် န့ဒဝ့် အုဝ်၊ န့ ယီ ပါယ် နီ။ အုဝ် တူ ဆီ ဘူင် မာဆေ အီ တဲး အုဝ် မွှိုမ် ဆာယ်။ အုဝ် ဆီ မိုဝ်း နဝ်း အီ ယ ဒီ ကာလာင် လွင် ဇဝ် ယေဆူ ဆေဆေ။ အုဝ် ပီ ဘော အိမ်၊ အုဝ် ပီ ဘော ယမ်၊ အုဝ် ဆီ တဲး ပီ ဘူင် ပီ ပါယ် အုဝ် ဒွန် မျုဝ် အိူပ် မျုက် ဇဝ် ယေဆူ။ 21 ခုဝ်၊ အီ မုး အုဝ်၊ ဒေါ ဆီ အိမ် အုဝ်၊ အုဝ် ဆီ ဘူင် ဒူပ် မီ ပီ အိုင် ဇဝ် ယေဆူ။ အုဝ် ပီ ဘော ယမ် မိူဝ်၊ ဟဲ့ မိုဝ်း အာဂျိုဝ်။ 22 ပါယ် တီ အုဝ် နပ်၊ ဆေ အုဝ် ဆီ မိုဝ်း ဖွိုမ်၊ အုဝ် ဒီ ဝဲ ဘူင် ဂါန် အီ ဘဲန် အာဂျိုဝ် ကိူန်။ အုဝ် ပီ ဘော ဟဲ့ တဝ်း ပါယ် တီ မိူဝ်၊ အုဝ် ညှမ် နပ် ဒီ ရဝ်း နာ မှဝ်။ 23 အာ မျုဝ် တီ၊ န့ ဆီ ကာဝှ်ု ခဲင် နဝ်း အုဝ်။ ခဲင် နဝ်း အုဝ် အာခ်ု၊ အုဝ် ဟဲ့ ဆီ ပွုန် ဇာတ် နီ၊ တဲး အုဝ် ပွိုန် ဒီ ကွယ် ရိုမ် ဒူပ် ဇဝ် ယေဆူ၊ အီ ဟဲ့ ဒါခိုယ် ကာဆဝ်။ 24 မာလဲ၊ ဆေ အုဝ် ယီ ဆီ မိုဝ်း ဖွိုမ်၊ န့ ဘော ဘဲန် အာဂျိုဝ် အာဒါ ဘေ လွှိုမ် အုဝ် ယမ်။ 25 ကူပ် န့ ပါယ် တီ၊ အုဝ် ဟဲ့ နပ်၊ အုဝ် ဆီ လုဝ် ကွယ် ဘော စွယ် ဘေ ဒွန် အီ၊ တဲး ဘေ ကြဲ ဒီ ညှိုမ် မန် ဆီချာ ဘော ဝဲ ဒါခိုယ် ကူပ် ညှိုမ် ဘေ။ 26 န့ ဒီ ဘော တဲး ဘေ ဝဲ ဒါခိုယ် ဘော အိူပ် ဇဝ် ယေဆူ ကူပ် ဝီ တး အုဝ် ဒူင် ကွယ် ဘေ ပေါ အူ ဇေန့်။

27 ပီ ဘော ဘဲန် မျုဝ် မှဝ် မိူဝ်၊ ပီ ဘူင် ဘေ၊ တဲး န့ ကာဒါန် ခဲ့ ကာလာင် ဘေ ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ်။ ဆေ ဘေ ဘူင် ပါယ် တီ၊ အုဝ် ပီ ဘော ဟာဝ် ယိုဝ် ဘေ၊ ပီ ဆ ဟာဝ် ယိုဝ် ဘေ၊ အုဝ် ဒီ ဘော နပ်၊ ဘေ ဟဲ့ ညှိုမ် ဆီချာ၊ ဟဲ့ လာယ် ဖြူမ် ဘဲန် အူ နဝ်း အူ ဖွိုမ်၊ တဲး ဘေ ဘ်ု ဆာဒိက် ပီ ညှိုမ် ဘေ ဂြုဝ်း ဇဝ်ဖြာ အီ တဲး နဝ်း ဘေ ဒါခိုယ်။ 28 အုဝ် ဒီ ဘော နပ် လွင် တူ ယုဝ် ဘေ ရန်ဆူ ဘေ တီ။ အာတီ န့ တဲး ရန်ဆူ ဘေ နပ် ဆီချာ လွင် ဒီ စှိုမ် ဂေ။ အီ မုး ဘေ၊ ဇဝ်ဖြာ ဒီ ချွတ် ဘေ။ 29 ကူပ် ခမ် ဇဝ် ယေဆူ ဒီ ယမ် ကာဒါင် ဘေ၊ ဘေ ဟဲ့ ပွိုန် ဒီ ညှိုမ် အန် ဘော ပွိုန် ဒီ ခမ် ဒုက် ကူပ် ညှိုမ် ဘေ ဒီ အန်။ 30 ခုဝ်၊ ဒေါ တီ နီ ဘေ ဘော ခမ် ဒုက် ဘဲန် မျုဝ် ဘဲန် မျုဝ် ပဲ့ ဟဲ့ ဒွိုမ် ယိုဝ် ဘေ အုဝ် ခမ်။ ဘော ဒေါ တီ နီ ဘေ ဟဲ့ ယိုဝ်၊ အုဝ် ဆီ ခမ် ဒုက် ဇိုဝ် တီ။