ပါယ် တီ၊ ဘေ မိုဝ်း နဝ်း တာင် ကူပ် ကာဒိုက် ကာဒဝ့် ဘေ ဒီ ဇဝ် ယေဆူ။ ဘေ မိုဝ်း ဘော နဝ်း ဂျီတ် ယေန် ကူပ် ရွက့် အန် ဇဝ် ဒီ ဘေ။ နဝ်း ဖွိုမ် ဇဝ်ဖြာ မိူဝ် ဟဲ့ လိုပ် ခဲင် နဝ်း ဘေ။ ဘေ မိူဝ် နပ် ဒီ လာယ် ရွက့် လာယ် ကာဝေ။ 2 ဆေ န့ ပါယ် တီ၊ တဲး ဘေ ဘူင်၊ တဲး နဝ်း အုဝ် ဝဲ ဒါခိုယ်။ တဲး ဘေ လာယ် ဖြူမ်။ ပီ လာယ် ဖြူမ် ဘေ၊ တဲး န့ မုး အူ မျုဝ်။ ဘော ပီ ဇေန့်ဇာ ဘေ ဘော ပီ ခြာမ် ဘေ ဒီ ဘူင်၊ တဲး န့ မုး အူ မျုဝ်။ 3 ခဲ့ ပီ ဘူင် ဘေ၊ ကွဲ့ တဲး ဘေ ကာဖာ မီ အာဒါ ဒုဝ် ဘြိမ် ဘေ။ ကွဲ့ တဲး ဘေ ဘူင်၊ တဲး အီ ဟဝ် အိူပ် ဘေ။ တဲး ဘေ မိုဝ်း မီ နဝ်း ဂူမ် နဝ်း တျီမ်၊ တဲး ဘေ ဒွန် အီ မာတ် အီ ဟဝ် ဟဲ့ မွှိုမ် လွှိုမ် ဘေ။ 4 ဒဲင် တီ၊ ကွဲ့ ဘူင် တဲး န့ ဘဲန် အာဂျိုဝ် မီ ဒီ ဒုဝ် ဘြိမ် ဘေ။ တဲး ဘေ ဘူင် တဲး န့ ဘဲန် အာဂျိုဝ် ဘော အာဒါ အီ ဟဝ်။

5 တဲး နဝ်း ဘေ ပီ နဝ်း ဇဝ် ယေဆူ။ 6 ဇဝ် ယေဆူ ပီ ဘော ဟဲ့ မုး ဇဝ်ဖြာ မိူဝ်၊ အန် ယီ တူ တဝ်း၊ “ကူပ် မုး အုဝ် ဇဝ်ဖြာ၊ အုဝ် တူ ခမ် ဒီ ဘဲန် ဒူအီ။” 7 အန် ဘော ခမ် ဒီ ဝဲန် အာဖုင် ဒင်ခုဝ် အန် ဘောကာဂ့လျီတ်။ အန် ဘော ခမ် ဒီ ဘဲန် ပီ မှာယ် အီ ဟဝ်၊ ဘော ခမ် ဒီ ဂွိုတ် ဘဲန် ဒူအီ။

8 အန် ဟဲ့ ဟွတ့် ခမ် ဒီ ဂွိုတ် ဘဲန် ဒူအီ၊ အန် ပီတျီမ် ဒုဝ် အန် ဘော ထူမ် ဘော ဘူင် တူတ့် ပဲ့ ဟဲ့ စ်ု ဇဝ်ဖြာ အန် ဘူင်၊ တဲး အန် ကော ခမ် ဒီ ယမ် ဒဲင် ရွင့် ကာဝဲ့ ပီ ဒူအီ ဟာယ်။

9 ကူပ် ပီ ဘူင် အန် တီ၊ ဇဝ်ဖြာ ဘော အိူပ် မျုက် အန် လွှိုမ် မျုဝ် ဟဝ်၊ ပီ ဝီ တဲး အန် မိုဝ်း ပွုန် တာင် လွှိုမ် တူတ့် ဒွန် မျုဝ်။

10 ခဲ့ ကွယ် မျုဝ် အီ နပ် ဒီ ကြိုပ်၊ ဂေ ဒီ ဘော ခြိုပ်ခြဝ် ကြိုပ် ဇဝ် ယေဆူ။ ဂေ အီ ကွယ် ခဲင် ဂါင်ဟြာဝ်၊ ဘော ဂေ အီ ကွယ် ဒဲင် ကာဒါယ်၊ ဘော ဂေ အီ ကွယ် ခြိုမ် ကာဒါယ်၊ ဂေ ဘောကာဂ့လျီတ် ဒီ လုဝ် ဂူမ် ကြိုပ် ဇဝ် ယေဆူ။

11 ဒွန် အီ ဒီ ဘော တဝ်း၊ ဇဝ် ယေဆူ မုး ဒါ ကာညာ အီ အိုပ် တူတ့် ဒွန် မျုဝ်။ ပါယ် တီ၊ အာဖုင် ဒင်ခုဝ် ဇဝ်ဖြာ အီ မုး ဂုန့် ဇဝ် ယေဆူ ဒီ ဘော လိုဝ်း ဆီချာ။

12 ခုဝ် အန် တီ ဘေ ဘီနွင် ပီ ရွက့် အုဝ်၊ ဘေ ဟဲ့ ဒွိုမ် ထူမ် ဂြုဝ်း အုဝ် ဒေါ ကွယ် အုဝ် ဒူပ် ဘေ။ ဒေါ တူ ကွယ် အုဝ် မိူဝ်၊ ဘေ ဟဲ့ ဝဲ လုဝ် ထူမ်။ တဲး ဘေ မိုဝ်း နဝ်း ယုဝ် ဒီယေန့် ဘော ဂျုဝ်ဂျာ ဒီ ဘူင်၊ တဲး န့ ကာဒါန် ဒီ ပီ ချွတ် ဇဝ်ဖြာ ဒီ ဘေ။ 13 ခုဝ်၊ န့ မုး ဇဝ်ဖြာ အီ တဲး ဘေ မိုဝ်း နဝ်း ဆီ ဘူင် နာ မွှိုမ်။ အန် တဲး ဘေ ဘော ပွိုန် ဒီ ဘူင် ဒူပ် ပီ အိုင် အန်။

14 ခဲ့ ပီ ဘူင် ဘေ ဒွန် မျုဝ်၊ ကွဲ့ ပိုန့်၊ ကွဲ့ ကာအေး ကာထဲန့်။ 15 ဆေ ဘေ ဘူင် ပါယ် တီ၊ အီ ဟဝ် မိူဝ် တူ ပွိုန် ကာလာင် နာ တူ မွှိုမ် လွင် ဘေ။ န့ ဒီ တဲး ဘေ မိုဝ်း နဝ်း လုယ် ဆီငါ။ ဘေ ဟဲ့ ဘဲန် ဂွန် ဇဝ်ဖြာ အီ တူ မိုဝ်း မှာပ် မာဆေ။ ဘေ မိူဝ် ကွယ် ကာတဲ ဂေ ဒူအီ အီ တူ မိုဝ်း နဝ်း ဆိူဝ် နဝ်း မှာန်၊ အီ ဘူင် အီ မွှိုမ် ကာအိး။ ဘေ ယီ ပီ ဘ့လာင် ဒီ ဒူအီ ဇိုဝ် တီ။ ဘ့လာင် တီ ပီ ဘ့လာင် ဆီမန့် အီ ကွယ် ခဲင် ဘ့လေန့်။ 16 တဲး ဘေ ကာလာင် ဂြုဝ်း ဇဝ်ဖြာ အီ ဒွါ အာဆာက် ဒီ အီ။ ဆေ ဘေ ဘူင် ပါယ် တီ၊ အုဝ် ဒီ ခူယ် ဘော ပွိုန် ဒီ ပီဖုင် အုဝ် ပန် ဒီ ဇမ် ဆီငဲ ဒီ ဝီ တး လူင် ဇဝ် ယေဆူ။ ခုဝ်၊ ဂါန် ပဲ့ ဟဲ့ ဂျုဝ်ဂျာ အုဝ် ဒီ ဘူင်၊ န့ တူ စှိုမ် ဒီလူယ် ဒီလာယ်။ 17 ဂါန် ပီ ဘူင် ဘေ ကူပ် ညှိုမ် ဘေ ဇဝ် ယေဆူ၊ န့ ပီ ဘေ လှူ ပီ ဒီ လှူ အီ ဒုဝ့် ဒီ ငဝ်။ ဆေ အုဝ် ဘော လုဝ် ယမ်၊ အုဝ် ဒီ ခမ် ဒီ ယမ်၊ တဲး န့ ပီ ပီ ဒီ ဒျီင် အီ လှုဝ် ဒဲင် ပီ ဒီ လှူ ဘေ တီ။ ဆေ ဇဝ်ဖြာ တဲး န့ ဘဲန် ပါယ် တီ၊ အုဝ် ဒီ ဘော ခူယ် ဘော ဘျုဝ် ဒူပ် ဘေ။ 18 ပါယ် တီ၊ တဲး ဘော ဘေ ဒါခိုယ် ဘော ခူယ် ဒူပ် အုဝ်။

19 အုဝ် ယီ ညှိုမ်၊ ဇဝ် ယေဆူ ဒီ တဲး အုဝ် ပွိုန် ဒီ စေဝ် စ်ု အာထီမုဝ်ထေ ဟာဝ် ဒူင် ကွယ် ဘေ၊ တဲး အုဝ် နပ် လွင် ဘေ၊ တဲး နဝ်း အုဝ် ဒါခိုယ်။ 20 န့ တူ မိုဝ်း အာဆေ အီ မိုဝ်း နဝ်း ဆီ ယွတ် မဲန် ဘေ ပီ အန်။ 21 ဂေ ဒူအီ ဟဝ်၊ ဂေ ဒွန် အီ တူ မိုဝ်း နဝ်း ဆီ ဘူင် တဲး န့ ဘဲန် အာဂျိုဝ် ဒီ ဇဝ် ယေဆူ။ ဂေ ဆီ ဘူင် မီ တဲး န့ ဘဲန် အာဂျိုဝ် ဒီ ဒုဝ် ဘြိမ် ဂေ။ 22 မာလဲ၊ အီ မုး အာထီမုဝ်ထေ၊ ဘေ ဟဲ့ ဟွတ့် နပ်၊ ပီ ဘူင် အန် န့ မိုဝ်း အာဂျိုဝ် ဒီ ဘေ။ အန် ဟဲ့ ဘူင် ဂါန် ရိုမ် ဒူပ် အုဝ်၊ ကာလာင် လွင် ဇဝ်ဖြာ အီ တဲး နဝ်း ဒူအီ ဒါခိုယ်။ ယာယ် ဟဲ့ ပီ အူ ဂုန့် အူ ဂွန်။ 23 ခုဝ် အန် တီ ပန် ဒီ ဝီ နပ် အုဝ် အီ ဒီ ဘဲန် ဒီ အုဝ်၊ အုဝ် မိူဝ် ဒီ ဝီ စ်ု အန် ဟာဝ် ဒူင် ကွယ် ဘေ အူ ဇေန့်။ 24 အုဝ် ယီ နပ်၊ အာဝ် ဘော လှေန့်၊ ဇဝ်ဖြာ ဒီ တဲး ဘော အုဝ် ဟာဝ် ဒူင် ကွယ် ဘေ။

25 အုဝ် ထာင်၊ အုဝ် ဒီ တဲး ဘော ဝါ အုဝ် အီ စိူဝ် အာအေပါဖော ဝီ ဝေန့် ဒူင် ကွယ် ဘေ။ ဒေါ တီ နီ၊ အန် ဟဲ့ ဘဲန် ဂိုက် အုဝ်၊ ဘူင် ရိုမ် ဂါန် ဒူပ် အုဝ်။ အန် ဘော ပီ ဒါ ဆိုက် ဒူပ် အုဝ်။ ဘေ ဟဲ့ တဲး အန် တး ဒူင် ကွယ် အုဝ်၊ တဲး အန် လိုမ်လာ အုဝ်။ 26 အန် မိူဝ် ဟဲ့ ဒီကေန် ဘေ။ အာဝ် ဟူ ဘဲန် နဝ်း ဒါခိုယ် ဒီ အန် ကူပ် ဟဲ့ ယိုဝ် ဘေ လွင် အန် တူ ကွယ် ဒါခိုယ်။ 27 ဟဲ့ မှာန်၊ အန် ဟဲ့ မိုဝ်း ဆဝ် ကော ရိန် ဒီ ယမ်။ မာလဲ၊ ဇဝ်ဖြာ ဟဲ့ ဝီ ကာဝေ အန်။ အာဝ် မုး ဇဝ်ဖြာ ကာဝေ မီ အန်။ ဇဝ်ဖြာ ဟဲ့ ကာဝေ ဘော အုဝ်၊ တူ တဲး န့ ဘဲန် ဒုက် ကာထာပ် ကာဒဲန့် ဒီ နဝ်း အုဝ်။ 28 အုဝ် မိူဝ် ဟဲ့ ဆီ တဲး ကာဆဝ် အန် ဝီ ဝေန့် ဒူင် ကွယ် ဘေ၊ တဲး ဘေ ယိုဝ် အန်၊ တဲး နဝ်း ဘေ ဒါခိုယ်။ န့ ဒီ တဲး ဘော နဝ်း ကာဟွာ့ နဝ်း မှဲ အုဝ် ဟြာယ်။ 29 တဲး ဘေ ဘော ဒါခိုယ် ဒီ ရွုး အန် ကူပ် ညှိုမ် အန် ဒီ ဇဝ် ယေဆူ ပီ ဘေ။ တဲး ဘေ ဘော ရုဝ်ဆေ ဒွန် အီ အီ ပီ အန် တီ။ 30 ခုဝ်၊ အန် ဟဲ့ ခမ် ဒီ ဘူင် ဂါန် ဇဝ် ယေဆူ အီ ညှာပ် ကာဆဝ်။ အန် ဟဲ့ ဘူင် ဂါန် ကာဒါင် ဘေ၊ တဲး အန် ကော ရိန် ဒီ ယမ်။ အန် ဟဲ့ စွယ် အုဝ် ဘူင် တဲး န့ ဇေ့ဇုင် ဒွန် မျုဝ် ခဲ့ ပီ တူ ပွိုန် ဘေ ဒီ ဘူင်။