အုဝ် အာပေါလူ ဝီ ဒဲမ် ပဲ့ ဒီ ဘေ ဒူအီ အီ ညှိုမ် ဇဝ် ယေဆူ အီ ကွယ် ခဲင် မိူင် အဲဖဲ။ ဇဝ် ယေဆူ တီ မုး ဒူအီ ပီ ရဝ်း ပီ တိုယ် ဇဝ်ဖြာ။ အုဝ် အာပေါလူ မုး ဒူအီ ပီ ရဝ်း ပီ တိုယ် ဇဝ် ယေဆူ။ ဘော ဇဝ်ဖြာ ဟဲ့ ရဝ်း အုဝ်။ အုဝ် မိူဝ် နပ်၊ ဘေ မုး ဒူအီ အီ ညှိုမ် ဆီချာ ဇဝ် ယေဆူ။

2 ဇဝ်ဖြာ အီ မုး ဂုန့် အေ ဘော ဇဝ် ယေဆူ အီ မုး ဒါ ကာညာ အီ အိုပ် အေ၊ တဲး ဂါယ် ဂေဇူ ဘေ ဘော ဒွါ နဝ်း ဂျီတ် ဒီ ဘေ။

3 ဇဝ်ဖြာ အီ မုး ဂုန့် ဇဝ် ယေဆူ၊ အန် ဟဲ့ မွင့်ကာရာ တဲး ဒီ နဝ်း ဖွိုမ် အေ၊ ဒွါ ပီ ဒီ လုဝ် အေ ဒွန် မျုဝ် ခဲင် မိူင် ဂါင်ဟြာဝ်။ အန် ဟဲ့ မွင့်ကာရာ တဲး ဇိုဝ် တီ ဒီ အေ ဒေါ ညှိုမ် အေ ဇဝ် ယေဆူ။ ခုဝ် အန် တီ ယေ ဒါင် ဂုင် ဂေဇူ ဒီ ဇဝ်ဖြာ။ 4 ဒေါ မွိုန်၊ ဒေါ ညှမ် ဖာန် ဘ့လေး ဇဝ်ဖြာ ကာဒါယ်၊ အန် ဟဲ့ ရဝ်း အေ။ ကူပ် ဟဲ့ ရဝ်း ဇဝ်ဖြာ ဇဝ် ယေဆူ၊ တဲး အန် ချွတ် ဒူအီ၊ ဇဝ်ဖြာ ဟဲ့ ရဝ်း ဘော အေ၊ တဲး အေ ဝီ ရွက့် ဇဝ်ဖြာ၊ ဝီ ဘဲန် ဒူအီ ဘွတ်၊ အီ တူ မိုဝ်း မှာပ် မာဆေ။ 5 အူ ဆိန့် ဒေါ မွိုန် ဇဝ်ဖြာ ဟဲ့ ဟွတ့် ဆုင်ဖျာတ် ဒီ ဘူင် တဲး အေ ဘဲန် ဂွန် အန်။ အန် ဘူင် တဲး အေ ညှိုမ် ဇဝ် ယေဆူ၊ တဲး အေ ဝီ ပွိုန် ဒီ ကွယ် ရိုမ် ဒူပ် အန်။ ဇဝ်ဖြာ ဟဲ့ ဘူင် ပါယ် တီ၊ တဲး န့ လဝ့် နဝ်း အန်။ 6 အန် မိူဝ် ဟဲ့ ဘူင် ပါယ် တီ၊ တဲး အေ နပ် ခဲ့ တာင် ဂေဇူ ပီ ဒွါ ဇဝ်ဖြာ ဒီ အေ၊ တဲး အေ ဝီ ပွိုန် ဒီ အိူပ် ဇဝ်ဖြာ။ ကူပ် ဂေဇူ ဇဝ်ဖြာ ဒီ အေ ဒူအီ၊ အန် ဟဲ့ တိုယ် ဇဝ် ယေဆူ အီ မုး ဂွန် ပီ ရွက့် အန်၊ တဲး အန် ချွတ် အေ။ 7 ဒေါ ဟဲ့ ခမ် ဇဝ် ယေဆူ ဒီ ယမ် ကာဒါင် အေ၊ ဂဝ်း ဝဲန် မှာပ် အေ၊ အန် ဟဲ့ ထုတ် လေး အေ တ မှာပ်။ ပါယ် တီ ဇဝ်ဖြာ ဟဲ့ ဂေဇူ ကိူန် အေ။ 8 ဇဝ်ဖြာ မိူဝ် မိုဝ်း အာငျာန် ဘွတ်။ အန် မိူဝ် နပ် တူတ့် လွင် နဝ်း အေ။ ခုဝ်၊ ပီ ဂေဇူ အန် ဟဲ့ ကိူန် ဒီ အေ။ အာဝ် ပွိုန် ကာလာင် ခဲ့ ဒီဟာင် နဝ်း အန်။ 9 ပီ ခြာမ် ဇဝ်ဖြာ ဒီ ဘူင်၊ တဲး န့ လဝ့် နဝ်း အန်၊ ပီ တူ ဒွိုမ် ကာလာင် အန် ဒီ အီ ဟဝ်၊ အန် ဟဲ့ တဲး အေ နပ် ဒေါ တိုယ် အန် ဇဝ် ယေဆူ၊ တဲး အန် ချွတ် အေ။ 10 ပီ ခြာမ် ဇဝ်ဖြာ ဒီ ဘူင် ညှမ် တူတ့်။ ဆေ န့ ဟီ ဇမ် အာခြာဝ် အန်၊ ဇဝ်ဖြာ ဒီ တဲး ဇဝ် ယေဆူ ဝီ အိုပ် တူတ့် ဒွန် မျုဝ်။ ဘော ဒွန် မျုဝ် အီ ကွယ် ဒဲင် ကာဒါယ်၊ ဘော ဒွန် မျုဝ် အီ ကွယ် ခဲင် ဂါင်ဟြာဝ်၊ ဇဝ်ဖြာ ဒီ တဲး အန် အိုပ် တူတ့်။ 11 ဇဝ်ဖြာ မိူဝ် နပ် ဒီ ဘူင် တူတ့် ဒွန် မျုဝ် ပီ ခြာမ် အန် ဒီ ဘူင်။ အန် ဟဲ့ ဟွတ့် တဝ်း ဒီ ရဝ်း ဘော အေ။ ပန် တီ အန် မိူဝ် ဟဲ့ ရဝ်း အေ ဒေါ ညှိုမ် အေ ဇဝ် ယေဆူ။ 12 ဇဝ်ဖြာ ဟဲ့ ရဝ်း ယေ၊ အီ ဟဲ့ ညှိုမ် ဘိုင် ဇဝ် ယေဆူ ဒီ အာတ့်၊ တဲး ယေ ဝီ အိူပ် အာဖုင် ဒင်ခုဝ် အန်။ 13 ဘော ဘေ ဟဲ့ ဟွတ့် ထူမ် ဂြုဝ်း အီ မှာန် အာခါခ်ု။ န့ မုး ဒါရာ ဇဝ်ဖြာ အီ ပဲ ဒီ ချွတ် ဒူအီ၊ တဲး ဂေ ဘဲန် နဝ်း ဒါခိုယ်။ ဘေ ဟဲ့ ဟွတ့် ထူမ်၊ ဘေ မိူဝ် ဟဲ့ ညှိုမ် ဂြုဝ်း ဇဝ်ဖြာ တီ။ ဝါယ် အန် တီ ဇဝ်ဖြာ ဟဲ့ ဝီ ဒွါ နဝ်း ဖွိုမ် အန် ဒီ ဘေ၊ တဲး န့ ဘဲန် ပီ ပီ ဒွိုမ် ဒွါ အန် ကာဒိက် ဆတ်ဇာ။ နဝ်း ဖွိုမ် ဇဝ်ဖြာ ပီ ဒွါ အန် ဒီ ဘေ၊ န့ တဲး ဘေ နပ်၊ ဘေ ဟဲ့ ဘဲန် ဂွန် ဇဝ်ဖြာ။ 14 ကူပ် ဒွါ ဇဝ်ဖြာ နဝ်း ဖွိုမ် အန် ဒီ အေ၊ န့ ပီ အန် ဟဲ့ ဒွါ ဒုဝ် မှာန် ဒီ အေ၊ တဲး အေ ဘော နပ် ဆီချာ၊ အေ ဒီ ပွိုန် တူတ့် ဒွန် မျုဝ် ခါဂုန် ပဲ့ ဟဲ့ တဝ်း ဇဝ်ဖြာ ဒီ ဒွါ။ အန် ဟဲ့ ဒွါ ဒုဝ် မှာန် တီ ဒီ အေ၊ တဲး န့ ကော ဇမ် အာခြာဝ် ဒီ ထုတ် လေး ဇဝ်ဖြာ ဒီ အေ ခဲင် အီ တူ မွှိုမ် တူတ့် ဒွန် မျုဝ်။ ခုဝ် အန် တီ တဲး အေ ဝီ အိူပ် ဇဝ်ဖြာ အီ မိုဝ်း အာဖုင် ဒင်ခုဝ် တာင် ကာဆဝ်။

15 ကူပ် ဟဲ့ ဘူင် ဇဝ်ဖြာ ဇိုဝ် တီ ဒွန် မျုဝ်၊ ဘော အုဝ် ဒါင် ဂုင် ဂေဇူ ဒီ ဇဝ်ဖြာ။ အုဝ် မိူဝ် ဟဲ့ ယိုဝ် လွင် ဟဲ့ ညှိုမ် ဘေ ဇဝ် ယေဆူ။ အုဝ် မိူဝ် ဟဲ့ ယိုဝ် လွင် ရွက့် ဘေ ဒွန် အီ အီ ညှိုမ် ဇဝ် ယေဆူ။ အူ ဆိန့် ဒေါ ယိုဝ် အုဝ် လွင် အန် တီ၊ အုဝ် ဒါင် ဂုင် ဂေဇူ ဒီ ဇဝ်ဖြာ ဆေဆေ။ 16 ဒေါ ဆာခိုဝ် အုဝ် ဒီ ဇဝ်ဖြာ၊ အုဝ် မိူဝ် မှာန့် ဆေဆေ ဒါင် ဘေ။ 17 ဇဝ်ဖြာ အီ မိုဝ်း အာဖုင် ဒင်ခုဝ် တာင်၊ အန် ဟဲ့ ဘဲန် ဂုန့် အေ။ အန် ဘော မုး ဇဝ်ဖြာ ပီ ကြိုပ် ဇဝ် ယေဆူ။ အုဝ် မှာန့် ဒီ ဇဝ်ဖြာ တီ၊ တဲး အန် ဒွါ နဝ်း ဖွိုမ် အန် ဒီ ဘေ။ နဝ်း ဖွိုမ် အန် တီ ဒီ တဲး ဘေ မိုဝ်း အာငျာန် ဘွတ်၊ တဲး န့ လိုဝ်း ဒီ နဝ်း ဘေ လွင် ဇဝ်ဖြာ၊ တဲး ဘေ နပ် ဆီချာ လွင် ဇဝ်ဖြာ။ 18 အုဝ် ဆာခိုဝ်၊ တဲး န့ ဘော လိုဝ်း ဆီချာ ဒီ နဝ်း ဘေ လွင် ပီ လုဝ် ဇဝ်ဖြာ ဘေ နှဝ့် န့ဒဝ့်။ အုဝ် ဆာခိုဝ်၊ တဲး ဘေ ဘော နပ် ခါဂုန် ပီ ဒီ ဒွါ ဇဝ်ဖြာ ဒီ ဘေ ဘော ဒီ ဂေ ဒွန် အီ အီ ညှိုမ် ဇဝ် ယေဆူ။ တဲး ဘေ နပ်၊ န့ ဒီ ကိူန် ခဲ့ မှဝ်။ အုဝ် ဘော ဆာခိုဝ်၊ တဲး ဘေ ဘော နပ် ခဲ့ တာင် အာဖုင် ဒင်ခုဝ် အီ ကွယ် ဒူပ် ခါဂုန် တီ။ 19 အုဝ် ဆာခိုဝ် တဲး န့ လိုဝ်း ဆီချာ လွင် ပွုန် ဇဝ်ဖြာ အီ တာင် လွှိုမ် တူတ့်။ ပွုန် တီ ယီ ကွယ် ခဲင် နဝ်း အေ ဒူအီ အီ ညှိုမ် ဇဝ် ယေဆူ။ အန် နပ် ဒီ စွယ် အေ၊ နပ် ဒီ ဘူင် တူတ့် ဒွန် မျုဝ်။ 20 ပွုန် ဇဝ်ဖြာ တီ ဟဲ့ တဲး ဇဝ် ယေဆူ ဝီ ယိတ့် ဝီ အိမ် ဝါယ် ဟဲ့ ဟွတ့် ယမ် အန်။ ပွုန် တီ မိူဝ် ဟဲ့ တဲး ဇဝ် ယေဆူ ဝီ ဟုဝ့် ဂါင်ဟြာဝ်၊ ဝီ ကွယ် ခူပ် ဇဝ်ဖြာ ဘ့လာက် အာအး အန်။ 21 ဒေါ ကွယ် အန် ဒူင် တီ၊ ဇဝ် ယေဆူ ဝီ အိုပ် တူတ့် ဒွန် မျုဝ် အီ မိုဝ်း ပွုန် ခဲင် ဘ့လေန့်။ န့ ဘော မုး ဒူအီ ဇိုဝ် မှဝ် အာဝ် တဝ်း၊ ဘော မုး အီ ကွယ် ဇာတ် နီ၊ ဇာတ် ဒီ တး၊ ဇဝ် ယေဆူ ဒီ အိုပ် ဒွန် ဇိုဝ် ဒွန် ခြိုဝ်။ ပွုန် အန် ဟဲ့ တာင် လွှိုမ် တူတ့်။ 22 အန် အိုပ် တူတ့်၊ တဲး န့ ပီ အန် ညဲတ့် ဒွန် မျုဝ်၊ တဲး န့ ကွယ် တူတ့် ခြိုမ် ပ့လဝ် အန်။ န့ ဘော မိုဝ်း မာဆေ၊ ဇဝ်ဖြာ ဟဲ့ ဟွတ့် ဒွါ တူတ့် ဒွန် မျုဝ် ဒီ ဇဝ် ယေဆူ တဲး အန် အိုပ်။ ဇဝ်ဖြာ တဲး ဇဝ် ယေဆူ ဘဲန် ဘော ဒါ ကာညာ အီ အိုပ် တူတ့် ဒွန် မျုဝ် ခဲင် ဖိုင် ဇဝ် ယေဆူ။ 23 ဖိုင် ဇဝ် ယေဆူ တီ ပီ ဒုဝ် ဘူင့် ဇဝ် ယေဆူ အီ ဟဲ့ တဲး ဒုဝ် ဘူင့် အန် ဇေ့ဇုင်။ ဇဝ် ယေဆူ ယီ တဲး တူတ့် ဒွန် မျုဝ် အီ ကွယ် ဒွန် ပ့လုဝ့် ဝီ ဇေ့ဇုင်။