အိုယ် ဘေ ဘီနွင်၊ ဆေ န့ ဘော မိုဝ်း အီ ဟဲ့ ကာလိုပ် ဒီ ဘူင် မှာပ်၊ ဘေ အီ ဟဲ့ တဲး နဝ်း ဖွိုမ် ဇဝ်ဖြာ အိုပ် နဝ်း ဘေ၊ ဘေ လုဝ် စွယ် ဒူအီ ဝီ တီ၊ တဲး အန် ဝီ နပ် ဒီ ညှိုမ် ဆီချာ ပီ ခါ အာတ့်။ တဲး ဘေ ကာလာင် ဂြုဝ်း န့စု န့စမ် ဒေါ စွယ် ဘေ ဒီ အန်။ တဲး ဘေ ဆာဒိက်၊ ယုဝ် ဘော ဘေ ဝီ ကာလိုပ် ဒီ ဘူင် မှာပ် ပါယ် တီ။ 2 ဆေ ဘေ မိုဝ်း ဒုက် မိုဝ်း ညှာပ်၊ တဲး ဘေ လာယ် စွယ်။ ဆေ ဘေ ဘူင် ပါယ် တီ၊ ဘေ ဘူင် ဒူပ် ဂြုဝ်း ဇဝ် ယေဆူ။ 3 ဆေ ဒူအီ အူ ဝီ ယီ ထာင်၊ ဒုဝ် အန် ဟဲ့ ခိုက်ခမ်၊ မာလဲ၊ အန် ယီ တူ မိုဝ်း ဒီ ခိုက်ခမ် မာဆေ၊ ဒူအီ ဝီ တီ၊ အန် ကာလုဝ် ဒီ ဒုဝ် ဘြိမ် အန်။ 4 တဲး ဘေ ဒွန် အီ ဆာခိ ဒီ ယွတ် ဂါန် ပီ ဘူင် ဘေ ဝီ မှဝ် ဝီ အန်။ အာဝ် လုဝ် လာယ် ကာဂဝ် ဒီ ဂါန် ပီ ဘူင် အီ ဟဝ်။ ဆေ ဘေ ဘူင် ပါယ် တီ၊ ဘေ ဒီ ဝီ မိုဝ်း နဝ်း တာင် ကူပ် ဂါန် ပီ ဘူင် ဘေ ရာင် အာဆေ ရာင် အန်။ 5 ခုဝ်၊ ဒွန် အီ ဒီ လုဝ် ဘူင် ခဲ့ ပီ လုဝ် ဘူင် အန်။

6 အာဆေ ဟေန် ဂြုဝ်း ဇဝ်ဖြာ၊ အန် လုဝ် ဝီ ကာဆာင် ကြုဝ် အီ မွှိုမ် ခဲ့ ပီ မိုဝ်း အန် ဒွန် မျုဝ်၊ ဒွါ ဒီ ဒါ ဆာရာ အီ မာနုဝ် အန်။

7 ကွဲ့ တဲး အာဆေ ကာလုဝ် ဘေ။ ခုဝ်၊ ဇဝ်ဖြာ တူ ခမ် အီ လုက်တာယ် အန်။ အေ ဒူအီ၊ အေ ဘြတ် ဆီမာ မာဆေ၊ အေ ဒီ ဝီ ပွိုန် ဒီ ဆုဝ့် ပီ ဘြတ် အေ တီ။ 8 ဒူအီ အီ ဘြတ် ဆီမာ ငှုဝ်၊ ဆေ အန် ပီ ဒူအီ အီ ဘူင် ပီ အိုင် နဝ်း ဘြိမ် အန် အီ နပ် ဒီ ဘူင် မှာပ် ဆေဆေ၊ အန် မိူဝ် ဒီ ဝီ ပွိုန် ဒီ ဆုဝ့် မီ မျုဝ် အီ နပ် ဒီ ကာပျာတ့် လိုဝ်။ ဒူအီ အီ ဘြတ် ဆီမာ ငှုဝ် တီ၊ ဆေ အန် ယီ ပီ ဒူအီ အီ ဘူင် ပီ အိုင် နဝ်း ဖွိုမ် ဇဝ်ဖြာ၊ အန် မိူဝ် ဒီ ဝီ ပွိုန် အာဆာက် ကာမာယ် ကူပ် ဒူပ် အန် နဝ်း ဖွိုမ် ဇဝ်ဖြာ။ 9 ပါယ် တီ၊ ကွဲ့ တဲး အေ နုန်၊ ကွဲ့ တဲး အေ ဒီလှး။ တဲး အေ ဂျုဝ်ဂျာ ဒီ ဘူင် နာ ဘွတ် နာ မွှိုမ် ဆေဆေ။ ဆေ အေ ယီ တူ နုန် ဒီ ဘူင် နာ မွှိုမ်၊ ဟီ ဇမ် အာခြာဝ် အန်၊ အေ ဒီ ပွိုန် အာဂျိုဝ် အန် အီ ပီ အေ ဆုဝ့် ငှုဝ်။ 10 ခုဝ်၊ ဒေါ ဆီ ပွိုန် အေ ဒီ ဘူင်၊ တဲး အေ ဘူင် နာ မွှိုမ် ဒီ ဒူအီ ဒွန် အီ။ ဒဲင် တီ၊ တဲး အေ စွယ် ဂေ ဘီနွင် အီ ဟဲ့ ညှိုမ် ဇဝ် ယေဆူ အာတ့် စွယ် အေ အီ ဟဝ်။

11 တဲး ဘေ ယွတ် ပဲ့ ပီ ဒဲမ် အုဝ် နီ။ ဒုဝ် ပဲ့ တီ ဟဲ့ တာင် ကာဆဝ် ကူပ် ဟဲ့ ဒဲမ် အုဝ် တာ ဒဲ အုဝ်။

12 ဂေ အီ ဆီ တဲး အီ ဟဝ် အိူပ် ဂေ တွိုန်၊ ဂေ ဆီ ခါနှာပ် ဘေ၊ တဲး ဘေ ဆွာ့ ဝဲန် ဟုန် လခါနာ အီမာယ်။ ဂေ တဝ်း ပါယ် တီ၊ ခုဝ်၊ ဂေ တူ ဆီ ခမ် ဒုက် ကူပ် ကာလာင် ဂေ လွင် ဇဝ် ယေဆူ ဟဲ့ ခမ် ဒီ ယမ် ဒဲင် ရွင့် ကာဝဲ့။ 13 ဂေ ဒူအီ အီ ဟဲ့ ဟွတ့် ဆွာ့ ဝဲန် ဟုန် လခါနာ အီမာယ် တီ၊ ဘော ဂေ တူ ဘူင် ဒူပ် ဒါရာ။ ဂေ ယီ ဆီ တဲး ဘေ ဆွာ့ ဝဲန် ဟုန် လခါနာ အီမာယ်၊ တဲး ဂေ ပွိုန် ဒီ ပီဖုင် ဂေ ကူပ် ဟဲ့ ဘူင် ဘေ ဒီ ဒုဝ် ဘေ ခဲ့ ပီ စ်ု ဒါရာ ယူဒါ။ 14 အီ မုး အုဝ်၊ န့ မိုဝ်း မီ အူ မျုဝ် အီ တဲး အုဝ် ပီဖုင် နဝ်း အုဝ်။ အုဝ် ပွိုန် ဒီ ကာလာင် လွင် ဇဝ် ယေဆူ အီ ဟဲ့ ခမ် ဒီ ယမ် ဒဲင် ရွင့် ကာဝဲ့။ လွင် အန် တီ ဟဲ့ တဲး အုဝ် ပွိုန် ဒီ ပီဖုင် အုဝ်။ ကူပ် ညှိုမ် အုဝ် ပါယ် တီ၊ အီ ကွယ် ဒဲင် ကာဒါယ် နီ ဒွန် မျုဝ် အာဝ် ဟူ မိုဝ်း အာရေ မာဆေ ဒီ အုဝ်။ န့ ပီ ဟဲ့ ဟွတ့် ဟြာယ်၊ ဟဲ့ ဟွတ့် ကာဂဝ်း ဒီ အုဝ်။ အုဝ် မိူဝ် ပီ ဒူအီ အီ ဟဲ့ ယမ် အီ ဟဲ့ ဟွတ့် ကာဂဝ်း ဒီ ဒွန် မျုဝ် အီ ကွယ် ဒဲင် ကာဒါယ် နီ။ 15 ခုဝ်၊ ပီ ဘော ခမ် ဒီ ဆွာ့ ဝဲန် ဟုန် လခါနာ အီမာယ်၊ ပီ ဆ ခမ် မိူဝ်၊ အာရေ တူ တာင် မာဆေ။ ဆေ အေ ဘိုင် ဇဝ် ယေဆူ၊ တဲး အန် ဒွါ အာဆာက် ကာမာယ် ဒီ အေ၊ အာတီ ဟဲ့ အာရေ တာင်။ 16 ပါယ် တီ၊ ဂေ ဒွန် အီ အီ ဘူင် ဒူပ် ပီ တဝ်း အုဝ် နီ၊ တဲး အန် ဇဝ် ဂေဇူ ဂေ ဘော ဒွါ နဝ်း ဂတ် ဂျီတ် ဒီ ဂေ ဒွန် အီ။ ဂေ ဒူအီ ဇိုဝ် တီ၊ ဂေ မုး ဒူအီ အီဆာရေလ အာခါခ်ု အီ မုး ဒူအီ အာမျုဝ် ဇဝ်ဖြာ။

17 ပုင် အာတိုဝ် နီ ဟာဝ်၊ ကွဲ့ တဲး န့ ဆီ မိုဝ်း အာဆေ အီ ဒွါ ဒုက် ဒီ အုဝ်။ ခုဝ်၊ အုဝ် ဟဲ့ မိုဝ်း ပ့လာ ဒီ ဒုဝ် ဘူင့် အုဝ် အီ ဘျ၊ အုဝ် ဟဲ့ ခမ် ဒုက် ဘဲန် မျုဝ် ဘဲန် မျုဝ် ကူပ် ဒူပ် အုဝ် ဇဝ် ယေဆူ။

18 အိုယ် ဘေ ဘီနွင်၊ တဲး ဇဝ် ယေဆူ ဂေဇူ ဘေ ဒွန် အီ။ ဆာတူ။