အုဝ် အာပေါလူ မုး ဒူအီ ပီ ရဝ်း ပီ တိုယ် ဇဝ် ယေဆူ။ ဘော ဇဝ်ဖြာ ဟဲ့ အိုင် ဒီ ရဝ်း အုဝ်။ အုဝ် ဟဲ့ ဒဲမ် ပဲ့ နီ၊ တိုယ် ဒီ ဘေ ဒူအီ ခဲင် ဖိုင် ဇဝ် ယေဆူ အီ မုး ဒူအီ ပီ အိုပ် ဇဝ်ဖြာ အီ ကွယ် ခဲင် မိူင် ခုဝ်ရိန်ထူ။ အုဝ် ဒဲမ် ဘော ဒီ ဂေ ဒူအီ အီ ဆီငါ ဘွတ်၊ အီ ညှိုမ် ဇဝ် ယေဆူ အီ ကွယ် ခဲင် အိူင် အာခါယာ။ ဘော အုဝ် ဘော အာထီမုဝ်ထေ အီ မုး ဘီနွင် အေ၊ 2 ယာယ် ဆီ တဲး ဇဝ်ဖြာ ဘော ဇဝ် ယေဆူ ဂေဇူ ဘေ၊ ဒွါ ဘော နဝ်း ဂတ် ဂျီတ် ဒီ ဘေ။

3 အေ ဒါင် ဂုင် ဂေဇူ ဒီ ဇဝ်ဖြာ အီ မုး ဂုန့် ဇဝ် ယေဆူ။ န့ မိုဝ်း မီ အန် ဇဝ် အီ နပ် ဒီ ကာဝေ၊ နပ် ဒီ လှဝ် နဝ်း အီ။ 4 အေ ဘော ကာဒုး ဒုက် ညှာပ် မျုဝ် မှဝ်၊ အန် ဇဝ် ဒီ လှဝ် နဝ်း အေ၊ တဲး န့ ဝီ ဒါခိုယ်။ ဇဝ်ဖြာ လှဝ် နဝ်း အေ ပါယ် တီ၊ တဲး အေ ဝီ ဒိုဝ်း ဂြုဝ်း တီ၊ ဝီ ကာလာင် ဒီ အီ ဟဝ်၊ တဲး န့ လှဝ် ဘော နဝ်း ဂေ။ 5 ခုဝ်၊ အေ ဒူအီ အီ ဒူပ် ဇဝ် ယေဆူ၊ အေ ဘော လုဝ် ခမ် ဒုက် ကိူန် ဘဲန် မျုဝ် ဘဲန် မျုဝ် ပီ ဇဝ် ယေဆူ ဟဲ့ ခမ်။ ပါယ် တီ၊ အန် ဇဝ် ပီ ဒီ ဝီ တဲး ဂျာမ်ဆာ ကိူန်၊ တဲး အေ ကော ပွိုန် ဒီ ဝီ ဒွါ ဘော ဒီ အီ ဟဝ်။ 6 ယေ ဒူအီ အီ ဘူင် ဂါန် ဇဝ်ဖြာ၊ ယေ ကာဒုး ဒုက် အီ ညှာပ် ကာဆဝ်၊ တဲး န့ တဲး ဘေ ဂျာမ်ဆာ၊ တဲး န့ ချွတ် ဘေ။ ဆေ ဇဝ်ဖြာ တဲး နဝ်း ယေ ဝီ ဒါခိုယ်၊ န့ တဲး ဘော နဝ်း ဘေ ဝီ ဒါခိုယ်။ ပါယ် တီ၊ ဘေ ဒီ ဘော ပဲ ဒီ အူတ်၊ ပဲ ဒီ ယိူန် ဘဲန် မျုဝ် ဘဲန် မျုဝ် ကူပ် ဒုက် ပဲ့ ဟဲ့ ကာဒုး ယေ။ ဘော ဘေ ဒီ လုဝ် ခမ် ပီ ယေ။

7 ခုဝ်၊ ယေ တူ မိုဝ်း နဝ်း မှဲ ကူပ် ဘေ။ ယေ ဟဲ့ နပ်၊ ကူပ် ဟဲ့ ခမ် ဘေ ဒုက် ကိူန် ဒူပ် ယေ၊ ဘေ မိူဝ် ပီ ဒီ ဝီ ပွိုန် ကိူန် ဂျာမ်ဆာ ပီ ဒွါ ဇဝ်ဖြာ ဒူပ် ယေ။

8 အိုယ် ဘေ ဘီနွင်၊ ယေ ဆီ တဲး ဘေ နပ်၊ ဒုက် ပဲ့ ဟဲ့ ခမ် ယေ ခဲင် အိူင် အာဆီယာ၊ န့ မုး ဒုက် တာင် ကာဆဝ်။ ယေ ကော ဟူ ပွိုန် ခမ်။ ယေ ဘော ထာင် အာဝ် ဟူ လွတ် ယမ်။ 9 ယေ ဘော ထာင် ဇဝ်ဖြာ ဟဲ့ ဟွတ့် ဆုင်ဖျာတ် ဒီ တဲး ယေ ယမ်။ ဒုက် ပီ ကာဒုး ယေ တီ၊ န့ ဘော မာနုဝ် တဲး ယေ နပ်၊ ကွဲ့ တဲး ယေ ဘိုင် ဒုဝ် ဘြိမ် ယေ၊ တဲး ယေ ဘိုင် မီ ဇဝ်ဖြာ အီ နပ် ဒီ တဲး ဒူအီ ဝီ ယိတ့် ဝီ အိမ်။ 10 ခုဝ်၊ အန် ဇဝ် ဟဲ့ ချွတ် တဲး ယေ လွတ် ယမ်။ ဘော နာ အာတ့် နီ ဟာဝ်၊ ယေ ဘော ညှိုမ်၊ အန် ဇဝ် ဒီ ချွတ် ယေ ပေါ မ့ပွါ။ 11 ပါယ် တီ၊ တဲး ဘေ ဆာခိုဝ် ဒါင် ယေ။ ဟဲ့ ဟွတ့် ဇဝ်ဖြာ ဒီ ဘော ဂေဇူ ယေ ဘော စွယ် ယေ၊ တဲး န့ ဝီ မိုဝ်း ဒူအီ ကိူန် အီ ဒါင် ဂုင် ဂေဇူ ဒီ ဇဝ်ဖြာ ကူပ် ဟဲ့ ထူမ် အန် ပီ ဆာခိုဝ် ဘေ။

12 ဘော အုဝ် ဘော ဂိုက် အုဝ်၊ ယေ ယီ ပီဖုင် ယေ ပါယ် နီ။ ယေ တူ တဝ်း၊ ယေ မိုဝ်း မှာပ်။ ပီ ဘူင် ယေ ဒီ ဒူအီ ဒဲင် ကာဒါယ် နီ ဘော ပီ ဘူင် ယေ ဒီ ဘေ၊ န့ ဒူပ် တူတ့် နဝ်း ဘွတ် ဘော နဝ်း ဆိူဝ် နဝ်း မှာန် ပီ ဒွါ ဇဝ်ဖြာ ဒီ ယေ။ ယေ တူ ဘိုင် အာငျာန် ဒူအီ ဒဲင် ကာဒါယ် နီ။ ယေ ယီ ဘိုင် ဂုင် ဂေဇူ ဇဝ်ဖြာ။ 13 ပီ ဒဲမ် ယေ ဒီ ဘေ၊ ယေ ဒဲမ် ဆိူဝ် ဆိူဝ် ပီ ပဲ့ ဟဲ့ တိး ဘေ နီ၊ တဲး န့ ကာလှုး ဒီ နဝ်း ဘေ။ အုဝ် ဘော ညှိုမ် ပီ ဒီ ဒဲမ် ယေ ဒွန် မျုဝ်၊ န့ ဒီ ကာလှုး တူတ့် ဒီ နဝ်း ဘေ။ 14 မင် မျုဝ် မင် မျုဝ် ဟဲ့ ဟွတ့် ကာလှုး ဒီ နဝ်း ဘေ။ ပါယ် တီ၊ ဘော ဒွန် မျုဝ် ဒီ ဘော ကာလှုး ဒီ နဝ်း ဘေ။ ခုဝ်၊ ပန် ဒီ ဝီ တး ဇဝ် ယေဆူ၊ ဘေ ဒီ ဘော ပွိုန် ဒီ ပီဖုင် ဘေ ကူပ် ယေ။ ယေ မိူဝ် ဒီ ပွိုန် ဒီ ပီဖုင် ယေ ကူပ် ဘေ ပန် ဒီ ဇမ် ဆီငဲ အန် တီ။

15 ကူပ် နပ် ဆီချာ အုဝ် လွင် အန် တီ၊ အုဝ် ဟဲ့ ဒွိုမ် ခြာမ် ဒီ တး စ်ု ဘေ၊ တဲး ဘေ ပွိုန် အာဂျိုဝ် အာ ဇေန့်။ 16 ခုဝ်၊ ဒေါ ဟာဝ် ယေ ဒီ အိူင် မာခေဒူန်၊ ဘော ဒေါ ဝီ ဝေန့် ယေ၊ အုဝ် ဟဲ့ ခြာမ် ဒီ ဝဝ့် ဒူင် ကွယ် ဘေ၊ ယုဝ် ဘေ ဘော ပွိုန် စွယ် ပွိုန် ဂမ် ခြာဝ် န့တေန့်၊ တဲး အုဝ် ဝီ ဇမ် အိူင် ယူဒါ။ 17 ဒေါ တူ ဝီ တး အုဝ် ဘေ ထာင်၊ ပဲ့ ဟဲ့ တဝ်း အုဝ် ဒီ တး စ်ု ဘေ တီ၊ န့ မုး ဂြုဝ်း ပီယေန့်။ ဘေ ဘော ထာင် အုဝ် နပ် တဝ်း၊ “ဟဲ့ မုး၊ ဟဲ့ မုး၊” ပီ ဝီ ကာပ့လု နဝ်း တဝ်း၊ “အာဝ် မုး၊ အာဝ် မှာန်။”

18 အာဝ် မုး ပါယ် တီ။ ဇဝ်ဖြာ ဟဲ့ မိုဝ်း နဝ်း ဆိူဝ် နဝ်း မှာန်။ ပါယ် တီ ဘော ဂြုဝ်း ပီ တဝ်း အုဝ်၊ “ဟဲ့ မူး” တွိုန်၊ အုဝ် တူ ဝီ ဘျွင် တဝ်း၊ “အာဝ် မုး။” 19 ခုဝ်၊ အာဆီလာတ် ဘော အာထီမုဝ်ထေ ဘော အုဝ် ဟဲ့ ဒွိုမ် ကာလာင် ဒီ ဘေ လွင် ဇဝ် ယေဆူ အီ မုး ဂွန် ဇဝ်ဖြာ။ ဘော ဇဝ် ယေဆူ တူ တဝ်း၊ “ဟဲ့ မှာန်၊” ပီ ဝီ ကာဝိဝ် ဂြုဝ်း တဝ်း၊ “အာဝ် မှာန်။” ဘူင့် မှာန် အန်၊ အန် ဇဝ် တဝ်း မီ “ဟဲ့ မှာန်။” 20 ခုဝ်၊ ခဲ့ ကွယ် ဂြုဝ်း ကာဒိက် ဆတ်ဇာ ပီ ဒွါ ဇဝ်ဖြာ၊ အန် ဇဝ် ဘော တဝ်း တူတ့်၊ “ဟဲ့ မှာန် ဟဲ့ မုး။” န့ မုး ဇဝ် ယေဆူ အီ ဟဲ့ တဲး န့ ဘဲန် တူတ့် ဒွန် မျုဝ် ပဲ့ ဟဲ့ ဒွိုမ် ကာလာင် ဇဝ်ဖြာ။ ကူပ် န့ ပါယ် တီ၊ ဘော အေ ဒူအီ အီ ဘိုင် ဇဝ် ယေဆူ၊ အေ တဝ်း၊ “ဟဲ့ မုး ဟဲ့ မှာန်၊” တဲး န့ လိုဝ်း အာဖုင် ဒင်ခုဝ် ဇဝ်ဖြာ ဒီ အီ။ 21 န့ ယီ မုး ဇဝ်ဖြာ အီ ဟဲ့ ရဝ်း ဘော ဘေ ဘော ယေ၊ တဲး အေ ညှိုမ် ဆီချာ ဇဝ် ယေဆူ။ 22 န့ ပီ အန် ဇဝ် ဟဲ့ ဒွက် ဇိုမ် အန် ဒီ အေ၊ ဟဲ့ မှာယ် အုန် အေ၊ တဲး အေ ဘဲန် ဒူအီ ပီ အိုပ် အန်။ အန် ဟဲ့ တဲး နဝ်း ဖွိုမ် ဇဝ်ဖြာ ကွယ် ခဲင် နဝ်း အေ၊ တဲး န့ ပီ ဒုဝ် မှာန် အန် အီ တဲး အေ နပ် ဆီချာ လွင် ပီ တဝ်း ဇဝ်ဖြာ ဒီ ဒွါ၊ အန် ဒီ ဘော ဒွါ။

23 ဇဝ်ဖြာ ဟဲ့ နပ် နဝ်း အုဝ်၊ အုဝ် ပီ ဘော တဝ်း ဒီ တး စ်ု ဘေ၊ အုဝ် ယီ တူ တး။ ခုဝ်၊ အုဝ် ဟဲ့ ကာဝေ ဘေ။

24 ယေ တူ မုး ဒူအီ အီ ခါနှာပ် တဲး ဘေ ညှိုမ် ဆီချာ။ ယေ ယီ ဘူင် ဂါန် ရိုမ် ဒူပ် ဘေ၊ တဲး နဝ်း ဘေ ဒါခိုယ်။ ခုဝ်၊ န့ မုး နဝ်း ညှိုမ် ဘေ အီ တဲး နဝ်း ဘေ မန် ဆေဆေ။