အုဝ် အာပေါလူ အီ မုး ဒူအီ ပီ ရဝ်း ပီ တိုယ် ဇဝ် ယေဆူ၊ အုဝ် ဒဲမ် ပဲ့ နီ ဒီ ဘေ ဒူအီ ခဲင် ဖိုင် ဇဝ် ယေဆူ အီ ကွယ် ခဲင် အိူင် ဂါလာထီ။ အာဝ် မုး ဒူအီ အီ ဟဲ့ ရဝ်း ဟဲ့ တိုယ် အုဝ်။ န့ မုး ဇဝ် ယေဆူ ဘော ဇဝ်ဖြာ အီ မုး ဂုန့် ဇဝ် ယေဆူ၊ အီ ဟဲ့ တဲး ဇဝ် ယေဆူ ဝီ ယိတ့် ဝီ အိမ် တွိုန်၊ ဂါယ် ဟဲ့ တဲး အုဝ် ဘဲန် ဒူအီ ပီ ရဝ်း ပီ တိုယ် ဇဝ် ယေဆူ။ 2 ဘော ဂေ ဘီနွင် အီ ကွယ် ရိုမ် ဒူပ် အုဝ် ဒွန် အီ၊ ဂေ ဘော တိုယ် ဂြုဝ်း နမ်လှုဝ်း ဒီ ဘေ ဒူပ် အုဝ်။

3 ယေ မှာန့် ဒီ ဇဝ်ဖြာ ဘော ဒီ ဇဝ် ယေဆူ အီ မုး ဒါ ကာညာ အီ အိုပ် အေ၊ တဲး ဂါယ် ဂေဇူ ဘေ ဘော ဒွါ နဝ်း ဂတ် ဂျီတ် ဒီ ဘေ။ 4 ဇဝ် ယေဆူ ဟဲ့ ခမ် ဒီ ယမ် ကာဒါင် မှာပ် အေ။ အန် ဟဲ့ ချွတ် အေ၊ တဲး အေ ပွုန် ဇာတ် အီ ဟာယ် အီ မိူက် နီ။ ပဲ့ ဟဲ့ ဘူင် အန် တီ၊ န့ ဟဲ့ လဝ့် နဝ်း ဇဝ်ဖြာ အီ မုး ဂုန့် ဇဝ် ယေဆူ အီ မုး ဒါ ကာညာ အေ။ 5 အေ အိူပ် မျုက် ဇဝ်ဖြာ တီ၊ တဲး အာဖုင် ဒင်ခုဝ် အန် တာင် ဆေဆေ။ ဆာတူ။

6 အုဝ် ဟဲ့ အာမ် ကာဆဝ် နဝ်း ဘေ၊ ဘေ ဆော နာယ် ဒီ ပီခြန် ဘေ ဒီ ဝဲန် အန် ဇဝ် အီ ဟဲ့ ဒဲ့ ဘေ တး ဒူပ် အန်။ ဘေ ဟဲ့ ဝဲန် ဘော ပီ ဂေဇူ ဇဝ် ယေဆူ၊ ဟဲ့ ဝီ ဟာဝ် ထူမ် ဂြုဝ်း ပီ ကာလာင် အီ ဟဝ် အီ တဝ်း၊ ဟဲ့ မုး ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ် ပေါ အူ မျုဝ်။ 7 န့ ယီ တူ မုး ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ်။ မာလဲ၊ န့ မိုဝ်း ဒူအီ မင် အီ၊ ဂေ ဘူင် တဲး န့ ကာဝှ်ု ကာဝျှီန် ခဲင် နဝ်း ဘေ။ ဂေ ဟဲ့ ဘျွင် ဟဲ့ ကာဘ့လျီ့ ဂြုဝ်း ဇဝ်ဖြာ အီ ကာလာင် လွင် ဇဝ် ယေဆူ အီ တဲး နဝ်း ဒူအီ ဒါခိုယ်။ 8 အုဝ် ယီ တဝ်း၊ န့ ပီ ဘော မုး ယေ၊ ပီ ဘော မုး အာမူ အာမာတ် ဇဝ်ဖြာ အီ တး ခဲင် ဂါင်ဟြာဝ် လူင်၊ ဆေ န့ မိုဝ်း အီ တး ကာလာင် ဂြုဝ်း၊ တဝ်း န့ မုး ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ်၊ ဆေ န့ ယီ လာယ် ဘ့လိူင် ဒီ ဂြုဝ်း ဇဝ်ဖြာ ပဲ့ ဟဲ့ ဒွိုမ် ထူမ် ဘေ တွိုန်၊ ဒူအီ ဝီ တီ လုဝ် ခမ် မှာပ် အန်၊ စုဝ်း ကာလုဝ့် ငါရာယ်။ 9 ပဲ့ ဟဲ့ ဒွိုမ် ကာလာင် အုဝ် အာတ့် နီ၊ အုဝ် ဝီ ကာလာင် ဒီ ဘေ ပေါ အူ ဇေန့်။ ဒဲင် ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ်၊ အီ မုး ဂြုဝ်း ပဲ့ ဟဲ့ ညှိုမ် ဘေ တွိုန်၊ ဆေ အီ ဟဝ် ဝီ တး ကာလာင် ဂြုဝ်း ပေါ အူ မျုဝ်၊ ဘော တဝ်း န့ မုး ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ်၊ တဲး ဒူအီ ဝီ တီ ခမ် မှာပ် အန်၊ တဲး အန် စုဝ်း ကာလုဝ့် ငါရာယ်။

10 အုဝ် တူ ကာလာင် ဂြုဝ်း တီ ဒီ ဘေ ကူပ် ဆီ တဲး အုဝ် ဒူအီ အိူပ် အုဝ်။ အုဝ် မိူဝ် တူ ကာလာင် ဂြုဝ်း တီ၊ တဲး ဇဝ်ဖြာ အိူပ် အုဝ်။ ဆေ အုဝ် ယီ ကာလာင် ဒူပ် ပီ အိုင် ဒူအီ၊ အုဝ် တူ ကာအာပ် ဘဲန် ဒဲစေန့် ဇဝ် ယေဆူ။

11 အိုယ် ဘေ ဘီနွင်၊ အုဝ် ဆီ တဲး ဘေ နပ် ဆီချာ ဂြုဝ်း ဇဝ်ဖြာ ပဲ့ ဟဲ့ ကာလာင် အုဝ် ဒီ ဘေ၊ အီ တဲး နဝ်း ဒူအီ ဒါခိုယ်၊ န့ တူ မုး ဂြုဝ်း ဒူအီ။ 12 အုဝ် မိူဝ် တူ ဒွိုမ် ဟေန် ဒီ အာဆေ။ န့ မိူဝ် တူ မိုဝ်း အာဆေ အီ ဟဲ့ မာနုဝ် အုဝ် လွင် အန် တီ။ န့ မုး ဂြုဝ်း ပီ ဘျ ဇဝ် ယေဆူ ဒီ အုဝ်။

13 ဘေ ဟဲ့ ဟွတ့် နပ် ပီ ပါယ် အုဝ် အာတ့် နီ ဒေါ ဒူပ် အုဝ် ဟိတ် ဒူအီ အာမျုဝ် ယူဒါ။ ဘေ မိူဝ် ဟဲ့ နပ် လွင် ဟဲ့ ခြာမ် အုဝ် ဒီ ခါနှာပ် ကာဆဝ် ဂေ ဒူအီ ခဲင် ဖိုင် ဇဝ် ယေဆူ အီ ညှိုမ် ဆီချာ ဇဝ်ဖြာ။ အုဝ် ဟဲ့ ဆီ ပျာတ့် ဝဲန် တူတ့် ဂေ။ 14 အုဝ် ဟဲ့ ဒူပ် ဆီချာ ဟိတ် ဒူအီ အာယူဒါ။ အုဝ် ဘော ဂျုဝ်ဂျာ ဒီ ဒူပ် ဟိတ် ဂေ ဂုန့် ဒင် ယေ။ ပဲ့ ဟဲ့ ဘူင် အုဝ် တီ၊ န့ ဟဲ့ လွှိုမ် ပဲ့ ဟဲ့ ဘူင် အီ ဟဝ် အီ မုး ဒူအီ ဘာန် အုဝ်၊ ဒူအီ အာမျုဝ် အုဝ်။ 15 မာလဲ၊ ဇဝ်ဖြာ ဟဲ့ ရဝ်း အုဝ် ဆိန့် ဒေါ ကွယ် အုဝ် ခဲင် ဝတ့် မာ အုဝ်။ န့ ဘော မုး ဂေဇူ ဇဝ်ဖြာ အီ ဟဲ့ ဒဲ့ အုဝ် တဲး အုဝ် ဘူင် ဂါန် အန်။ 16 အန် မိူဝ် ဟဲ့ တဲး အုဝ် ယိုဝ် ဂွန် အန်၊ တဲး အုဝ် ဝီ ပွိုန် ဒီ ကာလာင် လွင် အန် တီ ဒီ ဂေ ဒူအီ အာမျုဝ် ဟဝ် အီ တူ နပ် ဇဝ်ဖြာ။ ဒေါ အန် တီ အုဝ် တူ ဆင်ချာင် ဒီ အာဆေ။ 17 အုဝ် မိူဝ် တူ ဟာဝ် ဒီ မိူင် ယေရူဆာလဲမ်၊ တဲး အုဝ် ကာလာင် ဒီ ဂေ ဒူအီ ပဲ့ ဟဲ့ ရဝ်း အန် ဇဝ် အာတ့် ရဝ်း အန် ဒီ အုဝ်။ အုဝ် ယီ ဝီ ဟာဝ် ခဲင် အိူင် အာရာပ်၊ ဝီ ဟာဝ် ဇမ် ဒီ မိူင် ဒါမာခူ။

18 ဝါယ် အန် တီ ကော နုဝ့် အူယ် ဆီနမ်၊ အုဝ် ကော ဝီ ဟာဝ် ဒီ မိူင် ယေရူဆာလဲမ်၊ တဲး အုဝ် လာယ် ဒွိုမ် ဒီ အာပေတာရူ။ အုဝ် ဘော ကွယ် ဒူပ် အန် ဂိုဝ် ဒီ ဖန် ဆီငဲ။ 19 အုဝ် ဘော ယိုဝ် အာယာကူပ် အီ မုး ဝါ ဇဝ် ယေဆူ တွိုန်။ ဒဲင် တီ အုဝ် တူ ကာတုန့် ဒူအီ ပီ ရဝ်း ပီ တိုယ် ဇဝ် ယေဆူ ခေါ အူ ဝီ။ 20 လွင် ပီ ဒဲမ် အုဝ် နီ၊ ဘော ဇဝ်ဖြာ ဟဲ့ နပ်၊ အုဝ် တူ ကာလုဝ်။ 21 ဝါယ် အန် တီ အုဝ် ဘော ဝီ ဟာဝ် ခဲင် အိူင် ဆူရီ ဘော ခဲင် အိူင် ခီလီခီ။ 22 ဒေါ အန် တီ ဒူအီ ခဲင် ဖိုင် ဇဝ် ယေဆူ အီ ကွယ် ခဲင် အိူင် ယူဒါ၊ ဂေ ညှမ် ဒွိုမ် ယိုဝ် အုဝ်။ 23 ဂေ ဒွိုမ် ယိုဝ် မီ အီ တဝ်း၊ “ဒူအီ အီ ဟဲ့ ဒွိုမ် ဒွါ ဒုက် ဒီ ယေ တွိုန်၊ ဒေါ တီ နီ အန် ဟဲ့ ဝီ ကာလာင် ဂြုဝ်း လွင် လုဝ် ညှိုမ် ဇဝ် ယေဆူ။ ဒူအီ အီ ညှိုမ် လွင် အန် တီ၊ အန် ဟဲ့ ဒွိုမ် ခြာမ် ဒီ ပျာတ့် ဝဲန် တူတ့် ဂေ။” 24 ခုဝ် အန် တီ ဂေ အိူပ် ဇဝ်ဖြာ ကူပ် အုဝ်။