ဟဲ့ မုး အူယ် ဇေန့် ခါ နီ၊ အုဝ် ဒီ တး စ်ု ဘေ။ ခဲင် ဘပ် ဇဝ်ဖြာ ဟဲ့ ဒဲမ် တဝ်း၊ “ဆေ အေ ဒီ ဖျာက် အီ ဟဝ်၊ န့ လုဝ် မိုဝ်း အာ အူယ် ဝီ အီ ဘဲန် ဆက်ဆေ၊ အီ ကာလာင် အူ မျုဝ် လွင် မှာပ် အန်။” 2 ဒေါ တး အုဝ် ဒူင် ကွယ် ဘေ အာတ့် နီ၊ အုဝ် ဟဲ့ ဟွတ့် ဒမ် ဆာဒိက် ဒီ ဘေ။ ဒေါ တီ နီ၊ ဒေါ ဆီ ကွယ် တူင့် အုဝ် ဒီ ဘေ၊ အုဝ် ဒီ ဝီ ကာလာင် ပေါ အူ ဇေန့်၊ ဆေ အုဝ် ဟီ တး ဇမ် ဒူင် ကွယ် ဘေ ခါ နီ၊ ဘော ဂေ အီ ဟဲ့ ဘူင် မှာပ် အာတ့် နီ၊ ဘော ဂေ အီ ဟဲ့ လုတ့် ဒွန် အီ၊ အာဝ် မိုဝ်း အာဆေ အီ လွတ် ခမ် မှာပ် အန်။ 3 အုဝ် ဒီ ဘူင် ပါယ် တီ ကူပ် တူ ညှိုမ် ဘေ အုဝ် မိုဝ်း ပွုန် ဇဝ် ယေဆူ။ အန် ဇဝ် တူ ဒီလှး၊ အန် ဒီ ဘူင် ဒီ ဘေ တဲး ဘေ နပ် ခဲ့ တာင် ပွုန် အန်။ 4 ဇဝ် ယေဆူ ပီ ဘော ဟဲ့ ဒီလှး ဟဲ့ ခမ် ဒီ ယမ် ဒဲင် ရွင့် ကာဝဲ့ မိူဝ်၊ အန် ဟဲ့ ဝီ ယိတ့် ဝီ အိမ် ကူပ် ပွုန် ဇဝ်ဖြာ။ ယေ မိူဝ် ဟဲ့ ဒီလှး ပီ ဇဝ် ယေဆူ တီ။ မာလဲ၊ ဒေါ တီ နီ၊ ဇဝ်ဖြာ ဟဲ့ တဲး ပွုန် အန် ဒီ ယေ၊ တဲး ယေ ပွိုန် ဒီ ကွယ် ရိုမ် ဒူပ် ဇဝ် ယေဆူ၊ တဲး ယေ ပွိုန် ဒီ စွယ် ဘေ။

5 တဲး ဘေ ဝီ ဇေန့်ဇာ လွင် အာဆာက် ဘေ၊ တဲး ဘေ ဝီ ဇဲတ် ဒီ ယွတ် နဝ်း ဘေ၊ ယုဝ် ဘေ ဟဲ့ ညှိုမ် ဆီချာ။ ဘေ ဟဲ့ နပ်၊ ဇဝ် ယေဆူ ဟဲ့ ဟွတ့် ကွယ် ခဲင် နဝ်း ဘေ။ ဆေ ဘေ တူ နပ် လွင် အန် ပါယ် တီ၊ ဘေ တူ ညှိုမ် ဆီချာ။ 6 ယေ ယီ ထာင် ဘေ ဟဲ့ နပ် လွင် ယေ၊ ယေ ဟဲ့ ညှိုမ် ဆီချာ။ 7 ယေ ဘော ဆာခိုဝ် ဒီ ဇဝ်ဖြာ၊ ကွဲ့ တဲး ဘေ ဘူင် ကာလိုပ်။ ယေ တူ ဆာခိုဝ်၊ တဲး န့ လိုဝ်း ဒီ အီ လွင် ဟဲ့ ညှိုမ် ဆီချာ ယေ။ ဆာရေ ယေ ပီ ဘော ဟဲ့ လိုဝ် မိူဝ်၊ ယေ ဆီ တဲး ဘေ ဘူင် မီ နာ မုး နာ မှာန်။ 8 ခုဝ်၊ အေ တူ ပွိုန် ဘူင် မာဆေ တဲး န့ ကာဘး ဒီ နာ မှာန်။ အေ လုဝ် ဘူင် ဒူပ် မီ နာ မှာန် ဆေဆေ။ 9 ဒွန် ဇေန့် ဒွန် ဇေန့်၊ ဒေါ ဒီလှး န့စမ် ယေ၊ ယေ ဟဲ့ ဒါခိုယ် ကာဆဝ် ဆေ ဘေ ဟဲ့ ဝီ မိုဝ်း ပ့လူမ် မိုဝ်း ဟဲန့်။ ကူပ် န့ ပါယ် တီ၊ ယေ ဆာခိုဝ် တဲး ပီ ဘူင် ဘေ ဇေ့ဇုင် ဒွန် မျုဝ်။ 10 ခုဝ်၊ ဒေါ ဆီ ကွယ် တူင့် အုဝ် ဒီ ဘေ၊ အုဝ် ဒဲမ် ပဲ့ ပါယ် နီ။ ပန် ဒီ ဝီ တး ဇမ် အုဝ် ဒူင် ကွယ် ဘေ၊ ကွဲ့ တဲး အုဝ် လုဝ် ဒိုဝ်း ပွုန် ဇဝ်ဖြာ ဘူင် ကာဆဝ် ဒီ ဘေ။ ဇဝ်ဖြာ တူ ဒွါ ပွုန် အန် ဒီ အုဝ်၊ တဲး န့ ပျာတ့် ဘေ။ အန် တဲး အုဝ် ဒိုဝ်း ပွုန် အန် တဲး န့ စွယ် ဘေ။

11 အိုယ် ဘေ ဘီနွင်၊ ခဲ့ နီ ဂြုဝ်း ပီ ဒီ ဒဲမ် အုဝ် ဒီ ဘေ။ တဲး ဘေ ဂျုဝ်ဂျာ ဒီ ဘူင်၊ တဲး န့ ဇေ့ဇုင် ဒွန် မျုဝ်။ တဲး ဘေ ထူမ် ဂြုဝ်း ပီ ကာလာင် အုဝ် နီ။ တဲး ဘေ လာယ် ဖြူမ် ရိုမ် ဘော လာယ် ကာလဝ့်၊ တဲး န့ ဒါခိုယ်။ ဆေ ဘေ ဘူင် ပါယ် တီ၊ ဇဝ်ဖြာ အီ ရွက့် ဘေ၊ အန် ဒီ တဲး ဘေ မိုဝ်း နဝ်း ဂျီတ်။ အန် ဒီ ကွယ် ရိုမ် ဒူပ် ဘေ။

12 တဲး ဘေ လာယ် ရွုး လာယ် အုး၊ ပီ ဘီနွင် အီ ဟဲ့ လာယ် ရွက့်။ 13 ခဲ့ ကွယ် ဂေ ဒူအီ အီ ဆီငါ ဘွတ်၊ ဂေ ဘော နမ်လှုဝ်း ဘေ။

14 ယေ ဘော ဆာခိုဝ် တဲး ဇဝ် ယေဆူ ဂေဇူ ဘေ၊ တဲး ဇဝ်ဖြာ ရွက့် ဘေ ဆေဆေ၊ တဲး ဘော နဝ်း ဖွိုမ် ဇဝ်ဖြာ ကွယ် ဒီ ဘေ ဆေဆေ။