၂ ခရ 12

ခါန် 12

လွင် ပီ ပီဖုင် အုဝ် ဒုဝ် ဘြိမ် အုဝ်၊ ပီ ဆ မိုဝ်း ဒီခုဝ် မိူဝ်၊ အုဝ် ဒီ ဝီ ကာလာင် ပေါ မ့ပွါ လွင် ပီ ဘျ ဇဝ်ဖြာ ဒီ အုဝ်။ 2 အုဝ် ဟဲ့ နပ် ဒူအီ အီ ညှိုမ် ဇဝ် ယေဆူ အူ ဝီ၊ အန် ဟဲ့ ဟုဝ့် ဇမ် မိူင် ဒဲင် ခြွင့် ဟာအူယ်။ လွင် အန် တီ၊ န့ ဟဲ့ ပွုန် တး ဂိုဝ် ဒီ ဖွုန် ဆီနမ်။ (ယုဝ် မိူဝ် အန် ဟုဝ့် ဘော အိမ်၊ ယုဝ် မိူဝ် မီ နဝ်း ဖွိုမ် အန် ဟုဝ့်၊ အုဝ် တူ ပွိုန် ကာလာင် လွင် အန် တီ၊ ဇဝ်ဖြာ အီ နပ်)။ 3-4 အုဝ် ယီ နပ် ဒူအီ ဝီ တီ၊ အန် ဟဲ့ ဟွတ့် ဟုဝ့် ဇမ် မိူင် ဂျာမ်ဆာ။ (ယုဝ် မိူဝ် အန် ဟုဝ့် ဘော အိမ်၊ ယုဝ် မိူဝ် မီ နဝ်း ဖွိုမ် အန် ဟုဝ့်၊ အုဝ် တူ ပွိုန် ကာလာင်၊ မီ ဇဝ်ဖြာ အီ နပ် လွင် အန် တီ)။ ဒူအီ ဝီ တီ၊ အန် ဟဲ့ ယိုဝ် မျုဝ် ပီ တူ ပွိုန် ကာလာင် ခဲင် ဂြုဝ်း ဒူအီ၊ မျုဝ် ပီ တူ တဲး ဇဝ်ဖြာ အီ ကာလာင်။ 5 ပါယ် တီ၊ အုဝ် ဒီ မျုက် ဝီ တီ။ မာလဲ၊ အုဝ် တူ မျုက် ဒုဝ် ဘြိမ် အုဝ်။ ဒုဝ် ဘြိမ် အုဝ် မိုဝ်း မီ အီ ဒီလှး န့စမ်၊ အီ ဒီ ပွိုန် မျုက်။ 6 ဆေ အုဝ် ပီ ဘော ပီဖုင် ဒုဝ် ဘြိမ် အုဝ် မိူဝ်၊ အုဝ် တူ မုး ဒူအီ ရိုဝ်။ အုဝ် ဒီ ဘော ကာလာင် ဂြုဝ်း မှာန်။ မာလဲ၊ အုဝ် ယီ တူ ပီဖုင် အုဝ်။ အုဝ် တူ ဆီ တဲး အီ ဟဝ် ရုဝ်ဆေ အုဝ် လွှိုမ် ပီ ယိုဝ် ဂေ၊ လွှိုမ် ပဲ့ ဟဲ့ ဒွိုမ် ဘူင် ဒွိုမ် ကာလာင် အုဝ်။

7 ကူပ် ဟဲ့ ဘျ ဇဝ်ဖြာ အီ မွှိုမ် အာမ် ဘဲန် မျုဝ် ဘဲန် မျုဝ် ဒီ အုဝ်၊ အန် တူ ဆီ တဲး အုဝ် ပီခိုက် အုဝ်။ ခုဝ်၊ အန် ဟဲ့ တဲး အုဝ် ခမ် ဆဝ် ကာဆဝ် အီ ပီ ဒီခွင့် ခဲင် ယင် အုဝ်။ န့ ဘော ပီ ဘုဝ် ကာနမ် ဒွါ ဒုက် ဒီ အုဝ် ဆေဆေ။ 8 အူယ် ဇေန့် အုဝ် ဟဲ့ ဆာခိုဝ် ဇဝ်ဖြာ၊ မှာန့်၊ တဲး အန် ဇဝ် ဒိုဝ်း လေး ဒီခွင့် တီ။ 9 အန် ဇဝ် ယီ ဝီ တဝ်း ဒီ အုဝ်၊ “ဂေဇူ ပီ ဒွါ အုဝ် ဒီ မဲ၊ န့ ဟဲ့ ဂ့လိုမ် အာဒါ မဲ။ ခုဝ်၊ ဒေါ ဒီလှး မဲ၊ န့ ဒီ လိုဝ်း ဆီချာ၊ ပွုန် အုဝ် ဟဲ့ ဇေ့ဇုင်။” ပါယ် တီ၊ အုဝ် ဟဲ့ ခူယ် ကာဆဝ်၊ အုဝ် ဟဲ့ ပွိုန် ဒီ ပီဖုင် အုဝ် ကူပ် ဒီလှး န့စမ် အုဝ်။ န့ တဲး ပွုန် ဇဝ် ယေဆူ ကွယ် ရိုမ် ဒူပ် အုဝ်။ 10 န့ ဟဲ့ ဒါခိုယ် ကာဆဝ် ဒီ နဝ်း အုဝ် ကူပ် ဒီလှး န့စမ် အုဝ်၊ ကူပ် ပဲ့ ဟဲ့ နဲန အီ ဟဝ် ဒီ အုဝ်၊ ကူပ် ပဲ့ ဟဲ့ ခမ် အုဝ် ဒုက် ပဲ့ ဟဲ့ ခါနှာပ် အီ ဟဝ် ဒီ အုဝ် ဘော ကူပ် ဒုက် ပဲ့ ဟဲ့ ကာဒုး အုဝ် အီ ညှာပ် ကာဆဝ်။ အုဝ် ဟဲ့ ခမ် ဒုက် ဇိုဝ် တီ ဒွန် မျုဝ် ကူပ် ဟဲ့ ညှိုမ် အုဝ် ဇဝ် ယေဆူ။ အုဝ် ခူယ် ပါယ် တီ၊ ခုဝ်၊ ဒေါ ဒီလှး န့စမ် အုဝ်၊ ဇဝ်ဖြာ ဟဲ့ ဝီ ဒွါ ပ့လူမ်၊ ဒွါ ဟဲန့် ဒီ အုဝ်။ 11 အုဝ် ဟဲ့ ကာလာင် ဂြုဝ်း တီ ပီ ဒူအီ ရိုဝ်။ န့ ယီ မုး ဘေ အီ ဟဲ့ ဘူင် တဲး အုဝ် ကာလာင် ပါယ် တီ။ အုဝ် ပီ ဘော မုး ဒူအီ အီ တူ မိုဝ်း ဒီခုဝ် မာဆေ မိူဝ်၊ န့ ကာအာပ် ဘေ အိူပ် အုဝ်။ ခုဝ်၊ အုဝ် တူ ချဝ့် လွှိုမ် ဂေ ဒူအီ အီ ညိုင်ရာင် အိုပ် ဒူအီ ပီ ရဝ်း ပီ တိုယ် ဇဝ် ယေဆူ တွိုန်။ 12 ဒေါ ကွယ် အုဝ် ကာတဲ ဘေ၊ အုဝ် ဟဲ့ ဂျုဝ်ဂျာ ဒီ ဘျ ပွုန် ဇဝ်ဖြာ ဒီ ဘေ။ ဇဝ်ဖြာ မိူဝ် ဟဲ့ ဘူင် အီ မွှိုမ် အာမ် ဘဲန် မျုဝ် ဘဲန် မျုဝ်၊ တဲး န့ လိုဝ်း လွင် မုး အုဝ် ဒူအီ ပီ ရဝ်း ပီ တိုယ် ဇဝ် ယေဆူ။ 13 အုဝ် တူ မိုဝ်း ဒီ ဘူင် မာဆေ အီ တဲး ဘေ ထာင် ဘေ ဟဲ့ ချဝ့် လွှိုမ် ဖိုင် ဇဝ် ယေဆူ ဘဲန် ပ့လုဝ့် ဘဲန် ပ့လုဝ့်။ န့ မိုဝ်း မီ အူ မျုဝ် ပဲ့ ဟဲ့ ဘူင် အုဝ်။ အုဝ် တူ ဒွိုမ် မှာန့် မာဆေ တဲး ဘေ စွယ် အုဝ်။ ခုဝ်၊ တဲး ဘေ ဂဝ်း ဝဲန် မှာပ် ပဲ့ ဟဲ့ လုတ့် အုဝ် တီ။

14 အာဝ် ဘော လှေန့် အုဝ် ဒီ တး စ်ု ဘေ၊ တဲး န့ ဘဲန် အူယ် ဇေန့် ခါ နီ။ ဘော ခါ နီ အုဝ် တူ ဆီ ပွိုန် ကြုဝ် ဘေ။ အုဝ် ဆီ တဲး ဘေ ရွက့် အုဝ်။ ခုဝ်၊ အာဝ် မုး ဂွန် လုဝ် ဟျီင် ဂုန့် မာ၊ ဂုန့် မာ လုဝ် ဟျီင် ဂွန်။ 15 ဆေ အုဝ် ဒီ ဘော ဒိုဝ်း တူတ့် ခဲ့ ပီ မိုဝ်း အုဝ် ဒွန် မျုဝ်၊ ဒွါ ဒီ ဘေ ဘော ခမ် ဒီ စုန် ဘော အာဆာက် အုဝ်၊ န့ ဒီ တဲး နဝ်း အုဝ် ခူယ် ကာဆဝ်။ ကူပ် ဟဲ့ ရွက့် အုဝ် ဒီ ဘေ ပါယ် တီ၊ ဆေ ဘေ ယီ ဝီ ရွက့် အုဝ် အီ စဲက်၊ ဘေ ထာင် ဟဲ့ ကာအာပ်။း 16 ပီ ဘော ဟဲ့ ပါယ် တီ မိူဝ်၊ အုဝ် တူ ဒွိုမ် ဒိုဝ်း မာဆေ၊ တူ ဘူင် တဲး န့ ဘဲန် ဒုက် ဘဲန် ညှာပ် ဒီ ဘေ။ ဘေ ပီ ဘော ဟဲ့ နပ် လွင် အန် တီ မိူဝ်၊ မင် အီ ယီ နပ် ဒီ ဝီ တဝ်း၊ အုဝ် ဟဲ့ ပီလွှက့် ဒီ ဘေ။ 17 အာ မှဝ် ပဲ့ ဟဲ့ ဒွိုမ် ပီလွှက့် အုဝ် ဒီ ဘေ။း ဘေ ထာင် အုဝ် ဟဲ့ ပီလွှက့် ဒီ ဘေ ဒေါ စ်ု အုဝ် အီ ဟဝ် တး ဒူင် ကွယ် ဘေ။း 18 အုဝ် ဟဲ့ စ်ု အာထီထူ ဘော ဝါ ယေ ဟာဝ် ဒူင် ကွယ် ဘေ။ ဘေ ထာင် အာထီထူ ဟဲ့ ပီလွှက့် ဒီ ဘေ။း အာဝ် မုး ပါယ် တီ။ နဝ်း ဖွိုမ် ယေ မုး အူ မျုဝ်။ ဘော ပီ ဘူင် ယေ မုး အူ မျုဝ်။

19 လွင် ပီ ကာလာင် အုဝ် ဒွန် မျုဝ် ဇိုဝ် တီ၊ ဘေ ထာင် အုဝ် ဂဝ်း ဒုဝ် အုဝ်။း အာဝ် မုး ပါယ် တီ။ အိုယ် ဘေ ဘီနွင် ပီ ရွက့် အုဝ်၊ ကူပ် ညှိုမ် အုဝ် ဇဝ် ယေဆူ၊ ဇဝ်ဖြာ ဟဲ့ နပ်၊ အုဝ် ဘူင် တူတ့် ဒွန် မျုဝ်၊ တဲး န့ ဘဲန် အာဂျိုဝ် ဒီ ဘေ။ 20 ပန် ဒီ တး အုဝ် ဒူင် ကွယ် ဘေ၊ အုဝ် ဘော ယုဝ်၊ အုဝ် ဒီ ယိုဝ် ပီ ဘူင် ဘေ၊ ပီ တူ ကာအာပ် ဘေ ဘူင်။ အုဝ် ယုဝ်၊ ဘေ မိူဝ် ဒီ ယိုဝ် ပီ ဘူင် အုဝ် ပီ တူ ဆီ ယိုဝ် ဘေ။ အုဝ် ဘော ယုဝ် ဒီ ယိုဝ် ဘေ လာယ် ကာထဲန့်၊ လာယ် လှယ့်၊ လာယ် ရူ၊ တူ လာယ် ဖြူမ် ရိုမ်။ အုဝ် ဘော ယုဝ် ဘေ ကာဖာ မီ ဒုဝ် ဘြိမ် ဘေ၊ လာယ် ဖျာက်၊ လာယ် ကာယွင့် ဘော လာယ် ပီခိုက် ပီစာ၊ ဘော ဘူင် ကာဝှ်ု ကာဝျှီန်။ 21 ပန် ဒီ တး ဇမ် အုဝ် ဒူင် ကွယ် ဘေ ပေါ အူ ဇေန့် တီ၊ အုဝ် ဘော ယုဝ် ဇဝ်ဖြာ ဒီ တဲး အုဝ် မွှိုမ် ဆာယ် ကူပ် ဘေ။ အုဝ် ဘော ယုဝ် ဒီ ကာဒုး ဒီ က့လိုဝ် ကူပ် မှာပ် ပဲ့ ဟဲ့ ဘူင် ဒူအီ ကိူန်၊ ယီ တူ ဝီ လှုဝ်း တူ ဝဲန် မှာပ် တီ။ ဂေ အီ ဟဲ့ ဘူင် ဒူပ် နဝ်း ကာဝါတ့် ဂေ၊ အီ ဟဲ့ လာယ် လုတ့် လာယ် လာယ် ဘော ဘူင် အီ မွှိုမ် ကာအိး မွှိုမ် ကာဒါတ့်၊ အုဝ် ယုဝ် ဂေ ညှမ် ဝဲန် မှာပ် ဂေ။