1-3 အုဝ် အာပေါလူ ဟဲ့ ဒဲမ် ပဲ့ နီ၊ တိုယ် ဒီ ဘေ ဒူအီ ခဲင် ဖိုင် ဇဝ် ယေဆူ အီ ကွယ် ခဲင် မိူင် ခုဝ်ရိန်ထူ။ အုဝ် မုး ဒူအီ ပီ ရဝ်း ပီ တိုယ် ဇဝ် ယေဆူ။ ဘော ဇဝ်ဖြာ ဟဲ့ အိုင် ဒီ ရဝ်း အုဝ်။ ဇဝ်ဖြာ ဟဲ့ ရဝ်း ဘော ဘေ။ အန် ဟဲ့ တဲး ဘေ ဘဲန် ဒူအီ အီ ဆီငါ ဘွတ် ကူပ် ညှိုမ် ဘေ ဇဝ် ယေဆူ၊ တဲး ဘေ ဘဲန် ဒူအီ ပီ အိုပ် အန်။ ဘော အုဝ် ဘော အာဆူထိင် အီ မုး ဘီနွင် အေ၊ ယာယ် ဟဲ့ ဆာခိုဝ် တဲး ဇဝ်ဖြာ ဂေဇူ ဘေ။ ဘော ဘေ ဘော ဂေ ဒူအီ ဘောကာဂ့လျီတ် အီ ကွယ် ဒွန် နာ ဒွန် ပ့လုဝ့်၊ ဘေ အီ ဂါဝ် ပွုန် ဇဝ် ယေဆူ အီ မုး ဒါ ကာညာ အီ အိုပ် အေ၊ တဲး ဇဝ်ဖြာ အီ မုး ဂုန့် အေ ဘော ဇဝ် ယေဆူ ဘော ဒွါ နဝ်း ဂျီတ် ဒီ ဘေ။

4 ဆေဆေ အုဝ် ဘော ဒါင် ဂုင် ဂေဇူ ဒီ ဇဝ်ဖြာ ပီ ကြိုပ် အုဝ်။ ခုဝ်၊ ဇဝ်ဖြာ ဟဲ့ ဂေဇူ ဘေ၊ တဲး ဘေ ပွိုန် ဒီ ညှိုမ် ဇဝ် ယေဆူ။ 5 ကူပ် ညှိုမ် ဘေ ဇဝ် ယေဆူ တီ၊ ဘေ ဟဲ့ ပွိုန် ဘဲန် မျုဝ် ဘဲန် မျုဝ်၊ တဲး န့ ပီ ဘေ ဟဲ့ ခြမ် ကာဆဝ်။ ဘေ ဟဲ့ နပ် ဘဲန် မျုဝ် ဘဲန် မျုဝ် ဘော နပ် ပီ ဒီ ပါယ် ဒီ ကာလာင်။ 6 ပီ ကာလာင် ယေ ဒီ ဘေ လွင် ဇဝ် ယေဆူ၊ န့ ဟဲ့ လိုဝ်း ဆီချာ ဒီ ဘေ။ 7 ခုဝ်၊ ဘေ မိူဝ် ဟဲ့ မိုဝ်း တူတ့် ဒွန် မျုဝ် ပီ ဂေဇူ အန် ဇဝ် ဒီ ဘေ။ ဘေ ဘော ကာပြာ ကာဆဝ်၊ ဘ်ု ပန် ဒီ ဝီ တး ဇဝ် ယေဆူ ပေါ အူ ဇေန့်၊ တဲး ဒွန် အီ ယိုဝ် အန်။ 8 အန် ဇဝ် ဒီ ဘော ယွတ် မဲန် ဘေ၊ တဲး ဘေ ညှိုမ် ဆီချာ၊ တဲး န့ ကော ဇမ် ပန် ဒီ ဟွတ့် တူတ့်။ ဒေါ ဇမ် ဆီငဲ ဝီ တး လူင် ဇဝ် ယေဆူ၊ ကွဲ့ တဲး အီ ဟဝ် မိုဝ်း ဒီ ကာလာင် နာ တူ မွှိုမ် မာဆေ လွင် ဘေ။ 9 ဇဝ်ဖြာ အီ ဟဲ့ တဲး ဘေ ပွိုန် ဒီ ကွယ် ရိုမ် ဒူပ် ဇဝ် ယေဆူ အီ မုး ဂွန် ဇဝ်ဖြာ၊ အန် မိုဝ်း နဝ်း ဆိူဝ်၊ တဲး ဘေ ပွိုန် ဒီ ဘိုင် အန်။ ဇဝ် ယေဆူ ဘော မုး ဒါ ကာညာ အီ အိုပ် အေ။

10 အိုယ် ဘေ ဘီနွင်၊ ကူပ် ဟဲ့ တဲး ဇဝ် ယေဆူ အုဝ် ကာလာင်၊ အုဝ် မှာန့် ကာဆဝ် ဒီ ဘေ၊ တဲး ဘေ ဒွန် အီ လာယ် ဖြူမ် ရိုမ်။ ကွဲ့ တဲး ဘေ လာယ် ကာယဝ်း။ ပါယ် တီ၊ ပီ ခြာမ် ဘေ ဒီ ဘူင် ဘော ပီ ဆုင်ဖျာတ် ဘေ ဒွန် မျုဝ်၊ တဲး န့ တဲး ဘေ ဘဲန် အူ နဝ်း။

11 အိုယ် ဘေ ဘီနွင်၊ အုဝ် ဟဲ့ ယိုဝ် လွင် ပီ လာယ် ကာအေး ကာထဲန့် ဘေ။ ဂေ ဒူအီ အီ ကွယ် ခဲင် ကာင် နာင် ခ့လုဝ်အေ၊ ဂေ ဟဲ့ ဟွတ့် ကာလာင် ဒီ အုဝ်။ 12 ပီ ဆီ ကာလာင် အုဝ် ဒီ ဘေ န့ ပါယ် နီ။ ဘေ ဘော လာယ် ကာလာင် ကာဘး ကာတဲ ဘေ။ မင် အီ ဘော တဝ်း၊ “အုဝ် မုး ဒီဘဲ ဒါ ဆာရာ အာပေါလူ။” မင် အီ ဘော တဝ်း၊ “အုဝ် မုး ဒီဘဲ ဒါ ဆာရာ အာဖောလူန်။” မင် အီ ဘော တဝ်း၊ “အုဝ် မုး ဒီဘဲ ဒါ ဆာရာ အာခေဖာတ်။”^a မင် အီ ဘော တဝ်း “အုဝ် မုး ဒီဘဲ ဇဝ် ယေဆူ။” ဘေ လာယ် ကာထဲန့် ပါယ် တီ။

13 ဇဝ် ယေဆူ ယီ မုး အူ ကာဒင်၊ အာဝ် ပွိုန် ကာယဝ်း။ အာဝ် မုး ဒါ ဆာရာ အာပေါလူ အီ ဟဲ့ ခမ် ဒီ ယမ် ဒီ ရွင့် ကာဝဲ့ ဒါင် ဘေ။ အာဝ် မုး ကူပ် ညှိုမ် ဘေ ဒီ ဒါ ဆာရာ အာပေါလူ ဘေ ဟဲ့ ခမ် ဒီ စိုပ် ခဲင် အိုမ်။ 14 အုဝ် ဒါင် ဂုင် ဂေဇူ ဒီ ဇဝ်ဖြာ ကူပ် တူ ဒွိုမ် စိုပ် အုဝ် အာဆေ ခဲင် အိုမ်။ န့ မိုဝ်း မီ အာခါရီဖူ ဂါယ် အာဂါယူ ပဲ့ ဟဲ့ စိုပ် အုဝ် ခဲင် အိုမ်။ 15 ကူပ် န့ ပါယ် တီ၊ အာဝ် မိုဝ်း အီ ပွိုန် တဝ်း၊ အန် ဟဲ့ ခမ် ဒီ စိုပ် ခဲင် အိုမ် ကူပ် ညှိုမ် အန် ဒီ အုဝ်။ 16 အော၊ ဟဲ့ မှာန်၊ အုဝ် ဟဲ့ စိုပ် ဘော အာဆာဖာန် ဘော ဒူအီ ခဲင် န့ဟူမ် အန် ခဲင် အိုမ်။ ဒဲင် တီ အုဝ် တူ လှုဝ်း အာဆေ ပဲ့ ဟဲ့ စိုပ် အုဝ် ခဲင် အိုမ်။^b 17 ခုဝ်၊ ဇဝ် ယေဆူ တူ စ်ု အုဝ် စိုပ် အီ ခဲင် အိုမ်။ အန် ဇဝ် စ်ု အုဝ် ဟာဝ် ကာလာင် လွင် ဇဝ်ဖြာ ချွတ် ဒူအီ၊ တဲး န့ ဘဲန် နဝ်း ဒါခိုယ် ဒီ အီ။ လွင် ပီ ကာလာင် အုဝ် တီ၊ အုဝ် တူ ကာလာင် ဒူပ် အာငျာန် ဒူအီ ဒဲင် ကာဒါယ် နီ။ အုဝ် တူ ဆီ ဝဲန် ပွုန် ဇဝ် ယေဆူ ဒေါ ဟဲ့ ခမ် အန် ဒီ ယမ် ဒီ ရွင့် ကာဝဲ့။

18 ဂေ အီ ဒီ စုဝ်း ကာလုဝ့် ငါရာယ်၊ ဂေ ထာင် လွင် ဇဝ် ယေဆူ ဟဲ့ ခမ် ဒီ ယမ် ဒဲင် ရွင့် ကာဝဲ့၊ န့ မုး ဂြုဝ်း ရိုဝ်၊ ဂြုဝ်း တူ မိုဝ်း ဒီခုဝ်။ အေ ဒူအီ ပီ ချွတ် ဇဝ်ဖြာ၊ အေ ယီ ဟဲ့ နပ်၊ ဂြုဝ်း တီ မိုဝ်း ပွုန် ဇဝ်ဖြာ။ 19 ခုဝ်၊ ခဲင် ဘပ် ဇဝ်ဖြာ ဟဲ့ ဒဲမ် အုန် လွင် ဇဝ်ဖြာ တဝ်း၊

20 ဆေ ဟီ ပါယ် တီ၊ အာဝ် မိုဝ်း အာဆေ အီ မိုဝ်း အာငျာန်။ အာဝ် မိုဝ်း ဒါ ဆာရာ အီ နပ် ဒီ မာနုဝ် အီ ဟဝ်။ ဘော ဂေ ဒါ ဆာရာ အီ နပ် ဒီ ကာမွုန် လွင် ပီ ပါယ် ဒဲင် ကာဒါယ် နီ အာဝ် မိုဝ်း ဒီခုဝ်။ ပီ ကာဖာ၊ ပီ ထာင် ဒူအီ ဒဲင် ကာဒါယ် နီ ဟဲ့ မုး အာငျာန် ဘွတ်၊ ဇဝ်ဖြာ ယီ တဝ်း၊ န့ ရိုဝ်။ 21 ခုဝ်၊ အာဆေ မိုဝ်း အာငျာန် ဒူအီ၊ အန် တူ နပ် မာဆေ လွင် ဇဝ်ဖြာ။ ဇဝ်ဖြာ ယီ အိုင် ဒီ တဲး ဒဲစေန့် အန် ကာလာင် ဂြုဝ်း အန် ဒီ ဒူအီ။ ဂေ ဒူအီ ဒဲင် ကာဒါယ် ပီ ဘော တဝ်း၊ န့ တူ မိုဝ်း ဒီခုဝ် မိူဝ်၊ ဇဝ်ဖြာ ယီ တဝ်း ဒီ ချွတ် ဂေ အီ ညှိုမ် ဂြုဝ်း တီ။ အာငျာန် ဇဝ်ဖြာ ဟဲ့ ဘူင် ပါယ် တီ။ 22 ဂေ ဒူအီ အာယူဒါ၊ ဂေ ဆီ ယိုဝ် မီ အီ မွှိုမ် အာမ်။ ဂေ ဒူအီ ဂြိက်၊ ဂေ ဘော ဆီ မိုဝ်း မီ အာငျာန်။ 23 အီ မုး ယေ၊ ယေ ကာလာင် လွင် ဇဝ် ယေဆူ ဟဲ့ ခမ် ဒီ ယမ် ဒဲင် ရွင့် ကာဝဲ့။ ဂေ ဒူအီ အာယူဒါ ယီ ကာအိး ဂြုဝ်း တီ။ န့ ပီ ဂေ တာ ဒုး ပ့လဝ် ဂေ၊ တဲး ဂေ ကေး။ ဂေ ဒူအီ အာမျုဝ် ဟဝ် ဘော ထာင်၊ န့ မုး ဂြုဝ်း ရိုဝ်၊ ဂြုဝ်း တူ မိုဝ်း ဒီခုဝ်။ 24 မာလဲ၊ ဆေ န့ မုး ဂေ ဒူအီ ပီ ရဝ်း ဇဝ်ဖြာ၊ ဘော မုး ဒူအီ အာယူဒါ၊ ဘော မုး ဒူအီ ဂြိက်၊ ဂေ တဝ်း၊ ဇဝ် ယေဆူ ဟဲ့ ဘျ ပွုန် ဇဝ်ဖြာ ဘော အာငျာန် ဇဝ်ဖြာ အီ ဘွတ်။ 25 ခုဝ်၊ ဆေ ဒူအီ တဝ်း၊ ဂြုဝ်း ဇဝ်ဖြာ လွင် ဇဝ် ယေဆူ တွိုန် ဟဲ့ မုး ဂြုဝ်း ရိုဝ်၊ ရိုဝ် တီ ဟဲ့ မွှိုမ် လွှိုမ် အာငျာန် ဒူအီ။ ဆေ ဒူအီ ဘော တဝ်း၊ ပွုန် ဇဝ်ဖြာ အာဝ် တာင်၊ န့ ယီ တာင် လွှိုမ် ပွုန် ဒူအီ။

26 အိုယ် ဘေ ဘီနွင်၊ တဲး ဘေ လှုဝ်း ဒေါ ဒဲ့ ဇဝ်ဖြာ ဒီ ဘေ၊ ဘေ မုး ဒူအီ ပါယ် မှဝ်။ ဆေ န့ ဒူပ် ပီ ထာင် ဒူအီ ဒဲင် ကာဒါယ် နီ၊ ဘေ အီ မိုဝ်း အာငျာန်၊ အီ မိုဝ်း ပွုန်၊ အီ မုး ခြိုဝ် ဇဝ် ခြိုဝ် ခုန်၊ ဘေ ပြေတ့် ကာဆဝ်။ 27 ပါယ် တီ၊ ပီ ထာင် ဂေ ဒူအီ ဒဲင် ကာဒါယ် နီ ဟဲ့ ရိုဝ်၊ ဇဝ်ဖြာ ဟဲ့ ရဝ်း တဲး ဂေ အီ မိုဝ်း အာငျာန် ဝီ ဆာယ် အီ။ ပီ ထာင် ဂေ ဒူအီ ဒဲင် ကာဒါယ် နီ အာဝ် မိုဝ်း ပ့လူမ်၊ ဇဝ်ဖြာ ဟဲ့ ရဝ်း တဲး ဂေ အီ မိုဝ်း ပ့လူမ် ဝီ ဆာယ် အီ။ 28 ပီ အာထာင် တျီ့ ဒူအီ ဒဲင် ကာဒါယ်၊ ပီ ဇွင့် အီ ဟဝ်၊ ပီ ကြာန် အီ ဒီ ယိုဝ်၊ ပီ ထာင် အီ ဟဝ် အာဝ် မိုဝ်း ဒီခုဝ်၊ ဇဝ်ဖြာ ဝီ ရဝ်း ဂေ တီ၊ တဲး န့ လိုဝ်း ဆီချာ လွင် ပီ ထာင် ဒူအီ ဟဲ့ အာရေ တာင်၊ န့ တူ မိုဝ်း ဒီခုဝ်။ 29 ခုဝ်၊ ဇဝ်ဖြာ ဘူင် ပါယ် တီ၊ ကွဲ့ တဲး န့ မိုဝ်း အာဆေ အီ ပွိုန် ဒီ ပီခိုက် နဝ်း အန် ဒီ အာတ့် ဇဝ်ဖြာ။ 30 ပါယ် တီ ဇဝ်ဖြာ ဟဲ့ ဘူင် တဲး အေ ပွိုန် ဒီ ကွယ် ရိုမ် ဒူပ် ဇဝ် ယေဆူ။ အန် ဇဝ် မိူဝ် ဟဲ့ ဘူင် တဲး အေ မိုဝ်း အာငျာန် ကူပ် ညှိုမ် အေ ဇဝ် ယေဆူ။ အန် တဲး အေ မိုဝ်း နဝ်း လုယ် နဝ်း ဘွတ်။ အန် မိူဝ် ဟဲ့ ထုတ် လေး အေ ခဲင် မှာပ်။ 31 န့ ပီ ပဲ့ ဟဲ့ ဒဲမ် အုန် ခဲင် ဘပ် ဇဝ်ဖြာ။ န့ တဝ်း၊ “အာဆေ ဆီ အိူပ်၊ တဲး အန် အိူပ် မီ ဇဝ်ဖြာ။”