အိုယ် ဘေ ဘီနွင်၊ ဒေါ တး ကာလာင် အုဝ် ဒီ ဘေ လွင် ဇဝ်ဖြာ ပီ တူ ဒွိုမ် ယိုဝ် ဘေ၊ အုဝ် တူ ကာလာင် ဂြုဝ်း အီ ခိုက်ခမ် ဘော ဂြုဝ်း အီ မုး အာငျာန် ဒူအီ။ 2 ခုဝ်၊ ဒေါ ကွယ် ရိုမ် အုဝ် ဒူပ် ဘေ၊ အုဝ် ဟဲ့ အုန် နဝ်း တဝ်း၊ အုဝ် တူ ကာလာင် မာဆေ ဒဲင် ကာလာင် လွင် ဇဝ် ယေဆူ အီ ဟဲ့ ခမ် ဒီ ယမ် ဒဲင် ရွင့် ကာဝဲ့။ 3 ဒေါ တး အုဝ် ဒူင် ကွယ် ဘေ၊ အုဝ် ဟဲ့ ဒီလှး၊ တူ မိုဝ်း ဟဲန့်။ အုဝ် ဘော ယုဝ် ကော ဒီယေန့်။ 4 ဂြုဝ်း အုဝ် ဘော ဒါရာ ပီ ကာလာင် အုဝ်၊ န့ တူ ဒူပ် ပီ ပါယ် အာငျာန် ဒူအီ။ အုဝ် မိူဝ် တူ ကာဆုး နဝ်း ဘေ။ မာလဲ၊ ဒေါ ကာလာင် အုဝ် ဂြုဝ်း တီ၊ န့ မုး နဝ်း ဖွိုမ် ဇဝ်ဖြာ ဘော ပွုန် အန် အီ တဲး န့ ကာလှုး ဒီ နဝ်း ဘေ။ 5 ဇဝ်ဖြာ ဟဲ့ ဘူင် ပါယ် တီ၊ ကွဲ့ တဲး ဘေ ညှိုမ် အာငျာန် ဒူအီ၊ တဲး ဘေ ယီ ညှိုမ် ဘိုင် ပွုန် ဇဝ်ဖြာ။

6 ဆေ န့ ယီ မိုဝ်း ဒူအီ အီ ဟဲ့ ညှိုမ် ဆီချာ၊ ယေ ကာလာင် လွင် အာငျာန် ဒီ ဂေ။ မာလဲ၊ န့ တူ မုး အာငျာန် ဒူအီ အီ ကွယ် ဇာတ် နီ။ အာဝ် မုး အာငျာန် ဂေ ဒါ ကာညာ အီ အိုပ် ကာဒါယ် နီ။ အာငျာန် ဂေ တီ ဒီ ဟြာယ် တူတ့်။ 7 ပီ ကာလာင် ယေ ယီ မုး အာငျာန် ဇဝ်ဖြာ ပီ တူ ဒွိုမ် နပ် ဒူအီ။ အာငျာန် တီ ဇဝ်ဖြာ ဟဲ့ ဘ့လေး အုန် ဆိန့် ဒေါ ဂုဝ် အန်၊ တဲး အန် ဒွါ အာဖုင် ဒင်ခုဝ် အန် ဒီ ယေ ဒေါ တီ နီ။ 8 ဂေ ဒါ တာင် အီ အိုပ် ဒဲင် ကာဒါယ် နီ၊ အာဝ် မိုဝ်း အာဆေ အီ နပ် လွင် အာငျာန် တီ၊ န့ တူ ကာလှုး ဒီ နဝ်း ဂေ။ ဆေ ဂေ နပ်၊ ဂေ တူ ငဝ်း ဇဝ် ယေဆူ အီ မိုဝ်း အာဖုင် ဒင်ခုဝ် တာင်။ ဂေ တူ တဲး အန် ယမ် ဒဲင် ရွင့် ကာဝဲ့။ 9 မာလဲ၊ န့ ဟဲ့ ဒွိုမ် ဒဲမ် အုန် ခဲင် ဘပ် ဇဝ်ဖြာ တဝ်း၊

10 န့ ယီ မုး ယေ၊ ဇဝ်ဖြာ ဟဲ့ တဲး နဝ်း ဖွိုမ် အန် ဘျ ဒီ ယေ လွင် ဇိုဝ် တီ။ ခုဝ်၊ နဝ်း ဖွိုမ် ဇဝ်ဖြာ နပ် ဒီ ဆာခိ ဒီ ယွတ် တူတ့် ဒွန် မျုဝ်၊ တဲး အန် ဘော နပ် အီ လိုက် ကာဆဝ် လွင် ဇဝ်ဖြာ။ 11 ဒူအီ မိူဝ် တူ နပ် နဝ်း အီ ဟဝ်၊ န့ မိုဝ်း မီ ဒုဝ် ဘြိမ် အန် အီ ဝီ နပ် နဝ်း အန်။ ဇဝ်ဖြာ ဘော ပါယ် တီ။ အာဝ် မိုဝ်း အီ နပ် နဝ်း ဇဝ်ဖြာ။ န့ မိုဝ်း မီ နဝ်း ဖွိုမ် ဇဝ်ဖြာ၊ အီ နပ်။ 12 အေ ယီ တူ မိုဝ်း အာငျာန် ဂေ ဒူအီ ဒဲင် ကာဒါယ် နီ။ ဇဝ်ဖြာ ဟဲ့ ဒွါ ဒီ ယေ နဝ်း ဖွိုမ် အန်၊ တဲး ယေ နပ် ခဲ့ ကိူန် ပဲ့ ဟဲ့ ဂေဇူ ဇဝ်ဖြာ ဒီ ယေ။ 13 ကူပ် န့ ပါယ် တီ၊ ယေ တူ ကာလာင် အာငျာန် ပီ မာနုဝ် ဒူအီ၊ ယေ ကာလာင် ပီ မာနုဝ် နဝ်း ဖွိုမ် ဇဝ်ဖြာ။ ယေ ကာလာင် အီ ဒူပ် နဝ်း ဖွိုမ် ဇဝ်ဖြာ၊ တဲး ဂေ အီ မိုဝ်း နဝ်း ဖွိုမ် ဇဝ်ဖြာ နပ် လွင် အန်။ 14 ဆေ ဒူအီ တူ မိုဝ်း နဝ်း ဖွိုမ် ဇဝ်ဖြာ၊ ပီ ဒွါ နဝ်း ဖွိုမ် ဇဝ်ဖြာ တူ ပွိုန် ဒီ လိုပ် ခဲင် နဝ်း အန်၊ အန် ထာင် အာဝ် မိုဝ်း ဒီခုဝ်။ အန် မိူဝ် တူ နပ် ဒီ ထူမ်၊ တဲး န့ ကာလှုး ဒီ နဝ်း အန်။ ခုဝ်၊ န့ မုး နဝ်း ဖွိုမ် ဇဝ်ဖြာ အီ တဲး အီ နပ်။ 15 ဝီ မှဝ် အီ မိုဝ်း နဝ်း ဖွိုမ် ဇဝ်ဖြာ၊ အန် နပ် ဒီ ကာလာင် လွင် ပီ ဘူင် ဒူအီ ဒွန် မျုဝ်၊ ယုဝ် န့ မွှိုမ် တူ မွှိုမ်။ မာလဲ၊ န့ တူ မိုဝ်း အာဆေ အီ ဝီ ပွိုန် ကာလာင် လွင် အန်။

အီ မုး အေ၊ ပီ ဇေန့်ဇာ အေ ဟဲ့ ဒူပ် ပီ ဇေန့်ဇာ ဇဝ် ယေဆူ။