အိုယ် ဘေ ဘီနွင်၊ အုဝ် တူ ပွိုန် ကာလာင် ဒီ ဘေ၊ တဲး န့ ပီ အုဝ် ကာလာင် ဒီ ဂေ အီ ဟဲ့ မိုဝ်း နဝ်း ဖွိုမ် ဇဝ်ဖြာ။ အုဝ် လုဝ် ကာလာင် ဒီ ဘေ တဲး န့ ပီ ဘေ ဆီ ဒူပ် အာငျာန် ဒူအီ၊ ဘေ ပီ ဂွန် င အီ ဆီ ညှိုမ် ကာမာယ် ဇဝ် ယေဆူ။ 2 ကူပ် ညှမ် ကာဂိုင် ကာဒါန် ဘေ၊ အုဝ် ညှမ် ပွိုန် တဲး ဘေ ဟူမ် ပီ ဒီ ဟူမ် အီ ပ့လူမ်။ န့ ပီ အုဝ် ဆီ တဲး ဘေ ဒျီင် မီ အိုမ် ပူ။ ဇမ် ဒေါ တီ နီ၊ ဘေ ညှမ် ကာဂိုင် ကာဒါန်။ 3 ခုဝ်၊ ဘေ ဒူပ် နဝ်း ဒုဝ် ဘြိမ် ဘေ။ ဆေ ဘေ ယီ လာယ် ကာအေး လာယ် ကာထဲန့်၊ လာယ် ဆီဂဲ့၊ ဘေ ပီ ဒူအီ အီ တူ နပ် ဇဝ်ဖြာ။ 4 ခုဝ်၊ ဘေ မင် အီ တဝ်း၊ “အုဝ် မုး ဒီဘဲ ဒါ ဆာရာ အာပေါလူ။” မင် အီ ဘော တဝ်း၊ “အုဝ် မုး ဒီဘဲ ဒါ ဆာရာ အာဖောလူန်။” ကူပ် ပီ ဘူင် ဘေ တီ၊ ဘေ ပီ ဒူအီ တူ နပ် ဇဝ်ဖြာ။

5 ဆေ န့ ပါယ် တီ၊ ဒါ ဆာရာ အာဖောလူန် မုး အာဆေ။း ဒါ ဆာရာ အာပေါလူ မုး အာဆေ။း ယာယ် ဘော အာ ဝီ၊ ယာယ် မုး မီ ဒဲစေန့် ဇဝ်ဖြာ။ ယာယ် မာနုဝ် တဲး ဘေ ညှိုမ် ဇဝ် ယေဆူ။ ယာယ် ဘော အာ ဝီ ဘူင် ဂါန် ပီ အာပ် ဇဝ်ဖြာ ယာယ် ဘူင်။

6 အုဝ် ပီ ဒူအီ အီ ဆမ် ဆီမာ ငှုဝ်။ ဒါ ဆာရာ အာဖောလူန် ဘော ပီ ဒူအီ အီ ရိုက် အိုမ်။ ဇဝ်ဖြာ ယီ ဘူင် တဲး န့ ဟြေး၊ တဲး န့ တာင်။ 7 ခုဝ်၊ ဒူအီ အီ ဆမ် ဂါယ် ဒူအီ အီ ရိုက် အိုမ်၊ ဂါယ် တူ ဘော ခိုက်ခမ် ခဲ့ မှဝ်။ မီ ဇဝ်ဖြာ အီ ဘူင် တဲး န့ ဟြေး တဲး န့ တာင် တီ၊ အန် ဟဲ့ ခိုက်ခမ်။ 8 ပီ ခြာမ် ဒူအီ အီ ဆမ် ဂါယ် ဒူအီ အီ ရိုက် အိုမ် ဟဲ့ မုး အူ မျုဝ်။ ဇဝ်ဖြာ ယီ ဒီ ဒွါ ရုး ဒီ ဒွန် အီ တဲး န့ ကာဒါန် ဂါန် ပဲ့ ဟဲ့ ဘူင် ဝီ မှဝ် ဝီ အန်။ 9 ယာယ် ဘော အာ ဝီ၊ ယာယ် မုး ဒူအီ အီ ဘူင် ရိုမ် ဂါန် ဇဝ်ဖြာ။ ဘေ ဘော ပီ ကာပိုမ် မာန် ဇဝ်ဖြာ။ ဘေ ပီ ဘော ဟုဝ် ပီ ဆမ် ဇဝ်ဖြာ။

10 ဇဝ်ဖြာ ဟဲ့ ဂေဇူ အုဝ်၊ တဲး အုဝ် ပီ ဒူအီ အီ လှဲဝ် ဒီ ဆမ် ကာင်၊ တဲး အုဝ် ပွိုန် ဒီ ဆမ် အုန် စေန့် ရွင့် ခဲင် ဟုဝ် ဇဝ်ဖြာ တီ။ ဒူအီ ပေါ အူ ဝီ ဘော ဝီ ဂုဝ် ဟုဝ့် နာ ဒဲင် စေန့် ရွင့် တီ။ ဒွန် အီ ယီ လုဝ် ဆာဒိက် ဂါန် ပီ ဘူင် အန်၊ ရာင် အာဆေ ရာင် အန်။ 11 စေန့် ရွင့် တီ ဟဲ့ ဟွတ့် ဆမ်။ အာဝ် ပွိုန် ဒိုဝ်း စေန့် ရွင့် ပေါ အူ မျုဝ် ဝီ ဆမ်။ န့ မုး ဇဝ် ယေဆူ အီ ပီ စေန့် ရွင့် တီ။ 12 မင် အီ ဒီ ဒိုဝ်း ခြိဝ်၊ မင် အီ ဒီ ဒိုဝ်း ရွိုန်၊ မင် အီ ဒီ ဒိုဝ်း ဆဲန့်။ မင် အီ ဒီ ဒိုဝ်း ဟေ၊ ဒိုဝ်း ပြဲ ဂေ ဟျြီင် ဝီ ဂုဝ် ဟုဝ့် နာ ဒဲင် စေန့် ရွင့် တီ။ 13 ဂါန် ပီ ဘူင် ဒွန် အီ၊ န့ ဒီ လိုဝ်း ဆီချာ ဒေါ ဇမ် ဆီငဲ ဒီ ဝီ တး လူင် ဇဝ် ယေဆူ။ ဆီငဲ တီ၊ ဇဝ်ဖြာ ဒီ တာ ငဝ် ဒုဝ့် ဒီ ယွတ်၊ ဂါန် ပီ ဘူင် ဝီ မှဝ်၊ န့ မုး မျုဝ် မှဝ်။ 14 ဆေ ပီ ဂုဝ် ဒူအီ ဂေ တီ တူ ကာဆိုမ်၊ ဒူအီ ဝီ တီ မိူဝ် ဒီ ပွိုန် ရုး အန်။ 15 ဆေ ပီ ဂုဝ် ဒူအီ ယီ ကာဆိုမ်၊ ဒူအီ ဝီ တီ၊ အန် မိူဝ် ဒီ စှိုမ်။ အန် ယီ တူ စှိုမ် အာဆာက် အန်။ န့ ဒီ ပီ အန် လွတ် ခဲင် ငဝ် တီ။

16 ဘေ လုဝ် လှုဝ်း ဆေဆေ၊ ဘေ ဟဲ့ ပီ ဟုဝ် ဇဝ်ဖြာ။ နဝ်း ဖွိုမ် ဇဝ်ဖြာ ဟဲ့ ကွယ် ခဲင် နဝ်း ဘေ။ 17 အာဆေ ဘူင် တဲး ဟုဝ် ဇဝ်ဖြာ လိုဝ်၊ ဇဝ်ဖြာ မိူဝ် ဒီ ဘူင် တဲး ဒူအီ တီ လိုဝ်။ ခုဝ်၊ ဟုဝ် ဇဝ်ဖြာ န့ မုး ဒူင် ဆီငါ ဘွတ်။ ဒုဝ် ဘေ ယီ ပီ ဟုဝ် ဒူင် ကွယ် ဇဝ်ဖြာ။

18 ကာတဲ ဘေ၊ ကွဲ့ တဲး န့ မိုဝ်း အီ ဝီ ကာလုဝ် ဒုဝ် ဘြိမ် အန်။ ဆေ မင် အီ ထာင် ဂေ ဟဲ့ မိုဝ်း အာငျာန် အီ မုး အာငျာန် ဒူအီ၊ တဲး ဂေ မာတ် ဒုဝ် ဂေ ပီ ဒူအီ ရိုဝ်၊ တဲး ဂေ ဝီ ပွိုန် အာငျာန် အီ မုး အီ မှာန်။ 19 ခုဝ်၊ ဆေ ဒူအီ ဒဲင် ကာဒါယ် နီ ထာင် အာငျာန် ဂေ ဟဲ့ ကျ ကာဆဝ်၊ ဒီ အာတ့် ဇဝ်ဖြာ န့ ယီ တူ မိုဝ်း ဒီခုဝ်။ န့ ဟဲ့ ဒဲမ် အုန် ခဲင် ဘပ် ဇဝ်ဖြာ တဝ်း၊ “ဇဝ်ဖြာ ဒီ မှေတ့် ဂေ ဒူအီ အီ မိုဝ်း အာငျာန်၊ အီ ထာင် ဂေ ဟဲ့ လွှက့်။” 20 ဒဲင် တီ န့ ဘော ဒဲမ် ပေါ န့ ပွါ တဝ်း၊ “ဇဝ်ဖြာ နပ် တူတ့် ပီ ခြာမ် ဂေ ဒူအီ အီ မိုဝ်း အာငျာန်။ အန် ယီ တဝ်း၊ န့ တူ မိုဝ်း ဒီခုဝ် မာဆေ။”

21 ကူပ် န့ ပါယ် တီ၊ ကွဲ့ တဲး အာဆေ အိူပ် ပီ ဘူင် ပီ ရန့် ဒူအီ။ ဆေ ဟီ ကာဖာ ဆီချာ၊ ခဲ့ မိုဝ်း ဒဲင် ကာဒါယ် နီ၊ ဘော မုး ဒူအီ၊ ဘော မုး ကြုဝ်ကြာမ်၊ ဒွန် မျုဝ် ဟဲ့ ဘဲန် တူတ့် ကြုဝ် ဘေ။ 22 ဘော ပီ မာနုဝ် ဒါ ဆာရာ အာပေါလူ၊ ဒါ ဆာရာ အာဖောလူန် ဘော ဒါ ဆာရာ အာခေဖာတ်၊^a န့ ဘဲန် အာဂျိုဝ် ဒီ ဘေ။ ဒဲင် တီ၊ ဘော ကာဒါယ် နီ၊ ဘော အာဆာက်၊ ဘော ဇဝ် မာရာန၊ ဘော ဘာန် ဒေါ တီ နီ၊ ဘော အီ ဒီ ဘဲန် နာ အာတ့် ဟာဝ်၊ ဇိုဝ် တီ ဒွန် မျုဝ် ဟဲ့ ဘဲန် တူတ့် ကြုဝ် ဘေ။ 23 ဘေ ယီ ကွယ် ရိုမ် ဒူပ် ဇဝ် ယေဆူ ဆေဆေ။ ဇဝ် ယေဆူ ယီ ကွယ် ရိုမ် ဒူပ် ဇဝ်ဖြာ ဆေဆေ။