1-7 အုဝ် အာပေါလူ အီ မုး ဒဲစေန့် ဇဝ် ယေဆူ၊ အုဝ် ဒဲမ် ပဲ့ နီ တိုယ် ဒီ ဘေ ဒူအီ ပီ ရွက့် ဇဝ်ဖြာ အီ ကွယ် ခဲင် မိူင် ရုဝ်မာ။ ဇဝ်ဖြာ ဟဲ့ ဂေဇူ အုဝ်၊ တဲး အုဝ် ဘဲန် ဒူအီ ပီ ရဝ်း ပီ တိုယ် ဇဝ် ယေဆူ၊ တဲး အုဝ် ကာလာင် လွင် ဇဝ် ယေဆူ အီ တဲး နဝ်း ဒူအီ ဒါခိုယ်။ ဆိန့် ဒေါ မွိုန်၊ အန် ဇဝ် ဟဲ့ တဲး ဂေ ဒူအီ အီ ဘျာန် ဂြုဝ်း ဇဝ်ဖြာ ဒဲမ် အုန် ကာဒိက် ဆတ်ဇာ ခဲင် ဘပ် အန် တဝ်း၊ နဝ်း ဖွိုမ် ဇဝ်ဖြာ ဟဲ့ ကာလာင် လွင် ဇဝ် ယေဆူ မုး ဂွန် ဇဝ်ဖြာ။ အန် ဟဲ့ ဘဲန် ဒူအီ အီ ဂွိုတ် တး ခဲင် ခြိုဝ် အာဒါဝိတ်။ န့ ဘော လိုဝ်း ဆီချာ လွင် မုး အန် ဂွန် ဇဝ်ဖြာ။ ခုဝ်၊ ပွုန် ဇဝ်ဖြာ အီ ဟဲ့ တာင် ကာဆဝ် ဟဲ့ တဲး အန် ဝီ ယိတ့် ဝီ အိမ် ဝါယ် ဟဲ့ ဟွတ့် ယမ် အန်။ အန် မိူဝ် ဟဲ့ ဘဲန် ဒါ ကာညာ အီ အိုပ် အေ။ ကူပ် ဇဝ် ယေဆူ တီ၊ ဇဝ်ဖြာ ဟဲ့ ကာဝေ အေ။ အန် မိူဝ် ဟဲ့ ဂေဇူ အုဝ်၊ တဲး အုဝ် ဘဲန် ဒူအီ ပီ ရဝ်း ပီ တိုယ် ဇဝ် ယေဆူ၊ တဲး အုဝ် ပွိုန် ဒီ စွယ် ဒူအီ ဒွန် မျုဝ် ဒွန် ခြိုဝ်၊ တဲး ဂေ ညှိုမ် အန် ဇဝ် ဘော ထူမ် ဂြုဝ်း အန် ကူပ် ညှိုမ် ဂေ ဒီ အန်။ ဇဝ်ဖြာ ဟဲ့ ရဝ်း ဘော ဘေ၊ တဲး ဘေ ဘဲန် ဒူအီ ပီ အိုပ် ဇဝ် ယေဆူ။ ခုဝ် အန် တီ အုဝ် ဒဲမ် ပဲ့ နီ တိုယ် ဒီ ဘေ ဒူအီ ပီ ရဝ်း ဇဝ်ဖြာ အီ ကွယ် ခဲင် မိူင် ရုဝ်မာ ဘောကာဂ့လျီတ်။ အန် ဇဝ် ဆီ တဲး ဘေ ဘဲန် ဒူအီ အန် အီ ဆီငါ ဘွတ်။ အုဝ် မှာန့်၊ တဲး ဇဝ်ဖြာ ဘော ဇဝ် ယေဆူ ဂေဇူ ဘေ ဘော ဒွါ နဝ်း ဂျီတ် ဒီ ဘေ။ ဇဝ်ဖြာ တီ ဘော မုး ဂုန့် အေ။ ဇဝ် ယေဆူ ဘော မုး ဒါ ကာညာ အီ အိုပ် အေ။

8 အာတ့် ဒီ ဒဲမ် အုဝ် မျုဝ် ဟဝ်၊ အုဝ် ဆီ တဲး ဘေ နပ်၊ အုဝ် ဒါင် ဂုင် ဂေဇူ ဒီ ဇဝ်ဖြာ အာဒါ ဘေ ဒွန် အီ။ ကူပ် ပဲ့ ဟဲ့ ဘူင် ဇဝ် ယေဆူ ဒီ အေ၊ အုဝ် ဟဲ့ ပွိုန် ဒါင် ဂုင် ဂေဇူ ဒီ ဇဝ်ဖြာ ပါယ် တီ။ ခုဝ်၊ ဂေ ဒူအီ အီ ကွယ် ဒွန် နာ ဒွန် ပ့လုဝ့်၊ ဂေ ကာလာင် လွင် ပီ ညှိုမ် ဘေ။ 9 လွင် ပီ ကာလာင် အုဝ် နီ ဘော ဇဝ်ဖြာ ဟဲ့ နပ်၊ န့ ဟဲ့ မုး ဟဲ့ မှာန်။ အုဝ် ဟဲ့ ဘူင် ဂါန် ဇဝ်ဖြာ၊ တဲး ဘော နဝ်း ဘော ဖွိုမ် အုဝ် ကာလာင် ဂြုဝ်း လွင် ဇဝ် ယေဆူ အီ တဲး နဝ်း ဒူအီ ဒါခိုယ်။ အန် ဇဝ် ဟဲ့ နပ်၊ အုဝ် ဟဲ့ လှုဝ်း ဘေ ဆေဆေ ဘော ဆာခိုဝ် ဒါင် ဘေ၊ တူ မိုဝ်း ဒေါ ပိဝ်။ 10 အုဝ် ဘော ဆာခိုဝ် ဆေဆေ၊ မှာန့် ဒီ ဇဝ်ဖြာ၊ ဆေ န့ ဘော မုး ပီ အိုင် အန်၊ တဲး အုဝ် ပွိုန် ဒီ စေဝ် တး လဲ ဒူင် ကွယ် ဘေ။

11 အုဝ် ဟဲ့ ဆီ ကာတုန့် ကာဆဝ် ဘေ၊ တဲး အုဝ် ပွိုန် ဒီ ဒွါ ပ့လူမ် ဒွါ ဟဲန့် ဒီ နဝ်း ဘေ၊ တဲး န့ ဘော ဟျီင် နဝ်း ဖွိုမ် ဘေ။ 12 ဆေ န့ ပါယ် တီ၊ ပီ ညှိုမ် ဘေ ဒီ ဝီ တဲး နဝ်း အုဝ် ဒါခိုယ်။ ဘော ပီ ညှိုမ် အုဝ် ဒီ ဝီ တဲး နဝ်း ဘေ ဒါခိုယ်။ 13 ဘေ ဘီနွင် အုဝ်၊ အုဝ် ဆီ တဲး ဘေ နပ် လွင် ဟဲ့ ခြာမ် အုဝ် ဒီ ဟာဝ် ဒူင် ကွယ် ဘေ ဘဲန် ဇေန့် ဘဲန် ဇေန့်။ အုဝ် ယီ တူ ပွိုန် ဒီ ဟာဝ် ကူပ် ဟဲ့ မိုဝ်း ဘဲန် မျုဝ် ဘဲန် မျုဝ် အီ ရန် အီ ဖျာက် အုဝ်။ ဂါန် ပီ ဘူင် အုဝ် ဟဲ့ ဘဲန် အာဂျိုဝ် ကာတဲ ဂေ ဒူအီ အာမျုဝ် ဟဝ်။ န့ ဟဲ့ တဲး ဂေ ဘဲန် ဒီဘဲ ဇဝ် ယေဆူ။ ဘော ကာတဲ ဘေ အုဝ် ဆီ တဲး န့ ဘဲန် အာဂျိုဝ် ပါယ် တီ။

14 ဇဝ်ဖြာ ဟဲ့ စ်ု အုဝ် ကာလာင် ဂြုဝ်း အီ တဲး နဝ်း ဒူအီ ဒါခိုယ်။ အုဝ် လုဝ် ကာလာင် ဂြုဝ်း တီ ဒီ ဒူအီ အာယူဒါ ဘော ဒီ ဒူအီ အာမျုဝ် ဟဝ်။ အုဝ် လုဝ် ကာလာင် ဘော ဒီ ဂေ အီ မိုဝ်း အာငျာန် ဘော ဒီ ဂေ အီ တူ မိုဝ်း အာငျာန်။ 15 ခုဝ်၊ အုဝ် ဟဲ့ မိုဝ်း နဝ်း ဆီ ကာလာင် ကာဆဝ် ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ် တီ၊ တဲး ဘော ဘေ ဒူအီ ရုဝ်မာ ထူမ်။

16 ဆေ န့ မုး လွင် လုဝ် ကာလာင် ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ် တီ၊ အုဝ် မိူဝ် တူ ယုဝ် တူ ဆာယ် အာဆေ။ ခုဝ်၊ ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ် တီ၊ န့ ဘော မိုဝ်း ပွုန် ဇဝ်ဖြာ။ န့ ဘော ပဲ ဒီ ချွတ် ဒွန် အီ အီ ညှိုမ် ဇဝ် ယေဆူ။ လွင် အန် တီ၊ အုဝ် ကာလာင် တဲး ဒူအီ အာယူဒါ ထူမ် ဒီ အာတ့် အီ ဟဝ်။ ဟဲ့ ဟွတ့်၊ ဘော ဂေ ဒူအီ အာမျုဝ် ဟဝ် ဝီ ပွိုန် ဒီ ထူမ်။ 17 ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ် တီ၊ န့ ဘော ဘျ လွင် နဝ်း ဆိူဝ် နဝ်း မှာန် ပီ ဒွါ ဇဝ်ဖြာ။ ဇဝ်ဖြာ ဒွါ နဝ်း ဆိူဝ် နဝ်း မှာန် တီ ကူပ် ညှိုမ် အေ။ အန် ဆီ တဲး အေ ညှိုမ် ဂြုဝ်း ဇဝ်ဖြာ တီ ဆေဆေ။ ခုဝ်၊ ခဲင် ဘပ် ဇဝ်ဖြာ န့ ဟဲ့ ဒဲမ် အုန် တဝ်း၊ “အာဆေ မိုဝ်း နဝ်း ဆိူဝ် နဝ်း မှာန် ပီ ဒွါ ဇဝ်ဖြာ၊ အန် ဒီ မိုဝ်း အာဆာက် ကာမာယ် ကူပ် ညှိုမ် အန်။”

18 ခုဝ်၊ ဇဝ်ဖြာ အီ ကွယ် ခဲင် ဂါင်ဟြာဝ်၊ အန် ဒီ ရူ ကာဆဝ် ဒီ ဂေ အီ ဟဲ့ လှိုဝ် ဂြုဝ်း အန်။ အန် ဒီ ရူ ကာဆဝ် ဘော ဒီ ဂေ အီ ဘူင် နာ ဟာယ် နာ မိူက် ကူပ် တဲး ဂေ နာ ဟာယ် နာ မိူက် ဝီ ဆီဘ့လိုက် နာ မုး နာ မှာန်၊ ကွဲ့ တဲး န့ လိုဝ်း။ 19 ခုဝ်၊ ဂေ ဟဲ့ ဟွတ့် နပ် တူတ့် ဒွန် မျုဝ် လွင် ဇဝ်ဖြာ။ ဇဝ်ဖြာ မိူဝ် ဟဲ့ တဲး န့ လိုဝ်း ဆီချာ ဒီ နဝ်း ဂေ။ 20 ဆိန့် ဒေါ ဖာန် ဘ့လေး ဇဝ်ဖြာ ကာဒါယ် ဘော ဂါင်ဟြာဝ် ဒူအီ ဟဲ့ ပွိုန် ယိုဝ် ဆီချာ လွင် ဇဝ်ဖြာ။ နဝ်း ဇဝ်ဖြာ ပီ တူ ပွိုန် ယိုဝ် ဒူအီ ဘော ပွုန် အန် အီ ကွယ် ဆေဆေ ဘော နဝ်း အန် အီ ဘွတ် ကာဆဝ်၊ န့ ဟဲ့ ဝီ လိုဝ်း ဆီချာ။ ပဲ့ ဟဲ့ ဖာန် ဘ့လေး ဇဝ်ဖြာ ဒွန် မျုဝ် ဟဲ့ တဲး န့ လိုဝ်း ဆီချာ လွင် ဇဝ်ဖြာ တီ။ ခုဝ်၊ ဒူအီ ဂေ တီ၊ ဂေ တူ ပွိုန် တဝ်း ဂေ တူ မိုဝ်း မှာပ် ကူပ် တူ နပ် ဂေ လွင် ဇဝ်ဖြာ။

21 ဂေ ပီ ဘော ဟဲ့ နပ် ဇဝ်ဖြာ၊ ဂေ ယီ တူ ရုဝ်ဆေ ဇဝ်ဖြာ ခဲ့ ကာအာပ် ရုဝ်ဆေ။ ပီ ဟဲ့ ဂေဇူ ဇဝ်ဖြာ မိူဝ်၊ ဂေ တူ လှုဝ်း။ ဂေ ဘော ဝီ ကာဒွါ့ ကာဖာ အီ တူ မိုဝ်း ဒီခုဝ် အီ ဒူပ် နာ အပ် ဝွင့်။ 22 ဂေ ပီ ဘော တဝ်း ဂေ မိုဝ်း အာငျာန် မိူဝ်၊ ဂေ ယီ ဘဲန် ဒူအီ အီ ရိုဝ် ကာဆဝ်။ 23 ဂေ ဟဲ့ ဝဲန် ဇဝ်ဖြာ အီ တူ နပ် ဒီ ယမ် အီ မိုဝ်း အာဖုင် ဒင်ခုဝ်၊ ဝီ ကာရဝ်း အာရိုပ် ဒူအီ အီ ဒီ လုဝ် ယမ်။ ဘော အာရိုပ် မာဆိမ်၊ အာရိုပ် ဒုဝ် ဆတ်ဒါဝါ အီ ဟာဝ် ဖွုန် ပ့လဝ်၊ ဘော အာရိုပ် ဒုဝ် အီ မွိုန် အီ လှန် ဒဲင် ကာဒါယ်၊ ဂေ ဝီ ဘူင်၊ တဝ်း န့ မုး ဇဝ်ဖြာ။

24 ကူပ် ဘူင် ဂေ ပါယ် တီ၊ ဇဝ်ဖြာ မိူဝ် ဝီ အာပ် တဲး ဂေ ဘူင် ဒူပ် အီ ဟာယ် အီ မိူက် အီ လဝ့် နဝ်း ဂေ၊ တဲး ဂေ ဒူပ် နဝ်း ကာဝါတ့် ဂေ၊ ဘူင် အီ မွှိုမ် ကာအိး အီ မွှိုမ် ဆာယ် ဒီ ဒုဝ် ဘူင့် ဂေ၊ တဲး န့ ဖျာက် ဆာရေ ဂေ။ 25 ဂေ မိူဝ် ဟဲ့ ဝဲန် နာ မုး နာ မှာန် လွင် ဇဝ်ဖြာ၊ ဝီ ညှိုမ် အီ ကာလုဝ်၊ အီ တူ မုး၊ တူ မှာန်။ ဇဝ်ဖြာ အာခါခ်ု မိူဝ် ဂေ တူ ကြိုပ်။ ဂေ ဝီ ကြိုပ် မီ ပီ ဖာန် ဘ့လေး ဇဝ်ဖြာ ဘဲန် မျုဝ် ဘဲန် မျုဝ်၊ တဲး န့ ကာဒါင် ဇဝ်ဖြာ အီ ဟဲ့ ကာအာပ် အိူပ် ဆေဆေ။ ဆာတူ။

26 ကူပ် ဘူင် ဂေ ပါယ် တီ၊ ဇဝ်ဖြာ မိူဝ် ဝီ အာပ် တဲး နဝ်း ကာဝါတ့် ဂေ ဝီ အိုပ် ဂေ။ ကွဲ့ တဲး ဂေ မိုဝ်း ဆာရေ။ ဘော အီဘိုန့် ဂေ အာဝ် ဟူ ဒူပ် ဟိတ် ဒူအီ။ အီဘိုန့် ဂေ တီ၊ ဘော နပ် ဒီ ဝီ လာယ် လုတ့် လာယ် လာယ် ကာတဲ ဂေ။ 27 ဘော အီမာယ် ဂေ ဘော ဘူင် ပါယ် တီ။ အာဝ် ဟူ ဒူပ် ဟိတ် ဒူအီ။ အီမာယ် ဂေ မိူဝ်၊ အာဝ် မိုဝ်း နဝ်း ဆီ ဝီ လာယ် အီဘိုန့် ဂေ။ ဂေ ဘော ဝီ မိုဝ်း နဝ်း ဆီ လာယ် လုတ့် လာယ် လာယ် ကာဆဝ် မီ ဒီ အီမာယ် နင်ဂန်။ ကူပ် ဟဲ့ ဘူင် အီမာယ် ဂေ အီ မွှိုမ် ကာအိး မွှိုမ် ဆာယ် တီ၊ ဂေ မိူဝ် လုဝ် ခမ် မှာပ် ဂေ၊ တဲး န့ ကာဒါန် ဒီ ပဲ့ ဟဲ့ ဘူင် ဂေ တီ။ 28 ဒဲင် တီ၊ ဒူအီ ဂေ တီ၊ ဂေ မိူဝ် တူ ဆီ နပ်၊ တူ ဆီ ဇေန့်ဇာ လွင် ဇဝ်ဖြာ။ ခုဝ်၊ ဇဝ်ဖြာ အာပ် တဲး ဂေ ကာဒွါ့ ကာဖာ မီ နာ ဟာယ် နာ မိူက်၊ ကွဲ့ တဲး ဂေ ပွိုန် ဒီ ဘူင် ခဲ့ ပီ ကာအာပ် ဂေ ဘူင်။ 29 အီ တူ မွှိုမ် ဘဲန် မျုဝ် ဘဲန် မျုဝ် မိူဝ် ဟဲ့ နုဝ့် ခဲင် နဝ်း ဂေ။ န့ ဘော မုး အီ မိူက် အီ ဟာယ် ဘော လောဖ၊ ဆီ ဖျာက် အီ ဟဝ်၊ လှယ့် အီ ဟဝ်၊ ဆီ ငဝ်း ယမ် အီ ဟဝ်၊ ဆီ ကာအေး ကာထဲန့် ဒီ အီ၊ ကာလုဝ် အီ ဟဝ်၊ ကာယွင့် အီ ဟဝ် ဘော ခဲ စာဝ် အီ ဟဝ်။ 30 ဂေ ဘော ဆီ ကာလာင် မီ ဂြုဝ်း အီ နဲန အီ ဟဝ်။ ဂေ ဘော မုး ဒူအီ ပီ ဇွင့် ဇဝ်ဖြာ။ ဂေ ဘူင် တဲး န့ ဆဝ် ဒီ နဝ်း အီ။ ဂေ ဘော မုး ဒူအီ ပီခိုက် ပီစာ ဘော ဟြေတ့် ဒီ ဘူင် အီ ဟာယ် ပီ တူ ဘူင် အီ ဟဝ်။ ဂြုဝ်း ဂုန့် မာ ဂေ မိူဝ်၊ ဂေ တူ ထူမ်။ 31 ဂေ မိူဝ် တူ နပ် ဒီ ကာဖာ မာဆေ၊ တူ ခမ် ကာဒိက် ဆတ်ဇာ၊ တူ နပ် ဒီ ကာဝေ အီ ဟဝ်၊ နပ် မီ ဒီ ဘူင် နာ စီစိဝ် ဆေဆေ။ 32 ဒူအီ ဂေ တီ၊ ဂေ ဟဲ့ နပ်၊ ဇဝ်ဖြာ ဟဲ့ ဒမ် အုန် တဝ်း၊ ဒူအီ အီ ဘူင် ဇိုဝ် တီ၊ ဂေ ဒီ လုဝ် ယမ်။ မာလဲ၊ ဂေ ယီ ဝီ ဘူင် ဟာဝ်၊ တူ စူ။ ဒဲင် တီ၊ ဂေ ဘော အိူပ် ဒူအီ အီ ဘူင် ဇိုဝ် တီ။