အိုယ် မဲ အာထေအုဝ်ဖီလုဝ်၊ ဘပ် ပီ ဒဲမ် အုန် အုဝ် ဒီ မဲ ခါ အာတ့် အုဝ် ဟဲ့ ဒွိုမ် ဒဲမ် လွင် ပဲ့ ဟဲ့ ဘူင် ဇဝ် ယေဆူ ဘော ပဲ့ ဟဲ့ မာနုဝ် အန် ဒီ အီ။ 2 အူ ဆိန့် ဒေါ ဂုဝ် အန် ကော ဇမ် ဆီငဲ ဒေါ ဝီ လေး အန် ဒဲင် ကာဒါယ် နီ၊ ဝီ ဟုဝ့် ဂါင်ဟြာဝ်၊ အုဝ် ဟဲ့ ဟွတ့် ဒဲမ် အုန် တူတ့် ဒွန် မျုဝ် လွင် အန် တီ။ အာတ့် ဟုဝ့် ဇဝ် ယေဆူ ခဲင် ဂါင်ဟြာဝ်၊ နဝ်း ဖွိုမ် ဇဝ်ဖြာ ဟဲ့ စ်ု ဇဝ် ယေဆူ ကာလာင် ဂြုဝ်း ဒီ ဒီဘဲ အန်၊ အီ မုး ဒူအီ ပီ ရဝ်း ပီ တိုယ် အန်။ အန် ကာလာင် ဒီ ဂေ၊ တဲး ဂေ နပ်၊ မာဆေ ပီ လုဝ် ဂေ ဘူင်။ 3 ပန် တီ ဝါယ် ဟဲ့ ဟွတ့် ယမ် ဇဝ် ယေဆူ၊ ဝါယ် ဟဲ့ ဟွတ့် ဝီ ယိတ့် ဝီ အိမ် အန်၊ အန် ဟဲ့ ဝီ ကာပ့လုး ဒီ ဒီဘဲ အန်။ အန် မိူဝ် ဘူင် ဒွန် မျုဝ်၊ တဲး ဂေ နပ် ဆီချာ လွင် ဇဝ် ယေဆူ အာဝ် ဟူ ယမ်၊ ဟဲ့ ဝီ ယိတ့် ဝီ အိမ်။ အာဒါ ဖွုန် ဂိုဝ် ဆီငဲ အန် ဝီ ကာပ့လုး ဒူင် ကွယ် ဂေ၊ တဲး ဂေ ပွိုန် ဒီ ယိုဝ် အန်။ ဒေါ အန် တီ အန် ကာလာင် ဒီ ဂေ လွင် အာခြာဝ် ဒီ တး အိုပ် ဇဝ်ဖြာ ကာဒါယ်။

4 အူ ဆီငဲ၊ ဒေါ ကွယ် ရိုမ် ဇဝ် ယေဆူ ဒူပ် ဒီဘဲ အန်၊ အန် ဝီ တဝ်း ဒီ ဂေ၊ “ဘေ မ့ပါဝ် လေး ဟာဝ် ရေတ့် မိူင် ယေရူဆာလဲမ်၊ တဲး ဘေ နှဝ့်၊ တဲး ဇဝ်ဖြာ အီ မုး ဂုန့် အုဝ် ကော ဘူင် ပီ ဒွိုမ် ကာလာင် အန် ဒီ ဘေ။ 5 အုဝ် ဟဲ့ ဒွိုမ် ကာလာင် လွင် ကာဒိက် ဆတ်ဇာ ပဲ့ ဟဲ့ ဒွါ ဇဝ်ဖြာ ဒီ ဘေ။ အုဝ် ဟဲ့ ဒွိုမ် တဝ်း၊ ‘ဒါ ဆာရာ အာယောဟာန် ဟဲ့ စိုပ် ဒူအီ ခဲင် အိုမ်။ အာဝ် လှေန့်၊ အုဝ် ယီ ဒီ ဒွါ နဝ်း ဖွိုမ် ဇဝ်ဖြာ ဒီ ဘေ၊ တဲး န့ ကော နုဝ့် ခဲင် နဝ်း ဘေ။’”

6 ဒေါ ကွယ် ဇဝ် ယေဆူ ဒူပ် ဒီဘဲ အန်၊ ဂေ ဝီ ဒီမွှတ် အန် တဝ်း၊ “မဲ ဇဝ်၊ မဲ ဒီ ဝီ ဒွါ ဂေ ဒူအီ အီဆာရေလ အိုပ် မိူင် ဂေ ဒေါ တီ နီ။း”

7 ဇဝ် ယေဆူ ဝျီ့ ဂြုဝ်း ဂေ တီ။ အန် တဝ်း၊ “ဘေ တူ လုဝ် နပ် အာခြာဝ် အန်၊ ဆီငဲ အန်။ ဇဝ်ဖြာ အီ မိုဝ်း ပွုန် တာင် ဟဲ့ ဟွတ့် ဘ့လေး အုန် ရာင် အန် ပန် မှဝ် အာခြာဝ် အန် တီ ဒီ တး ဇမ်။ 8 န့ ယီ မုး ဘေ၊ နဝ်း ဖွိုမ် ဇဝ်ဖြာ ဒီ လိုပ် ခဲင် နဝ်း ဘေ၊ တဲး ဘေ မိုဝ်း ပွုန် တာင်။ ဝါယ် အန် တီ ဘေ ဒီ ကာလာင် တဲး ဂေ အီ ဟဝ် နပ် လွင် အုဝ်။ ပါယ် တီ၊ ဘေ ဒီ ကာလာင် လွင် အုဝ် ခဲင် မိူင် ယေရူဆာလဲမ် ဘော မိူင်၊ ဘော ခဲင် အိူင် ယူဒါ ဘော မိူင် ဆာမာရီ ဘော မိူင်။ ဟဲ့ ဟွတ့် ဘေ ဒီ ဘော ကာလာင် လွင် အုဝ် တဲး ကော ဇမ် ဒွန် နာ ဒွန် ပ့လုဝ့် ဒဲင် ကာဒါယ်။”

9 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ ဒီ ဒီဘဲ အန်၊ ဂေ ဝီ ယွတ် ဘော ယိုဝ် အန် ဟုဝ့် နာ ဒဲင်။ န့အု ဟဲ့ တး၊ ပ့လိုက် အန်၊ ဒိုဝ်း အန်၊ တဲး အန် ဟုဝ့် ဂါင်ဟြာဝ်၊ ကွဲ့ ဟူ တဲး ဂေ ပွိုန် ဒီ ယိုဝ် အန်။

10 ဝါယ် အန် တီ ဂေ ယွတ် တွင့် ဂါင်ဟြာဝ်။ ဒေါ အန် တီ န့ ဝီ မိုဝ်း ဒူအီ အာ ဝီ၊ ဂါယ် တာ ခြိုင် လုယ်၊ တး ဇမ် ဒီ အာတ့် ဂေ။ ဂါယ် ဝီ တဝ်း၊ 11 “အိုယ် ဘေ ဒူအီ အီ ကွယ် အိူင် ဂါလီလေ၊ မှဝ် န့ ပါယ် ပီ ယွတ် တွင့် ဘေ ဂါင်ဟြာဝ်။း ဇဝ် ယေဆူ အီ ဟဲ့ လေး ဒူင် ကွယ် ဘေ၊ ဟုဝ့် ဂါင်ဟြာဝ်၊ အန် ပီ ဒီ ဝီ တး လူင်။ ဘေ ဟဲ့ ယိုဝ် အန် ဟုဝ့် ပါယ် မှဝ်၊ အန် ဒီ ဝီ တး လူင် ပါယ် တီ။”

12 ဝါယ် အန် တီ ဂေ ဒီဘဲ ဇဝ် ယေဆူ ဝီ လူင် ဒဲင် နွန် ဟေ နာမန်၊ ဟာဝ် ဝေန့် ခဲင် မိူင် ယေရူဆာလဲမ်။ နွန် တီ ဂါယ် မိူင် ယေရူဆာလဲမ်၊ ဂါယ် လာယ် ကာတူင့် ခဲ့ ပီ ခ့ဝါင် ဂေ ဟာဝ် ဆီငဲ ဒီလှဝ်။ 13 ဂေ ဟဲ့ ဟွတ့် ဇမ် မိူင် ယေရူဆာလဲမ်၊ ဂေ ဝီ လိုပ် ခဲင် ကာင် အူ ကာင်၊ ဟုဝ့် ကွယ် ခဲင် ဟူင် တာင် အီ ကွယ် ခြွင့် နာ ဒဲင်။ ခဲင် ဟူင် တီ၊ ဂေ ဝီ ကွယ် ရိုမ်။ န့ မုး အာပေတာရူ၊ အာယောဟာန်၊ အာယာကူပ်၊ အာအန်ဒါရူ၊ အာဖီလိပ်၊ အာထုဝ်မာတ်၊ အာဘာထုဝ်လုဝ်မုဝ်၊ အာမာထဲ ဘော အာယာကူပ် အီ မုး ဂွန် အာလာဖဲ၊ အာဆီမူန် အီ ဟဲ့ ဒွိုမ် ဘဲန် ဒါ ဇူန် ဘော အာယူဒတ် အီ မုး ဂွန် အာယာကူပ်။ 14 ဂေ ဘောကာဂ့လျီတ် ကွယ် ရိုမ် ခဲင် ဟူင် တွိုန်။ ဂေ မိူဝ် ဟဲ့ ဘဲန် အူ နဝ်း၊ ကွယ် ဆာခိုဝ် ဆေဆေ။ ဘော အီဘိုန့် မင် အီ၊ ဘော နာင် မာရီ၊ အီ မုး မာ ဇဝ် ယေဆူ ဘော ဝါ အန်၊ ဂေ ကွယ် ရိုမ် ဒူပ် ဂေ ဒီဘဲ ဇဝ် ယေဆူ။

15 ဒေါ အန် တီ အာပေတာရူ ဝီ ယိတ့်၊ ဝီ ကာလာင် ဂြုဝ်း ဒီ ဂေ။ (န့ ဘော မိုဝ်း ဒူအီ ကာဘက် အူ မာယဝ်း ဒီ အာ ဂိုဝ် ဝီ ကွယ် ရိုမ် ခဲင် ဟူင် တွိုန်။) 16 အန် တဝ်း၊ “အိုယ်၊ ဘေ ဘီနွင်၊ ဒေါ တီ နီ၊ န့ ဟဲ့ ဘဲန် ပီ ဒွိုမ် ဒဲမ် အုန် ဇဝ်ဖြာ ခဲင် ဘပ် အန်။ ဒေါ မွိုန်၊ နဝ်း ဖွိုမ် ဇဝ်ဖြာ ဟဲ့ တဲး ခုန်ဒီခမ် အာဒါဝိတ် ကာလာင် ဂြုဝ်း လွင် အာယူဒတ် အီ ဟဲ့ နှဲ န့တေန့် ဒီ ဂေ ဒူအီ အီ မှေတ့် ဇဝ် ယေဆူ။ 17 ခဲင် ဖိုင် ယေ ဒီဘဲ ဇဝ် ယေဆူ၊ ဟဲ့ ဘာ့ ဘော အန် အူ ဝီ။ ဂါန် ပီ ဘူင် ယေ၊ ဘော အန် ဟဲ့ ဘူင်။ ဒေါ တီ နီ အန် ယီ ဟဲ့ ယမ်။” 18 ခဲ့ ပွိုန် အန် ရွိုန်၊ ဒေါ စွယ် အန် ဂေ ရန်ဆူ ဇဝ် ယေဆူ တွိုန်၊ အန် ဝီ ဟာ စိုဝ်း မာန် အူ ပ့လုဝ့်၊ ဝီ ဟာဝ် ဟွယ် မဲင် အန်၊ ဝီ စုဝ်း ဆတ့် ဝတ့် အန် ကာယာတ့် မာတုး လေး တူတ့် ခဲင် မာန် တီ။ 19 ဂေ ဒူအီ ကွယ် ခဲင် မိူင် ယေရူဆာလဲမ်၊ ဂေ ဒွန် အီ နပ် လွင် အန် တီ။ ခုဝ်၊ ဂေ ဝီ ဒဲ့ မာန် တီ စိူဝ် “ဒူင် လေး နှာမ်”။ ခဲင် ဂြုဝ်း ဂေ န့ လေး “အာကေဒါမာ”။

20 အာပေတာရူ ဝီ တဝ်း၊ “ခဲင် ဘပ် ဇဝ်ဖြာ န့ ဟဲ့ ဒဲမ် အုန် လွင် မာန် တီ။ ခဲင် ဘပ် ပီ မှုဝ် ထမ် န့ တဝ်း၊ ‘ကွဲ့ တဲး န့ မိုဝ်း ဒူအီ ကွယ် ဒီ တီ၊ တဲး န့ ဘဲန် ဒူင် ငွင့်။’ န့ မိူဝ် တဝ်း၊ ‘ဂါန် ပီ လုဝ် ဘူင် အန်၊ တဲး ပေါ အူ ဝီ ဘူင်။’ 21 ခုဝ် အန် တီ ယေ လုဝ် ရဝ်း ဒူအီ ပေါ အူ ဝီ၊ တဲး အန် လိုပ် ခဲင် ဖိုင် ယေ။ 22 အာဆေ ဟဲ့ ဒွိုမ် ဟာဝ် ရိုမ် ဒူပ် ယေ၊ ဒေါ ဆီ ကွယ် ဇဝ် ယေဆူ ကာတဲ ယေ၊ အာဆေ ဟဲ့ ကွယ် ရိုမ် ဒူပ် ယေ အူ ဆိန့် ဒေါ ဂုဝ် အန်၊ ဒေါ ကွယ် ဒါ ဆာရာ အာယောဟာန် အီ စိုပ် ဒူအီ ခဲင် အိုမ်၊ ကော ဇမ် ဆီငဲ ဝီ လေး ဇဝ် ယေဆူ ဒူင် ကွယ် ယေ၊ ဝီ ဟုဝ့် ဂါင်ဟြာဝ်၊ အာဆေ ဟဲ့ ယိုဝ် တူတ့် ဒွန် မျုဝ် ပီ ဘူင် ဇဝ် ယေဆူ ဒေါ အန် တီ၊ ယေ လုဝ် ရဝ်း ဒူအီ ဇိုဝ် တီ အူ ဝီ၊ တဲး အန် ဝီ လိုပ် ဖိုင် ယေ။”

23 အာပေတာရူ ဟဲ့ ဟွတ့် ကာလာင် ဂြုဝ်း တီ၊ ဂေ ဝီ ရဝ်း ဒူအီ အာ ဝီ။ အူ ဝီ၊ အန် စိူဝ် အာယုဝ်ဆဲပ်။ အန် စိူဝ် ဘော အာဘာဆာဘာ။ ဂေ ဘော တဲး အန် စိူဝ် အာယူထူ။ ပေါ အူ ဝီ၊ အန် စိူဝ် အာမာထီ။ 24 ဂေ ဟဲ့ ဟွတ့် ရဝ်း ဂါယ် အာ ဝီ တီ၊ ဂေ ဝီ ဆာခိုဝ် ဇဝ်ဖြာ တဝ်း၊ “အိုယ် မဲ ဇဝ်၊ မဲ နပ် တူတ့် နဝ်း ဂေ ဒူအီ ဒွန် အီ။ တဲး မဲ ဘျ ဒီ ယေ၊ အာ ဝီ တီ၊ အာဆေ မုး ဒူအီ ပီ ရဝ်း မဲ၊ 25 တဲး အန် ဝီ ကပ် ဆိူပ် ဂါန် ပီ ဒွိုမ် ဘူင် အာယူဒတ် တွိုန်။ အာယူဒတ် ဟဲ့ ဟွတ့် ဟာဝ် ဒူင် ပီ လုဝ် အန် ဟာဝ်။” 26 ဂေ ဟဲ့ ဟွတ့် ဆာခိုဝ် ပါယ် တီ၊ ဂေ ဝီ ကာတာမ် ရဝ်း အာမာထီ တွိုန်။ ဂေ တဝ်း၊ အန် မုး ဒူအီ ပီ ရဝ်း ပီ တိုယ် ဇဝ် ယေဆူ၊ တဲး အန် ဝီ လိုပ် ခဲင် ဖိုင် ဂေ၊ တဲး န့ ဝီ နုဝ့် ဂိုဝ် ဒီ အာ ဝီ။