1 န့ ဘော နုဝ့် ဖန် ဂိုဝ် ဆီငဲ ဝါယ် ဝီ ယိတ့် ဝီ အိမ် ဇဝ် ယေဆူ၊ န့ ဘော ဇမ် ဆီငဲ ဘူင် ဂေ ဘ့လွယ် ဖေန်ထေခူတ်။ ဆီငဲ အန် တီ၊ ဂေ ဒူအီ ညှိုမ် ဇဝ် ယေဆူ၊ ဂေ ဘောကာဂ့လျီတ် ကွယ် ရိုမ် အူ ပ့လုဝ့်။ 2 ဒေါ အန် တီ န့ မိုဝ်း ဟမ် တာင် တး အူ ဇေန့်။ န့ ပီ ခုန် တာင်။ ဟမ် တီ၊ န့ လေး ခဲင် ဂါင်ဟြာဝ်၊ တး လိုပ် ခဲင် ကာင် ဒူင် ကွယ် ဂေ၊ တဲး န့ ဒီငိုန့် ခဲင် ကာင် ဘော ကာင်။ 3 ဂေ ဒူအီ အီ ကွယ် ခဲင် ကာင် တွိုန်၊ ဂေ ဘော ယိုဝ် ဘ့လာင် အီ ပီ ပ့လဲ့ ငဝ်၊ ကာယဝ်း လူင် ကွယ် ဒဲင် ဂိန့် ဂေ။ 4 နဝ်း ဖွိုမ် ဇဝ်ဖြာ မိူဝ် တး လိုပ် ခဲင် နဝ်း ဂေ ဒွန် အီ၊ အီ ကွယ် ရိုမ် ခဲင် ကာင် တွိုန်။ ဂေ မိူဝ် စုး ဒီ ကာလာင် ဂြုဝ်း ပီ တူ ဒွိုမ် နပ် တူ ဒွိုမ် ယိုဝ် ဂေ။ န့ မုး နဝ်း ဖွိုမ် ဇဝ်ဖြာ၊ အီ တဲး ဂေ ကာလာင် ဂြုဝ်း ဇိုဝ် တီ။

5 ဒေါ အန် တီ န့ မိုဝ်း ဒူအီ အာယူဒါ အီ ဟဲ့ တး ဒွန် ပ့လုဝ့် ဒွန် နာ၊ တး ဇမ် ခဲင် မိူင် ယေရူဆာလဲမ်။ ဂေ မုး ဒူအီ အီ ဒူပ် ဒါရာ ဇဝ်ဖြာ။ 6 ဒေါ ယိုဝ် ဂေ ဟမ် တာင် တွိုန်၊ ဂေ ဒူအီ ကိူန် တး ကာဇု အူ ဇေန့် ဒူင် ကွယ် ဂေ ဒူအီ အီ ညှိုမ် ဇဝ် ယေဆူ။ ဂေ ဘဲန် ဝီ ဘဲန် ဝီ မိူဝ် အာမ် ကာဆဝ်။ ခုဝ်၊ ဂြုဝ်း ပီ ထူမ် ဂေ မုး ဂြုဝ်း ပီ ဒွိုမ် နပ် ဂေ ဆိန့် ဒီတဲတ် ဂေ။ 7-8 ဂေ မိူဝ် တဝ်း၊ “မှဝ် န့ ပါယ် ဂြုဝ်း ပီ ထူမ် အေ၊ န့ ဝီ ဘဲန် ဂြုဝ်း အာမျုဝ် အေ ရာင် အာဆေ ရာင် အန်။ ဒူအီ ဂေ တီ၊ ဂေ ဒွန် အီ မုး ဒူအီ အာမျုဝ် ဂါလီလေ။ ဂေ တူ နပ် ဒီ ကာလာင် ဂြုဝ်း အေ။ 9 အေ ဒူအီ အီ ကွယ် ဒီ နီ၊ အေ မုး ဒူအီ အာမျုဝ် ဖာထေ၊ မေဒီ၊ အေလာမ် ဘော အာမျုဝ် မေဆုဝ်ဖုဝ်ထာမ်၊ အာမျုဝ် ယူဒါ၊ အာမျုဝ် ကာပါဒုဝ်နီ၊ အာမျုဝ် ဖူန်ထူ ဘော အာမျုဝ် အာဆီယာ။ 10 န့ ဘော မိုဝ်း ဒူအီ အီ တး ခဲင် မိူင် ဖူဂီ၊ မိူင် ဖမ်ဖူလီ၊ မိူင် အဲဂိုပ်၊ ဘော ဂေ ဒူအီ အီ ကွယ် ကာတတ် မိူင် လီဘီ ဘော မိူင် ကူရေန့်၊ ဘော ဂေ ဒူအီ အီ တး မိူင် ရုဝ်မာ။ 11 ကာတဲ အေ ဒူအီ ဇိုဝ် တီ၊ န့ မိုဝ်း ဒူအီ အာယူဒါ ဘော ဒူအီ အာမျုဝ် ဟဝ်။ အေ ဘောကာဂ့လျီတ် ယီ ကြိုပ် ဇဝ်ဖြာ ပီ ကြိုပ် ဂေ ဒူအီ အာယူဒါ။ န့ ဘော မိုဝ်း ဒူအီ တး မိူင် ကြေထာ ဂေ ဒူအီ တး မိူင် အာရာပ်။ အေ ဒွန် အီ ဇိုဝ် တီ၊ အေ ယီ နပ် ဒီ ထူမ် ဂြုဝ်း ဒါ ဆာရာ တီ။ အေ ဘော နပ် ဒီ ထူမ် လွင် ပဲ့ ဟဲ့ ဘူင် ဇဝ်ဖြာ နာ မွှိုမ် အာမ် ကာဆဝ်၊ တဲး န့ လေး ခဲင် ဂြုဝ်း အေ။ အေ ဒွန် အီ နပ် ဒီ ထူမ် ဂြုဝ်း အာမျုဝ် အေ ရာင် အာဆေ ရာင် အန်။” 12 ဂေ ဟဲ့ ဟွတ့် ကာလာင် ပါယ် တီ၊ ဂေ ဘောကာဂ့လျီတ် အာမ် ကာဆဝ်။ ဂေ ယီ တူ နပ် မာဆေ န့ မုး လွင် အန် တီ။ ဂေ ကာမွုန် တဝ်း၊ “မာဆေ န့ မုး၊ ပီ ပဲ ဂေ ဒီ ဘူင် ဇိုဝ် တီ။း” 13 န့ ဘော မိုဝ်း မင် အီ၊ ဂေ မိူဝ် ကာလာင် ဂြုဝ်း အီ မွှိုမ် ကာညး ဒီ ဂေ ဒီဘဲ ဇဝ် ယေဆူ။ ဂေ တဝ်း၊ “ဂေ ဒူအီ တီ၊ ဂေ ဟဲ့ ဒျီင် ပဝ်း၊ ဂေ ဟဲ့ ယိုတ့် ပဝ်း။”

14 ဝါယ် အန် တီ အာပေတာရူ ဘော ဂေ ဒီဘဲ ဇဝ် ယေဆူ ဂိုဝ် ဒီ အူ ဝီ၊ ဂေ ဘော ယိတ့် စွင့် ကာလာင် ဂြုဝ်း ဒီ ဂေ ဒူအီ ကိူန်။ အာပေတာရူ ကာလာင် ဂြုဝ်း တာင်၊ တဲး ဂေ ဒူအီ ကိူန် နပ် ဒီ ထူမ်။ အန် တဝ်း၊ “အိုယ်၊ ဘေ ဒူအီ အာယူဒါ၊ ဘေ ဒူအီ ကွယ် မိူင် ယေရူဆာလဲမ် ဒွန် အီ၊ အုဝ် ဒီ ကာလာင် ဂြုဝ်း ဒီ ဘေ၊ တဲး ဘေ ထူမ် ဆီချာ ဂြုဝ်း အုဝ်။ 15 ဒူအီ ဂေ နီ၊ ဂေ တူ မိုဝ်း ဒီ ယိုတ့် ပဝ်း။ အာဝ် မှာန် ပီ ကာလာင် ဘေ။ ဒေါ တီ နီ၊ န့ ဆီ ရာမ် စေဝ် ဆွ့ နုဝ့် ဒိမ် နာရီ၊ ညှမ် မိုဝ်း အီ ဒျီင် ပဝ်း။ 16 ဒေါ တီ နီ ဘေ ပွိုန် ဒီ ယိုဝ်၊ မာဆေ န့ မုး၊ ပီ ဒွိုမ် ကာလာင် ဒါ ဆာရာ အာယုဝ်အေလ တွိုန်။ အန် မုး ဒူအီ အီ ဘျာန် ဂြုဝ်း ဇဝ်ဖြာ။ 17 ဇဝ်ဖြာ ဟဲ့ ဒွိုမ် ကာလာင် ဒီ အန် တဝ်း၊

ဒါ ဆာရာ အာယုဝ်အေလ ဟဲ့ ဒွိုမ် ဘျာန် ဂြုဝ်း ဇဝ်ဖြာ ပါယ် တီ။”

22 အာပေတာရူ ဟဲ့ ဟွတ့် ကာလာင် ပါယ် တီ၊ အန် ဝီ တဝ်း၊ “ဘေ ဒူအီ အီဆာရေလ၊ တဲး ဘေ ထူမ် ဂြုဝ်း ပီ ကာလာင် အုဝ် ဒီ ဘေ။ ဇဝ် ယေဆူ အီ ဟဲ့ တး မိူင် နာဆာရေတ့် တွိုန်၊ အန် မုး ဒူအီ ပီ ရဝ်း ပီ တိုယ် ဇဝ်ဖြာ။ ခုဝ် အန် တီ ဇဝ်ဖြာ ဟဲ့ တဲး ဇဝ် ယေဆူ နပ် ဒီ ဘူင် နာ မွှိုမ် အာမ် ကာဆဝ်၊ တဲး န့ ဘျ ပွုန် အန် ဒီ ဘေ။ ဘေ မိူဝ် နပ် ဆီချာ လွင် အန် တီ။ 23 ခါ အာတ့် ဟဲ့ လှေန့်၊ ဇဝ်ဖြာ ဟဲ့ ဟွတ့် ပွက့် အုန် လွင် အာဆာက် ဇဝ် ယေဆူ၊ တဲး ဘေ ပွိုန် ဒီ အိုပ် အန်။ ဟဲ့ ဟွတ့်၊ ဘေ မိူဝ် ဟဲ့ စ်ု ဂေ ဒူအီ တူ မွှိုမ်၊ တဲး ဂေ စွယ် ဘေ၊ တဲး ဘေ ပွိုန် ဒီ ငဝ်း အာဆာက် အန်၊ ဒွက် ဒိုက် အန် ဒီ ရွင့် ကာဝဲ့၊ တဲး အန် ယမ်။ 24 ဝါယ် အန် တီ ပွုန် ဇဝ်ဖြာ ယီ အွင် ဇဝ် မာရာန။ ဇဝ် မာရာန အာဝ် ပဲ ဒီ အိုပ် ဇဝ် ယေဆူ။ ပွုန် ဇဝ်ဖြာ ဟဲ့ တဲး အန် ဝီ ယိတ့် ဝီ အိမ်၊ အာဝ် ဟူ တဲး အန် ယမ်။ 25 ဘော ခုန်ဒီခမ် အာဒါဝိတ် တွိုန် ဟဲ့ ဒွိုမ် ကာလာင် လွင် အာဆာက် ဇဝ် ယေဆူ။ အန် ဟဲ့ ဒွိုမ် တဝ်း၊

ခုန်ဒီခမ် အာဒါဝိတ် ဟဲ့ ဘျာန် ဂြုဝ်း ဇဝ်ဖြာ ပါယ် တီ။”

29 ဟဲ့ ဟွတ့် ပန် တီ အာပေတာရူ ဝီ တဝ်း၊ “အိုယ်၊ ဘေ ဘီနွင်၊ အုဝ် ဒီ ကာလာင် ဂြုဝ်း ဆိူဝ် ဒီ ဘေ လွင် ခုန်ဒီခမ် အာဒါဝိတ် အီ မုး ဒူအီ အာမျုဝ် အေ၊ အီ ကွယ် ခါ အာတ့် အန် ဟဲ့ ဟွတ့် ယမ်။ ဂေ ဟဲ့ ဟွတ့် ဒိပ် ဒုဝ် ဘူင့် အန်။ ဒူင် အွုန် အန်၊ န့ ဆီ ကွယ်၊ ဆီ ပွိုန် ယိုဝ် ကော ဇမ် အာတိုဝ်။ 30 ခုန်ဒီခမ် အာဒါဝိတ် ယီ မုး ဒူအီ အီ ဘျာန် ဂြုဝ်း ဇဝ်ဖြာ။ အန် မိူဝ် နပ်၊ ဇဝ်ဖြာ ဟဲ့ ဒွိုမ် ဒွါ ကာဒိက် ဆတ်ဇာ ဒီ အန် လွင် လှုက်လှာန် အန် အူ ဝီ ဒီ ဘဲန် ခုန်ဒီခမ် တာင် ပီ အန်။ 31 ခုဝ် အန် တီ န့ လေး ဆီချာ၊ အာဒါဝိတ် ဟဲ့ နပ် ဒီ အာတ့် အာခြာဝ် အီ ဒီ တး၊ န့ ဒီ ဘဲန် ပါယ် မှဝ်။ အန် ဟဲ့ နပ် ဒီ ကာလာင် ဒီ အာတ့် လွင် ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။ ဝါယ် ယမ် အန်၊ အန် ဒီ ဝီ ယိတ့် ဝီ အိမ်။ အန် ဘော နပ် ဒီ တဝ်း၊ ဇဝ် ယေဆူ တူ ပွိုန် ယိုဝ် မိူင် မာရာန။ ဒုဝ် ဘူင့် အန် မိူဝ် တူ ယိုဝ် အုး အမ် ခဲင် ကာဒဝ် ဘာရေဝ်။ 32 ဒေါ တီ နီ၊ ဇဝ်ဖြာ ဟဲ့ ဟွတ့် တဲး ဇဝ် ယေဆူ ဝီ ယိတ့် ဝီ အိမ်။ ယေ အီ ကွယ် ဒီ အာတ့် ဘေ၊ ယေ မိူဝ် ဟဲ့ ယိုဝ် တူတ့် ဒွန် မျုဝ် ပီ ဘူင် ဇဝ်ဖြာ။ ယေ မိူဝ် ဟဲ့ နပ် ဒီ ကာလာင် ဆက်ဆေ လွင် အန် တီ။ 33 ဝါယ် အန် တီ အန် ဟဲ့ ဝီ ဟုဝ့် ဂါင်ဟြာဝ်၊ ကွယ် ဒီ ခူပ် ဘ့လာက် အာအး ဇဝ်ဖြာ။ ဇဝ်ဖြာ အီ မုး ဂုန့် အန်၊ အန် ဟဲ့ ဝီ ဒွါ နဝ်း ဖွိုမ် အန် ဒီ ဇဝ် ယေဆူ။ ဇဝ် ယေဆူ မိူဝ် ဟဲ့ ဒွါ နဝ်း ဖွိုမ် ဇဝ်ဖြာ ဒီ ယေ ဒွန် အီ။ အာတီ န့ မုး လွင် ဒါင် အန်၊ ပီ ယိုဝ် ဘေ ဒေါ တီ နီ။ န့ ဟဲ့ ဘဲန် တူတ့် ဒွန် မျုဝ် ပီ ဒွိုမ် ကာလာင် ဇဝ်ဖြာ ဒီ ဒူအီ အီ ဘျာန် ဂြုဝ်း အန်။ 34 ခုန်ဒီခမ် အာဒါဝိတ် တီ တူ ဒွိုမ် ဟုဝ့် ဂါင်ဟြာဝ်။ အန် ယဲ့ ဟဲ့ ဒွိုမ် တဝ်း၊

36 ခုဝ် အန် တီ ဘေ ဒူအီ အီဆာရေလ၊ တဲး ဘေ ဒွန် အီ နပ် ဆီချာ ပီ တဝ်း အုဝ် ဒေါ တီ နီ။ ဇဝ် ယေဆူ အီ မုး ဒူအီ ပီ ငဝ်း ဝဲန် ဘေ ဒဲင် ရွင့် ကာဝဲ့၊ အန် မုး ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။ ဇဝ်ဖြာ မိူဝ် ဟဲ့ တဲး အန် ဘဲန် ဒါ ကာညာ အီ ဒီ အိုပ် ကာဒါယ်။”

37 အာပေတာရူ ဟဲ့ ဟွတ့် ကာလာင် ဂြုဝ်း တီ၊ န့ ဘော လိုပ် ခဲင် နဝ်း ဂေ ဒူအီ ကိူန်။ ဂေ ဝီ ဒီမွှတ် အာပေတာရူ ဘော ဂေ ဒူအီ ပီ ရဝ်း ပီ တိုယ် ဇဝ် ယေဆူ တဝ်း၊ “အိုယ် ဘေ ဘီနွင် ယေ၊ မာဆေ ပီ လုဝ် ဘူင် ယေ။း”

38 အာပေတာရူ ဝီ တဝ်း၊ “ဘေ ဒွန် အီ လုဝ် ဝဲန် နဝ်း ဘြိမ် ဘေ၊ ဒိုဝ်း နဝ်း ကာမာယ် ပီ ဒွါ ဇဝ်ဖြာ ဒီ ဘေ။ ဟဲ့ ဟွတ့်၊ ဘေ လုဝ် ခမ် ဒီ စိုပ် ခဲင် အိုမ်၊ တဲး အီ နပ်၊ ဘေ ဟဲ့ ညှိုမ် လိုပ် ဇဝ် ယေဆူ၊ တဲး ဇဝ် ယေဆူ ဂဝ်း ဝဲန် မှာပ် ဘေ။ ဝါယ် အန် တီ ဇဝ် ယေဆူ ဒီ ဒွါ နဝ်း ဖွိုမ် ဇဝ်ဖြာ ဘော ဒီ ဘေ။^a 39 ဇဝ်ဖြာ ဟဲ့ ဒွိုမ် ဒွါ ကာဒိက် ဆတ်ဇာ လွင် ဒီ ဒွါ အန် နဝ်း ဖွိုမ် အန်၊ တဲး န့ လိုပ် ခဲင် နဝ်း ဒူအီ။ ကာဒိက် ဆတ်ဇာ တီ၊ အန် ဒီ ဒွါ ဒီ ဒွန် အီ။ ဘော ဘေ၊ ဘော ဂွန် ဘေ၊ ဘော ဂေ ဒူအီ အီ ကွယ် ကာတူင့်၊ ဂေ ဒူအီ ပီ ဒီ ဒဲ့ ဇဝ်ဖြာ၊ ဂေ ဒွန် အီ ဇိုဝ် တီ၊ ဂေ ဒီ ပွိုန် ပီ ဒွိုမ် ကာဆဲန့် ဇဝ်ဖြာ ဒီ ဒွါ။”

40 အာပေတာရူ ဟဲ့ မာနုဝ် ဂေ ပါယ် တီ။ အန် မိူဝ် ကာလာင် ဂြုဝ်း ဒွန် မျုဝ် ဒီ ဂေ၊ တဲး န့ ကာဆုး ဂေ၊ တဲး ဂေ တဲး ဇဝ်ဖြာ ချွတ် ဘော ဂေ၊ တဲး ဂေ လေး တ ဖိုင် ဒူအီ အီ တူ မွှိုမ်၊ အီ ကွယ် ဇာတ် နီ။ 41 ဝါယ် အန် တီ ဂေ ဒူအီ အီ ညှိုမ် ဂြုဝ်း ပီ ကာလာင် အန်၊ ဘော တဲး န့ လိုပ် ခဲင် နဝ်း၊ ဂေ ဒွန် အီ ဝီ ဟာဝ် တဲး ဒါ ဆာရာ စိုပ် ဂေ ခဲင် အိုမ်။ ဆီငဲ အန် တီ၊ န့ မိုဝ်း ဒူအီ ကာဘက် အူယ် ဟြဲန့် ဝီ၊ အီ လိုပ် ခဲင် ဖိုင် ဂေ ဒူအီ အီ ညှိုမ် ဒူပ် ဇဝ် ယေဆူ။

42 ဖိုင် ဂေ ဒူအီ အီ ညှိုမ် ဇဝ် ယေဆူ၊ ဂေ မိူဝ် ကွယ် ရိုမ် ဆေဆေ၊ ထူမ် ပီ မာနုဝ် ဂေ ဒူအီ ပီ ရဝ်း ပီ တိုယ် ဇဝ် ယေဆူ၊ ကာမွုန် လွင် အန် တီ။ ဂေ မိူဝ် ကာဘက် ခါမုန်၊ ဘူင် ပီ ဒွိုမ် ဘျ ဇဝ် ယေဆူ ဂေ ဘူင်။ ဂေ မိူဝ် ကွယ် ရိုမ်၊ ဆာခိုဝ်။ 43 ဂေ ဒူအီ ပီ ရဝ်း ပီ တိုယ် ဇဝ် ယေဆူ၊ ဂေ မိူဝ် ဘူင် နာ မွှိုမ် အာမ် ကာဆဝ် အီ ဘျ ခဲ့ တာင် ပွုန် ဇဝ်ဖြာ။ ဂေ ဒူအီ ကိူန် ဘော အာမ် ဘော ယုဝ် ကာဆဝ် ပီ ပါယ် ပွုန် ဇဝ်ဖြာ။ 44 ဂေ ဒူအီ အီ ညှိုမ် ဇဝ် ယေဆူ၊ ဂေ ဘဲန် အူ နဝ်း၊ ကွယ် ရိုမ်။ 45 ကြုဝ်ကြာမ် ဂေ၊ ဂေ ဘော လာယ် ကာဆာင် ကာတဲ ဂေ။ ဒူင် နာ ဘော မာန် ဂေ၊ ဂေ ဝီ ယွင့် တူတ့်၊ ဝီ လာယ် ကာဆာင် ခဲ့ ပီ ပွိုန် ဂေ။ ခဲ့ လုဝ် ဒွန် အီ၊ ဂေ ဒွါ ဒီ အန်။ 46 ဒွန် ဆီငဲ ဂေ မိူဝ် တး ကာဇု ခဲင် ဇေရူပ် အီ ကွယ် ခဲင် ဝဲင် ဟုဝ် ဇဝ်ဖြာ တွိုန်။ ဟဲ့ ဟွတ့်၊ ဒေါ ကွယ် ရိုမ် ဂေ ခဲင် ကာင် ဂေ၊ ဂေ ဝီ ကာဘက် ခါမုန် ပီ ပီ ဒွိုမ် ဘူင် ဘျ ဇဝ် ယေဆူ ဒီ ဂေ။ ဒေါ ဘူင် ဂေ ပါယ် တီ ဒွန် မျုဝ်၊ နဝ်း ဂေ ဟဲ့ ဒါခိုယ် ဘော ဘဲန် နဝ်း ဆိူဝ်၊ နဝ်း မှာန် ဒီ ဂေ။ 47 ဂေ ဘော အိူပ် ဇဝ်ဖြာ။ ဒွန် အီ ခဲင် မိူင် မိူဝ် အိုင် ဂေ။ ဒွန် ဆီငဲ ဒွန် ဆီငဲ၊ ဇဝ်ဖြာ မိူဝ် ချွတ် ဒူအီ တဲး ဂေ တး ညှိုမ် လိုပ် ဇဝ် ယေဆူ။