1 အူ ဆီငဲ အာပေတာရူ ဂါယ် အာယောဟာန် ဟာဝ် လိုပ် ခဲင် ဟုဝ် ဇဝ်ဖြာ။ ဒေါ လိုပ် ဂါယ်၊ န့ မုး အာခြာဝ် ဆာခိုဝ် ဂေ ဒူအီ အာယူဒါ။ န့ မုး ဝါယ် ဟူမ် အူယ် နာရီ။ 2 ဒေါ အန် တီ န့ မိုဝ်း ဒူအီ ဆဝ် အူ ဝီ။ အူ ဆိန့် ဒေါ ဂွိုတ် အန်၊ ပ့လဝ် အန် ဟဲ့ ယမ်။ ဒွန် ဆီငဲ ဂေ ဟဲ့ ကာဂွတ် တး အန် ဒီ အာတ့် မာလုဝ်း ဟုဝ် ဇဝ်ဖြာ၊ တဲး အန် မှာန့် ဒီ ဂေ ဒူအီ အီ တး လိုပ် ခဲင် ဟုဝ် ဇဝ်ဖြာ၊ တဲး ဂေ ကာဝေ အန်၊ ဒွါ ရွိုန် ဒီ အန်။ မာလုဝ်း ဒူင် ကွယ် အန် တီ၊ န့ စိူဝ် မာလုဝ်း စှိတ်။ 3 ဒူအီ တီ၊ ဒေါ ယိုဝ် အန် အာပေတာရူ ဂါယ် အာယောဟာန် တး လိုပ် ခဲင် ဟုဝ် ဇဝ်ဖြာ၊ အန် ဝီ မှာန့်၊ တဲး ဂါယ် ဒွါ ရွိုန် ဒီ အန်။ 4 အာပေတာရူ ဂါယ် အာယောဟာန် ယီ ယွတ် ဆီချာ အန်။ အာပေတာရူ ဝီ တဝ်း၊ “တဲး မဲ ယွတ် ယာယ်။” 5 ဟဲ့ ဟွတ့် တဝ်း ပါယ် တီ၊ ဒူအီ ဆဝ် ဝီ ယွတ် ဂါယ်။ အန် ထာင် ဂါယ် ဒီ ဒွါ ရွိုန် ဒီ အန်။

6 အာပေတာရူ ယီ တဝ်း၊ “ရွိုန် ဂါယ် ခြိဝ် အုဝ် တူ မိုဝ်း။ ခဲ့ ပီ မိုဝ်း အုဝ်၊ အုဝ် ယီ ဒွါ ဒီ မဲ။ ဇဝ် ယေဆူ၊ အီ တး မိူင် နာဆာရေတ့်၊ အီ မုး အန် ဇဝ် ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ၊ ကူပ် ဂါဝ် အုဝ် ပွုန် ဇဝ် ယေဆူ တီ၊ တဲး မဲ ယိတ့် ဟာဝ်။” 7 အန် ဟဲ့ ဟွတ့် ကာလာင် ဂြုဝ်း တီ၊ အန် မိူဝ် ပါ ဒဲ အာအး ဒူအီ ဆဝ် တီ၊ စွယ် အန် ယိတ့်။ ပန် တီ ပ့လဝ် အန် ဘော ကာဆွင့် ပ့လဝ် အန် ဝီ မိုဝ်း ပ့လူမ် အူ ဇေန့်။ 8 အန် ဘော ယိတ့် ဟာဝ် အူ ဇေန့်။ ဟဲ့ ဟွတ့် ပန် တီ အန် ဝီ ဒူပ် အာပေတာရူ ဟာဝ် လိုပ် ခဲင် ဟုဝ် ဇဝ်ဖြာ။ အန် ဘော ဝိန် ဒီ လဲ ဘော ခူယ်။ အန် ဘော အိူပ် ဇဝ်ဖြာ၊ ကာလာင် လွင် ပွုန် ဇဝ်ဖြာ။ 9 ဂေ ဒူအီ ကိူန် ဘော ယိုဝ် အန် ဟာဝ် ဘော အိူပ် ဇဝ်ဖြာ။ 10 ဂေ ဘော လှုဝ်း အာရိုပ် အန် ဘော ဝီ နပ်၊ အန် မုး ဒူအီ အီ ဒွိုမ် ကွယ် ဒီ အာတ့် ဟုဝ် ဇဝ်ဖြာ ဘာင် မာလုဝ်း စှိတ် တွိုန်၊ မှာန့် ရွိုန် ဒီ အီ။ ပန် တီ ဂေ ဘော အာမ် ကာဆဝ် လွင် အန် တီ။

11 ဒူအီ တီ ကွယ် ကာတတ် အာပေတာရူ ဂါယ် အာယောဟာန်။ ဂေ ဒူအီ ကိူန် မိူဝ် အာမ် ကာဆဝ်။ ဂေ ဘောကာဂ့လျီတ် ဝီ တး ကာဇု ခဲင် ဇေရူပ် တာင် အီ စိူဝ် ဇေရူပ် ခုန်ဒီခမ် အာဆာလုဝ်မုဝ်။ 12 ဒေါ ဝီ ယိုဝ် အာပေတာရူ ဂေ ဒူအီ ကိူန် ဟဲ့ တး၊ အန် ဝီ ကာလာင် ဂြုဝ်း ဒီ ဂေ။ အန် တဝ်း၊ “ဘေ ဒူအီ အီဆာရေလ၊ မှဝ် န့ ပါယ် ပီ အာမ် ဘေ အာတီ။း မှဝ် န့ ပါယ် ပီ ယွတ် ဘေ ဒီ ယာယ်။း ဘေ ထာင် န့ မုး ပွုန် ယာယ် ဘော နာ ဘွတ် ယာယ် အီ ဟဲ့ ပီကဲန် ဒူအီ တီ။ အာဝ် မုး ပါယ် တီ။ 13 န့ မုး ဇဝ်ဖြာ ပီ ကြိုပ် ဂေ ဂုန့် ဒင် အေ အီ မုး ဒါ အာဘြာဟမ်၊ အာဆဲက် ဘော အာကူပ်၊ အန် ဟဲ့ ဘျ အာဖုင် ဒင်ခုဝ် ဇဝ် ယေဆူ ဒီ ဘေ။ ဇဝ် ယေဆူ ယီ မုး ဒဲစေန့် ဇဝ်ဖြာ။ ဇဝ် ယေဆူ တီ ဘေ ဟဲ့ အာပ် ဒီ အာဖီလာတ် တွိုန်။ အာဖီလာတ် ဟဲ့ တဝ်း ဒီ ဘ့လေး အန်။ ဘေ ယီ တဝ်း၊ ဘေ တူ လုဝ် အန်။ 14 ဘေ ဟဲ့ ဝဲန် ဒူအီ အီ မွှိုမ် အီ ဆီငါ ဘွတ်၊ ဘေ ဟဲ့ ဝီ မှာန့်၊ တဲး အာဖီလာတ် ဘ့လေး ဒူအီ ဟာယ်၊ ဒူအီ အီ ဒွိုမ် ငဝ်း အာဆာက် အီ။ 15 ဝါယ် အန် တီ ဘေ ဟဲ့ ဝီ ငဝ်း အာဆာက် ဒူအီ တီ၊ အီ မုး အန် ဇဝ် အီ နပ် ဒီ ဒွါ အာဆာက် ဒီ ဒူအီ ဒွန် အီ။ ဇဝ်ဖြာ ယီ ဟဲ့ တဲး ဇဝ် ယေဆူ တီ ဝီ ယိတ့် ဝီ အိမ်။ ယာယ် မိူဝ် ဟဲ့ ယိုဝ် တူတ့် လွင် အန် တီ။ 16 ဒူအီ ပီ ယိုဝ် ဘေ နီ၊ ဘေ ဒွန် အီ ဟဲ့ နပ် အာဆေ အန် မုး။ အန် ဟဲ့ ညှိုမ် ဇဝ် ယေဆူ မိုဝ်း ပွုန်။ ဟဲ့ ဟွတ့်၊ ဇဝ် ယေဆူ ဟဲ့ ပီကဲန် အန်၊ တဲး ပ့လဝ် အန် ဝီ မိုဝ်း ပ့လူမ်။ န့ မုး ပွုန် ဇဝ် ယေဆူ ဘော နဝ်း ညှိုမ် ပီ ဒွါ ဇဝ် ယေဆူ ဒီ ဒူအီ နီ၊ န့ ဟဲ့ တဲး အန် ကဲန်၊ တဲး ဘေ ဒွန် အီ ပွိုန် ဒီ ယိုဝ်။

17 အိုယ် ဘေ ဘီနွင် အုဝ်၊ အုဝ် ဟဲ့ နပ်၊ ဘော ဘေ ဘော ဒါ တာင် ဘေ၊ ဒေါ ဝဲန် ဘေ ဇဝ် ယေဆူ၊ ဘေ တူ နပ် အာဆေ အန် မုး။ 18 ပါယ် တီ၊ ဇဝ်ဖြာ ယီ ဟဲ့ တဲး န့ ဘဲန် တူတ့် ဒွန် မျုဝ် ပီ ဒွိုမ် ကာလာင် အန် ဒီ ဒူအီ အီ ဘျာန် ဂြုဝ်း ဇဝ်ဖြာ။ ဇဝ်ဖြာ ဟဲ့ ဒွိုမ် ကာလာင် ဒီ ဂေ ဒွန် အီ လွင် ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။ အန် လုဝ် ခမ် ဒုက် ဘဲန် မျုဝ် ဘဲန် မျုဝ်။ 19 ခုဝ် အန် တီ ဒေါ တီ နီ၊ ဘေ လုဝ် ဝဲန် နဝ်း ဘြိမ် ဘေ၊ ဒိုဝ်း နဝ်း ကာမာယ် ပီ ဒွါ ဇဝ်ဖြာ ဒီ ဘေ၊ တဲး ဇဝ်ဖြာ ဂဝ်း ဝဲန် မှာပ် ဘေ၊ တဲး အန် ဝီ ဒွါ အာခြာဝ် ဒီ မိုဝ်း ဘေ နဝ်း ဒါခိုယ်။ 20 ဟဲ့ ဟွတ့်၊ တဲး ဒူအီ ပီ ရဝ်း ပီ တိုယ် ဇဝ်ဖြာ တး ဒီ ဘေ၊ တဲး အန် ချွတ် ဘော ဘေ။ ဒူအီ တီ ဟဲ့ မုး ဇဝ် ယေဆူ၊ ဝီ ပီ စ်ု ဇဝ်ဖြာ တဲး အန် ချွတ် ဘေ။ 21 ဒေါ တီ နီ၊ ဇဝ် ယေဆူ ကွယ် ခဲင် မိူင် ဂါင်ဟြာဝ်၊ တဲး န့ ကော ဇမ် အာခြာဝ် ဒီ မ့ပြာယ် ဇဝ်ဖြာ တဲး ဒွန် မျုဝ် ဝီ ဆီချာ ပီ ဘြိမ်၊ ပီ ဒေါ မွိုန်။ ပါယ် တီ၊ န့ ဒီ ဘဲန် ပီ ပီ ဒွိုမ် ကာလာင် ဇဝ်ဖြာ ဒီ ဒူအီ အီ ဘျာန် ဂြုဝ်း အန် ခါ အာတ့် ဒေါ ဟဲ့ လှေန့် ကာဆဝ်။

22 ဒါ ဆာရာ အာမုဝ်ဆဲ တွိုန် မိူဝ် ဟဲ့ ဒွိုမ် တဝ်း၊ ‘ဇဝ်ဖြာ အီ မုး ဇဝ်ဖြာ ပီ ကြိုပ် ဘေ၊ အန် ဒီ ဝီ တိုယ် ဒူအီ အီ ဘျာန် ဂြုဝ်း ဇဝ်ဖြာ အူ ဝီ ဒီ ဘေ။ အန် ဒီ ဘဲန် ပီ အုဝ်။ အန် ဒီ တး ကာတဲ ဘေ ဘော မုး ဒူအီ အာမျုဝ် ဘေ။ ဘေ လုဝ် ထူမ် တူတ့် ဂြုဝ်း ပီ ကာလာင် အန် ဒီ ဘေ ဒွန် မျုဝ်။ 23 အာဆေ ယီ တူ ထူမ် ဒူပ် ဂြုဝ်း ပီ ကာလာင် အန်၊ အုဝ် ဒီ ဝဲန် အန်၊ ကွဲ့ ဟူ တဲး အန် ကွယ် ကာတဲ ဒူအီ အာမျုဝ် အန်။’

24 အူ ဆိန့် ဒေါ ကွယ် အာဆာမူအေန် တွိုန်၊ ဂေ ဒူအီ အီ ဘျာန် ဂြုဝ်း ဇဝ်ဖြာ ဒွန် အီ၊ ဂေ မိူဝ် ဟဲ့ ကာလာင် လွင် အာခြာဝ် တီ အီ ဟဲ့ ဇမ် ဒေါ တီ နီ။ 25 ဂြုဝ်း ပီ ကာလာင် ဇဝ်ဖြာ ဒီ ဂေ ဒါ တာင် ဘေ ဒေါ မွိုန်၊ န့ မုး ဂြုဝ်း ပီ ကာလာင် ဇဝ်ဖြာ ဘော ဒီ ဘေ ဒေါ တီ နီ။ ဘော ကာဒိက် ဆတ်ဇာ ပီ ဒွိုမ် ဒွါ ဇဝ်ဖြာ ဒီ ဂုန့် ဒင် ဘေ၊ န့ မုး ကာဒိက် ဆတ်ဇာ ပီ ဒွါ ဇဝ်ဖြာ ဘော ဒီ ဘေ။ ဇဝ်ဖြာ ဟဲ့ ဒွိုမ် ကာလာင် ဂြုဝ်း ဒီ ဒါ အာဘြာဟမ် တွိုန်။ အန် ဟဲ့ တဝ်း၊ ‘န့ ဒီ မိုဝ်း လှုက်လှာန် မဲ အူ ဝီ၊ အန် ဒီ မွင့်ကာရာ တဲး ဒီ ဒူအီ ဒွန် မျုဝ် ဒဲင် ကာဒါယ်။’ 26 ဒေါ တိုယ် ဇဝ်ဖြာ ဂွန် အန်၊ တဲး အန် တး ဇမ် ဒဲင် ကာဒါယ် နီ၊ ဇဝ်ဖြာ ဟဲ့ တဲး အန် ဇမ် ဒူင် ကွယ် ဘေ ဒီ အာတ့်၊ တဲး အန် မွင့်ကာရာ ဒွါ ဒီ ဘေ၊ တဲး ဘေ ဒွန် အီ ဘော ဝဲန် နာ တူ မွှိုမ် ပီ ဘူင် ဘေ။” ခဲ့ တီ အာပေတာရူ ကာလာင် ဂြုဝ်း ဒီ ဂေ ဒူအီ ကိူန် အီ ကွယ် ခဲင် ဟုဝ် ဇဝ်ဖြာ။