1 အာပေတာရူ ဂါယ် အာယောဟာန်၊ ဒေါ ကာလာင် ဂါယ် ဂြုဝ်း ဒီ ဒူအီ ကိူန်၊ န့ မိုဝ်း ဂေ ဒူအီ အီ လှူ ဒီ ဇဝ်ဖြာ ဘော ဒူအီ အီ အိုပ် ဂေ ဒူအီ အီ ဘ်ု ဟုဝ် ဇဝ်ဖြာ ဘော ဂေ ဒူအီ ခဲင် ဖိုင် ဆာဒူခဲ မင် အီ၊ ဂေ ဟဲ့ တး ဒူင် ကွယ် အာပေတာရူ ဂါယ် အာယောဟာန် တွိုန်။ 2 ဂေ ဟဲ့ ရူ ကာဆဝ် ဒီ ဂါယ်။ ဂေ တူ အိုင် ဂြုဝ်း ပီ ကာလာင် ဂါယ် ဒီ ဒူအီ ကိူန် လွင် ဇဝ် ယေဆူ ဟဲ့ ဝီ ယိတ့် ဝီ အိမ်။ 3 ခုဝ် အန် တီ ဂေ ဝီ မှေတ့် ဂါယ်၊ ခြွင့် ဂါယ် ခဲင် ကာပိုမ်။ ကူပ် ဟဲ့ ရာမ် အပ်၊ ဂေ တဲး ဂါယ် ကွယ် နှဝ့် ခဲင် ကာပိုမ်၊ တဲး န့ ဇမ် ပါ ခဲညှာ။ 4 န့ ယီ မိုဝ်း ဒူအီ ကိူန်၊ ဂေ ဟဲ့ ဟွတ့် ထူမ် ဂြုဝ်း ပီ ကာလာင် ဂါယ်၊ ဂေ ဝီ ညှိုမ် ခဲင် နဝ်း။ ဂေ ဒူအီ ညှိုမ် တီ၊ ဂေ အီမာယ် ဟဲ့ မုး ကာဘက် ဖန် ဟြဲန့် ဝီ။

5 ပါ ခဲညှာ၊ ဂေ ဒူအီ အိုပ် အိူင် ယူဒါ ဘော ဂေ ဒါ တာင် ဘော ဂေ ဒါ ဆာရာ အီ မာနုဝ် ဒါရာ ယူဒါ၊ ဂေ ဟဲ့ တး ကာဇု ခဲင် မိူင် ယေရူဆာလဲမ်။ 6 ဘော ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ၊ အီ စိူဝ် အာနာတ်၊ ဘော အာကာယ်ဖာ ဂေ အာယောဟာန်၊ အာလေဆန်ဒါ၊ ဘော ဂေ အီ မုး လှုက်လှာန် ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ၊ ဂေ ဘောကာဂ့လျီတ် ဟဲ့ တး ကာဇု။ 7 ဂေ ဟဲ့ ဝီ ဒဲ့ အာပေတာရူ ဂါယ် အာယောဟာန်၊ တဲး ဂါယ် တး ဇမ် ဒီ အာတ့် ဂေ။ ဂေ ဝီ ဒီမွှတ် ဂါယ် တဝ်း၊ “အာဆေ ဟဲ့ တဲး ဘာယ် ဘူင် ဇိုဝ် တီ။း ပွုန် အာဆေ ဘာယ် ဟဲ့ ဒိုဝ်း ဘူင် ဇိုဝ် တီ။း”

8 ပန် တီ နဝ်း ဖွိုမ် ဇဝ်ဖြာ ကော နုဝ့် ခဲင် နဝ်း အာပေတာရူ။ ဟဲ့ ဟွတ့်၊ အန် ဝီ ဝျီ့ ဂြုဝ်း ဂေ တီ။ အန် တဝ်း ဒီ ဂေ၊ “အိုယ် ဘေ ဒူအီ အီ အိုပ် မိူင် ဘော ဘေ ဒါ တာင် ခဲင် မိူင် အီဆာရေလ၊ 9 အာတိုဝ် ဘေ ဟဲ့ တဝ်း ဒီ ဒီမွှတ် ယာယ် လွင် ပဲ့ ဟဲ့ စွယ် ယာယ် ဒီ ဒူအီ ဆဝ် တွိုန်။ ဘေ ဟဲ့ တဝ်း၊ ဘေ ဆီ နပ်၊ မှဝ် ယာယ် ဟဲ့ ပါယ် ဒီ ပီကဲန် အန်။ 10 ခုဝ် အန် တီ အုဝ် ဒီ ဝီ ကာလာင်၊ တဲး ဘော ဘေ ဘော ဂေ ဒူအီ အီဆာရေလ ဒွန် အီ နပ် ဆီချာ၊ န့ ဟဲ့ မုး ပွုန် ဇဝ် ယေဆူ အီ ဟဲ့ တဲး ဒူအီ တီ ဝီ ကဲန်၊ တဲး အန် ပွိုန် ဒီ ကွယ် ဒီ အာတ့် ဘေ ဒေါ တီ နီ။ ဇဝ် ယေဆူ တီ မုး ဒူအီ တး မိူင် နာဆာရေတ့်။ ဘေ မိူဝ် ဟဲ့ ငဝ်း ဝဲန် အန်၊ ဘူင် တဲး အန် ယမ် ဒဲင် ရွင့် ကာဝဲ့။ ဟဲ့ ဟွတ့်၊ ဝါယ် ယမ် အန်၊ ဇဝ်ဖြာ ဟဲ့ တဲး အန် ဝီ ယိတ့် ဝီ အိမ်။ ဇဝ် ယေဆူ တီ ဟဲ့ တဲး ဒူအီ ဆဝ် နီ ဝီ ကဲန်။ 11 လွင် ဇဝ် ယေဆူ တီ ဟဲ့ ဒွိုမ် ကာလာင် ခဲင် ဘပ် ဇဝ်ဖြာ တဝ်း၊

12 န့ ဘော ပါယ် တီ။ န့ မိုဝ်း မီ ဇဝ် ယေဆူ အူ ကာဒင် အီ ပဲ ဒီ ချွတ် ဒူအီ။ အာဝ် မိုဝ်း အာဆေ ဒဲင် ကာဒါယ် အီ ပဲ ဒီ ချွတ် ဒူအီ။”

13 ဒေါ ကာလာင် အာပေတာရူ ဂြုဝ်း တီ၊ ဂေ ဒါ တာင် ဝီ ယိုဝ်၊ ဘော အန် ဘော အာယောဟာန် ဟဲ့ ယ ဒီ ကာလာင် ဂြုဝ်း ဆိူဝ် ဒီ ဂေ။ ဂေ ဘော အာမ် ကာဆဝ်။ ဂေ ယီ နပ်၊ ဒူအီ ဂါယ် တီ တူ ဒွိုမ် ဟေန် ပဲ့ ခဲင် ဇူင်။ ဂါယ် မုး ဒူအီ တူ နပ် မာဆေ။ ဂါယ် ယီ ယ ဒီ ကာလာင် ဂြုဝ်း ဒီ ဂေ။ ဂေ ယီ ဝီ လှုဝ်း၊ ဂါယ် ဟဲ့ ဒွိုမ် ကွယ် ရိုမ် ဒူပ် အာယေဆူ တွိုန်။ 14 ကူပ် ယိုဝ် ဂေ ဒူအီ ပဲ့ ဟဲ့ ပီကဲန် အာပေတာရူ ဂါယ် အာယောဟာန် ဟဲ့ ကွယ် ရိုမ် ဒူပ် ဂါယ်၊ ဂေ တူ ပွိုန် ကာလာင် တဝ်း၊ အာဝ် မှာန်၊ အန် တူ ကဲန်။ 15 ပန် တီ ဂေ ဒါ တာင် ဝီ စ်ု အာပေတာရူ ဂါယ် အာယောဟာန်၊ တဲး ဂါယ် လေး တ ဒူင် ကွယ် ဂေ။ ဟဲ့ ဟွတ့်၊ ဂေ ဝီ လာယ် ဆင်ချာင် လွင် အန် တီ။ 16 ဂေ တဝ်း၊ “မာဆေ ပီ လုဝ် ဘူင် အေ ဒီ ဒူအီ အာ ဝီ နီ။း ဂေ ဒွန် အီ၊ အီ ကွယ် မိူင် ယေရူဆာလဲမ်၊ ဂေ မိူဝ် ဟဲ့ နပ် လွင် ဂါယ် ဟဲ့ ဘူင် နာ မွှိုမ် အာမ် ကာဆဝ်။ အေ မိူဝ် တူ ပွိုန် ကာလာင် တဝ်း၊ အာဝ် မှာန်၊ အာဝ် မုး။ 17 အေ ယီ တူ ဆီ တဲး ဂေ ဒူအီ အီဆာရေလ ဒွန် အီ နပ် လွင် အန် တီ။ ခုဝ်၊ အေ လုဝ် ကာလာင် ဂြုဝ်း ကာဘျုဝ် ဒီ ဂါယ်၊ တဲး ဂါယ် ဝီ မိုဝ်း နဝ်း ယုဝ်။ ပေါ အူ စိုပ်၊ ကွဲ့ ဟူ တဲး ဂါယ် ဂါဝ် ပွုန် အာယေဆူ တီ၊ ဝီ ကာလာင် ဒီ အီ ဟဝ်။”

18 ဂေ ဟဲ့ ဟွတ့် ကာလာင် ပါယ် တီ၊ ဂေ ဝီ ဒဲ့ အာပေတာရူ ဂါယ် အာယောဟာန်၊ တဲး ဂါယ် ဝီ တး ဒူင် ကွယ် ဂေ။ ဂေ ဝီ စ်ု ဂါယ်၊ ကွဲ့ ဟူ တဲး ဂါယ် ဝီ ဒိုဝ်း ပွုန် အာယေဆူ တီ၊ ဝီ ကာလာင် ဒီ အီ ဟဝ်၊ ကွဲ့ ဟူ တဲး ဂါယ် ဝီ မာနုဝ် မာဆေ လွင် အာယေဆူ တီ။ 19 အာပေတာရူ ဂါယ် အာယောဟာန် ယီ ဝီ တဝ်း၊ “ဘေ လုဝ် ဇေန့်ဇာ ရာင် ဘေ၊ ဆေ ယာယ် ဝဲန် ဂြုဝ်း ဇဝ်ဖြာ၊ ဝီ ထူမ် ဒူပ် ဂြုဝ်း ဘေ။ န့ မှာန်၊ တူ မှာန်။ 20 အီ မုး ယာယ်၊ ယာယ် တူ ပွိုန် ကွယ် ပီယေန့်၊ တူ ပွိုန် ကွယ် ဆီတွင့် တူ ဂြုဝ်း။ ခဲ့ ပီ ယိုဝ် ငါယ် ယာယ်၊ ခဲ့ ပီ ထူမ် ဟျုဝ့် ယာယ်၊ ယာယ် လုဝ် ဝီ ကာလာင်၊ တဲး အီ နပ်။”

21 ဂါယ် ဟဲ့ ဟွတ့် ကာလာင် ပါယ် တီ၊ ဂေ ဒါ တာင် ဝီ ကာလာင် ဂြုဝ်း မွှိုမ် ယုဝ် ဒီ ဂါယ်။ ဟဲ့ ဟွတ့် ဂေ ဝီ တဲး ဂါယ် လေး ဟာဝ် ဒူင် ကွယ် ဂေ။ ဂေ ယီ တူ နပ် မှဝ် ဒီ ပါယ် ဒီ ဒမ် မှာပ် ဒီ ဂါယ်။ ကူပ် ဝီ အိူပ် ဂေ ဒူအီ ကိူန် ဇဝ်ဖြာ လွင် ပဲ့ ဟဲ့ ဘူင် ဂါယ်၊ ဂေ ဒါ တာင် တူ ဝီ ယ ဘူင် မာဆေ ဒီ ဂါယ်။ 22 ဒူအီ အီ ဟဲ့ ကဲန် တွိုန်၊ အာဆာက် အန် ဟဲ့ နုဝ့် ဖွုန် ဂိုဝ် လူယ်။

23 ဂေ ဟဲ့ ဟွတ့် ဘ့လေး အာပေတာရူ ဂါယ် အာယောဟာန်၊ တဲး ဂါယ် ဝေန့် ဒူင် ကွယ် ဂါယ်။ ဂါယ် မိူဝ် ဟာဝ် ဆိူဝ် ဒီ ဒူအီ ခဲင် ဖိုင် ဂါယ်။ ဂါယ် ဝီ ခဲ တူတ့် ဒွန် မျုဝ် ပီ ကာလာင် ဂေ ဒါ တာင် အီ အိုပ် မိူင် ဘော ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ။ 24 ဂေ ဒူအီ ခဲင် ဖိုင် ဇဝ် ယေဆူ ဂေ ဟဲ့ ဟွတ့် ထူမ် ဂြုဝ်း ပီ ခဲ ဂါယ်၊ ဂေ ဝီ ဘဲန် အူ နဝ်း၊ ဝီ စုး ဒီ ဆာခိုဝ်၊ ကာလာင် ဂြုဝ်း ဒီ ဇဝ်ဖြာ။ ဂေ တဝ်း၊ “အိုယ် မဲ ဇဝ်ဖြာ၊ မဲ မုး ဇဝ်ဖြာ အီ အိုပ် တူတ့်။ မဲ မိူဝ် ဟဲ့ ဖာန် ဘ့လေး ဘော ဂါင်ဟြာဝ် ဘော ကာဒါယ်။ မဲ ဟဲ့ ဖာန် ဘ့လေး ဘော အိုမ် နမ်မုက်ဆာရာ။ ခဲ့ ဘော မိုဝ်း အီ ကွယ် ဒဲင် ကာဒါယ် နီ၊ မဲ ဇဝ်ဖြာ ဟဲ့ ဘူင် တူတ့်။ 25 မဲ မိူဝ် ဟဲ့ ဒွိုမ် ဒွါ နဝ်း ဖွိုမ် မဲ ဒီ ခုန်ဒီခမ် အာဒါဝိတ် အီ မုး ဒဲစေန့် မဲ။ အန် ဘော မုး ဂုန့် ဒင် ယေ။ မဲ ဟဲ့ တဲး အန် တဝ်း၊

27 ဒေါ တီ နီ၊ န့ ဟဲ့ ဝီ ဘဲန် ပါယ် တီ။ ခုန်ဒီခမ် အာဟေရူတ် ဘော အာဖူန်ထီ ဖီလာတ်၊ ဘော ဂေ ဒူအီ အာမျုဝ် ဟဝ်၊ ဘော ဂေ ဒူအီ အီဆာရေလ ခဲင် မိူင် နီ၊ ဂေ ဟဲ့ တး ကာဇု၊ တဲး ဂေ ဘူင် နာ တူ မွှိုမ် ဒီ ဇဝ် ယေဆူ၊ အီ မုး ဒဲစေန့် မဲ၊ အီ ဟဲ့ ဘွတ် ကာဆဝ်၊ ဝီ ပီ ရဝ်း မဲ တဲး အန် ချွတ် ဒူအီ။ 28 ပဲ့ ဟဲ့ ဘူင် ဂေ၊ န့ ပီ ပီ ဒွိုမ် ကာလာင် မဲ ခါ အာတ့် ပီ ဒွိုမ် ခ့ဝါင် မဲ ဇဝ်ဖြာ တဲး န့ ဘဲန်။ 29 ဒေါ တီ နီ၊ မဲ ဇဝ်ဖြာ၊ တဲး မဲ ဝီ ယွတ် ခဲ့ ပီ ဘူင် ဂေ၊ မဲ ဝီ ထူမ် ဂြုဝ်း ကာဘျုဝ် ဂေ။ ယေ ဒဲစေန့် မဲ၊ ယေ မှာန့် ဒီ မဲ ဇဝ်ဖြာ၊ တဲး မဲ ဝီ ဒွါ ယေ မိုဝ်း နဝ်း ယ ဒီ ဝီ ကာလာင် ဂြုဝ်း မဲ ဒီ ဒူအီ ဟဝ်။ ကွဲ့ တဲး ယေ မိုဝ်း နဝ်း ယုဝ်။ 30 တဲး မဲ ဇဝ်ဖြာ မိူဝ် ဘျ ပွုန် မဲ၊ တဲး ဒူအီ ဆဝ် ဝီ ကဲန်၊ တဲး ယေ ပွိုန် ဒီ ဒိုဝ်း ပွုန် ဇဝ် ယေဆူ၊ ဘူင် နာ မွှိုမ် အာမ် ဘဲန် မျုဝ် ဘဲန် မျုဝ်၊ တဲး အီ နပ် လွင် ဇဝ် ယေဆူ အီ မုး ဒဲစေန့် ဘွတ် ပီ တိုယ် မဲ။”

31 ဒေါ မှာန့် ဂေ ပါယ် တီ၊ ဒူင် ကွယ် ဂေ တွိုန်၊ န့ ဘော ဒီယေန့် အူ ဇေန့်။ နဝ်း ဖွိုမ် ဇဝ်ဖြာ မိူဝ် တး လိုပ် နုဝ့် ခဲင် နဝ်း ဂေ ဒွန် အီ။ ဂေ ဝီ စုး ဒီ ကာလာင် ဂြုဝ်း ဇဝ်ဖြာ၊ အာဝ် ဟူ မိုဝ်း နဝ်း ယုဝ် မာဆေ။

32 ဂေ ဒူအီ အီ ညှိုမ် ဇဝ် ယေဆူ၊ ဂေ ဘောကာဂ့လျီတ် ကွယ် ရိုမ်။ ဂေ ဘဲန် အူ နဝ်း။ ခဲ့ မိုဝ်း ဂေ ကြုဝ်ကြာမ်၊ ဂေ ဝီ လာယ် ကာဆာင် ဒီ ဂေ ဒွန် အီ။ န့ မိူဝ် တူ မိုဝ်း အာဆေ အီ မာတ် န့ မုး ကြုဝ်ကြာမ် ဒုဝ် ဘြိမ် အန်။ 33 ဂေ ဒူအီ ပီ ရဝ်း ပီ တိုယ် ဇဝ် ယေဆူ၊ ဂေ မိူဝ် ကာလာင် ဂြုဝ်း အီ မိုဝ်း ပွုန် တာင် ဒီ ဒူအီ ဟဝ်။ ဂေ ကာလာင် ခဲ့ ပီ ဒွိုမ် ယိုဝ် ဂေ လွင် ဇဝ် ယေဆူ ဟဲ့ ဝီ ယိတ့် ဝီ အိမ်။ ဇဝ်ဖြာ မိူဝ် ကာဝေ ဂေ၊ စွယ် ဂေ ဒွန် အီ။ 34 ကာတဲ ဂေ ဒူအီ အီ ညှိုမ် ဇဝ် ယေဆူ၊ အာဝ် မိုဝ်း ဒူအီ ဂိန်။ အာဆေ မိုဝ်း ကာင် ဘော မာန်၊ အန် ယွင့် တူတ့်။ 35 ခဲ့ ပွိုန် အန် ရွိုန်၊ အန် ဝီ ဒွါ ဒီ ဒူအီ ပီ ရဝ်း ပီ တိုယ် ဇဝ် ယေဆူ၊ တဲး ဂေ ဝီ ကာဆာင် ခဲ့ ပီ လုဝ် ဒွန် အီ။

36 န့ ဘော မိုဝ်း အာယုဝ်ဆဲပ်၊ ဂေ ဒူအီ ပီ ရဝ်း ပီ တိုယ် ဇဝ် ယေဆူ၊ ဂေ မိူဝ် တဲး အန် စိူဝ် ဘော အာဘာနာဘ။ (ဆီဖဝ် စိူဝ် တီ၊ န့ မုး “ဂွန် အီ နပ် ဒီ လှဝ် နဝ်း အီ ဟဝ်”)။ ဒူအီ တီ၊ အန် မုး ခြိုဝ် အာလေဝီ အူ ဝီ။ မိူင် ဘြိမ် အန် မုး ဂုန် အိုမ် အီ စိူဝ် ခူဖြုဝ်။ 37 ဘော အန် ယွင့် မာန် အန်၊ ဒွါ ရွိုန် ပီ ပွိုန် အန် ဒီ ဒူအီ ပီ ရဝ်း ပီ တိုယ် ဇဝ် ယေဆူ။