1 န့ ဝီ မိုဝ်း ဒူအီ အူ ဝီ၊ အန် စိူဝ် အာနာနီ။ အီဘိုန့် အန် စိူဝ် နာင် ဆာဖီရာ။ ဒူအီ ဝီ တီ မိူဝ် ဝီ ယွင့် မာန် အန် အူ ပ့လုဝ့်။ ခဲ့ ပွိုန် အန် ရွိုန်၊ အန် ဝီ အုန် မင် ကာလဝ့် အာဒါ အန်။ 2 အီဘိုန့် အန် မိူဝ် နပ် တူတ့် လွင် အန် တီ။ ဟဲ့ ဟွတ့်၊ အန် ဝီ ဒိုဝ်း ရွိုန် အီ ကာလူယ်၊ ဝီ ဒွါ ဒီ ဒူအီ ပီ ရဝ်း ပီ တိုယ် ဇဝ် ယေဆူ။

3 အာပေတာရူ ဝီ တဝ်း၊ “အိုယ်၊ အာနာနီ၊ မှဝ် န့ ပါယ် ပီ ခ့ဝါင် မဲ ဘုဝ် ကာနမ် အီ စိူဝ် ဆာတာန် ပွိုန် ဒီ လိုပ် ခဲင် နဝ်း မဲ၊ တဲး မဲ ကာလုဝ် ဒီ နဝ်း ဖွိုမ် ဇဝ်ဖြာ။း မဲ ဟဲ့ ဟွတ့် ဒိုဝ်း အုန် ရွိုန် ပီ ပွိုန် မဲ၊ ယီ တဝ်း၊ မဲ ဟဲ့ ဒွါ တူတ့်။ 4 အာတ့် ယွင့် မဲ မာန် တီ၊ န့ မုး ကြုဝ် မဲ။ မဲ ဟဲ့ ဟွတ့် ယွင့်၊ ရွိုန် ပီ ပွိုန် မဲ၊ န့ ဘော မုး ရွိုန် မဲ။ မဲ ဆ ဒွါ တူတ့် ဟဲ့ ပွိုန်။ မှဝ် န့ ပါယ် ပီ ကာလုဝ် မဲ ပါယ် တီ။း မဲ တူ ကာလုဝ် ဒူအီ။ မဲ ဟဲ့ ကာလုဝ် ဇဝ်ဖြာ။”

5 ဒေါ ယိုဝ် အာနာနီ ဂြုဝ်း တီ၊ အန် ဝီ ကေး ယမ် အူ ဇေန့်။ ပန် တီ ဂေ ဒူအီ အီ ယိုဝ် လွင် အန် တီ၊ ဂေ ဒွန် အီ ဝီ ယုဝ် ကာဆဝ်။ 6 ဂေ ကာညူမ် အီ ကွယ် ဒူင် ကွယ် ဂေ တီ၊ ဂေ ဝီ တး၊ ကာဘန် ဒုဝ် ဘူင့် အန် ခဲင် ဘိက်၊ ဝီ ကာဂွတ် ဟာဝ် ဒိပ် အန်။

7 ဝါယ် အန် တီ ဘော နုဝ့် အူယ် နာရီ၊ အီဘိုန့် အာနာနီ ဝီ တး လိုပ် ဒူင် ကွယ် ဂေ။ အန် ညှမ် နပ် လွင် အီမာယ် အန် ဟဲ့ ယမ်။ 8 အာပေတာရူ ဝီ ဒီမွှတ် အန် တဝ်း၊ “တဲး မဲ ကာလာင် ဂြုဝ်း မှာန် ဒီ အုဝ်။ ဒေါ ယွင့် ဘာယ် မာန် ဘာယ်၊ န့ မှာန်၊ ဘာယ် ဟဲ့ ပွိုန် ရွိုန် ခဲ့ ပီ ဒွါ ဘာယ် ဒီ နီ။း”

နာင် ဆာဖီရာ ဝီ တဝ်း၊ “ဟဲ့ မုး၊ ဟဲ့ မှာန်။ ယာယ် ဟဲ့ ပွိုန် ခဲ့ တီ။”

9 ပန် တီ အာပေတာရူ ဝီ တဝ်း ဒီ အန်၊ “မှဝ် န့ ပါယ် ပီ လာယ် ဖြူမ် ဘာယ် ဒီ ထေဝ် နဝ်း ဖွိုမ် ဇဝ်ဖြာ။း တဲး မဲ ယွတ်။ ဂေ ဒူအီ အီ ဟဲ့ ဟွတ့် ဒိပ် ဒုဝ် ဘူင့် အီမာယ် မဲ၊ ဂေ ဟဲ့ ဟွတ့် ဝီ တး ဇမ် ဒီ အာတ့် မာလုဝ်း။ ဂေ ဒီ ဝီ ဟာဝ် ဒိပ် ဘော ဒုဝ် ဘူင့် မဲ ဒေါ တီ နီ။”

10 အာပေတာရူ ဟဲ့ ဟွတ့် ကာလာင် ဂြုဝ်း တီ၊ နာင် ဆာဖီရာ တွိုန် ဝီ ကေး ယမ် ဒီ အာတ့် အန် အူ ဇေန့်။ ပန် တီ ဂေ ကာညူမ် ဝီ တး လိုပ် ဒူင် ကွယ် ဂေ တီ။ ဒေါ ယိုဝ် ဂေ ဘော နာင် ဆာဖီရာ ဟဲ့ ဟွတ့် ယမ်၊ ဂေ ဝီ ကာဂွတ် လေး အန် ဒူင် တီ၊ ဝီ ဟာဝ် ဒိပ် ဒုဝ် ဘူင့် အန် ခူပ် အီမာယ် အန်။ 11 ဂေ ဒူအီ အီ လိုပ် ဖိုင် ဇဝ် ယေဆူ၊ ဂေ ဒွန် အီ အီ နပ် လွင် အန် တီ ဘော ယုဝ် ကာဆဝ်။

12 ဂေ ဒူအီ ပီ ရဝ်း ပီ တိုယ် ဇဝ် ယေဆူ၊ ဂေ ဘူင် နာ မွှိုမ် အာမ် ကာဆဝ် ကာတဲ ဂေ ဒူအီ ကိူန်၊ တဲး ဂေ ဘောကာဂ့လျီတ် ယိုဝ် ပွုန် ဇဝ်ဖြာ။ ဂေ ဒူအီ ညှိုမ် ဇဝ် ယေဆူ၊ ဂေ တး ကာဇု ခဲင် ဇေရူပ် တာင် အီ ကွယ် ခဲင် ဝဲင် ဟုဝ် ဇဝ်ဖြာ အီ စိူဝ် ဇေရူပ် ခုန်ဒီခမ် အာဆာလုဝ်မုဝ်။ ဂေ မိူဝ် ဘဲန် အူ နဝ်း။ 13 ဂေ ဒူအီ ဟဝ် တူ ယ တး လိုပ် ခဲင် ဖိုင် ဇဝ် ယေဆူ။ ဂေ ယီ ရုဝ်ဆေ ဂေ ဒူအီ အီ ညှိုမ် ဇဝ် ယေဆူ။ 14 ပီ ဘော ဟဲ့ ပါယ် တီ မိူဝ်၊ ဂေ ဒူအီ ညှိုမ် ဆီချာ ဇဝ် ယေဆူ ယီ ကြဲ ဒီ ကိူန်။ ဘော မိုဝ်း ဘော အီမာယ် ဘော အီဘိုန့်၊ ဂေ ကိူန် ဝီ ဟာ လိုပ် ခဲင် ဖိုင် ဂေ ဒူအီ ညှိုမ် ဇဝ် ယေဆူ။ 15 ဂေ ဒူအီ ကိူန် ဝီ ဒိုဝ်း လေး ဒူအီ ဆဝ် ခဲင် ကာင်၊ ဝီ ဟာဝ် ဘ့လေး ဂေ ခူပ် န့တေန့် ဒဲင် ကာစှူင့် အိတ် ဂေ ဘော ဒဲင် မ့ဘေ၀်၊ တဲး ဂေ နှဝ့် အာပေတာရူ တး၊ တဲး ကာမိုက် အန် ဝီ ယာပ် ဒူအီ ဆဝ် ဂေ တီ။ 16 ဘော မိုဝ်း ဂေ ဒူအီ ကိူန် အီ ကွယ် ကာတတ် မိူင် ယေရူဆာလဲမ်၊ ဂေ တး တိုယ် ဒူအီ ဆဝ် ဘော ဂေ ဒူအီ မိုဝ်း ကာနမ် ဟာယ် ကွယ် ခဲင် ဒုဝ် ဘူင့် ဂေ။ ဂေ မိူဝ် ဟဲ့ ကဲန် ဒွန် အီ။

17 ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ ဘော ဂေ ဒူအီ ဒူပ် အန် ဘော ဂေ ဒူအီ အီ မုး ဖိုင် ဆာဒူခဲ၊ ဂေ ယီ တူ အိုင် နာ မွှိုမ် အာမ် ကာဆဝ် ပီ ဘူင် ဂေ ဒူအီ ပီ ရဝ်း ပီ တိုယ် ဇဝ် ယေဆူ။ 18 ဂေ ဝီ မှေတ့် ဂေ ဒူအီ ပီ ရဝ်း ပီ တိုယ် ဇဝ် ယေဆူ၊ ခြွင့် ဂေ ခဲင် ကာပိုမ်။ 19 ခဲင် မှိုဝ် န့ ယီ မိုဝ်း အာမူ အာမာတ် ဇဝ်ဖြာ အူ ကာဒင် တး၊ ဝိုဝ်း မာလုဝ်း ခဲင် ကာပိုမ်၊ တဲး ဂေ လေး။ 20 အန် ဝီ တဝ်း ဒီ ဂေ၊ “တဲး ဘေ ဟာဝ် ခဲင် ဟုဝ် ဇဝ်ဖြာ၊ ကာလာင် တဲး ဂေ ထူမ် တူတ့် ဒွန် မျုဝ် လွင် ပီ ဒီ ပါယ် ဂေ ဒီ ပွိုန် အာဆာက် ကာမာယ်။”

21 ဝါယ် အန် တီ ဆိန့်ဝး စေဝ် ဂေ ဝီ ထူမ် ဘူင် ပီ စ်ု အာမူ အာမာတ် ဇဝ်ဖြာ ဂေ ဘူင်။ ဂေ ဝီ ဟာဝ် လိုပ် ခဲင် ဝဲင် ဟုဝ် ဇဝ်ဖြာ၊ မာနုဝ် ဂေ ဒူအီ ကိူန်။

ဝါယ် အန် တီ ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ ဘော ဂေ ဒူအီ အီ ဒူပ် အန်၊ ဂေ ဝီ တး ကာဇု ဒူင် ကွယ် ဂေ ဒါ တာင်။ ဂေ ဝီ ဒဲ့ ဂေ ဒူအီ အီ ဆုင်ဖျာတ် အာမူ အီ ဘော ဂေ ဒါ တာင် ခဲင် မိူင် အီဆာရေလ၊ တဲး ဂေ ဒွန် အီ တး။ ဂေ ဘော စ်ု ဒါလာမ် ဂေ မင် အီ၊ တဲး ဂေ ဟာဝ် ဒဲ့ ဒူအီ ပီ မှေတ့် ဂေ တွိုန်။ 22 ဒေါ တး ဇမ် ဂေ ခဲင် ကာပိုမ်၊ ဂေ တူ ယိုဝ် ဒူအီ ပီ ရဝ်း ပီ တိုယ် ဇဝ် ယေဆူ ဂေ တွိုန်။ အာဝ် ဟူ မိုဝ်း။ ပန် တီ ဂေ ဝီ ဝေန့် ဒူင် ကွယ် ဂေ ဒါ တာင် တွိုန်၊ ကာလာင် တူတ့် ဒီ ဂေ လွင် အန် တီ။ 23 ဂေ တဝ်း၊ “ယေ ဟဲ့ တး ဇမ် ခဲင် ကာပိုမ်။ မာလုဝ်း ဆီ ကာဘိတ် ဆီချာ။ ဂေ ဒူအီ ဘ်ု မာလုဝ်း၊ ဂေ မိူဝ် ကွယ် ဆီချာ နာ အာတ့် မာလုဝ်း။ ယေ ဝီ ဟာဝ် ဝိုဝ်း မာလုဝ်း၊ အာဝ် ဟူ ယိုဝ် အာဆေ ကွယ် နာ ခဲင်။” 24 ဒေါ ယိုဝ် ဂေ လွင် အန် တီ၊ ဘော ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဒူအီ အီ အိုပ် ဂေ အီ ဘ်ု ဟုဝ် ဇဝ်ဖြာ၊ ဂေ ဒွန် အီ တူ နပ် ဒီ ဘူင် မာဆေ။ ဂေ ဘော ယုဝ်၊ တူ နပ်၊ မှဝ် န့ ပါယ် န့ ဘဲန် ပါယ် တီ။

25 ဒေါ အန် တီ န့ ဝီ မိုဝ်း ဒူအီ အူ ဝီ၊ အန် တး တဝ်း၊ “ဂေ ဒူအီ ပီ ခြွင့် ဘေ ခဲင် ကာပိုမ်၊ ဂေ ဝီ ကွယ် ခဲင် ဝဲင် ဟုဝ် ဇဝ်ဖြာ၊ မာနုဝ် ဂေ ဒူအီ ကိူန်။” 26 ပန် တီ ဒူအီ အီ အိုပ် ဂေ အီ ဘ်ု ဟုဝ် ဇဝ်ဖြာ ဘော ဂေ ဒူအီ အီ စွယ် အန်၊ ဂေ ဝီ ဟာဝ် ဒဲ့ ဂေ ဒူအီ ပီ ရဝ်း ပီ တိုယ် ဇဝ် ယေဆူ တး ဇမ် ဒူင် ကွယ် ဒါ တာင် ဂေ တွိုန်။ ဂေ ယီ တူ ယ ကာစွှာ့ ဒူအီ ပီ ရဝ်း ပီ တိုယ် ဇဝ် ယေဆူ ဂေ တီ။ ဂေ ယုဝ် ဒူအီ ကိူန် ဒီ ဒိုဝ်း မာဝ် ဝိုန့် ဒီ ဂေ။

27 ဂေ ဒူအီ ပီ ရဝ်း ပီ တိုယ် ဇဝ် ယေဆူ ဂေ တွိုန်၊ ဂေ ဟဲ့ ဟွတ့် တး ဇမ် ဒီ အာတ့် ဂေ ဒါ တာင် ခဲင် မိူင်၊ န့ မုး ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ၊ အန် ဝီ ဒီမွှတ် ဂေ။ 28 အန် တဝ်း၊ “ယေ ဟဲ့ ဟွတ့် ဒမ် ဘေ၊ ကွဲ့ တဲး ဘေ မာနုဝ် ဒူအီ ဟဝ် လွင် အာယေဆူ တွိုန်။ ဘေ ယီ ဟဲ့ ဟွတ့် ကာလာင် တဲး မိူင် ယေရူဆာလဲမ် ဘော မိူင် နပ် လွင် အန် တီ။ ဘေ မိူဝ် တဝ်း န့ မုး မှာပ် ယေ၊ ယေ ဟဲ့ ငဝ်း ဝဲန် အန်။”

29 အာပေတာရူ ဘော ဂေ ဒူအီ ပီ ရဝ်း ပီ တိုယ် ဇဝ် ယေဆူ၊ ဂေ ဝီ ဝျီ့ ဂြုဝ်း တီ။ ဂေ တဝ်း၊ “ယေ လုဝ် ထူမ် ဂြုဝ်း ဇဝ်ဖြာ အာတ့် ထူမ် ဂြုဝ်း ဒူအီ။ 30 ဘေ ဟဲ့ ငဝ်း ဝဲန် ဇဝ် ယေဆူ ဒဲင် ရွင့် ကာဝဲ့။ ဇဝ်ဖြာ ပီ ကြိုပ် ဂေ ဂုန့် ဒင် အေ ခါ အာတ့် အန် ယီ ဟဲ့ တဲး ဇဝ် ယေဆူ ဝီ ယိတ့် ဝီ အိမ်၊ တဲး ဇဝ် ယေဆူ ဝီ ဟုဝ့် ကွယ် ဘ့လာက် အာအး အန်။ 31 အန် မိူဝ် ဟဲ့ တဲး ဇဝ် ယေဆူ ဘဲန် ဒါ ကာညာ အီ အိုပ် ကာဒါယ်။ အန် ဘော ဘဲန် ဇဝ် အီ ချွတ် ဒူအီ။ ဇဝ် ယေဆူ တီ ဘော နပ် ဒီ တဲး ဘေ ဝဲန် နဝ်း ဘြိမ် ဘေ၊ ဒိုဝ်း နဝ်း ကာမာယ် ပီ ဒွါ အန်။ အန် နပ် ဘော ဒီ ဂဝ်း ဝဲန် မှာပ် ဘေ ဒူအီ အီဆာရေလ။ 32 ယေ မိူဝ် ဟဲ့ ယိုဝ် တူတ့် လွင် အန် တီ၊ ယေ ကော နပ် ဒီ ကာလာင်။ နဝ်း ဖွိုမ် ဇဝ်ဖြာ မိူဝ် နပ် ဒီ ကာလာင်၊ တဲး န့ ကာလှုး ဒီ နဝ်း ဘေ။ ဇဝ်ဖြာ ယီ ဒီ တဲး နဝ်း ဖွိုမ် အန် လိုပ် ကွယ် ခဲင် နဝ်း ဒွန် အီ အီ ထူမ် ဒူပ် အန်။”

33 ဒေါ ယိုဝ် ဂေ ဒါ တာင် ဂြုဝ်း တီ၊ ဂေ ဘော ရူ ကာဆဝ်၊ ဆီ ငဝ်း ဝဲန် ဂေ။ 34 န့ ယီ မိုဝ်း ဒူအီ ခဲင် ဖိုင် ဖာရီဆဲ အူ ဝီ၊ အန် စိူဝ် အာဂါမာလေန်။ အန် မုး ဒါ ဆာရာ အီ မာနုဝ် ဒါရာ ဇဝ်ဖြာ။ ဂေ ဒူအီ ဘောကာဂ့လျီတ်၊ ဂေ ဘော ရုဝ်ဆေ အန်။ ဒေါ လာယ် ဆင်ချာင် ဂေ ဒါ တာင် ပါယ် တီ၊ အာဂါမာလေန် တွိုန် ဝီ ယိတ့် မှာန့်၊ တဲး ဂေ စ်ု ဒူအီ ပီ ရဝ်း ပီ တိုယ် ဇဝ် ယေဆူ လေး ဒူင် ကွယ် ဂေ အူ ကာစန်။ 35 ဟဲ့ ဟွတ့်၊ အန် ဝီ ကာလာင် ဒီ ဂေ ဒါ တာင်။ အန် တဝ်း၊ “အိုယ်၊ ဘေ ဒါ တာင် ခဲင် မိူင် အီဆာရေလ၊ တဲး ဘေ ဇေန့်ဇာ ဆီချာ ပီ ဒီ ဘူင် ဘေ ဒီ ဂေ ဒူအီ တီ။ 36 ခါ အာတ့် န့ ညှမ် လှေန့်၊ န့ မိုဝ်း ဒူအီ အူ ဝီ၊ အန် စိူဝ် အာထေဒါ။ အန် ဟဲ့ တဝ်း၊ အန် မုး ဒူအီ တာင်။ အန် မိူဝ် ဒဲ့ ဒူအီ ဒူပ် အန်၊ တဲး ဂေ ကာဂုဝ်း ဒီ ဒူအီ ရုဝ်မာ။ န့ မိူဝ် မိုဝ်း ဒူအီ ကာဘက် ဖွုန် မာယဝ်း ဝီ၊ အီ တး ဒူပ် အန်။ ဂေ ယီ ငဝ်း အာဆာက် အန်။ ဟဲ့ ဟွတ့်၊ ဘော ဂေ ဒူအီ အီ ဒူပ် အန် ဟဲ့ ကာယဝ်း၊ အာဝ် ဟူ မိုဝ်း။ 37 ဝါယ် အန် တီ န့ မိုဝ်း အာယူဒတ် တွိုန်၊ အီ တး အိူင် ဂါလီလေ။ အန် ဟဲ့ တး ဒေါ ဒိုဝ်း ဒါ ကာညာ ရုဝ်မာ ဇာရာင်၊ ဒဲမ် အုန် စိူဝ် ဒွန် အီ ခဲင် မိူင်။ အန် မိူဝ် ဒဲ့ ဒူအီ ဒူပ် အန်။ ဂေ ဟဲ့ ငဝ်း ဘော အန်။ ဘော ဂေ ဒူအီ အီ ဒူပ် အန် ဟဲ့ ကာယဝ်း၊ အာဝ် ဟူ မိုဝ်း။ 38 ခုဝ် အန် တီ ဒေါ တီ နီ၊ အုဝ် တဝ်း ဒီ ဘေ၊ ကွဲ့ ဘူင် မာဆေ ဒီ ဒူအီ ဂေ တီ။ တဲး ဘေ ဘ့လေး ဂေ၊ တဲး ဂေ ဟာဝ်၊ ဘူင် ပီ အိုင် ဂေ။ ပီ ဘူင် ဂေ၊ ဆေ န့ မုး အာငျာန် ဒူအီ၊ န့ ဒီ စှိုမ်။ 39 ဆေ န့ ယီ မုး ပွုန် ဇဝ်ဖြာ၊ တဲး ဂေ ဘူင် ပါယ် တီ၊ ဘေ တူ ပဲ ဒီ ဘူင် မာဆေ၊ တဲး ဂေ စှိုမ်။ ဘေ ယီ လုဝ် ဆာဒိက်၊ ကွဲ့ တဲး ဘေ ကာဂုဝ်း ဒီ ဇဝ်ဖြာ။”

40 အန် ဟဲ့ ဟွတ့် ကာလာင် ဂြုဝ်း တီ၊ ဂေ ဒါ တာင် တွိုန် ဝီ လာယ် ဖြူမ် လွင် အန် တီ။ ဂေ ဝီ ဒဲ့ ဂေ ဒူအီ ပီ ရဝ်း ပီ တိုယ် ဇဝ် ယေဆူ ဝီ တး လိုပ် ဒူင် ကွယ် ဂေ ဘော မး ဂေ ဒွန် အီ။ ဟဲ့ ဟွတ့်၊ ဒါ တာင် ဂေ တီ ဝီ ဒမ် ဂေ၊ ကွဲ့ တဲး ဂေ ကာလာင် ဂြုဝ်း လွင် ဇဝ် ယေဆူ။ ဝါယ် အန် တီ ဒါ တာင် ဂေ တွိုန် ဘော ဝီ ဘ့လေး၊ တဲး ဂေ ဟာဝ်။

41 ဂေ ဒူအီ ပီ ရဝ်း ပီ တိုယ် ဇဝ် ယေဆူ၊ ဂေ ဝီ လေး ဒူင် ကွယ် ဂေ ဒါ တာင် အီ အိုပ် မိူင်။ နဝ်း ဂေ ဝီ ဒါခိုယ် ကာဆဝ်။ ဂေ တဝ်း၊ ဇဝ်ဖြာ ဟဲ့ ခ့ဝါင်၊ တဲး ဂေ ပွိုန် ဒီ ခမ် ဒုက် ကူပ် ညှိုမ် ဂေ ဇဝ် ယေဆူ။

42 ဝါယ် အန် တီ ဒွန် ဆီငဲ၊ ဒွန် ဆီငဲ၊ ဂေ ဝီ ဟာဝ် လိုပ် ခဲင် ဝဲင် ဟုဝ် ဇဝ်ဖြာ၊ ဂေ ဘော ဟာဝ် လိုပ် ခဲင် ကာင် အီ၊ ဝီ ကာလာင် လွင် ဇဝ် ယေဆူ။ ဂေ ကာလာင် ဆေဆေ တဲး ဒွန် အီ ကော နပ် လွင် ဇဝ် ယေဆူ မုး ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။