1 ဝါယ် အန် တီ ဂေ ဒီဘဲ ဇဝ် ယေဆူ မိူဝ် ဟဲ့ ကြဲ ဒီ ကိူန် ကာဆဝ်။ န့ ယီ မိုဝ်း ဒူအီ အာယူဒါ အီ ကာလာင် ဂြုဝ်း ဂြိက် မင် အီ ဘော ဂေ ဒူအီ အာယူဒါ အီ ကာလာင် ဂြုဝ်း ဟဲဘြဲ မင် အီ၊ ဂေ တူ လာယ် ဖြူမ်။ ဂေ ဒူအီ တး မိူင် ဂြိက်၊ ဂေ တဝ်း၊ “ဒွန် ဆီငဲ၊ ဒေါ ကာဆာင် ဂေ ပီ ဒီ ဟူမ်၊ ယာ ဆီပြး ယေ၊ ဂေ တူ ပွိုန် ခဲ့ ပီ လုဝ် ဂေ။” 2 ပန် တီ ဂေ ဒီဘဲ ဇဝ် ယေဆူ ဂိုဝ် ဒီ အာ ဝီ၊ ဂေ ဝီ ဒဲ့ ဂေ ဒီဘဲ ဇဝ် ယေဆူ ဒွန် အီ တး ကာဇု။ ဂေ ဝီ တဝ်း၊ “ဆေ ယေ ကာဆာင် ပီ ဒီ ဟူမ်၊ ယေ အာဝ် ဟူ ဝီ ဒန် မာနုဝ် ဒါရာ ဇဝ်ဖြာ။ အာတီ အာဝ် မွှိုမ်၊ အာဝ် ဆီချာ။ 3 ခုဝ် အန် တီ တဲး ဘေ ဘီနွင် ရဝ်း ဒူအီ ကာတဲ ဘေ ဘူ ဝီ။ တဲး န့ မုး ဒူအီ အီ မိုဝ်း အာငျာန်၊ အီ မိုဝ်း နဝ်း ဖွိုမ် ဇဝ်ဖြာ နုဝ့် ခဲင် နဝ်း ဂေ။ ဆေ ဒူအီ ဟဝ် မိူဝ် တဝ်း၊ ဂေ မုး ဒူအီ မွှိုမ်၊ တဲး ဘေ ရဝ်း ဒူအီ ဇိုဝ် တီ ဘူ ဝီ၊ တဲး ယေ ဝီ စ်ု ဂေ ကာဆာင် ပီ ဒီ ဟူမ် ဒီ ဒွန် အီ။ 4 ဆေ န့ ပါယ် တီ၊ ယေ ဒီ ဘော ဒန် ဒီ ဆာခိုဝ် ဒီ ဇဝ်ဖြာ ဘော ဟုဝ် ဒါရာ ဇဝ်ဖြာ ဆေဆေ၊ အာဝ် ဟူ လုဝ် ဘူင် ဘဲန် မျုဝ် ဘဲန် မျုဝ်။”

5 ဂေ ဟဲ့ ဟွတ့် ကာလာင် ဂြုဝ်း တီ၊ ဂေ ဒူအီ ခဲင် ဖိုင် ဇဝ် ယေဆူ၊ ဂေ ဒွန် အီ အိုင် ဂြုဝ်း တီ။ ဂေ ဝီ ရဝ်း အာဆာထေဖာန်။ နဝ်း ဖွိုမ် ဇဝ်ဖြာ ဟဲ့ နုဝ့် ခဲင် နဝ်း အန်။ အန် မိူဝ် ညှိုမ် ဆီချာ။ ဂေ ဘော ရဝ်း အာဖီလိပ်၊ အာဖြုဝ်ခုဝ်ရူ၊ အာနီခါနုဝ်၊ အာထီမူန်၊ အာဖာမေန် ဘော အာနီခုဝ်လာ၊ အီ တး မိူင် အန်ထီအုဝ့်၊ အီ ဟဲ့ လိုပ် ဒူအီ အာယူဒါ။ 6 ဂေ ဟဲ့ ဟွတ့် ရဝ်း ဒူအီ ဘူ ဝီ တီ၊ ဂေ ဝီ တဲး ဂေ ဒူအီ ပီ ရဝ်း ပီ တိုယ် ဇဝ် ယေဆူ ဝီ ဆာခိုဝ် ဇဝ်ဖြာ ဘော ဒါင် ဒဲ ဒဲင် ဂိန့် ဂေ ဘူ ဝီ တီ၊ တဲး ဇဝ်ဖြာ မွင့်ကာရာ ဒွါ ဒီ ဂေ။ 7 ပန် တီ ဂေ ဒူအီ အီ ကွယ် ခဲင် မိူင် ယေရူဆာလဲမ်၊ ဂေ ကိူန် ဘော ပွိုန် ဒီ ထူမ် ဂြုဝ်း ဇဝ်ဖြာ၊ တဲး ဂေ ဒူအီ ညှိုမ် ဇဝ် ယေဆူ ဝဲ ကိူန် ကာပွါ။ ဂေ ဒူအီ အီ လှူ ဒီ ဇဝ်ဖြာ မိူဝ်၊ ဂေ ကိူန် ဝီ ညှိုမ် ဇဝ် ယေဆူ၊ ဝီ ဒူပ် ဒါရာ ပီ မာနုဝ် ဂေ လွင် ဇဝ် ယေဆူ။

8 န့ ယီ မိုဝ်း အာဆာထေဖာန် တွိုန်၊ ဇဝ်ဖြာ ဟဲ့ ကာဝေ ဟဲ့ စွယ် ကိူန် အန် ဘော တဲး အန် မိုဝ်း ပွုန် ဇဝ်ဖြာ။ အန် ဘူင် နာ မွှိုမ် အာမ် ကာဆဝ် ဘဲန် မျုဝ် ဘဲန် မျုဝ်။ 9 ဂေ ဒူအီ အီ ကွယ် ခဲင် ဇူင် ယူဒါ မင် အီ၊ ဂေ တူ အိုင် အန်။ ဘော ဒူအီ ခဲင် ဖိုင် ဒူအီ ထင်ဟာင်၊ ဂေ ကြိုပ် ခဲင် ဇူင် တီ။ ဂေ ဒူအီ ဇိုဝ် တီ၊ ဘော ဂေ ဒူအီ အီ တး မိူင် ကူရေန့် ဂါယ် မိူင် အာလေဆန်ဒါရေန် ဘော ဂေ အီ တး အိူင် ခီလီခီ ဂါယ် အိူင် အာဆီယာ၊ ဂေ ဘော ဟာဝ် ဒူင် ကွယ် အာဆာထေဖာန်။ ဂေ ဘော ကာလာင် ဂြုဝ်း အီ လာယ် ကာဘး ဒီ အန်။ 10 အန် ဘော ဝျီ့ ဂြုဝ်း ဂေ၊ တဲး န့ လေး ခဲင် အာငျာန် ပီ ဒွါ ဇဝ်ဖြာ ဒီ အန်။ ပန် တီ ဂေ တူ ပဲ အန်။ ဂေ တူ ပွိုန် တဝ်း၊ အန် တူ မှာန်၊ တူ မုး။

11 ဝါယ် အန် တီ ဂေ ဝီ ပြာ ဒီ ဒဲ့ ဒူအီ မင် အီ၊ တဲး ဂေ ဝီ တဝ်း ဒီ အီ ဟဝ်၊ “ယေ ဟဲ့ ယိုဝ် အာဆာထေဖာန် ကာလာင် နာ စီစိဝ် လွင် ဇဝ်ဖြာ ဂါယ် အာမုဝ်ဆဲ။”

12 ဂေ ဘူင် ပါယ် တီ၊ တဲး ဘော ဂေ ဒါ တာင် ခဲင် မိူင် ဘော ဂေ ဒါ ဆာရာ အီ မာနုဝ် ဒါရာ ဇဝ်ဖြာ ကော ရူ ဒီ အန်၊ တဲး ဂေ ဒူအီ အာယူဒါ ဘောကာဂ့လျီတ် ဝီ ရူ ဒီ အန်။ ဂေ မိူဝ် တး မှေတ့် အန်၊ ဝီ တိုယ် အန် ဇမ် ဒီ အာတ့် ဂေ ဒါ တာင် အီ ဆုင်ဖျာတ် အာမူ အီ။

13 ဂေ မိူဝ် ဟဲ့ စ်ု ဒူအီ မင် အီ၊ တဲး ဂေ ကာလုဝ် တဝ်း၊ “ဒူအီ နီ၊ အန် ကာလာင် ဂြုဝ်း တူ မွှိုမ် လွင် ဟုဝ် ဇဝ်ဖြာ။ ဆေဆေ၊ အန် ဘော ကာလာင် နာ စီစိဝ် လွင် ဒါရာ ဇဝ်ဖြာ။ 14 ယေ မိူဝ် ဟဲ့ ယိုဝ် အန် တဝ်း၊ ‘အာယေဆူ အီ ဟဲ့ တး မိူင် နာဆာရေတ့် တွိုန်၊ အန် ဒီ ပျာတ့် ဟုဝ် ဇဝ်ဖြာ၊ တဲး န့ လိုဝ် တူတ့်။ အန် ဒီ ဘော ဘူင်၊ တဲး ဟိတ် ယေ ကော လိုဝ် ကော ဘျွင်။’”

15 ဂေ ဟဲ့ ဟွတ့် ကာလာင် ပါယ် တီ၊ ဂေ ဒါ တာင် ဘော ဂေ ဒွန် အီ ဘော ယွတ် ပီ ပါယ် အာရိုပ် အာဆာထေဖာန် တွိုန်။ ဂေ ဘော ယိုဝ် နာ အန် ဟဲ့ ဘ့လာင် ပီ နာ အာမူ အာမာတ် ဇဝ်ဖြာ။